1 ମିରୁ ମାପୁରୁଦି ଇଲୁଦୁ ସନି ୱାଲେ ଜାଗାର୍‌ତାଦାନ୍‌ ନିଜେଦି ପାଦ୍‌ ଇଡ୍‌ଦୁ; ଇରିଙ୍ଗ୍‌ ମୁର୍କୁଲୋକାରି ପୁଜା ସିନି ବାଦ୍‌ଲୁ ୱେଣ୍ତ୍ରେଙ୍ଗ୍‌ ଲାକୁତୁ ଆନିକା ନେଗେତ୍‌; ୱାର୍ ତାଗ୍‍ଇ ପାଣି କିନାର୍ ଇଜି ନେସ୍‌ଏର୍‌ । 2 ନିନୁ ନିଜେ ୱାର୍‌ଗିନି ୱାଲେ ଦାନ୍ଦା ଆମା ମାରି ମାପୁରୁଦି ଆଗିଡ଼ି ଇନି ମାଟା ୱେର୍‌ନି ଉଣ୍ତିଙ୍ଗ୍‌ ନି ମୋନ୍ ଦାନ୍ଦା ଆମାକିତ୍; ଇରିଙ୍ଗ୍‌ ମାପୁରୁ ମୁସ୍‌କୁପୁର୍‌ତୁ ମାନାନ୍ ମାରି ନିନୁ ଦୁନିଆଦୁ ମାନି; ଇୟାଉଣ୍ତିଙ୍ଗ୍‌ ନିନୁ ମାଟା ୱେର୍‌ନି ଆଗ୍‌ଡ଼ିରାନ୍‌ ନେଗେନ୍‌ତାନ୍‌ ସିନ୍ତା କିଆ । 3 ଇରିଙ୍ଗ୍‌ ପାଣିଦି ନାଣ୍ତଦାନ୍‌ ଲବ୍‌ ସୁଣିକା ଆନାତ୍; ମାରି ମାଟାଦି ନାଣ୍ତଦାନ୍ ମୁର୍କୁ ଲୋକ୍‌ଦି ବଲୁ ଆନାତ୍ । 4 ନିନୁ ମାପୁରୁଦି ଲାକୁତୁ ମାନତ୍‌ କିତିଙ୍ଗ୍‌, ଆକା ଡ଼େପ୍‌ତେଙ୍ଗ୍‌ ୱେଡ଼ା କିମାଟ୍; ଇରିଙ୍ଗ୍‌ ମୁର୍କୁ ଲୋକାମାନୁ ୱାରି ୱେଡ଼ିକା ସିଲେତ୍; ନିନୁ ଏମେକା ମାନତ୍‌ କିନି, ଆକା ଡ଼େପ୍‌ସି ସିଦୁ । 5 ମାନତ୍‌ କିଜି ଡ଼େପ୍‍ସି ସିଇ ବାଦ୍‌ଲୁ ନିନୁ ମାନତ୍‌ କିଇକା ନେଗେତ୍ । 6 ନି ମେନ୍ଦଲ୍‌ତିଙ୍ଗ୍‌ ପାପ୍ କିନି ଉଣ୍ତିଙ୍ଗ୍‌ ନି ୱେୟୁଦିଙ୍ଗ୍‌ ମାଟା ୱାର୍‌ଗିଦେଙ୍ଗ୍‌ ସିମା; ମାରିବା ଇକା ବୁଲ୍‌ତାନ୍‌ ଆତାତ୍ ଇଜି ଦୁତ୍‌ ଆଗିଡ଼ି ଇନ୍‍ମା; ଏନ୍ଦାଇରିଙ୍ଗ୍ ମାପୁରୁ ନି ମାଟାଦୁ ରିସା ଆଜି ନି କିୟୁଦି ପାଣି ସାପିସ୍‌ କିନାନ୍‌ ? 7 ଇରିଙ୍ଗ୍‌ ଲବୁ ସୁଣିକା ମାରି ୱାର୍ହିତାନି ନାଣ୍ତ ମାରି ବାକ୍ୟଦାନ୍ ଇୟାୱାଜା ଗଟାନାତ୍; ମାତର୍‌ ମିରୁ ମାପୁରୁଙ୍ଗୁଁ ତିଲାଦୁ ।

8 ଏସାଙ୍ଗ୍‌ ମିରୁ ଏମେ ଦେସ୍‍ଦୁ କାକୁର୍ତି ଉଣ୍ତିଙ୍ଗ୍‌ ଡଙ୍ଗାଁ, ବେସିକାସ୍ଟୁ ବିସାର୍‌ ମାରି ନିୟାଇ ଆଇକା ଆନିକା ସୁଡ଼ୁତିଙ୍ଗ୍‌, ଆର୍‍ତିଙ୍ଗ୍‌ ଆୟା ବିସୟ୍‌ଦାନ୍ ତିଏଲ୍‌ ଆମାଟ୍‌; ଇରିଙ୍ଗ୍‌ ପେରିୱାନି ବାଦ୍‌ଲୁ ମାରିଅରେନ୍‌ ପେରିକାନ୍ ସୁଡ଼ୁନାନ୍‌; ମାରି, ୱାରି ମାଡ଼ାନ୍‌କୁ ପେରିକାନ୍ ମାନାନ୍ । 9 ମାରିବା ସାରାଦୁନିଆଦି ପଲ୍‌ ୱିଜେରି ଉଣ୍ତିଙ୍ଗ୍‌; କିଡ଼ିଇଦାନ୍‌ ରାଜା ନିଜେ ଲାବ୍‌ ପୟ୍‌ନାନ୍‌ । 10 ଏମେ ଲୋକୁ ଡାବୁଆଙ୍ଗାଁ ଜିବନ୍‌ନୋନାନ୍‌, ୱାନ୍ ଡାବୁଦାନ୍‌ ପୁରା ଆଏନ୍; ମାରିବା ଏମେ ଲୋକ୍‌ ନାଣ୍ତ ଦନ୍‌ସମ୍ପତିଦିଙ୍ଗ୍‌ ଜିବନ୍‌ନୋନାନ୍‌, ୱାନ୍ ଦନ୍‌ସମ୍ପତିଦୁ ପୁରା ଆଏନ୍; ଇକା ନେ ୱାର୍ହିକା । 11 ଦନ୍‍ସମ୍ପତି ନାଣ୍ତ ପଇତିଙ୍ଗା, ଆବେଣି ପାଣିକିନିକାର୍ ନାଣ୍ତ ଆନାର୍; ଆଦେଙ୍ଗ୍‌ ନିଜେଦି କାଣାଗାଦାନ୍‌ ସୁଡ଼ୁନି ବାଦ୍‌ଲୁ ଆବେଣି ମାଲିକ୍‌ ଇନି ଲାବ୍‌ ? 12 ପାଣିକିନି ଲୋକୁ ଉଣା ବା ନାଣ୍ତ ଉଟିଙ୍ଗାଁ ନେ ୱାନି ସୁସ୍‍କାଣୁକୁ ନେଗେନ୍‌ ଆନେ; ମାତର୍‌ ମାଜନ୍‌ ଲୋକୁଦି ପୁରା ସୁସ୍‍କାଣୁକୁ ରେଉ । 13 ଦନି ଲୋକ୍‌ତି ଅଦିକାରି ମାଡ଼ାନ୍ ନିଜେଦି ନାସ୍ଟୁ ଉଣ୍ତିଙ୍ଗ୍‌ ଦନ୍‌ ଉଣ୍ତାକିଜି ଇଡ୍‌ନାନ୍‌, ଇକା ଉଣ୍ତ୍ରି ବାଧା ୱାଜା ଅନିଷ୍ଟ ନାନୁ ୱେଡ଼ା ଆଡ୍‌ଗି ସୁଡ଼ୁତାମାନା; 14 ମାରି, ରାଉ ମାଡ଼ାନ୍ ଆୟା ୱିଜୁ ଦନ୍ ନାସ୍ଟୁ ଆନାତ୍; ମାରି, ୱାନ୍ କଡ଼ ଜନମ୍‌ କିତିଙ୍ଗ୍‌, ୱାନି କିୟୁଦୁ ଇନିକା ସିଲେତ୍‍ମାନାତ୍ । 15 ୱାନ୍ ନିଜେ ୟାୟା ପଟାଦାନ୍ ଏଣ୍ତେସ୍ ୱାତାନ୍, ଆୟା ୱାଜା ନାଗାଡ଼ା ଆଜି ୱାତି ୱାଜା ଡ଼େସି ସନାନ୍, ମାରି ୱାନ୍ ନିଜେ ପାଣିଦି ଉଣ୍ତିଙ୍ଗ୍‌ ନିଜେ କିୟୁଦୁ ଏମେକା ଅତେଙ୍ଗ୍‌ ଆଟ୍‍ନାନ୍, ଇୟା ୱାଜା ଇନିକା ବା ଅତେଙ୍ଗ୍‌ ଆଟ୍‍ଏନ୍ । 16 ମାରି, ୱାନ୍ ଏଣ୍ତେସ୍ ୱାତାନ୍, ମାରି ୱାନ୍ ଜେ ଆୟା ୱାଜା ସନାନ୍, ଇକା ନେ ବାଦା ୱାଜା ଅନିଷ୍ଟ; ଇଲେ ଗାଲି ଉଣ୍ତିଙ୍ଗ୍‌ ୱାନ୍ ପାଣି କିତିଙ୍ଗ୍‌, ୱାନି ଇନି ଲାବ ? 17 ମାରିବା, ୱାନ୍ ଜିତିମାନି ବେଡ଼ାଦୁ ସିକାଟିଦୁ ଉଣାନ୍, ମାରି ୱାନ୍ ବେସି ରିସା ଆନାନ୍, ମାରି ୱାନିଙ୍ଗ୍‌ ଦୁଃକ୍‌, ସିନ୍ତା, ରିସା ମାରି ବେମାର୍‌ ଗଟାନାତ୍ ।

18 ସୁଡ଼୍‍ଦୁ, ଉଣିତିନିକା କିନି ମାରି ମାପୁରୁଦି ଅଦିକାର୍ ପାଣି ନାଡ଼ିମି ଲୋକ ୱେଡ଼ା ଆଡ୍‍ଗି ଏମେ ଏମେ ପାଣି କିନାନ୍, ଆୟା ୱିଜୁ ପାଣିଦୁ ୱେଡ଼ିକା କିନିକା, ଇକା ନେ ୱାନି ଉଣ୍ତିଙ୍ଗ୍‌ ନେଗିକା ମାରି ୱେଡ଼ିକାଦି ବଲି ନାନୁ ସୁଡ଼ୁତାମାନା; ମାତର୍‌ ଇକା ନେ ୱାନି ବାଗ୍ । 19 ମାରି ମାପୁରୁ ଏମେ ଲୋକ୍‌ଦିଙ୍ଗ୍‌ ଦନ୍ ସମ୍ପତି ଦାନ୍ ସିଜି ଆକା ୱେଡ଼ିକା କିଦେଙ୍ଗ୍‌, ନିଜେଦି ବାଗ୍ ଆସ୍‍ନି ଉଣ୍ତିଙ୍ଗ୍‌ ମାରି ନିଜେ ପାଣିଦୁ ୱେଡ଼ିକା କିଦେଙ୍ଗ୍‌ ଅଦିକାର୍‌ ସିତାନ୍, ଇକା ନେ ମାପୁରୁଦି ଦାନ । 20 ଏଣ୍ତେସ୍ ୱାନ୍ ନିଜେଦି ଜିତିମାନି ଦିନ୍‌ ୱିଜୁ ବେସି ଏତ୍ କିଦେଙ୍ଗ୍‌ ଆଟ୍‍ଏନ୍; ମାତର୍‌ ମାପୁରୁ ୱାନି ଜିବନ୍‌ଦୁ ୱେଡ଼ିକା ସିଜି ମାଟା ୱେର୍‌ନାନ୍ ।