1 ୱିଜୁ ବିସୟ୍‌ତି ଟିକ୍‌ ବେଡ଼ା ମାନାତ୍ ମାରି ବାଦଡ଼ ଆଡ୍‌ଗି ଏମେ ୱିଜୁ ପାଣି ଆନାତ୍‌, ଉଡ୍ରି ଟିକ୍‌ ବେଡ଼ା ମାନାତ୍;

2 ଜନମ୍‌ ଆନି ବେଡ଼ା ମାରି ସାନି ବେଡ଼ା;

ଉର୍‍ନି ବେଡ଼ା, ଏମେକା ଉରାଇ ଆତାତ୍, ଆକା କାରିନି ବେଡ଼ା;

3 ଡାକ୍‌ନି ବେଡ଼ା ମାରି ନେଗିକା କିନି ବେଡ଼ା;

ରୁକ୍‍ନି ବେଡ଼ା ମାରି ତିଆର୍‌ କିନି ବେଡ଼ା,

4 ଆଡ଼୍‍ବାନି ବେଡ଼ା ମାରି ସିକ୍‍ନି ବେଡ଼ା;

ଆଡ଼୍‍ବାନି ବେଡ଼ା ମାରି ଗାତ୍‍ନି ବେଡ଼ା;

5 କାଲ୍‍କୁ ପୋକ୍‍ନି ବେଡ଼ା ମାରି କାଲ୍‍କୁ ଉଣ୍ତା କିନି ବେଡ଼ା;

ପମ୍‌ନି ବେଡ଼ା ମାରି ପମ୍‌ନି ମାଡ଼ାନ୍‌କୁ ୱେର୍‌ଏ ଆନି ବେଡ଼ା,

6 ପୟ୍‌ନି ବେଡ଼ା ମାରି ମୁରୁପ୍‌ନି ବେଡ଼ା;

ଇଡ୍‌ନି ବେଡ଼ା ମାରି ପକ୍‍ନି ବେଡ଼ା;

7 କିସ୍‍ନି ବେଡ଼ା ମାରି ସିଲାଇ କିନି ବେଡ଼ା;

ଆଲେଜମାନି ବେଡ଼ା ମାରି ୱାର୍‌ଗିନି ବେଡ଼ା;

8 ଜିବନ୍‌ନୋନି ବେଡ଼ା ମାରି କାଡ଼୍‍ନି ବେଡ଼ା;

ଜୁଦ୍‌ଦି ବେଡ଼ା ମାରି ସାନ୍ତିଦି ବେଡ଼ା ମାନାତ୍ ।

9 ପାଣିକିନି ଲୋକାଦି ନିଜେଦି ପାଣିଦାନ୍ ଇନି ଲାବ ପୟ୍‌ନାନ୍‌ ? 10 ମାପୁରୁ ଲୋକାଙ୍ଗ୍‌ ଦାନ୍ଧା ଆନି ଉଣ୍ତିଙ୍ଗ୍‌ ଏମେ ପାଣି ସିତାମାନାନ୍‌, ଆକା ନାନୁ ସୁଡ଼ୁତାମାନା । 11 ୱାନ୍ ୱିଜୁ ବିସୟ୍‌ତିଙ୍ଗ୍‌ ୱାନି ବେଡ଼ାଦୁ ସବାକିତାମାନାନ୍; ମାରି ୱାନ୍ ୱାରି ଜିବନ୍‌ତୁ ୱିଜୁଦିନ୍ ଇଟ୍‍ତାମାନାନ୍; ମାରିବା ମାପୁରୁ ପାର୍‌ତୁମ୍‌ତାନ୍‌ ସାରାସାରି ସାନ୍ଦି ଏମେ ପାଣି କିତାମାନାନ୍, ଲୋକୁ ଆବେଣି ବିସୟ୍‌ ନେସ୍‌ତେଙ୍ଗ୍‌ ଆଟ୍‍ଏର୍‌ ।

12 ନାନୁ ନେସ୍‍ନା ଜେ, ଜିନିମାନିସାନ୍ଦି ୱେଡ଼ିକା ମାରି ନେଗିପାଣି କିନି ବାଦ୍‌ଲୁ ୱାରି ମାରି ଇନି ନେଗି ବିସୟ୍‌ ସିଲେତ୍ । 13 ମାରିବା, ୱିଜେରେ ଲୋକ୍‌ ଉଣିଜି ତିନ୍‌ଜି ନିଜେଦି ପାଣିଦାନ୍ ୱେଡ଼ିକା କିନାର୍, ଇକା ମାପୁରୁଦି ଦାନ୍‌ । 14 ନାନୁ ନେସ୍‍ନା ଜେ, ମାପୁରୁ ଆମାକା ଇନିକା କିନାନ୍‌, ଆକା ୱିଜୁଦିନ୍‌ସାନ୍ଦି; ଆକା ପେରିକା କିଦେଙ୍ଗ୍‌ ଆଏତ୍, ସିଲେତିଙ୍ଗ୍ ଆକା ଉଣା କିଦେଙ୍ଗ୍‌ ଆଏତ୍; ମାରି ଲକୁ ମାପୁରୁଦି ଆଗିଡ଼ି ତିଲାନି ଉଣ୍ତିଙ୍ଗ୍ ୱାନ୍ ଆକା କିତାମାନାନ୍ । 15 ଏମେକା ମାନାତ୍, ଆକା ମାର୍ହାତ୍‌; ମାରି, ଏମେକା ଆନାତ୍, ଆକା ନେ ମାର୍ହାତ୍‌; ମାରି, ଏମେକା ସର୍ହା ମାନାତ୍, ମାପୁରୁ ଆକା ମାରିଡ଼େସି ପଇନାନ୍ ।

16 ମାରି, ନାନୁ ୱେଡ଼ା ଆଡ୍‌ଗି ବିସାର୍‌ କିନି ଜାଗାଦୁ ସୁଡ଼ୁତା, ଆବେନୁ ତାଗ୍‍ଇକା ମାନାତ୍, ମାରି ଦାର୍ମୁ ଜାଗାଦୁ ସୁଡ଼ୁତା, ଆବେନୁ ନେ ତାଗ୍‍ଇକା ମାନାତ୍ । 17 ନାନୁ ମନ୍‌ତୁ ମନ୍‌ତୁ ଇର୍ହା, "ମାପୁରୁ ଦାର୍ମୁ ମାରି ତାଗ୍‍ଇ ଲୋକା ବିସାର୍‌ କିନାନ୍; ଇରିଙ୍ଗ୍‌ ୱିଜୁ ବିସୟ୍‌ତିଙ୍ଗ୍‌ ମାରି ୱିଜୁ ପାଣି ଉଣ୍ତିଙ୍ଗ୍‌ ବେଡ଼ା ମାନାତ୍ ।" 18 ନାନୁ ମନ୍‌ତୁ ଅଡ଼୍‌ବିଜି ଇର୍ହା, "ମାପୁରୁ ଏଣ୍ତେସ୍ ଲୋକାଙ୍ଗ୍‌ ପରିକା କିନାନ୍ ମାରି ୱାର୍ ନିଜେ ଜେ କେବଲ ପସୁ ସାମାନ୍‌, ଇକା ଏଣ୍ତେସ୍ ୱାର୍ ସୁଡ଼ୁନାର୍, ଇୟା ଉଣ୍ତିଙ୍ଗ୍ ୱାରି ଉଣ୍ତିଙ୍ଗ୍‌ ଇକା ଆଜିନାତ୍ ।" 19 ଇରିଙ୍ଗ୍‌ ଲୋକା ମାରିନ୍‌କା ଉଣ୍ତିଙ୍ଗ୍‌ ଇନିକା ଗଟାନାତ୍, ପସୁଦିଙ୍ଗ୍‌ ଆକା ଗଟାନାତ୍; ୱିଜେରି ଉଣ୍ତିଙ୍ଗ୍‌ ନେ ଉଣ୍ତ୍ରେନାନି ଗଟ୍‌ନା ଗଟାନାତ୍; ଇକାନ୍‌ ଏଣ୍ତେସ୍ ସାନାନ୍‌, ୱାନ୍ ଆୟାୱାଜା ସାନାନ୍; ମାରି, ୱିଜେରି ଜିବନ୍‌ ସାମାନ୍‌; ମାରି, ପସୁଦି ମାଣାନ୍‌ ଲୋକାଦି ଇନିକା ପେରିକା ସିଲେତ୍‌; ଇରିଙ୍ଗ୍‌ ୱିଜୁ ୱାର୍ହିକା । 20 ୱିଜେରେ ଉଣ୍ତ୍ରେ ବାଡିଦୁ ସନାର୍‌; ୱିଜେରେ ଦୁଡ଼ିଦାନ୍‌ ତିଆର୍‌ ଆତିକାର୍‌ ମାରି ୱିଜେରେ ମାରିଡ଼େସି ଦୁଡ଼ିଦୁ ମିସାନା ସନାର୍ । 21 ଲୋକାଦି ଆତ୍ମା ମୁସ୍‌କୁପୁର୍‌ ସନିକା ମାରି ପସୁଦି ଆତ୍ମା ଦୁନିଆଦି ଆଡ୍‌ଗି ସନାତ୍‌ ଇଜି ଏନ୍ ନେସ୍‍ନାନ୍ ? 22 ଇୟା ଉଣ୍ତିଙ୍ଗ୍‌ ଲୋକ୍‌ ନିଜେ ପାଣିଦାନ୍ ୱେଡ଼ିକା କିନି ବାଦ୍‌ଲୁ ମାରି ୱାନି ଏସ ନାଣ୍ତ ପେରିକା ସିଲେତ୍ ଇଜି ନାନୁ ସୁଡ଼ୁତା; ଇରିଙ୍ଗ୍‌ ଇକା ନେ ୱାନି ଅଦିକାର୍‌; ମାରି, ତାନିୱେନେକା ଏମେକା ଗଟାନାତ୍, ଆକା ସୁଣି ଉଣ୍ତିଙ୍ଗ୍‌ ଏନ୍ ୱାନିଙ୍ଗ୍ ଡ଼େସି ଡ଼େପ୍‍ସି ତାତେଙ୍ଗ୍ ଆଟ୍‍ନାନ୍ ?