1 ପାରତୁମ୍‍ତି ନିୟମ୍‍ତୁ ପାର୍‍ତନାଦି ସାରି ନି ଲୋକୁ ତିଆର୍‍କିତି ଉଣ୍ତ୍ରି ସେବା କିନି ଇଲୁ ବିସୟ୍‌ତାନ୍‍ ରାସାତା ମାର୍ହାତ୍‌ । 2 ଆୟାଇସାବ୍‌ତାନ୍ ଉଣ୍ତ୍ରି ପାର୍‍ତନା କିନି ଗୁଡ଼ା ତିଆର୍ ଆତାମାର୍ହାତ୍‍ । ଆବେନ୍‌ ମାନି ପାର୍‍ତୁମ୍‍ତି ବାକ୍‍ରା ପବିତ୍ର ବାଡି ଇନ୍‍ଜିମାର୍ହାର୍ । ଇୟା ଲୋଇ ଦିୱା ଇଡ୍‍ନି ବାଡି, ଉନ୍‍ଡ୍ରି ଟେବୁଲ୍‍ ମାରି ଟେବୁଲୁ ମୁସୁକୁ ମାପୁରୁଦି ଉଦେସ୍‍ତାନ୍ ପୁଜା ସିତିମାର୍‍ଇ ରୁଟି ମାର୍ହାତ୍‌ । 3 ପାର୍‌ଦା ୱେନ୍‍କା ଏମେ ମାରିଉଣ୍ଡ୍ରି ବାକ୍‍ରା ମାର୍ହାତ୍‌, ତାନିଙ୍ଗ୍‌ ମହାପବିତ୍ର ବାଡି ଇନ୍‍ଜିମାର୍ହାର୍ । 4 ଆବେନ୍‌ ଉନ୍‍ଡ୍ରି ବାଙ୍ଗାଁରାମ୍‍ତି ଦୁପୁଣି ବେଦି ମାରି ବାଙ୍ଗାଁରାମ୍‍ତି ତିଆର୍‍ଆତି "ନିୟମ୍‌ ପେଡ଼ା" ମାର୍ହାତ୍‌ । ଇୟା ପେଡ଼ା ଲୋଇ "ମାନ୍ନା" ମାନି ଉନ୍‍ଡ୍ରି ବାଙ୍ଗାରାମ୍‌ତି ସାଟି, ହାରୋଣତି କାୟ୍‍ତି ବାଡିଗା ମାରି ମାପୁରୁଦି ମାଟା ରାସାତି ରୁଣ୍ତି କାଲୁକୁ ପାଟା ମାର୍ହେ । 5 ପେଡ଼ା ମୁସୁକୁ ମାପୁରୁଦି ଆବେନ୍‌ମାନ୍‌ଜି ତରାୟ୍‌ଆନି ୱାଜା ରେକେଙ୍ଗ୍‌ମାନି ରୁଣ୍ତି ଲୋକ୍‌ଦି ମୁର୍ତି ମାର୍ହାତ୍‍ । ଇୟାକାର୍‌ "ପାପ୍‍କେମା" ବାଡି ମୁସୁକୁ ରେକେଙ୍ଗ୍‌ ଅସାର୍ କିଜି ତେବାତାମାର୍ହାର୍‍, ମାତର୍‌ ଇଲେଇ ଇୟା ୱିଜୁଦି ବିସୟ୍‌ ନେଗେନ୍‌ତାନ୍ ୱେର୍‍ତେଙ୍ଗ୍‍ ଦରକାର୍‍ ସିଲେ । ସମାଗମ ଇଲୁଦି ଲୋଇରି ବାଗ୍‌