1 ଜିସୁ ଲୋକାଙ୍ଗ୍‌ ନିଜେଦି ୱିଜୁ ମାଟା ୱେର୍‌ତି ୱିସ୍‌ତି ୱେନ୍‌କା କପର୍‍ନାହୁମ୍‍ତୁ ସୋର୍‌ଆନ୍‌ । 2 ଆୟା ୱେଡ଼ାଦୁ ଅରେନ୍‍ ରମିୟ ନେତାଦି ଗତିମୁରୁଲି ନବ୍‌ ଆଜି ସାନି ୱାଜା ଆତାମାର୍ହାନ୍‍, ୱାନ୍‌ ୱାନିଙ୍ଗ୍‌ ନାଣ୍ତ ଜିବନ୍‍ନୋଜି ମାର୍‌ଆନ୍‌ । 3 ୱାନ୍‌ ଜିସୁଦି ମାଟା ୱେନ୍‍ଞ୍ଜ, ୱାନ୍‌ ୱାଜି ୱାରି ଗତିମୁରୁଲି ଜିବନ୍‌ ରକିୟା କିଦେଙ୍ଗ୍, ଇୟାଉଣ୍ତିଙ୍ଗ୍‌ ୱାରି ଲାକ୍‌ତୁ ଜିହୁଦିର୍‌ ଏସ ପେରି ନେତାରିଙ୍ଗ୍‌ ପକ୍‍ସି ୱାନିଙ୍ଗ୍‌ ୱାଦେଙ୍ଗ୍‌ ଇର୍ହାର୍‌ । 4 ୱାର୍‌ ଜିସୁ ଲାକ୍‌ତୁ ସଲ୍‌ସି ୱାନିଙ୍ଗ୍‌ ନାଣ୍ତ ମାଡ଼ିସ୍‌ କିଜି ଇଣ୍ତ୍ରେଙ୍ଗ୍‌ ଆସ୍‌ତାର୍‌, ନିନୁ ଜେ ୱାରି ଲାକ୍‌ତୁ ଇୟାକା କିନି, ୱାନ୍‌ ଆବେଟ୍‌ ଜଗ୍‌ ଆନାନ୍‌; 5 ମାତର୍‌ ୱାନ୍‌ ମା ଜାତିଦିଙ୍ଗ୍‍ ନାଣ୍ତ ଜିବନ୍‌ନୋନାନ୍‌ ମାରି ନିଜେ ମା ଉଣ୍ତିଙ୍ଗ୍‌ ପାର୍‌ତନା ଇଲୁ ତିଆର୍‍କିତା ସିତାମାନାନ୍‌ ।

6 ଆବେଟ୍‌ ଜିସୁ ୱାରି ୱାଲେ ସର୍‌ଆନ୍‌ । ୱାନ୍‌ ଇଡ୍ରଣାନ୍ ଅଡ଼ପ୍‍ ଆକ ଇତାନ୍‍ନୋ, ସତସେନାପତି ସଙ୍ଗ୍‌ରିଙ୍ଗ୍‌ ପକ୍‍ସି ୱାରିଙ୍ଗ୍‌ ଇର୍ହାନ୍‌, ପ୍ରବୁ, କାସ୍ଟୁ କିମା, ମାତର୍‌ ନିନ୍‌ ଜେ ନା ଇଣ୍ତ୍ର ପାଦାମ୍‌ ଇଡ୍‌ଦେଙ୍ଗ୍‌ ନାନ୍‌ ଇୟାୱାଜା ଜୋଗ୍‍ ସିଲେ; 7 ମାରି ନାନ୍ ନି ଲାକ୍‌ତୁ ସନ୍‌ଡ଼୍ରେଙ୍ଗ୍‌ ନିଜେଦିଙ୍ଗ୍ ଜୋଗ୍‍ ଅଡ଼୍‍ବିଏତା; ମାତର୍‌ ଉନ୍‌ଡ୍ରି ପଦ୍‍ମାଟାଦି ଆଦେସ୍‌ ଇନ୍‌ଆଁ, ନା ପାଣିକିନିକାନ୍‌ ନେଗେନ୍‍ ଆନାସନାନ୍‍ । 8 ମାତର୍‌ ନାନ୍ ଅରେନ୍‍ୱାନି ଆଡ୍‍ଗିମାନି ମାର୍‍ରିଙ୍ଗ୍‍ ବା ନା ଅଦିକାର୍‍ତାନ୍‍ ସନ୍ୟ ଦଲ୍‌ ମାନାର୍‌; ମାରି, ଅରେନ୍‍ ୱାନିଙ୍ଗ୍‌ ଜଦି ନାନ୍ ସାଙ୍ଗ୍‍ଆ ଇଜି ଆଦେସ୍‌ ସିତିଙ୍ଗ୍‌, ୱାନ୍‌ ସନାନ୍‌; ଆଇୱାନିଙ୍ଗ୍‍ ରାଆ, ଇଜି ଇରିଙ୍ଗ୍‌, ୱାନ୍‌ ୱାନାନ୍‌; ମାରି, ନା ସାକର୍‌ତିଙ୍ଗ୍‌ ଇକା କିଆ, ଇରିଙ୍ଗାଁ ୱାନ୍‌ ଆକା କିନାନ୍ ।

9 ଜିସୁ ଇୟାୱିଜୁ ମାଟା ୱେନ୍‌ଜି ୱାରି ବିସୟତାନ୍ କାବା ଆତାନ୍‌, ମାରି ମାର୍‍ଜି ୱାନି ୱେନ୍‌କା ୱାଜିମାରି ଲୋକାଙ୍ଗ୍‌ ଇର୍ହାନ୍‌; "ନାନ୍ ମିଙ୍ଗିଁ ସତ୍‍ଇଜିନା, ଇସ୍ରାଏଲ୍‌ତୁ ବା ନିସା ପେରି ବିସ୍‌ବାସ୍‌ ପାଏ ଆଏତ୍ ।"

10 ମାରି, ପୋକ୍‍ତି ମାର୍‍ଇ ଲୋକୁ ଇନ୍‌ଡ୍ର ଡ଼େସି ୱାଜି ଗତିମୁରୁଲିଙ୍ଗ୍‍ ନେଗେନ୍‌ ଆତିକା ସୁଡ଼ୁତାର୍‌ ।

11 ଆବେଟ୍‌କୁ ଜିସୁ ନାଇନ୍‍ ଦର୍‌ତି ଗାଡ଼୍‌ତୁ ସର୍‌ଆନ୍‌, ମାରି ୱାନି ସିସୁର୍‍ ମାରି ନାଣ୍ତ ଲୋକୁ ୱାନିୱାଲେ ସଲ୍‌ସି ମାର୍‌ଆର୍‌ । 12 ୱାନ୍‌ ଗାଡ଼୍‌ ଲାକ୍‌ତୁ ଇତାନ୍‌, ସୁଡ଼ୁଦୁ, ଲୋକୁ ଅରେନ୍‍ ସାତି ଲୋକ୍‌ତିଙ୍ଗ୍‌ ଡାଣ୍ତିଆଦୁ ପିଣ୍ତଜୋ ତାସିମାର୍‍ଆର୍‍, ୱାନ୍‌ ନିଜେ ଆଇସିଦି ଅରେନ୍‍ନେ ମାରିସି, ମାରି ଆୟା ଆଇମା ରାଣ୍ତି; ମାରି, ଗାଡ଼୍‌ତି ନାଣ୍ତ ଲୋକୁ ତାନି ୱାଲେ ମାର୍‌ଆର୍‌ । 13 ତାନିଙ୍ଗ୍‌ ସୁଡ଼ୁଜୋ ପ୍ରବୁ ତାନି ମୁସ୍‌କୁ ଦୟାକିଜି ତାନିଙ୍ଗ୍‌ ଇର୍‌ଆନ୍‌, "ଆଡ଼୍‍ବାମା ।" 14 ମାରି, ୱାନ୍‌ ଲାକ୍‌ତୁ ସଲ୍‌ସି ଡାଣ୍ତିଆଦୁ ମୁଟ୍‌ତାନ୍‌, ମାରି ପିଣ୍ତିତି ମାର୍ହିକାର୍‍ ନିର୍‍ଆର୍‍, ୱାନ୍‌ ୱେର୍‌ତାନ୍‌, ଏ ମୁରୁଲି ନାନ୍ ଇଜିନା, ନିଙ୍ଗିଁଆ । 15 ଆବେଣାନ୍‍ ସାତିଲୋକ୍‌ ନିଙ୍ଗିଁଜି ବାସ୍‌ତାନ୍‌, ମାରି ୱାର୍‍ଗିଦେଙ୍ଗ୍‍ ଆସ୍‌ତାନ୍‌, ମାରି ୱାନ୍‌ ୱାନିଙ୍ଗ୍‌ ୱାନି ଆଇସି କିଦୁ ଆପିସ୍‍କିତାନ୍‍ ।

16 ଆବେନୁ ୱିଜେରେ ତିଲାତାର୍‌, ମାରି ମାପୁରୁଦି ଦନ୍ୟବାଦ୍‌ କିଜି କିଜି ଇନ୍‌ଡ୍ରେଙ୍ଗ୍‌ ଆସ୍‍ତାର, ମା ଲୋଇରାନ୍‌ ଅରେନ୍‍ ପେରି ବାବବାଦି ସତାମାନାନ୍‍ ମାରି ମାପୁରୁ ନିଜେଦି ଲୋକାଙ୍ଗ୍‌ ରକିୟା କିଦେଙ୍ଗ୍‌ ୱାତାମାନାନ୍‍ ।

17 ମାରି, ଜିସୁ ବିସୟ୍‌ତି ଇୟା ମାଟା ୱିଜୁ ଜିହୁଦା ଦେସ୍‌ ମାରି ୱିଜୁ ତରିନ୍‌ ୱେଙ୍ଗିଁତାତ୍‌ ।

18 ୱେନ୍‌କା ଡୁବନ୍‌ସିନି ଜୋହନତି ସିସୁର୍‍ ଇୟା ବିସୟ୍‌ ୱାନିଙ୍ଗ୍‌ ଇର୍ହାର୍‌ । 19 ଆବେନ୍‌ ଜୋହନ ନିଜେଦି ସିସୁରି ଲୋଇ ରିଏରିଙ୍ଗ୍‍ ଲାକ୍‌ତୁ କୁକ୍‍ସୋ ମାଲିକ୍‌ ଲାକ୍‌ତୁ ଇକା ଇଜି ପୋକ୍‌ତାନ୍‌, ଆମାକାନ୍‍ ୱାଦେଙ୍ଗ୍‌ ଆତା ମାର୍‌ଆର୍‌, ଆୟା ଲୋକୁ ନିନ୍‌ନେ ନୋ, ନା ମାପ୍‌ ଆଇୱାନିଙ୍ଗ୍‍ କାପ୍‍କିନାପ୍‍ ?

20 ଆୟା ଲୋକୁ ଜିସୁ ଲାକ୍‌ତୁ ସଲ୍‌ସି ଇର୍ହାର୍‌, "ଡୁବନ୍‌ସିନି ଜୋହନ ମାଙ୍ଗିଁ ନି ଲାକ୍‌ତୁ ଇୟାକା ଇଜି ପୋକ୍‌ତାମାନାନ୍‌, ଆମାକାନ୍‍ ୱାନିକା ଆତାମାରାତ୍‍, ଆୟା ଲୋକୁ ନୋ ନିନ୍‌, ନା ମାପ୍‌ ଆଇ ଲୋକ୍‌ତିଙ୍ଗ୍‌ କାପ୍‍କିନାପ୍‍ ?"

21 ଆୟା ୱେଡ଼ାଦୁ ୱାନ୍‌ ଏସୋ ରୋଗ୍‌, ବାଦା ମାରି ତାଗ୍‌ଇ ଆତ୍ମା ମାଣ୍‌କୁ ନେଗେଣ୍ତ୍‍ କିତାନ୍‌, ମାରି ଏସୋ କାଣାରିଙ୍ଗ୍‌ କାଣୁକୁ ସୁଡ଼ୁଦେଙ୍ଗ୍‍ ସାକ୍ତି ସିତାନ୍‌ । 22 ଜିସୁ ୱାରିଙ୍ଗ୍‌ ଇର୍ହାନ୍‌, "ମିର୍‌ ମିର୍‌ ଡ଼େସି ସଲ୍‌ସି ଆମାକା ୱିଜୁ ୱେନ୍‌ଜିନିଦେର୍‌ ମାରି ସୁଡ଼ୁଜିନିଦେର୍‍, ଆୟାକାୱିଜୁ ଜୋହନତିଙ୍ଗ୍‍ ୱେର୍‌ତୁ; କାଣା ଲୋକୁ ସୁଡ଼ୁଜିନାର୍‍, ମାରି ସଟା ଲୋକୁ ବୁଲାଜିନାର୍‌, କୁସ୍ଟରୋଗ୍‌ ଲୋକୁ ନେଗେଣ୍ତ୍‌ ଆଜିନାର୍‌, ବଇରା ଲୋକ୍‌ ୱେନ୍‍ଜିନାର୍‍, ସାତି ଲୋକୁ ନିଙ୍ଗିଁଜିନାର୍‍, କାକୁର୍ତି ଲୋକାମାନୁ ବା ନେଗି କାବୁର୍‌ ପ୍ରଚାର୍‌ କିଆଇଆଜିନାତ୍‍; 23 ମାରି, ଆମାକାନ୍‍ ନାଙ୍ଗିଁ ନାମ୍‍ଏନ୍‍, ୱାନ୍‌ ଦନ୍ୟ ।"

24 ଜୋହନତି ସିସୁର୍‍ ସର୍‌ଇ ୱେନ୍‌କା ୱାନ୍‌ ଜୋହନତି ବିସୟ୍‌ତାନ୍‌ ଲୋକାଙ୍ଗ୍‌ ଇନ୍‌ଡ୍ରେଙ୍ଗ୍‌ ଆସ୍‌ତାନ୍‌, ମିର୍‌ ଇନିକା ସୁଡ଼ୁଦେଙ୍ଗ୍‍ ସିମ୍ରା ବାଡିଦୁ ସତିସର୍‌ଇ ମାର୍‌ଇଦେର୍‌ ? ଇନିକା ଗାଲିଦାନ୍‍ ଦୁଙ୍ଗ୍‍ଁଜିମାନି ଉଣ୍ତ୍ରି ଦେର୍‍ ନାଡ଼ା ? 25 ଆୟାକା ଆଏତିଙ୍ଗାଁ ମିର୍‌ ଇନିକା ସୁଡ଼ୁଦେଙ୍ଗ୍‍ ସତିସର୍‍ଇ ମାର୍‍ଇଦେର୍‍ ? ଇନିକା ଦାରାଦି ଆଙ୍ଗିଁ ଆରାତିମାନି ଅରେନ୍‍ ଲୋକ୍‌ତିଙ୍ଗ୍‌ ? ସୁଡ଼ୁଦୁ, ଆମାକାର୍‌ ଦାରାଦି ଆଙ୍ଗିଁ ଆରାନାର୍‍ ମାରି ସୁକ୍‌ତାନ୍‌ ଜିନାର୍‌, ୱାର୍‌ ରାଜାଦି ମେଡ଼୍‍ତୁ ତେବାନାର୍‌ । 26 ନାଙ୍ଗିଁ ଇନ୍‌ଡ୍ରୁ, ଆୟାକା ଆଏତିଙ୍ଗାଁ ଇନିକା ସୁଡ଼ୁଦେଙ୍ଗ୍‍ ସହସୋ ସର୍‍ଇମାର୍‍ଇଦେର୍‍ ? ଇନିକା ଅରେନ୍‍ ବାବବାଦିଙ୍ଗ୍‍ନୋ ? ନାନ୍ ମିଙ୍ଗିଁ ସତ୍‌ ଇଜିନା, ବାବବାଦି ମାଣାନ୍‌ ନାଣ୍ତ ପେରିୱାନିଙ୍ଗ୍‌ । 27 ଜୋହନତି ବିସୟ୍‌ତାନ୍‌ ସାସ୍ତ୍ରଦୁ ରାସାତାମାନାତ୍‌, ମାପୁରୁ ଇର୍ହାନ୍‌, ମାପ୍‌ ନିଜେ ଦୁତ୍‍ତିଙ୍ଗ୍‍ ମି ଆଗ୍‌ଡ଼ି ପୋକ୍‍ତାମାନାପ୍‍, ୱାନ୍‌ ମି ଆଗ୍‌ଡ଼ି ମି ସାରି ତିଆର୍‌ କିନାନ୍‌, ଇୟାକାନ୍‌ ଆୟା ଜୋହନ । 28 ନାନ୍ ମିଙ୍ଗିଁ ସତ୍‌ ଇଜିନା, "ଆଇମାମାନୁ ଜନମ୍‌ଆତି ଲୋଇରାନ୍‌ ଜୋହନ ମାଣାନ୍‌ ଆମାକାନ୍‍ ପେରିକାନ୍‌ ସିଲେନ୍‌; ଆତିଙ୍ଗ୍‌ବା ମାପୁରୁଦି ରାଜିଦୁ ଆମାକାନ୍‍ ଇସ୍ରିକାନ୍‌, ୱାନ୍‌ ଜୋହନତି ମାଣାନ୍‌ ପେରିକାନ୍‌ ।"

29 ✝ଆମାକାର୍‌ ଇୟାୱିଜୁ ମାଟା ୱେନ୍‌ଜି ମାର୍‌ଆର୍‌, ୱାର୍‌, ବିସେସ୍‌କିଜି ସିସ୍‍ଟୁ ଲୋସ୍‌ନିକାର୍‌, ମାପୁରୁଦି ଟିକ୍‌ ଦାବିୱିଜୁ ପୁରାକିଜି ଜୋହନତି ମାଣ୍‌କୁ ଡୁବନ୍‌ ଅତାମାର୍‍ଆର୍‍ । 30 ମାତର୍‌ ପାରୁସିର୍‌ ନି ଦାର୍ମୁଗୁରୁର୍‌ ୱାରି ଜିବନ୍‌ ଉଣ୍ତିଙ୍ଗ୍‌ ମାପୁରୁଦି ଉଦେସ୍‌ତିଙ୍ଗ୍‌ ମାନାଏଣ୍‍ଗା ଜୋହନ ମାଣ୍‌କୁ ଡୁବନ୍‌ ଅଏତା ମାର୍‌ଆର୍‌ ।

31 ଜିସୁ ମାରି ଇର୍‌ଆନ୍‌, ଆରିଙ୍ଗ୍‌ ନାନ୍ "ଇୟା ଆଜିକାଲ୍‍ତି ଲୋକାଙ୍ଗ୍‌ ଏମେତାନିୱାଲେ ତୁସ୍‍ନା, ମାରି ୱାର୍‌ ଏୱାଜା ?" 32 ଏମେ କଡ଼ର୍‌ ସାତା ସାଉକାଦୁ ବାସ୍‌ସି ନିଜେନିଜେ କୁକ୍‌ସି ଇନାର୍‌, ମାପ୍‌ ମି ଲାକ୍‌ତୁ ପିରଡ଼ି ଉକୁତାପ୍‍, ମିର୍‌ ଗାତ୍‍ଏତିଦେର୍‍, ମାପ୍‌ ଦୁକ୍‍ତି ପାଟା ପାରିତାପ୍‍, ମିର୍‌ ଆଡ଼ାବାଇତିଦେର୍‍, ୱାର୍‌ ୱାରି ୱାଜା । 33 ଇରିଙ୍ଗ୍‌ ଡୁବନ୍‌ସିନି ଜୋହନ ୱାଜି ରୁଟି ତିନ୍‍ଏତାନ୍‍ ମାରି ଅଙ୍ଗୁର୍‍ରସ୍‍ ଉଣୁଏତାନ୍‍, ମାରି ମିର୍‌ ଇର୍‍ଇଦେର୍‍, ୱାନ୍‌ ଦୁବାକାସ୍ତିକାନ୍‍ । 34 ମନୁସ୍ୟପୁତ୍ର ୱାଜି ଉଣାନ୍‌ ତିନାନ୍‍, ମାରି ମିର୍‌ ଇଜିନିଦେର୍‌, ସୁଡ଼ୁଦୁ, ୱାନ୍‌ ଅରେନ୍‍ ପେଟୁ ନି ମଦୁଆ, ସିସ୍‍ଟୁ ଲୋସ୍‍ନିୱାରି ମାରି ପାପି ଲୋକା ତଡ଼୍‍ ।

35 ମାତର୍‌ ଏମେକାର୍‌ ମାପୁରୁଦି ବୁଦିଦିଙ୍ଗ୍‌ ମାନାନାର୍‌, ୱାରି ଜିବନ୍‌ତୁ ତାନି ସତ୍‌ ବିସୟ୍‌ ପାର୍‍ମାଣ୍‍ଆତାନ୍‍ ।

36 ମାରି, ପାରୁସିର୍‌ ମାଣାନ୍‌ ଅରେନ୍‍ ଜିସୁଙ୍ଗୁଁ ୱାନିୱାଲେ ଉଣ୍ତେଙ୍ଗ୍‌ କୁକ୍‍ତାନ୍‍ । ଆବେନ୍‌ ୱାନ୍‌ ପାରୁସିର୍‌ ଇନ୍‌ଡ୍ର ଡ଼ୁଗୁଜି ଉଣ୍ତେଙ୍ଗ୍‌ ବାସ୍‌ତାନ୍‌ । 37 ✝ମାରି ସୁଡ଼ୁଦୁ, ଆୟା ଗାଡ଼୍‌ତୁ ଅରେତ୍‌ ପାପି ଆଇମା ମାର୍‌ଆତ୍‌; ଜିସୁ ଆୟା ପାରୁସିର୍‌ ଇନ୍‌ଡ୍ର ଉଣ୍ତେଙ୍ଗ୍‌ ବାସ୍‍ତା ମାର୍‌ଆନ୍‌, ଇୟାକା ନେସ୍‌ସି ୱାଦ୍‌ ଉଣ୍ତ୍ରି ସାଟିଦୁ ବାସ୍‌ନା ନିୟୁ ତାତାତ୍‍ଦୋ, 38 ୱେନ୍‌କା ତର୍‍ନ୍‍ ୱାନି ପାଦାମ୍‌ ଲାକ୍‌ତୁ ନିଲ୍‍ଜି ଆଡ଼୍‍ବାଜି ଆଡ଼୍‍ବାଜି କାଣେର୍‍ ଏର୍‍ତାନ୍‍ ୱାନି ପାଦାମ୍‌ ନୋର୍‍ଜି ନିଜେ ତାଲାଦି କୁକୁଟିଦାନ୍‍ ତେଲ୍‍ଦେଙ୍ଗ୍‍ ଆସ୍‌ତାତ୍‌, ମାରି ୱାନି ପାଦାମ୍‍ତିଙ୍ଗ୍‍ ନୋଣ୍ତ୍‍ନିୱାଲେ ଆୟା ବାସ୍‌ନା ନିୟୁ ଉସ୍‌ତେଙ୍ଗ୍‌ ଆସ୍‌ତାତ୍‌ । 39 ଆକା ସୁଡ଼ୁଜି, ଆମା ପାରୁସି ଜିସୁଙ୍ଗୁଁ କୁକ୍‌ତା ମାର୍‌ଆନ୍‌, ୱାନ୍‌ ମୋନ୍‌ତୁ ମୋନ୍‌ତୁ ଇର୍‌ଆନ୍‌, "ଇକାନ୍‌ ଜଦି ବାବବାଦି ଆନିମାନିକାଇରିଙ୍ଗ୍‌, ଆରିଙ୍ଗ୍‌ ୱେନିଙ୍ଗ୍‌ ଜେ ମୁଟ୍‌ସିନାତ୍‌, ୱାଦ୍‌ ଏଦ୍‌ ମାରି ଏଣ୍ତେସ୍‍ମାରି ଆଇମା, ୱାଦ୍‌ ଜେ ପାପି ଲୋକ୍‍ ଇକା ନେସ୍‌ତାନ୍‌ ମାନ୍ଦି ।"

40 ଜିସୁ ୱାନିଙ୍ଗ୍‌ ଇର୍‌ଆନ୍‌, ସିମୋନ୍‍, ନିଙ୍ଗିଁ ଉଣ୍ତ୍ରି ମାଟା ଇନ୍‌ଡ୍ରେଙ୍ଗ୍‌ ମାନାତ୍‌ । ୱାନ୍‌ ଇର୍‌ଆନ୍‌, "ଗୁରୁ ଇନ୍‌ଆଁ ।"

41 ଅରେନ୍‍ ପେରି ମାଜନ୍‌ ଲୋକୁ ଲାକ୍‌ତୁରାନ୍‌ ରିଏର୍‌ ଲୋକୁ ରୁଣୁ ଅତାମାର୍‍ଆର୍‍; ଅରେନ୍‍ ପାସ୍‍ସୋ ଡାବୁଙ୍ଗ୍‌* ମାରି ଅରେନ୍‍ ପସାସ୍‌ ଡିନାରି ରୁଣୁ ତାତାମାର୍‍ଆର୍‍ । 42 ଡ଼େସି ରୁଣୁ ସିଦେଙ୍ଗ୍‍ ୱାରିଙ୍ଗ୍‌ ଇନିକା ସିଲେତିଙ୍ଗ୍‍ ୱାନ୍‌ ରିଏରି ରୁଣୁ ଡ଼ିସ୍‍ତାସିତାନ୍‍ । ଏନ୍‌ ୱାରି ବାଣାନ୍‍ ଏନ୍‌ ୱାନିଙ୍ଗ୍‌ ନାଣ୍ତ ଜିବନ୍‍ନୋନାନ୍‍ ?

43 ସିମୋନ୍‍ ଇର୍‌ଆନ୍‌, "ନାନ୍ ଅଡ଼୍‌ବିଜିନା," ୱାନ୍‌ ଆମାୱାନିନ୍ଦି ନାଣ୍ତ ରୁଣୁ ଡ଼ିସ୍‍ତାନ୍‍, ୱାନ୍‌ ୱାନିଙ୍ଗ୍‌ ଇର୍‌ଆନ୍‌, "ନିନ୍‌ ଟିକ୍‍ ୱେର୍‌ତି ।" 44 ମାରି, ୱାନ୍‌ ଆୟା ଆଇମାଦି ଉଣ୍ତିଙ୍ଗ୍‌ ମୋକମ୍‌ ଡ଼େପ୍‍ସି ସିମୋନ୍‍ତିଙ୍ଗ୍‌ ଇର୍ହାନ୍‌, "ଇୟା ଆଇମାଦିଙ୍ଗ୍‍ ସୁଡ଼ୁଜିନି ? ନାନ୍ ମି ଇନ୍‌ଡ୍ର ୱାତା ନିନୁ ନା ପାଦାମ୍‍ତି ଉଣ୍ତିଙ୍ଗ୍‌ ଏର୍‌ ସିଏତି, ମାତର୍‌ ଇୟାକାତ୍‍ କାଣେର୍‍ ଏର୍‍ତାନ୍‍ ନା ପାଦାମ୍‍ତିଙ୍ଗ୍‍ ନୋର୍‍ଜି ନିଜେ କୁକୁଟିଦାନ୍‍ ତେଲିତାତ୍‍ । 45 ନିନ୍‌ ନାଙ୍ଗିଁ ନଣ୍ତ୍‍ଜି କୁକ୍‍ସୋ ଅଇତି, ମାତର୍‌ ନାନ୍ ଲୋଇ ୱାତିୱାଲେରାନ୍‍ ଇୟାକାତ୍‍ ନା ପାଦାମ୍‌ ନଣ୍ତ୍‍ଦେଙ୍ଗ୍‍ ଡ଼ିସ୍‍ଏତ୍‍ । 46 ନିନ୍‌ ନା ତାଲାଦୁ ନିୟୁ ଉସ୍‍ଏତି, ମାତର୍‌ ଇୟାକାତ୍‍ ନା ପାଦାମ୍‍ତୁ ବାସ୍‌ନା ନିୟୁ ଉସ୍‍ତାତ୍‍ । 47 ଇୟାଉଣ୍ତିଙ୍ଗ୍‌ ନାନ୍ ନିଙ୍ଗିଁ ଇଜିନା, ତେନି ୱିଜୁ ପାପ୍‌ କେମା ଆତାମାନାତ୍‌, ଇରିଙ୍ଗ୍‌ ୱାଦ୍‌ ନାଣ୍ତ ଜିବନ୍‌ ନତାତ୍‍; ମାତର୍‌ ଏଙ୍ଗ୍‌ ଅଲପ୍‍ କେମା ସିଆଇ ଆନାତ୍‌, ୱାନ୍‌ ଅଲପ୍‍ ଜିବନ୍‍ନୋନାନ୍‍ ।"

48 ମାରି, ଜିସୁ ଆୟା ଆଇମାଦିଙ୍ଗ୍‍ ଇର୍‌ଆନ୍‌, "ନି ପାପ୍‌ ୱିଜୁ କେମା ଆତାମାନାତ୍‌ ।"

49 ଆବେନୁ ୱାନିୱାଲେ ଉଣ୍ତେଙ୍ଗ୍‌ ବାସ୍‍ତି ମାର୍‍ଇ ଲୋକୁ ମୋନ୍‌ତୁ ମୋନ୍‌ତୁ ଇନ୍‌ଡ୍ରେଙ୍ଗ୍‌ ଆସ୍‌ତାର୍‌, ପାପ୍‌ ବା କେମା କିଜିନାନ୍‍ ଜେ ଇକାନ୍‍ ଏନ୍‌ ?

50 ମାତର୍‌ ଜିସୁ ଆୟା ଆଇମାଦିଙ୍ଗ୍‍ ଇର୍‌ଆନ୍‌, "ନି ବିସ୍‌ବାସ୍‌ ନିଙ୍ଗିଁ ରକିୟା କିତାମାନାତ୍‌, ସାନ୍ତିଦାନ୍‌ ସାଙ୍ଗ୍‍ଆ ।"