1 ଅର୍‍ଲେନ୍‍ ଏସ ଲୋକୁ ପାରୁସିର୍‌ ମାରି ସାସ୍ତ୍ରିର୍‌ ଜିରୁସାଲମ୍‌ତାନ୍‌ ୱାଜି ଜିସୁଙ୍ଗୁଁ ୱେନ୍‌ବାତାର୍‌, 2 "ମା ପୁର୍ବେଦିଡକ୍‌ରାଦାଦାର୍‌ ଆମାୱିଜୁ ନିତିନିୟମ୍ ସିତା ସର୍‌ଆମାନାର୍‌, ନି ସିସୁର୍‍ ଏନ୍ଧା ଆୟାୱିଜୁ ମାନାଏଜିନାର୍‌ ? ଉଣି ଆଗ୍‍ଡ଼ିନେ ମା ନିତିନିୟମ୍ ନେଗେନ୍‍କିଜି କିକୁ ନର୍‌ବାଏଣ୍ତା ଏନ୍ଦା ଉଣୁଜିନାର୍‌ ।"

3 ଜିସୁ ୱାରିଙ୍ଗ୍‌ ଇର୍ହାନ୍‌, ମିର୍‌ ଏନ୍ଧା ମାପୁରୁଦି ମାଟା ମାନାଏଜି ନିଜେଦି ନିତିନିୟମ୍ ଇସାବ୍‌ତାନ୍‌ ପାଣି କିଜିନିଦେର୍‌ ? 4 ମାପୁରୁ ତୋ ୱେର୍‌ତାମାନାନ୍‌, ବୁବା ୟାୟାଏଙ୍ଗ୍‍ ମାନାଦୁ, ଏନ୍‌ ନିଜେଦି ବୁବା ନି ୟାୟାଙ୍ଗ୍‌ ଆନାଦୁରିଆ ସିନାନ୍‌, ୱାନ୍‌ ସାନି ଦଣ୍ଡ୍‌ ପୟ୍‌ନାନ୍‌ । 5 ମାତର୍‌ ମିର୍‌ ଇଜିନିଦେର୍‌, ଆମା ଲୋକୁ ବୁବା ନି ୟାୟାଙ୍ଗ୍‌ ଇନାନ୍‌, ନା ମାଣ୍‌କୁ ଆମାକା ମି ଉଣ୍ତିଙ୍ଗ୍‌ ଆତାମାନାତ୍‌, ଆକା ପ୍ରବୁଦି ଉଦେସ୍‍ତାନ୍‍ ପୁଜା ସିଆତାମାନାତ୍‌ । 6 ୱାନ୍‌ ମାରି ନିଜେଦି ବୁବା ନି ୟାୟାରିଙ୍ଗ୍‌ ସମ୍ମାନ୍‌ କିଏନ୍‌ । ଇୟାୱାଜା ଇସାବ୍‌ତାନ୍‌ କିଜି ୱାଜି ମିର୍‌ ମାପୁରୁଦି ମାଟା ମାନାଏଜି ନିଜେଦି ସିକିୟା ଇସାବ୍‌ତାନ୍‌ ବୁଲାଜିନି । 7 ଏ ସାଲାକିଦି ଦାର୍ମୁ ଦଲ୍‌, ଜିସାଇୟ ମି ବିସୟ୍‌ତାନ୍‌ ଜତାର୍ତ ୱାଜା ଇୟା ବାବବାଣି ୱେର୍‌ତାମାନାନ୍‌ ।

8 ମାପୁରୁ ଇଜିନାନ୍‌, ଇୟା ଲୋକୁ କେବଲ୍‌ ମାଟାଦାନ୍‌ ନାଙ୍ଗିଁ ସମ୍ମାନ୍‌ କିନାର୍‌,

ମାତର୍‌ ୱାରି ଜିବନ୍‌ ନା ମାଣାନ୍‌ ନାଣ୍ତ ଆକ ।

9 ନାଙ୍ଗିଁ ୱାର୍‌ ଆମା ଆରାଦନା କିନାର୍‌, ଆକା ପାଣିସିଇକା,

ଇରିଙ୍ଗ୍‌ ୱାର୍‌ ଲୋକୁ ତିଆର୍‌ କିତି ନିୟମ୍‌କୁ ନା ମାଟା ଇଜି ୱେର୍‌ସିନାର୍‌ ।

10 ତାନେୱେନ୍‌କା ଜିସୁ ଲୋକାଙ୍ଗ୍‌ ଲାକ୍‌ତୁ କୁକ୍‌ସି ୱାରିଙ୍ଗ୍‌ ଇର୍ହାନ୍‌, "ୱେନ୍‌ଡ୍ରୁ ମାରି ବୁଜାଦୁ; 11 ଲୋକା ୱେୟୁ ସିଜି ଆମାକା ଲୋଇ ଡ଼ୁଗୁନାତ୍‌, ଆକା ୱାନିଙ୍ଗ୍‌ ଅପବିତ୍ର କିଏତ୍‌; ମାତର୍‌ ୱେୟୁଦାନ୍‌ ଆମାକା ସନାତ୍‌, ଆକା ୱାନିଙ୍ଗ୍‌ ଅପବିତ୍ର କିନାତ୍‌ ।"

12 ନାସ୍ତିୱାଲେ ସିସୁର୍‍ ଜିସୁଦି ଲାକ୍‌ତୁ ୱାଜି ଇର୍ହାର୍‌, "ନି ମାଟା ୱେନ୍‌ଞ୍ଜି ପାରୁସିର୍‌ ରିସା ଆତାମାନାର୍‌, ଇକା ଇନିକା ନିନ୍‌ ନେସେଇ ?"

13 ଜିସୁ ଇର୍ହାନ୍‌, "ଏମେ ମାରାକ୍‌ ୱିଜୁ ନା ମୁସ୍‌କୁପୁର୍‌ତି ବୁବା ଉର୍‍ଏନ୍‌, ଆୟାୱିଜୁ ମାଗ୍‌ନେ ସନେ । 14 ✝୧୫:୧୪ ଲୁକ ୬:୩୯.ୱାରିଙ୍ଗ୍‌ ଡ଼ିସ୍‌ସୋ ସିଦୁ, ୱାର୍‌ କାଣାର୍‌, ଆଇ କାଣାରି ସାରିତର୍‌ନିକାର୍‍; ମାରି, ଅରେନ୍‍ କାଣା ମାରି ଅରେନ୍‍ କାଣାଦିଙ୍ଗ୍‌ ସାରି ତର୍‌ନା ସିନାନ୍‌, ଆର୍‌ତିଙ୍ଗ୍‌ ରିଏର୍‌ବା ଗୁଟାଦୁ ଆର୍‌ନାର୍‌ ।"

15 ଆବେଟ୍‌ ପିତର୍‌ ୱାନିଙ୍ଗ୍‌ ଇର୍ହାନ୍‌, "ଇୟା କାତା ମାଙ୍ଗିଁ ନେସ୍‌ନିୱାଜା ବୁଜାକିଜ ସିଦା ।"

16 ଜିସୁ ୱାରିଙ୍ଗ୍‌ ଇର୍ହାନ୍‌, "ମିର୍‌ ବା ଇନିକା ଇୟାସାନ୍ଦି ବୁଜାଦେଙ୍ଗ୍‌ ଆଟ୍‍ଏଜିନିଦେର୍‍ । 17 ନିସବା ବୁଜାଦେଙ୍ଗ୍‌ ଆଟ୍‍ଏଜିନିଦେର୍‍ ? ଆମାକା ଇନିକା ୱେୟୁଦୁ ଡ଼ୁଗୁନାତ୍‌, ଆକା ପଟା ଲୋଇ ସନାତ୍‌ ମାରି ମେନ୍ଦଲ୍‌ତାନ୍‌ ସନା ସନାତ୍‌ । 18 ✝୧୫:୧୮ ମାତିଉ ୧୨:୩୪.ମାତର୍‌ ଆମାୱିଜୁ ବିସୟ୍‌କୁ ୱାନି ୱେୟୁଦାନ୍‌ ଆତେରେ ୱାନାତ୍‌, ଆକା ୱାନି ଜିବନ୍‌ତାନ୍‌ ସନାତ୍‌, ଆକାନେ ଲୋକତିଙ୍ଗ୍‌ ଅପବିତ୍ର କିନାତ୍‌ । 19 ଇରିଙ୍ଗ୍‌ ୱାନି ଜିବନ୍‌ତାନ୍‌ ତାଗ୍‌ଇସିନ୍ତା, ସାୟାମାର୍‌ଗାଡାକ୍‌ନିକା, ଦାରିପାଣି, ତାଗ୍‌ଇପାଣି, ଡଙ୍ଗାଁ, ମିସ୍‌ମାଟା ୱେର୍‌ନିକା ମାରି ନିନ୍ଦାକିନିକା ନାଣ୍ତ ରକମ୍‌ତି ନିୟମ୍‌ ସିଲି ପାଣି କିନାନ୍‌ । 20 ଇୟାୱିଜୁ ବିସୟ୍‌ ଲୋକତିଙ୍ଗ୍‌ ଅପବିତ୍ର କିନାତ୍‌ । ମାତର୍‌ ନିତିନିୟ୍‍ତାନ୍‍ କିୟୁ ନର୍‌ବାଏଣ୍‌ଗା ଉଣିକା ଆକା ଲୋକ୍‌ତିଙ୍ଗ୍‌ ଅପବିତ୍ର କିଏତ୍‌ ।"

21 ଜିସୁ ଆୟା ବାଡି ଡ଼ିସ୍‌ତାନ୍‌ନୋ ସୋର ନି ସିଦନ୍‍ ରାଜିଦି ଗାଡ଼୍‌କାଙ୍ଗ୍‌ ସୋର୍ହାନ୍‌ । 22 ଆବେନୁ ତେବାଜି ମାନି ଅରେତ୍‌ କିଣାନିୟା ଆଇମା ଜିସୁଦି ଲାକ୍‌ତୁ ୱାଜି ଇର୍ହାତ୍‌, "ଏ ପ୍ରବୁ, ଦାଉଦତି ମାରିନ୍‌, ନାଙ୍ଗିଁ ଦୟା କିଆ । ନା ଗାଡ଼ିଙ୍ଗ୍‌ ଦୁବା ଆସ୍‌ତାମାନାତ୍‌ ମାରି ୱାଦ୍‌ ନାଣ୍ତ କାସ୍ଟୁ ବଗାଜିନାତ୍‌ ।"

23 ମାତର୍‌ ଜିସୁ ତାନେଙ୍ଗ୍‌ ପଦେକ୍‌ ମାଟାବା ଇନ୍‌ଏତାନ୍‌ । ମାରି ୱାନି ସିସୁର୍‍ ୱାଜି ୱାନିଙ୍ଗ୍‌ ମାଡ଼ିସ୍‌କିଜି ଇନ୍‌ଡ୍ରେଙ୍ଗ୍‌ ଆସ୍‌ତାର୍‌, "ତାନେଙ୍ଗ୍‌ ବେଗି ସନ୍‌ଡ଼୍ରେଙ୍ଗ୍‌ ଇନିଆ, ସୁଡୁଆ ୱାଦ୍‌ ଏଣ୍ତେସ୍‌ ଆଉଲି ଆଜି ମା ୱେନ୍‌କା ୱେନ୍‌କା ୱାଜିନାତ୍‍ ।"

24 ଜିସୁ ଇର୍ହାନ୍‌, "ନାନ୍ ଇସ୍ରାଏଲ୍‌ କୁଟୁମ୍‌ତି ମୁରିତିମାନି ମେଣ୍ତେଆଙ୍ଗାଁ ଡ଼ିସ୍‌ତିଙ୍ଗ୍‌ ମାରି ଏ ଲାକ୍‌ତୁ ରେଏ ।"

25 ଆଇମା ୱାଜି ଜିସୁଦି କାଲ୍‌କା ଆଡ୍‍ଗି ମେଣ୍ତେଙ୍ଗ୍‍ ଗଟ୍‌କିଜି ଇର୍ହାତ୍‌, "ଏ ପ୍ରବୁ, ନାଙ୍ଗିଁ ଦୟା କିଆ ।"

26 ଜିସୁ ଇର୍ହାନ୍‌ । "ଇରିଙ୍ଗ୍‌ କଡ଼ରି ବାଟା ଖାଦି ଅସି ନୁକୁଡ଼ିଆଙ୍ଗାଁ ମାନୁ ପୋକ୍‍ନିକା ନେଗେତ୍‌ ସିଲେ ।"

27 ଆଇମା ଇର୍ହାତ୍‌, "ଆକା ସତ୍‌ ପ୍ରବୁ, ମାତର୍‌ ନୁକୁଡ଼ିଙ୍ଗ୍‌ ବା ଟେବୁଲ୍‌ ଆଡ୍‍ଗି ଆର୍‌ନି ମାଲିକ୍‌କା ସକ୍‌ଡ଼ି ଉନ୍‌ଣ୍ତେ ପଇନେ ।"

28 ଜିସୁ ତାନିଙ୍ଗ୍‌ ଇର୍ହାନ୍‌, "ନିନୁ ଅରେତ୍‌ ଡାଟ୍‌ତି ବିସ୍‌ବାସ୍‌ତି । ନି ବଦା ପୁରା ଆନାତ୍‌ ।" ଆୟା ଦ୍ରାପେନେ ତାନି ଗାଡ଼୍‌ସି ନେଗେନ୍‌ ଆତାତ୍‌ ।

29 ଜିସୁ ଆବେଟ୍‌ତାନ୍‌ ଡ଼ିସ୍‌ତାନ୍‌ନୋ ଗାଲିଲି ଗାଡା ଲାକ୍‌ତୁ ୱାତାନ୍‌, ମାରି ଗରନ୍‌ ମୁସ୍‌କୁ ସୋର୍ହାନ୍‌ନୋ ଆବେନ୍‌ ବାସ୍‌ତାନ୍‌ । 30 ନାଣ୍ତ ଲୋକୁ ୱାଜି ୱାନି ଲାକ୍‌ତୁ ଉଣ୍ତାତାର୍‌ । ୱାର୍‌ ଚଟା, ଗୁଲା, କାଣା, ବୁଲାଦେଙ୍ଗ୍‌ ଆଟ୍‍ଇକାର୍‍ ମାରି ନାଣ୍ତ ନବ୍‌ଆତି ଲୋକାଙ୍ଗ୍‌ ତାସି ଜିସୁଦି ପାଦାମ୍‌ ଆଡ୍‍ଗି ଇଟ୍‌ତାର୍‌ ମାରି ଜିସୁ ଆୟା ୱିଜେରିଙ୍ଗ୍‌ ନେଗେନ୍‌ କିତାନ୍‌ । 31 ଗୁଲାର୍‌ ଜେ ୱାର୍‌ଗିଜିନାର୍‌, କିକୁକାଲ୍‌କୁୱାର୍‌ତିକାର୍‌ବା ନେଗେନ୍‌ ଆତାର୍‌, ଚଟାର୍‌ ବୁଲାଜିନାର୍‌ ମାରି କାଣାର୍‌ ସୁଡ଼୍‌ଦେଙ୍ଗ୍‌ ଆଟ୍‌ସିନାର୍‌, ଇକା ସୁଡ଼ୁଜି ଲୋକୁୱିଜେର୍‌ କାବା ଆତାର୍‌, ମାରି ଇସ୍ରାଏଲ୍‌ତି ମାପୁରୁଙ୍ଗୁଁ ଦନ୍ୟବାଦ୍‌ କିତାର୍‌ ।

32 ଜିସୁ ନିଜେଦି ସିସୁରିଙ୍ଗ୍‌ ଲାକ୍‌ତୁ କୁକ୍‌ସି ଇର୍ହାନ୍‌, "ଇୟା ଲୋକା ଉଣ୍ତିଙ୍ଗ୍‌ ନା ଜିବନ୍‌ ଆଡ୍‌ବାଜିନାତ୍‌, ଇରିଙ୍ଗ୍‌ ଇୟାକାର୍‌ ମୁନେନ୍‌ ଆତାତ୍‌ନି ନା ୱାଲେ ମାନାର୍‌ ମାରି ଇୟାୱାରି ମାନୁ ଇନିକା ଉନ୍‌ଣ୍ତେଙ୍ଗ୍‌ ସିଲେତ୍‌ । ୱାର୍‌ ଉଣୁଏଣ୍‌ଗା ଇବେଟ୍‌କୁ ସୋଲିର୍‌, ଇୟା ମାଟା ନାନ୍ ଅଡ଼୍‌ବିଏ; ଇରିଙ୍ଗ୍‌ ଡ଼େସିସୋନିୱାଲେ ସାରିଦୁ ୱାର୍‌ ୱାନ୍ଦ୍‍ନା ସନାର୍‌ ।"

33 ସିସୁର୍‍ ୱାନିଙ୍ଗ୍‌ ୱେନ୍‌ବାତାର୍‌, "ଇୟା ସିମ୍ରା ବାଡିଦୁ ନିସ ଲୋକାଙ୍ଗ୍‌ ଉଟ୍‍ପିସ୍‍କିଦେଙ୍ଗ୍‍ ଇଜି ମାଡ୍‌ ଏମେଟ୍‌କୁ ନାଣ୍ତ କାଦି ପଇନିକା ?"

34 ଜିସୁ ୱାରିଙ୍ଗ୍‌ ୱେନ୍‌ବାତାନ୍‌, "ମି ଲାକ୍‌ତୁ ଏସଗୋଟା ରୁଟିଙ୍ଗ୍‌ ମାନେ ?"

ୱାର୍‌ ଇର୍ହାର୍‌, "ସାତ୍‍ଗୋଟା ରୁଟିଙ୍ଗ୍‌ ମାରି ଏସ ଇସ୍ରି ମିନ୍‌କୁ ମାନେ ।"

35 ଜିସୁ ଲୋକାଙ୍ଗ୍‌ ବୁମି ମୁସ୍‌କୁ ବାସ୍‌ତେଙ୍ଗ୍‌ ଆଦେସ୍‌ ସିତାନ୍‌ । 36 ତାନେୱେନ୍‌କା ୱାନ୍‌ ଆୟା ସାତଗଟା ରୁଟି ମାରି ମିନ୍‌କୁ ଅସି ମାପୁରୁଙ୍ଗୁଁ ଦନ୍ୟବାଦ୍‌ ସିତାନ୍‌ ମାରି ଆୟାୱାନିକାଙ୍ଗ୍‌ ମକେଙ୍ଗ୍‌ ମକେଙ୍ଗ୍‌ କିଜି ରୁକ୍‍ସି ସିସୁରିଙ୍ଗ୍‌ ସିତାନ୍‌ । ସିସୁର୍‍ ଆକା ଲୋକାଙ୍ଗ୍‌ ବାଟାକିତାସିତାର୍‌ । 37 ମାରି, ୱିଜେରେ ତିନ୍‌ଞ୍ଜି ପଟା ପାଜିତାର୍‌ ମାରି ଡ଼ିକ୍‌ତି ମକାରୁଟିଙ୍ଗ୍‌ ଏସ ଏଜିତେ, ଆକା ସିସୁର୍‍ ସାତଗଟା ଡାଡ଼ିଆଙ୍ଗାଁ ବର୍ତି କିତାର୍‌ । 38 ଉଟି ଲୋକୁ, ଆଇମେକାଙ୍ଗ୍‌ ନି କଡ଼ରିଙ୍ଗ୍‌ ଡ଼ିସ୍‌ସି ନାଲ୍‌ଗି ହାଜାର୍‌ ମେମାରୁଙ୍ଗୁଁ ମାର୍ହାର୍‌ ।

39 ତାନେୱେନ୍‌କା ଜିସୁ ୱିଜୁ ଲୋକାଙ୍ଗ୍‌ ପୋକ୍‌ତାନ୍‌ନୋ ଡଙ୍ଗାଁଦୁ ଏକ୍‌ତାନ୍‌ନୋ ମଗଦାନ୍‌ ରାଜିଦୁ ୱାତାନ୍‌ ।