1 ମି ଉଣ୍ତିଙ୍ଗ୍‌, ଲାଅଦିକିଆଦି ଲୋକୁ ମାରି ନାଙ୍ଗିଁ ନିଜେଦିଙ୍ଗ୍‌ ଚିନିସ୍‌କିଇ ମାନି ୱିଜୁ ଲୋକା ଉଣ୍ତିଙ୍ଗ୍‌ ନାନ୍‌ ଜେ ଏସା କାସ୍ଟୁପାଣି କିଜିନା, ଇକା ମିର୍‌ ନେସ୍‌ନିଦେର୍‌ ଇଜିନା ଇଚ୍ଛା । 2 ନା ଉଦେସ୍‍ ଇକା, ଏଣ୍ତେସ୍‌ ମିର୍‌ ୱିଜୁଲୋକୁ ୱେଡ଼ିକା ଆନିଦେର୍‌, ମାରି ୱାର୍‌ ନିଜେନିଜେଦି ୱାଲେ ଜିବନ୍‌ନୋନିମାନୁ ମିସାନିଦେର୍‌ ମାରି ସତ୍‌ତି ବୁଦି ପୟ୍‌ଜି ସତ୍‌ତିୱାଜା ୱିଜୁ ଦନ୍‌ତି ପୁରା ଅଦିକାରି ଆନିଦେର୍‌, ଇୟାଉଣ୍ତିଙ୍ଗ୍‌ ମିର୍‌ ୱିଜିଦେର୍‌ ନେସ୍‌ନିଦେର୍‌ ଜେ, କ୍ରିସ୍ତନେ ମାପୁରୁଦି ଆୟା ମାର୍‌ଗିତିମାନି ମାଟା । 3 ଜିସୁ କ୍ରିସ୍ତ ଆଜିନାନ୍‍ ଆୟା କୁସିକାଣ୍ତି, ଆମାକା ମାପୁରୁଦି ବୁଦି ମାରି ବୁଦିୱାଜା ୱିଜୁ ମାର୍‌ଗିତିମାନି ଦନ୍‌ତି ଗୁଦାମ୍‍ ରେନାନ୍‌ ।

4 ଏନ୍‌ ଏଣ୍ତେସ୍‌ ମିଙ୍ଗିଁ ସାଲାକିଦାନ୍‍ ବାଣ୍ତିସ୍‍ କିମାକିନ୍‌ । ଆୟାଉଣ୍ତିଙ୍ଗ୍‌ ନାନ୍‌ ଇକା ୱେର୍‌ସିନା । 5 ଇରିଙ୍ଗ୍‌ ନାନ୍‌ ମେନ୍ଦଲ୍‌ତାନ୍‌ ସିଲେତିଙ୍ଗ୍‌ ବା, ଆତ୍ମାଦାନ୍‌ ନାନ୍‌ ମି ୱାଲେ ମାନା । କ୍ରିସ୍ତଦି ମୁସ୍‌କୁ ଡାଟ୍‌ତାନ୍‌ ବିସ୍‌ବାସ୍‌ ଇଡ୍‌ଜି ମିର୍‌ ଏଣ୍ତେସ୍‌ ସାନ୍ତି ଆତିମାନିଦେର୍‌, ଆକା ସୁଡ଼ୁଜି ନାନ୍‌ ୱେଡ଼ିକା ଆଜିନା ।

6 ମାରି, କ୍ରିସ୍ତ ଜିସୁଙ୍ଗୁଁ ପ୍ରବୁ ୱାଜା ମାନାତିମାନିଦେର୍‌, ଆୟାଇସାବ୍‌ତାନ୍‌ ୱାନି ୱାଲେ ମିସାଜି ଜିଜି ମାଡ଼ିଦୁ, 7 ମି ୱେଲେଙ୍ଗ୍‍ ୱାନି ମୁସ୍‌କୁ ଡାଟ୍‌ତାନ୍‌ ତିଆର୍‌ କିଜ ଜିବନ୍‌ ତିଆର୍‌ କିଦୁ ମାରି ମିର୍‌ ପୟ୍‌ତିମାନି ସିକିୟା ଇସାବ୍‌ତାନ୍‌ ବିସ୍‌ବାସ୍‌ତୁ ନାଣ୍ତ ସାକ୍ତି ଆଦୁ । ମି ଜିବନ୍‌ ଦନ୍ୟବାଦ ସିନିମାନୁ ବର୍ତି ଆପିତ୍‌ । 8 ଜାଗାର୍‌ତା, ଏନ୍‌ ଏଣ୍ତେସ୍‌ ମିଙ୍ଗିଁ ଲୋକ୍‌ତି ବାୟାକିନିନାନି ବେକାର୍‌ତି ବୁଦିଦାନ୍‌ ବେମ୍‌ରି କିଏନ୍‌ । ଆୟାୱିଜୁ ବୁଦି କ୍ରିସ୍ତଦି ସିକିୟାଦାନ୍‌ ରେଏତ୍‌ ମାନାତ୍‌ । ଆକା ଲୋକା କୁଟୁମ୍‌ତାନ୍‌ ରିତିନିୟମ୍‌ତି ସିକିୟା ମାରି ସାରାଦୁନିଆ ମୁସ୍‌କୁ ସାସନ୍‌ କିଜିମାନି ଦୁବେଙ୍ଗ୍‌ଆଙ୍ଗାଁ ସାକ୍ତି ସିକିୟାଦି ପଲ୍‌ । 9 କେବଲ୍‌ ଲୋକାୱାଜା କ୍ରିସ୍ତଦିମାନୁ ନେଗି ଗୁଣ୍‍ ପୁରାବର୍ତି ତେବାତାମାନାତ୍‌ । 10 ୱାନି ୱାଲେ ମିସାତିମାନିଙ୍ଗ୍‌ ମିର୍‌ ଜିବନ୍‌ତୁ ପୁରାବର୍ତି ପୟ୍‌ତିମାନିଦେର୍‌ । ଆଇ ୱିଜୁ ସାକ୍ତି ମାରି ଅଦିକାର୍‌ ମୁସ୍‌କୁ କ୍ରିସ୍ତଦି ସାସନ୍‌ ନେ ପେରିକା ।

11 କ୍ରିସ୍ତଦି ୱାଲେ ମିସାଜିମାନି ଜିବନ୍‌ ନେ ମି ସୁନ୍ନତ ୱାଜା । ଇୟା ସୁନ୍ନତ ଲୋକ୍‌କିତିକା ଆଏତ୍‍, ଆକା କ୍ରିସ୍ତଦିମାଣୁକୁ ଆତାମାନାତ୍‌ । ଆକା ଲୋକ୍‌ତିଙ୍ଗ୍‌ ପାପ୍‌ବର୍ତିମାନି ମେନ୍ଦଲ୍‌ତି ୱିଜୁ ସାକ୍ତିଦାନ୍‌ ଡ଼ିସିସ୍‍ କିନାତ୍‌ । 12 ✝ଇରିଙ୍ଗ୍‌ ଡୁବନ୍‌ ଅତି ମାଣ୍‌କୁ ମିର୍‌ କ୍ରିସ୍ତଦି ୱାଲେ ମୁସାତିମାର୍‌ଇଦେର୍‌ ମାରି ଆମା ମାପୁରୁ ୱାନିଙ୍ଗ୍‌ ସାତିୱାରି ମାଣୁକୁ ନିକ୍‌ତାନ୍‌, ୱାନି ପାଣିକିତିମାନି ସାକ୍ତିଦାନ୍‌ ବିସ୍‌ବାସ୍‌ କିଜି କ୍ରିସ୍ତଦି ୱାଲେ ମିର୍‌ ବା ମାରିଡ଼େସିନିଙ୍ଗିଁତି ମାନିଦେର୍‌ । 13 ✝ମି ପାପ୍‌ ଉଣ୍ତିଙ୍ଗ୍‌ ମାରି ମିର୍‌ ନିୟମ୍‌ତାନ୍‌ ୱେର୍‌ଏ ଆଜି ଅଣଜିହୁଦି ମାନିଙ୍ଗ୍‌ ଉନ୍‌ଡ୍ରି ଦେବା ମିର୍‌ ଜିବନ୍‌ତାନ୍‌ ସାତି ମାର୍‌ଇଦେର୍‌; ମାତର୍‌ ମାପୁରୁ ଇଲେଇ କ୍ରିସ୍ତଦି ୱାଲେ ମିଙ୍ଗିଁ ବା ଜିବନ୍‌ କିତାମାନାନ୍‌; ମାପୁରୁ ମା ୱିଜୁ ପାପ୍‌ କେମା କିତାମାନାନ୍‌ । 14 ✝ୱାନ୍‌ ମା ବିରୁଦ୍‌ତାନ୍‌ ମାନି ନିୟମ୍‌ତି ଆକୁ ମାରି ଇୟାତାନି ନିତିନିୟମ୍‌ତିଙ୍ଗ୍‌ କ୍ରୁସକାଟ୍‌ତୁ ଡ଼ସି ମା ମାଣାନ୍‌କୁ ଆକ କିତାମାନାନ୍‌ । 15 ମାରି ଆୟା କ୍ରୁସକାଟ୍‌ ମୁସ୍‌କୁ କ୍ରିସ୍ତ ୱିଜୁ ରକମ୍‌ତି ସାକ୍ତି ମାରି ଅଦିକାର୍‍ତାନ୍‍ ନିଜେଦିଙ୍ଗ୍‌ ମୁକୁଡ଼ାତା ମାନାନ୍‌ ମାରି ୱାରିଙ୍ଗ୍ ଜଇଲ୍‌ତୁ ନିରିସି ନିଜେଦି ଜିଣାନି ସନି ସାରିଦୁ ଲୋକା ଆଗ୍‌ଡ଼ି ୱାରିଙ୍ଗ୍ ସେମାର୍‌ କିତାମାନାନ୍‌ ।

16 ✝ଏନ୍‌ ମି ଉଣିକା, ତିନିକା, ପବିତ୍ରଦିନ୍‍ ମାରି କଡ଼୍‍କିଲେଜୁ ପଣ୍ତୟ୍‍, ମାରି ରମ୍‌ନିଦିନ୍‌ ବିସୟ୍‌ତାନ୍‌ ଇନି ନିୟମ୍‌ ବିଚାର୍‌ କିମାକିର୍‌ । 17 ଆୟାୱିଜୁ କେବଲ ୱାଜିନିଦିନ୍‌ତୁ ଗଟାଦେଙ୍ଗ୍‌ ସୋଲ୍‌ସିମାନି ବିସୟ୍‌ତି ନିଡ଼ିଗା ୱାଜା; କ୍ରିସ୍ତନେ ୱିଜୁ ବିସୟ୍‌ତୁ ସତ୍‌ତିକାନ୍‌ । 18 ଆମାକାର୍‌ ବିସେସ୍‌ ସୁଣିକା ସାଲାକିଦି ସାନ୍ତି ମାରି ମୁସ୍‌କୁପୁର୍‌ତି ଦୁତ୍‌ ପୁଜା ମୁସ୍‌କୁ ଦିୟାନ୍‌ ସିଜି ନିଜେଦିଙ୍ଗ୍‌ ପେରିକାର୍‌ ଇନାର୍‌, ୱାରିଙ୍ଗ୍ ସୁଡ଼ୁଜି ମିର୍‌ ନିଜେଦିଙ୍ଗ୍‌ ଇସ୍ରିକାନ୍‌ ଇଜି ଅଡ଼୍‌ବିମାଟ୍‌ । ଇୟାୱାଜା ଲୋକୁ ନିଜେଦିଙ୍ଗ୍‌ ଲୋକା ବିସୟ୍‌ ସିନ୍ତାଦାନ୍‌ ବେକାର୍‌ତି ଗର୍ବଦାନ୍‌ କେଇନିକା ଆଜି ତେବାନାର୍‌ । 19 ✝ମେନ୍ଦଲ୍‌ତି ତାଲାଦି ୱାଜା କ୍ରିସ୍ତଦିମାଣୁକୁ ୱାର୍‌ ୱେର୍‌ଏ ଆତାମାନାର୍‌ । ତାନି ସାଲାକିନି ମେନ୍ଦଲ୍‍ୱିଜୁ ଗାଟିଙ୍ଗ୍‌ ମାରି ସିରେଙ୍ଗ୍‌ ମିରେଙ୍ଗ୍‌ ଦାନ୍‌ ନିଜେନିଜେଦି ୱାଲେ ମିସାଜି ମଟାଆନେ ମାରି ମେନ୍ଧଲ୍‍ ମାପୁରୁଦି ମାଟା ଇସାବ୍‌ତାନ୍‌ ପିରିଏନ୍‌ ।

20 ମିର୍‌ ଜଦି କ୍ରିସ୍ତଦି ୱାଲେ ସାତି ମାନିଦେର୍‌ ମାରି ଇୟା ଦୁନିଆଦି ସିକିୟାଦାନ୍‌ ମୁସ୍‌କୁ ସାସନ୍‌ କିଜିମାନି ସାକ୍ତିଆଙ୍ଗାଁ ମାଣ୍‌କୁ ମୁକୁଡ଼ାତିମାନିଦେର୍‌ । ଆର୍‌ତିଙ୍ଗ୍‌ ଏନ୍ଦା ମିର୍‌ ଦୁନିଆଦି ଲୋକା ୱାଜା ଜିବନ୍‌ କାଟେକିଜିନିଦେର୍‌ ? ଏନ୍ଦା ମିର୍‌ ଇୟାୱାଜା ରୀତିନିୟମ୍‌ ମାନାଜିନିଦେର୍‌, 21 "ଇକା ଆସ୍‌ମାଟ୍‌, ଆକା ଉଣୁମାଟ୍‌, ଆକା ମୁଟ୍‌ମାଟ୍‌ ?" 22 ଇୟାୱିଜୁ ବିସୟ୍‌ ୱିଜ୍‌ନିକା । ଇକା ବ୍ୟବ୍‌ହାର୍‌ ଆନି ଦାପେ ଦାପେ ଦାରାସିଲିକା ଆନାତ୍‌ । ଇୟାୱିଜୁ କେବଲ ଲୋକ୍‌ ତିଆର୍‌କିତି ନିୟମ୍‌ ମାରି ସିକିୟା । 23 ମାରିବା ମୁସ୍‌କୁପୁର୍‌ତି ଦୁତ୍‌ ପୁଜା, ସାଲାକିଦି ଦାର୍ମୁ ମାରି ଆତ୍ମାକାସ୍ଟୁ କିନି ଉଣ୍ତିଙ୍ଗ୍‌ ୱେର୍‌ସିମାନି ଇୟାୱିଜୁ ନିୟମ୍‌କୁ ନାଣ୍ତ ବୁଦିଦାନ୍‌ ନେସ୍‌ତାମାନା ଇଜି ଏତ୍‌ ୱାନାତ୍‌; ମାତର୍‌ ମେନ୍ଦଲ୍‌ତି ପାଣିଦିଙ୍ଗ୍‌ ନାସ୍ଟୁ କିନି ଉଣ୍ତିଙ୍ଗ୍‌ ଇୟାୱାନିକା ସାକ୍ତି ସିଲେତ୍‌ ।