1 ନାନୁ ନିଜେଦି ମନ୍‌ତୁ ମନ୍‌ତୁ ଇର୍ହା, "ରାଦୁ, ନାନୁ ଇଲେଇ ମିଙ୍ଗିଁ ୱେଡ଼ିକାଦାନ୍‌ ପରିକା କିନା; ଇୟା ଉଣ୍ତିଙ୍ଗ୍‌ ୱେଡ଼ିକା କିଦୁ; ମାରି ସୁଡ଼ୁଦୁ, ଆକା ବା ୱାର୍ହିକା ।" 2 ନାନୁ ସିକ୍‌ନି ବିସୟ୍‌ତାନ୍‌ ଇର୍ହା, "ଆକା ବାୟାଦିକା," ୱେଡ଼ିକାଦି ବିସୟ୍‌ତାନ୍‌ ଇର୍ହା, "ଆକା ଇନିକା କିନାତ୍‌ ?" 3 ନାନୁ ଏଣ୍ତେସ୍ ଅଙ୍ଗୁର୍‌ରସ୍‌ ଉଣୁଜି ମେନ୍ଦଲତିଙ୍ଗ୍‌ ୱେଡ଼ିକା କିନା ମାରି ବାଦଡ଼ ଆଡ୍‌ଗି ଲୋକ୍‌ତି ଜିନିମାଡ଼ିନିକା ଇନିକା କିତିଙ୍ଗ୍‌ ନେଗେତ୍‌, ଇକା ନେସ୍‍ତେଙ୍ଗ୍‌ ଆଟ୍‍ନି ସାନ୍ଦି ଏଣ୍ତେସ୍ ବୁଦିନେସ୍‌ଇକା ୱେଡ଼ା କିନା, ଇକା ମନ୍‌ତୁ ମନ୍‌ତୁ ଅଡ଼୍‌ବିତା, ଇୟା ବେଡ଼ାଦୁ ବା ନା ମନ୍‌ ବୁଦିଦାନ୍ ନାଙ୍ଗିଁ ସାରି ତର୍‍ସି ମାର୍ହାତ୍‌ ।

4 ନାନୁ ନିଜେଦି ଉଣ୍ତିଙ୍ଗ୍‌ ପେରି ପେରି ପାଣି କିତା; ନାନୁ ଇଲୁକୁ ତିଆର୍‌ କିତା; ନାନୁ ନାଣ୍ତ ଅଙ୍ଗୁର୍‌ ଡଡିଙ୍ଗ୍ ରସ୍‌ତା; 5 ନାନୁ ନିଜେଦି ଉଣ୍ତିଙ୍ଗ୍‌ କିଡ଼ିଇ ମାରି ପଲ୍‌ ଡଡି ତିଆର୍‌ କିତା, ଆବେନୁ ୱିଜୁରକମ୍‌ତି ପଲ୍‌ମାଲ୍ ମାରାକ୍‌ ଉର୍‌ତା; 6 ନାନୁ ମାରାକାଣି ପାଡ଼ା ଉର୍‌ତି ବନ୍‌ତୁ ଏରୁ ସିନି ଉଣ୍ତିଙ୍ଗ୍ ଏରୁ ବାନ୍ଦୁଙ୍ଗୁ କାରିସ୍‌କିତା; 7 ନାନୁ ନାଣ୍ତ ସାକର୍‌ସାକ୍‌ରାଣିକାଙ୍ଗ୍‌ କଟା ମାରି ନା ଇଲୁଦୁ ଜନମ୍‌ ଆତିମାନି ସାକର୍‌ଙ୍ଗୁ ମାର୍ହାର୍‌; ମାରିବା ନା ଆଗ୍‌ଡ଼ି ଜିରୁସାଲାମତୁ ବାସାତିମାର୍ହି ୱିଜେରି ମାଡ଼ାନ୍ ନାୱି ପୋସାକିନି ମାନ୍ଦା ନାଣ୍ତ ମାର୍ହେ; 8 ନାନୁ ୱେଣ୍ତି ମାରି ବାଙ୍ଗାଁରାମ୍‍, ମାରି ନାଣ୍ତ ରାଜାର୍ ମାରି ଆଇଆଇ ଦେସ୍‍କାଣି ଏସୋ ଦନ୍‌ ସମ୍ପତି ଉଣ୍ତା କିତା; ନାନୁ ପାଟା ପାର୍‌ନିକାର୍‌ ମାରି ପାଟା ପାର୍‌ନିକେଙ୍ଗ୍‌, ମାରି ଲୋକାଙ୍ଗ୍‌ ୱେଡ଼ିକାକିନି କଗ୍‌ରି ଆଡ଼ିକ୍‌ ପୟ୍‌ତା ।

9 ଇୟାୱାଜା ନା ପୁର୍ବେ ଜିରୁସାଲାମଦୁ ଏମେକାର୍ ମାର୍ହାର୍‌, ଆୟା ୱିଜେରି ମାଡ଼ାନ୍ ପେରିକାନ୍ ମାରି ସାକ୍ତିସାଲି ଆତା; ମାରିବା ନା ବୁଦି ନା ମାନୁ ମାର୍ହାତ୍‌ । 10 ମାରି, ନା କାଣୁକୁ ଏମେକା ସୁଡ଼ୁତାତ୍‌, ଆକା ନାନୁ ତାନିଙ୍ଗ୍ ମାନା କିଏତା; ନାନୁ ନିଜେଦି ଜିବନ୍‌ତିଙ୍ଗ୍‌ ଇନି ୱେଡ଼ିକା ମାନା କିଏତା, ଇରିଙ୍ଗ୍‌ ନା ୱିଜୁ ପାଣି ଉଣ୍ତିଙ୍ଗ୍‌ ନା ଜିବନ୍‌ ୱେଡ଼ିକା ଆତାତ୍‌; ମାରି ନା ୱିଜୁ ପାଣିଦାନ୍ ଇକା ନା ବାଗ୍‌ ମାର୍ହାତ୍‌ । 11 ଆବେଟ୍ ନା କିୟୁ ଏମେ ୱିଜୁ ପାଣି କିତାମାର୍ହାତ୍‌ ମାରି ଏମେ ଏମେ ପାଣିଦାନ୍ ନାନୁ ୱାନ୍ଦିତାମାର୍ହା, ଆୟାଉଣ୍ତିଙ୍ଗ୍‌ ନାନୁ ସୁଡ଼ୁତା; ମାରି ସୁଡ଼ୁଦୁ, ୱିଜୁ ୱାର୍ହିକା ମାରି ଗାଲିଦିଙ୍ଗ୍‌ ଆସ୍‌ନିକା ମାତର୍‌, ମାରି ୱେଡ଼ା ଆଡ୍‌ଗି ଇନି ଲାବ୍‌ ସିଲେତାତ୍ ।

12 ତାନିୱେନ୍‌କା ନାନୁ ବୁଦି, ବାୟା ମାରି ବୁଦିସିଲିକା ସୁଡ଼ୁଦେଙ୍ଗ୍‌ ବଦା କିତା; ମାତର୍‌ ଏମେ ଲୋକ୍‌ ରାଜାଦି ୱେନ୍‍କା ୱାନାନ୍‌, ୱାନ୍ ଇନିକା କିନାନ୍ ? ଏମେକା କିଆୟ୍‌ ଆତାମାନାତ୍, ଆକା ନେ ଆନାତ୍‌ । 13 ଆବେଟ୍‌କୁ ନାନୁ ସୁଡ଼ୁତା, ଏଣ୍ତେସ୍ ସିକାଟି ମାଡ଼ାନ୍ ଜାୟ୍‌ ନେଗିକା, ଆୟାୱାଜା ବୁଦିସିଲି ମାଡ଼ାନ୍ ବୁଦି ନେଗିକା । 14 ବୁଦିମାନି ଲକୁ ଏମେ ସାରିଦୁ ସନାନ୍‌ ୱାନ୍‌ ଆକା ନେସ୍‌ନାନ୍‌ ମାତର୍‌ ମୁର୍କୁ ଲୋକୁ ସିକାଟିଦୁ ବୁଲାନାନ୍, ମାରିବା ୱିଜେରି ଉଣ୍ତିଙ୍ଗ୍‌ ଆୟା ଦସ୍‌ ଗଟାନାତ୍, ଇକା ନାନୁ ସୁଡ଼ୁତା । 15 ଆବେଟ୍ ନାନୁ ନିଜେଦି ମନ୍‌ତୁ ଇର୍ହା, "ମୁର୍କୁ ଲୋକ୍‌ ଉଣ୍ତିଙ୍ଗ୍ ଏଣ୍ତେସ୍ ଗଟାନାତ୍, ନା ଉଣ୍ତିଙ୍ଗ୍‌ ବା ଆୟାୱାଜା ଗଟାନାତ୍; ଆର୍‍ତିଙ୍ଗ୍‌ ନାନୁ ଇନିଦାନିଙ୍ଗ୍‌ ନାଣ୍ତ ବୁଦିଦି ଲୋକୁ ଆତା ?" ଆବେଟ୍‌କୁ ନାନୁ ମନ୍‌ତୁ ଇର୍ହା, ଇକା ନେ ୱାର୍ହିକା । 16 ଇରିଙ୍ଗ୍‌ ଏଣ୍ତେସ୍ ମୁର୍କୁ ଲୋକ୍‌ଦି, ଆୟାୱାଜା ବୁଦିଦି ଲୋକ୍‌ଦି ଏତ୍‍କିନିକା ୱିଜୁଦିନ୍ ତେବାଏତ୍‌; ଏଣ୍ତେସ୍‌କି ୱାଜିନିଦିନ୍‌ତୁ ୱିଜେରେ ବାଣାନା ସନାମାନାର୍ । ମୁର୍କୁ ଲୋକ୍‌ ଏଣ୍ତେସ୍‌ ସାନାନ୍, ବୁଦିଦି ଲୋକ୍ ବା ଆୟା ୱାଜା ସାନାନ୍ । 17 ଆବେଟ୍‌କୁ ନାନୁ ଜିବନ୍‌ଦିଙ୍ଗ୍‌ କାଡ଼ିତା; ଏଣ୍ତେସ୍‌ ୱେଡ଼ା ଆଡ୍‌ଗି ୱିଜୁ ପାଣି ନା ଉଣ୍ତିଙ୍ଗ୍ କାସ୍ଟୁଦିକା ଆତାତ୍; ଇରିଙ୍ଗ୍‌ ୱିଜୁ ୱାର୍ହିକା ମାରି ଗାଲିଦି ୱେନ୍‌କା ଉର୍‌ନିକା ମାତର୍‌ ।

18 ମାରି, ୱେଡ଼ା ଆଡ୍‌ଗି ନାନୁ ଏମେ ଏମେ ପାଣିଦୁ ୱାନ୍ଦିତା, ନା ଆୟାୱିଜୁ ପାଣିଦିଙ୍ଗ୍‌ ନାନୁ କାଡ଼ିତା; ଇରିଙ୍ଗ୍‌ ନା ୱେନ୍‌କାରି ଲୋକା ଉଣ୍ତିଙ୍ଗ୍‌ ୱିଜୁ ଡ଼ିସ୍‍ସୋ ସନ୍‍ଡ୍ରେଙ୍ଗ୍‌ ପଡ଼ାନାତ୍ । 19 ମାରି, ୱାନ୍ ବୁଦି ନ ମୁର୍କୁ ଆନାନ୍, ଏନ୍ ନେସ୍‌ତାମାନାନ୍ ? ଇରିଙ୍ଗ୍‌ ନାନୁ ୱେଡ଼ା ଆଡ୍‌ଗି ଏମେ ଏମେ ପାଣିଦୁ ୱାନ୍ଦ୍‌ଜି ବୁଦି ୱେର୍‌ତା, ୱାନ୍ ନା ଆୟା ୱିଜୁ ପାଣିଦି ଅଦିକାରି ଆନାନ୍; ଇକା ନେ ୱାର୍ହିକା । 20 ଇୟାଉଣ୍ଡିଙ୍ଗ୍‌ ୱେଡ଼ା ଆଡ୍‌ଗି ନାନୁ ଏମେ ଏମେ ପାଣିଦୁ ୱାନ୍ଦିତା, ଆୟା ୱିଜୁ ବିସୟ୍‌ତାନ୍ ନିଜେଦି ମନ୍‌ତିଙ୍ଗ୍‌ ନିରାସ୍ କିଦେଙ୍ଗ୍‌ ଆସ୍‌ତା । 21 ଇରିଙ୍ଗ୍‌ ଅରେନ୍ ଲୋକ୍ ବୁଦି, ବିଦ୍ୟା ମାରି ସାକ୍ତିଦି ୱାଲେ ପାଣି କିନାନ୍; ମାରିବା ଏମେ ଲୋକ୍ ଆବେନୁ ପାଣି କିଏନ୍, ୱାନି ଅଦିକାର୍ ଉଣ୍ତିଙ୍ଗ୍‌ ୱାନ୍ ଆକା ଡ଼ିସ୍‌ନା ସିନାନ୍‌ । ଇକା ନେ ୱାର୍ହିକା ମାରି ବେସି ତାଗ୍‍ଇକା । 22 ଆର୍‍ତିଙ୍ଗ୍‌ ୱେଡ଼ା ଆଡ୍‌ଗି ଲୋକ୍ ଏମେ ଏମେ ପାଣିଦାନ୍ ମାରି ଜିବନ୍‌ତି ସିନ୍ତାଦାନ୍‌ ୱାଦ୍‌ନାନ୍‌, ଆୟାୱିଜୁଦାନ୍ ୱାନ୍ ଇନିକା ପୋଇନାନ୍ ? 23 ଇରିଙ୍ଗ୍‌ ୱାନି ଦିନ୍‌ ୱିଜୁ କେବଲ ଦୁଃକ୍‌ନେ ମାରି ୱାନି ପାଣି ସିନ୍ତା; ନାଡ଼ା ବା ୱାନି ଜିବନ୍‌ ରମ୍‍ଏତ୍ । ଇକା ବା ୱାର୍ହିକା ।

24 ତିନି ଉଣିକା ମାରି ନିଜେ ପାଣିଦୁ ନିଜେ ଜିବନ୍‌ତିଙ୍ଗ୍‌ ୱେଡ଼ିକା କିନିମାଣାନ୍ ଲୋକାଦି ମାରି ନାଣ୍ତ ସାନ୍ତି ବିସୟ୍‌ ସିଲେତ୍ । ନାନୁ ବା ସୁଡ଼ୁତା, ଇକା ମାପୁରୁଦି ମାଣାନ୍‌ ଆନାତ୍ । 25 ଇରିଙ୍ଗ୍‌ ୱାନିଙ୍ଗ୍ ଡ଼ିସ୍‌ତିଙ୍ଗ୍‌ ଏନ୍ ଉଣ୍ତେଙ୍ଗ୍‌ ଆଟ୍‍ନାନ୍ ମାରି ୱେଡ଼ିକା କିଦେଙ୍ଗ୍‌ ଆଟ୍‍ନାନ୍ ? 26 ଇୟାଉଣ୍ତିଙ୍ଗ୍‌ ଏମେକାର୍‌ ୱାନିଙ୍ଗ୍‌ ୱେଡ଼ିକା କିନାର୍‌, ମାପୁରୁ ଜ୍ଞାନ୍‌, ବୁଦି ମାରି ୱେଡ଼ିକା ସିନାନ୍; ମାତର୍‌ ୱାନ୍‌ ପାପି ଲୋକାଙ୍ଗ୍‌ ପାଣି କିନାନ୍‌, କମେ କିନାନ୍‌ ମାରି ଉଣ୍ତା କିନାନ୍‌, ଆମାମାଣାନ୍‌ ୱାର୍‌ ଆମାକା ପଇନାର୍‌ ଆକା ୱାରିଙ୍ଗ୍‌ ପୁରା କିଜିମାନି ଲୋକାଙ୍ଗ୍‌ ସିଆଇଆନାତ୍‌ । ଇକା ୱିଜୁ ୱାର୍ହିକା । ଇକା ଗାଲିଦି ୱେନ୍‌କା ଉରୁକ୍‌ନି ଲକ୍‌ ୱାଜା ।