1 ଇୟାୱିଜୁ ସିକିୟା ସିତି ୱିସ୍‌ତି ୱେନ୍‌କା ଜିସୁ ସିସୁରିଙ୍ଗ୍‌ ଇର୍ହାନ୍‌, 2 "ମିର୍‌ ନେସ୍‌ନିଦେର୍‌, ନିସ୍ତାର୍‌ ପଣ୍ତୟ୍‌ ଆଦେଙ୍ଗ୍‌ ମାରି ରିନେନ୍‌ ମାନାତ୍‌ । ନାସ୍ତିୱାଲେ ମନୁସ୍ୟପୁତ୍ର କ୍ରୁସଦୁ ସାନି ଉଣ୍ତିଙ୍ଗ୍‌ ସପ୍ରେଆନାନ୍‌ ।"

3 ଆୟା ସମୟ୍‍ତୁ ପେରି ଜାଜକର୍‌ ମାରି ଆଇ ଜିହୁଦି ନେତାର୍‌ ୱିଜେରିଙ୍ଗ୍‌ପେରି ଜାଜକ କୟାପାଦି ଇଲୁ ଦୁଆର୍‌ତୁ ଉନ୍‌ଡ୍ରେମାନୁ ଉଣ୍ତାତାର୍‍ । 4 ଜିସୁଙ୍ଗୁଁ ସାଲାକିଦାନ୍‍ ଆସ୍‌ସି ଡାକ୍‌ତେଙ୍ଗ୍‍ଁ ଇଜି ଉପାୟ୍‌ କିତାର୍‍ । 5 ମାତର୍‌ ୱାର୍‌ ଇର୍ହାର୍‌, "ଇୟା ପାଣି ମାପ୍‌ ପଣ୍ତୟ୍‌ ବେଡ଼ାଦୁ କିନିକା ନେଗେତ୍‌ସିଲେ । ନାସ୍ତିୱାଲେ ଲୋକୁ ଜାଟିଜଗଡ଼ାକିନାର୍‌ ।"

6 ଅର୍‍ଲେନ୍‍ ଜିସୁ ବେତନିୟାଦୁ ଆଗ୍‍ଡ଼ିରାନ୍‍ କୁସ୍ଟରୋଗ୍‌ ବଗାତିମାର୍‍ଇ ସିମୋନ୍‍କା ଇଲୁଦୁ ମାର୍ହାନ୍‌ । 7 ✝ସିମୋନକା ଇଲୁଦୁ ଜିସୁ ଉନ୍‌ଣ୍ତେଙ୍ଗ୍‌ ବାସ୍‌ତି ମାରିଇୱାଲେ ଅରେତ୍‌ ଆଇମା ଉନ୍‌ଡ୍ରି ସାଟିଦୁ ନାଣ୍ତଦାରାଦି ବାସ୍‌ନା ନିୟୁ ବର୍ତି କିଜି ତାସି ୱାନି ତାଲା ମୁସ୍‌କୁ ୱାକ୍‌ତାତ୍‌ । 8 ସିସୁର୍‍ ଇକା ସୁଡ଼ୁଜି ରିସା ଆତାର୍‌ । ୱାର୍‌ ତାନିଙ୍ଗ୍‌ ଇର୍ହାର୍‌, "ନିସ ନାସ୍ଟୁକିତି ଏନ୍ଦା ?" 9 "ଇୟା ବାସ୍‌ନା ନିୟୁ ନାଣ୍ତ ଡାବୁଙ୍ଗାଁ ପର୍‌ଦେଙ୍ଗ୍‌ ଆତାତ୍‌ମାନ୍ଦି ମାରି ଆୟା ଡାବୁଙ୍ଗୁଁ କାକୁର୍ତି ଲୋକାଙ୍ଗ୍‌ ସିଦେଙ୍ଗ୍‍ ଆତାତ୍‌ ମାନ୍ଦି ।"

10 ୱାର୍‌ ଇନିକା ୱେର୍‌ସିନାର୍‌, ଜିସୁ ନେସ୍‌ତେଙ୍ଗ୍‌ ଆଟ୍‍ତାନ୍‍ନୋ ଇର୍ହାନ୍‌, "ଆୟା ଆଇମାଦିଙ୍ଗ୍‍ ଏନ୍ଦା ବାଦାକିଜିନିଦେର୍‌ ? ନା ଉଣ୍ତିଙ୍ଗ୍‌ ୱାଦ୍‌ ଉନ୍‌ଡ୍ରି ନେଗି ନି ସୁନ୍ଦର୍‌ ପାଣି କିତାମାନାତ୍‌ । 11 କାକୁର୍ତି ଲୋକାଙ୍ଗ୍‌ ମିୱାଲେ ୱିଜୁଦିନ୍‌ ପଇନିଦେର୍‌, ମାତର୍‌ ନାଙ୍ଗିଁ ୱିଜୁଦିନ୍‌ ପୟ୍‌ଇଦେର୍‌ । 12 ୱାଦ୍‌ ନା ମେନ୍ଦଲ୍‌ତୁ ଇୟା ବାସ୍‌ନା ନିୟୁ ୱାକ୍‌ସି ସିଜି ନା ମୁସ୍‍ନି ଉଣ୍ତିଙ୍ଗ୍‌ ତିଆର୍‌ କିତି ୱାଜା କିତାମାନାତ୍‌ ।" 13 ନାନ୍ ମିଙ୍ଗିଁ ସତ୍‌ ୱେର୍‌ସିନା, ସାରା ଦୁନିଆଦି ଆମା ବାଡିଦୁ ଇୟା ନେଗିକାବୁର୍‌ ୱେର୍‌ନାର୍‌, ଇୟା ଆଇମା ଆମାକା କିତାମାନାତ୍‌, ତାନିଙ୍ଗ୍‌ ଏତ୍‌କିଜି ଆକାବା ପ୍ରଚାର୍‌ କିନାର୍‌ ।

14 ନାସ୍ତିୱାଲେ ବାରଲୋକ୍‌ ସିସୁରି ଲୋଇରାନ୍‌ ଇସ୍କାରିୟୋତିୟ ଯିହୁଦା ଦର୍‌ତି ଅରେନ୍‍ ସିସୁ ପେରି ଜାଜକରି ଲାକ୍‌ତୁ ସୋର୍‌ର୍ହାନ୍‌ନୋ ୱେନ୍‌ବାତାନ୍‌, 15 "ଜିସୁଙ୍ଗୁଁ ଆସିସ୍‌କିତି ସିତିଙ୍ଗ୍‌ ନାଙ୍ଗିଁ ଇନିକା ସିନିଦେର୍‌ ?" ୱାର୍‌ ୱାନିଙ୍ଗ୍‌ ତିରିସ୍‌ଗୋଟା ୱେଣ୍ତିଅଦ୍‌ଲିଙ୍ଗ୍‌ ଲେକିସ୍‌ତାସିତାର୍‌ । 16 ଆୟାନାଣ୍ତିରାନ୍‌ ଜିସୁଙ୍ଗୁଁ ୱାରି କିୟୁଦୁ ଆସିସ୍‌କିନି ଉଣ୍ତିଙ୍ଗ୍‌ ଜିହୁଦା ସାରି ପୟ୍‌ତାନ୍‌ ।

17 "କମିର୍‌ସିଲି ରୁଟି" ପଣ୍ତୟ୍‌ତି ଆଗ୍‍ଡ଼ିରି ନାଣ୍ତିଙ୍ଗ୍‌ ସିସୁର୍‍ ଜିସୁଦି ଲାକ୍‌ତୁ ୱାତାରୋ ୱେନ୍‌ବାତାର୍‌, "ମାପ୍‌ ଏମେମାନୁ ନି ଉଣ୍ତିଙ୍ଗ୍‌ ନିସ୍ତାର୍‌ ପଣ୍ତୟ୍‌ତି ବଜି ତିଆର୍‌କିନାପ୍‌ ?"

18 ଜିସୁ ୱେର୍‌ତାନ୍‌, "ଗାଡ଼୍‌ତୁ ସୋଲ୍‌ସ ଆୟା ପେରି ଲୋକ୍‌ତିଙ୍ଗ୍‌ ଇନିଦେର୍‌, ‘ଗୁରୁ ଇଜିନାନ୍‌,’ ନା ଦିନ୍‌ ଲାକ୍‌ତୁ ଆଜି ୱାଜିନାତ୍‍ । ୱାନି ସିସୁରି ୱାଲେ ମି ଇନ୍‌ଡ୍ର ୱାନ୍‌ ନିସ୍ତାର୍‌ ପଣ୍ତୟ୍‌ କିନାନ୍‌ ।"

19 ଜିସୁ ୱେର୍‌ତି ଇସାବ୍‌ତାନ୍‌ ସିସୁର୍‍ ନିସ୍ତାର୍‌ ପଣ୍ତୟ୍‌ତି ବଜି ତିଆର୍‌ କିତାର୍‌ ।

20 ୱେନ୍‌କା ମିଲ୍‌ମିଲିକା ଆତାତ୍‌ଆକା ଜିସୁ ନି ବାରଲୋକ୍‌ ସିସୁର୍‍ ଉନ୍‌ଣ୍ତେଙ୍ଗ୍‌ ବାସ୍‌ତାର୍‌ । 21 ଉଣୁଜିମାରିଇୱାଲେ ଜିସୁ ଇର୍ହାନ୍‌, "ନାନ୍ ମିଙ୍ଗିଁ ସତ୍‌ ଇଜିନା, ମି ଲୋଇରାନ୍‌ ଅରେନ୍‍ ନାଙ୍ଗିଁ ସାତ୍ରୁରି କିୟୁଦୁ ସର୍‌ପେ କିନାନ୍‌ ।"

22 ସିସୁର୍‍ ନାଣ୍ତ ଦୁଃକ୍‌ ଆଜି ଅରେନ୍‍ ୱେନ୍‌କା ମାରି ଅରେନ୍‍ ଜିସୁଙ୍ଗୁଁ ୱେନ୍‌ବାତାର୍‌, "ପ୍ରବୁ, ନାନ୍ ଆକାନ୍‍ ନୋ ?"

23 ଜିସୁ ଇର୍ହାନ୍‌, "ଏନ୍‌ ନା ୱାଲେ ଡୁବାଇତୁ ରୁଟି ମୁଡ଼ୁକୁନାନ୍‌, ୱାନ୍‌ ନାଙ୍ଗିଁ ସାତ୍ରୁରି କିୟୁଦୁ ସର୍‌ପେକିନାନ୍‌ । 24 ସାସ୍ତ୍ରଦୁ ରାସାତିମାନି ୱାଜା ମନୁସ୍ୟପୁତ୍ର ସାନିଦଣ୍ତବଗାନାନ୍‌, ମାତର୍‌ ମନୁସ୍ୟପୁତ୍ରଙ୍ଗ୍‌ ଏନ୍‌ ଆସିସ୍‌ କିନାସିନାନ୍‌, ୱାନି ଦଣ୍ଡ୍‌ ଏସ ବୟ୍‌ଙ୍କାର୍‌ ! ଏସ୍‌କାଙ୍ଗ୍‌ ଜନମ୍‌ ଆଇତିମାରିଙ୍ଗ୍‌ ୱାନି ଉଣ୍ତିଙ୍ଗ୍‌ ନେଗେନ୍‌ ଆତାତ୍‌ମାନ୍ଦି ।"

25 ଆମା ଜିହୁଦା ୱାନିଙ୍ଗ୍‌ ସାତ୍ରୁରି କିୟୁଦୁ ସର୍‌ପେକିତାନ୍‌, ୱାନ୍‌ ଇର୍ହାନ୍‌, ଗୁରୁ, ୱାନ୍‌ ଇନିକା ନାନ୍ ?

ଜିସୁ ୱାନିଙ୍ଗ୍‌ ଇର୍ହାନ୍‌, "ନିନ୍‌ ଆକା ଇଜିନି ।"

26 ୱାର୍‌ ଉଣି ବେଡ଼ାଦୁ ଜିସୁ ଉନ୍‌ଡ୍ରି ରୁଟି ତାତାନ୍‌ନୋ ମାପୁରୁଙ୍ଗୁଁ ଦନ୍ୟବାଦ୍‌ ସିତାନ୍‌ ମାରି ଆକା ରୁକୁସି ସିସୁରିଙ୍ଗ୍‌ ସିଜି ଇର୍ହାନ୍‌, ଅସି ତିନ୍‍ଣ୍ତ୍ରୁ; "ଇକା ନା ମେନ୍ଧଲ୍‍ ।"

27 ତାନେୱେନ୍‌କା ୱାନ୍‌ ଉଣି ଡୁବାଇ ଅତାନ୍‌ନୋ ମାପୁରୁଙ୍ଗୁଁ ଦନ୍ୟବାଦ୍‌ ସିତାନ୍‌ ମାରି ଆକା ସିସୁରିଙ୍ଗ୍‌ ସିଜି ଇର୍ହାନ୍‌, ମିର୍‌ ୱିଜିଦେର୍‌ ଇବେଟ୍‌ତାନ୍‌ ଉଣ୍ତୁ । ୱାନ୍‌ ଇର୍ହାନ୍‌; 28 ଇକା ନା ନେତେର୍‌ । ଲୋକା ପାପ୍‌ କେମା ଉଣ୍ତିଙ୍ଗ୍‌ ନାନ୍ ନା ଆମା ନେତେର୍‌ ୱାକ୍‌ସ ସିଦେଙ୍ଗ୍‍ ସଲ୍‌ସିନା, ଆମାକା ମାପୁରୁଦି ପୁନି ନିୟମ୍‌ତିଙ୍ଗ୍‌ ସିଲ୍‌ଡାକ୍‌ନାତ୍‍ । 29 ନାନ୍ ମିଙ୍ଗିଁ ୱେର୍‌ସିନା, "ଆମା ନାଣ୍ତିଙ୍ଗ୍‌ ନା ବୁବାଦି ରାଜିଦୁ ମି ୱାଲେ ପୁନି ଅଙ୍ଗୁର୍‍ରସ୍‍ ଉଣୁଇ ସାନ୍ଦି ନାନ୍ ମାରି ଏସ୍‌କାଙ୍ଗ୍‌ ଅଙ୍ଗୁର୍‍ରସ୍‍ ଉଣୁଏ ।"

30 ୱାର୍‌ ଦନ୍ୟବାଦ୍‍ତି ପାଟା ପାରିତି ୱେନ୍‌କା ଜିତ ଗରନ୍‌ ମୁସ୍‌କୁ ସତାସର୍ହାର୍‌ ।

31 ନାସ୍ତିୱାଲେ ଜିସୁ ୱାରିଙ୍ଗ୍‌ ଇର୍ହାନ୍‌, "ନେର୍‌ ନାଡ଼ା ମିର୍‌ ୱିଜିଦେର୍‌ ନାଙ୍ଗିଁ ଡ଼ିସ୍‌ନି ଉର୍‍କ୍‍ନିଦେର୍‌ । ସାସ୍ତ୍ରଦୁ ରାସାତାମାନାତ୍‌, ନାନ୍ ମେଣ୍ତେଙ୍ଗ୍‌ ସାରାକିନିୱାନିଙ୍ଗ୍‌ ସାୟାମାରାଗ୍‌ ଡାକ୍‌ତିଙ୍ଗ୍‌ ମାରି ମେଣ୍ଡେଙ୍ଗ୍‌ ଇନିଙ୍ଗାଁ ଆନିଙ୍ଗାଁ ଆନେସନେ । 32 ✝ମାତର୍‌ ନାନ୍ ମାରିଡ଼େସିନିଙ୍ଗିଁତି ୱେନ୍‌କା ମି ଆଗ୍‍ଡ଼ିନେ ଗାଲିଲି ରାଜିଦୁ ସନା ।"

33 ପିତର୍‌ ଜିସୁଙ୍ଗୁଁ ଇର୍ହାନ୍‌, "ଆଇକାର୍‌ ୱିଜେରେ ନିଙ୍ଗିଁ ଡ଼ିସ୍‌ତି ସରିଙ୍ଗ୍ ବା ନାନ୍ ମୁଡ଼ୁକେ ସୋଲଏ ।"

34 ଜିସୁ ପିତରତିଙ୍ଗ୍‌ ଇର୍ହାନ୍‌, ନାନ୍ ନିଙ୍ଗିଁ ସତ୍‍ ଇଜିନା, ନେର୍‌ ନାଡ଼ା କରୁ କେଡ଼େନି ଆଗ୍‍ଡ଼ିନେ ନିନୁ ନାଙ୍ଗିଁ ନେସେଏ ଇଜି ମୁନ୍‌ଡ୍ରି ଦେବେଙ୍ଗ୍‌ ଇନି ।

35 ପିତର୍‌ ଇର୍ହାନ୍‌, "ନି ୱାଲେ ସାଦେଙ୍ଗ୍‌ ପଡ଼ାତିଙ୍ଗ୍‌ ବା ନାନ୍ ଏସ୍‌କାଙ୍ଗ୍‌ ନିଙ୍ଗିଁ ନେସ୍‍ଏ ଇଜି ଇନ୍‌ଏ ।" ଆଇ ସିସୁର୍‍ ୱିଜେରେ ବା ଆୟାୱାଜା ଇର୍ହାର୍‌ ।

36 ତାନେୱେନ୍‌କା ଜିସୁ ନିଜେଦି ସିସୁରି ୱାଲେ ଗେତ୍‌ସିମାନି ଇନି ଉନ୍‌ଡ୍ରି ଡଡିଦୁ ସର୍ହାର୍‌ନୋ ୱାରିଙ୍ଗ୍‌ ଇର୍ହାନ୍‌, "ନାନ୍ ଆବେନୁ ସନାନୋ ପାର୍‌ତନା କିଜିମାନି ସାନ୍ଦି ମିର୍‌ ଇବେନୁ ବାସ୍‌ସୋ ମାନ୍‌ଡ୍ରୁ ।" 37 ୱାନ୍‌ ପିତର୍‌ ମାରି ଜେବଦିରି ରିଏର୍‌ ମାରିସିରିଙ୍ଗ୍‌ ୱାନି ୱାଲେ ଅତାନ୍‍ । ନାସ୍ତିୱାଲେ ଜିସୁ ନାଣ୍ତ ଦୁଃକ୍‌ ମାରି ଦାନ୍ଦା ଆଜି, 38 ୱାନ୍‌ ୱାରିଙ୍ଗ୍‌ ଇର୍ହାନ୍‌, "ଦୁଃକ୍‌ତାନ୍‌ ନା ଜିବନ୍‌ ସାନିୱାଜା ଆଜିନାତ୍‌, ଇବେନୁ ମିର୍‌ ନା ୱାଲେ କାପ୍‌କିଜ ମାନ୍‌ଡ୍ରୁ ।"

39 ଜିସୁ କାଣ୍ତେକ୍‍ ଆକ ସର୍ହାନ୍‌ନୋ ବୁମିଦୁ ମକମ୍‌ ପାଡ଼ାକ୍‌ତାନ୍‌ନୋ ପାରାତାନା କିଜି କିଜି ଇର୍ହାନ୍‌, "ଏ ନା ବୁବା, ଜଦି ଆଦେଙ୍ଗ୍‌ଆଟ୍‌ନାତ୍‌, ଆର୍‌ତିଙ୍ଗ୍‌ ଇୟା ଦୁଃକ୍‌ବୋଗ୍‌ତି ଉଣି ଡୁବାଇ ନା ମାଣାନ୍‌ ଆକ ଅଆ, ମାତର୍‌ ନା ବଦା ସିଲେ । ନି ବଦା ପୁରା ଆପିତ୍‌ ।"

40 ତାନେୱେନ୍‌କା ୱାନ୍‌ ମୁଏର୍‌ ସିସୁରି ଲାକ୍‌ତୁ ଡ଼େସି ୱାତାନ୍‌ନୋ ସୁଡ଼ୁତାନ୍‌, ୱାର୍‌ ସୁସ୍‌ତା ମାନାର୍‌ । ଜିସୁ ପିତରତିଙ୍ଗ୍‌ ଇର୍ହାନ୍‌, "ମିର୍‌ ଇନିକା ନା ୱାଲେ ଗନ୍‌ଟା ବା କାପ୍‌କିଦେଙ୍ଗ୍‌ ଆଟ୍‍ଇଜିନିଦେର୍‍ ? 41 ପରିକାଦୁ ଏଣ୍ତେସ୍‌ ପଡ଼ାଇଦେର୍‌, ଇୟାଉଣ୍ତିଙ୍ଗ୍‌ କାପ୍‌କିଜ ପାରାତାନା କିଦୁ । ଇରିଙ୍ଗ୍‌ ମି ଆତ୍ମା ବଦାକିନାତ୍‍, ମାତର୍‌ ମେନ୍ଧଲ୍‍ ଲିଡ଼ଲାଡ଼ା ।"

42 ଜିସୁ ମାରିଡ଼େସି ସର୍ହାନ୍‌ନୋ ପାର୍‌ତନା କିଜି ଇର୍ହାନ୍‌, "ଏ ନା ବୁବା, ଜଦି ଇୟା ଦୁଃକ୍‌ବୋଗ୍‌ତି ଉଣି ଡୁବାଇ ନା ମାଣାନ୍‌ କୁତ୍‌ସଅତେଙ୍ଗ୍‌ ଆଟ୍‍ଏର୍‍ ଆମାସାନ୍ଦି ନାନ୍ ତାନିଙ୍ଗ୍‌ ଉନ୍‌ଣ୍ତେଙ୍ଗ୍‌ ପଡ଼ାନାତ୍‌, ଆର୍‌ତିଙ୍ଗ୍‌ ନି ବଦା ପୁରା ଆପିତ୍‌ ।" 43 ୱାନ୍‌ ୱାଜି ମାରିଡ଼େସି ସିସୁରିଙ୍ଗ୍‌ ସୁସ୍‌ତି ମାରିକା ସୁଡ଼ୁତାନ୍‌ । ୱାରି କାଣୁକୁ ରେସ ମାନ୍‌ଡ୍ରେଙ୍ଗ୍‌ ଆଟ୍‌ଏଜି ମାର୍ହାର୍‌ ।

44 ଜିସୁ ୱାରିଙ୍ଗ୍‌ ଡ଼ିସ୍‌ସି କାଣ୍ତେକ୍‍ ଆକ ସୋଲ୍‌ସି ମୁନ୍‌ଡ୍ରି ଦେବେଙ୍ଗ୍‌ ବା ଆୟାୱାଜା ପାରାତାନା କିତାନ୍‌ । 45 ତାନେୱେନ୍‌କା ୱାନ୍‌ ସିସୁରି ଲାକ୍‌ତୁ ୱାଜି ଇର୍ହାନ୍‌, "ମିର୍‌ ଇୟାସାନ୍ଦି ଡରିତିଦେର୍‌ନୋ ରମ୍‌ଜିନିଦେର୍‌ ? ସୁଡ଼ୁଦୁ, ମନୁସ୍ୟପୁତ୍ର ପାପି ଲୋକା କିୟୁଦୁ ସର୍‌ପେଆନି ସାକ୍ତିଦି ବେଡ଼ା ୱାତାନି । 46 ନିଙ୍ଗ୍‍ଦୁ, ମାଡ୍‌ ସନାଟ୍‌; ସୁଡ଼ୁଦୁ, ଏନ୍‌ ନାଙ୍ଗିଁ ଶାତ୍ରୁରି କିୟୁଦୁ ସେରେପ୍‌ନା ସିନାନ୍‌, ୱାନ୍‌ ଲାକ୍‌ତୁ ୱାତାନ୍‍ନି ।"

47 ଜିସୁ ଇୟା ମାଟା ୱେର୍‌ସିମାନି ବେଡ଼ାଦୁ, ୱାରି ବାରଲୋକ୍ ସିସୁରି ଲୋଇରାନ୍‌ ଜିହୁଦା ଦର୍‌ତି ସିସୁ ୱାତା ଇତାନ୍‌ । ୱାନି ୱାଲେ କାଣ୍ତା ନି ଡୁଡୁଙ୍ଗ୍‌କଣେଙ୍ଗ୍‌ ଆସ୍‌ସି ଗାଦି ଲୋକୁ ଆବେନୁ ଉଣ୍ତାତାର୍‌ । ୱାରିଙ୍ଗ୍‌ ପେରି ଜାଜକର୍‌ ନି ଦାର୍ମୁ ନେତାର୍‌ ପୋକ୍‌ତାମାର୍ହାର୍‌ । 48 ସାତ୍ରୁରି କିୟୁଦୁ ଆସ୍‌ସିସ୍‌ କିନିସିନି ଜିହୁଦା ୱାରିଙ୍ଗ୍‌ ଉନ୍‌ଡ୍ରି ସିନା ସିନି ଉଣ୍ତିଙ୍ଗ୍‌ ଟିକ୍‌ କିତାମାର୍ହାନ୍‌, ୱାନ୍‌ ୱାରିଙ୍ଗ୍‌ ଇର୍‌ଆ ମାର୍ହାନ୍‌, "ନାନ୍ ଆମାୱାନିଙ୍ଗ୍‌ ନଣ୍ତ୍‌ନା, ୱାନ୍‌ ଆୟାକାନ୍‌, ୱାନିଙ୍ଗ୍‌ ଆସ୍‌ତୁ ।"

49 ଜିହୁଦା ଆୟାଦାପ୍ରେ ଜିସୁଦି ଲାକ୍‌ତୁ ୱାତାନ୍‌ନୋ, ଏ ଗୁରୁ, ମାଡ଼ିସ୍‍କିନିକା, ଇକା ଇନ୍‌ଞ୍ଜି ୱାନିଙ୍ଗ୍‌ ନଣ୍ତିତାନ୍‌ ।

50 ଜିସୁ ୱାନିଙ୍ଗ୍‌ ଇର୍ହାନ୍‌, "ସଙ୍ଗ୍‍, ନି ପାଣି ବେଗି ୱିସ୍‌ଆ ।"

ତାନେୱେନ୍‌କା ୱାର୍‌ ଲାକ୍‌ତୁ ୱାଜି ଜିସୁଙ୍ଗୁଁ ଆସ୍‌ତାରୋ ତର୍‌ତାର୍‌ । 51 ଜିସୁଦି ତରିଟି ଅରେନ୍‍ ଲୋକୁ ନିଜେଦି କାଣ୍ତା ସପ୍‌ତାନ୍‌ନୋ ୱିଜେରିଙ୍ଗ୍‌ପେରି ଜାଜକଦି ସାକର୍‌ତିଙ୍ଗ୍‌ କାତ୍‌ତାନ୍‌ । ଆୟା ଲୋକ୍‌ତି ଗିତଣି ତେୱିତାତ୍‌ । 52 ଜିସୁ ୱାନିଙ୍ଗ୍‌ ଇର୍ହାନ୍‌, "ନି କାଣ୍ତାଦିଙ୍ଗ୍‌ ତାନି ବାଡିଦୁ ଇଡିଆ । ଆମାକାର୍‌ କାଣ୍ତା ସୋପ୍‌ନାର୍‌ କାଣ୍ତାଦାନ୍‍ ସାନାର୍‍, ୱାର୍‌ କାଣ୍ତାଦାନ୍‌ନେ ସାନାର୍‍ । 53 ନିନୁ ଇନିକା ନେସ୍‌ଇ, ନାନ୍ ନା ବୁବେଙ୍ଗ୍‌ ସାକା ଲସ୍‌ତିଙ୍ଗ୍‌, ୱାନ୍‌ ନା ଉଣ୍ତିଙ୍ଗ୍‌ ଆୟାଦାପ୍ରେନେ ବାରଗୋଟା ସନ୍‌ୟ୍ୟଦଲ୍‌ତି ବାଦୁଲୁ ନାଣ୍ତ ମୁସ୍‌କୁପୁର୍‌ତି ଦୁତ୍‌କାଙ୍ଗ୍‌ ପୋକ୍‌ତେଙ୍ଗ୍‌ ଆଟ୍‍ନାନ୍‍ ? 54 ମାତର୍‌ ଇୟାୱିଜୁ ଗଟାନାତ୍‌ ଇଜି ଦାର୍ମୁସାସ୍ତ୍ରଦୁ ଆମାକା ରାସ୍‌ତାମାନାତ୍‌, ଆକା ପୁରା ଆନାତ୍‌ ଏଣ୍ତେସ୍‌ ?"

55 ✝ଜିସୁ ତାନେୱେନ୍‌କା ଉଣ୍ତାତିମାରିଇ ଆୟା ଲୋକାଙ୍ଗ୍‌ ଇର୍ହାନ୍‌, "ନାନ୍ ଇନିକା ଅରେନ୍‍ ଉରୁକ୍‌ସିମାନି ଡଙ୍ଗାଁର୍‌ଏନ୍‌ ୱାଜା କାଣ୍ତା ନି ଡୁଡୁଙ୍ଗ୍‌ ଆସ୍‌ସି ନାଙ୍ଗିଁ ଆସ୍‌ତେଙ୍ଗ୍‌ ୱାତିମାନିଦେର୍‌ ? ନାନ୍ ୱିଜୁଦିନ୍‌ ମନ୍ଦିର୍‌ତୁ ବାସ୍‌ସି ସିକିୟା ସିଜିମାର୍‌ଆ, ନାସ୍ତିୱାଲେ ମିର୍‌ ନାଙ୍ଗିଁ ଆସ୍‍ଇତିଦେର୍‍ ! 56 ମାତର୍‌ ବାବବାଦିର୍ ସାସ୍ତ୍ରଦୁ ଆମା ଆମାକା ରାସାତାମାନାର୍‌, ଆୟାୱିଜୁ ପୁରାଆନିଉଣ୍ତିଙ୍ଗ୍‌ ଇକା ଗଟାତାମାନାତ୍‌ ।"

ନାସ୍ତିୱାଲେ ସିସୁର୍‍ ୱିଜେରେ ଜିସୁଙ୍ଗୁଁ ଡ଼ିସ୍‌ସି ଉର୍‌କୁସି ସର୍ହାର୍‌ ।

57 ଆମାକାର୍‌ ଜିସୁଙ୍ଗୁଁ ଆସ୍‌ତାମାର୍ହାର୍‌, ୱାର୍‌ ୱାନିଙ୍ଗ୍‌ ୱିଜେରିଙ୍ଗ୍‌ପେରି ଜାଜକ କୟାପାରି ଇନ୍‌ଡ୍ର ଅତାର୍‍ । ଆୟା ବାଡିଦୁ ଦାର୍ମୁଗୁରୁ ନି ଦାର୍ମୁ ନେତାର୍‌ ଉନ୍‌ଡ୍ରେମାନୁ ଆତାମାର୍ହାର୍‌ । 58 ପିତର୍‌ କାଣ୍ତେକ୍‌ ଆକ ମାନ୍‌ଞ୍ଜି ଜିସୁଦି ୱେନ୍‌କା ସୋଲ୍‌ସିମାର୍ହାନ୍‌ ମାରି ୱାନ୍‌ ୱିଜେରିଙ୍ଗ୍‌ପେରି ଜାଜକ କୟାପାରି ଇଲୁଦି ଦୁଆର୍‌ ସାନ୍ଦି ସର୍ହାନ୍‌ । ଇୟାୱିଜୁ ଗଟ୍‌ନାଦି ଅବସ୍ତା ଇନିକା ଆନାତ୍‌, ଆକା ସୁଡ଼ୁନି ଉଣ୍ତିଙ୍ଗ୍‌ ପିତର୍‌ ଲୋଇ ସୋର୍ହାନ୍‌ନୋ ମନ୍ଦିର୍‌ କାପ୍‍କିନିୱାରି ୱାଲେ ବାସ୍‌ତାନ୍‌ ! 59 ପେରି ଜାଜକର୍‌ ନି ଜିହୁଦିର୍‌ ପେରିମିଟିଙ୍ଗ୍‌ତି ୱିଜେରେ ଜିସୁଙ୍ଗୁଁ ସାନିଦଣ୍ତ ସିନିଉଣ୍ତିଙ୍ଗ୍ ୱାନି ବିରଦ୍‌ତାନ୍‌ ମିସ୍‌ସାକି ପୟ୍‌ଦେଙ୍ଗ୍‌ ତେରେପେତେଆତାର୍‌ । 60 ମାତର୍‌ ଗାଦି ଲୋକୁ ଜିସୁଦି ବିରଦ୍‌ତାନ୍‌ ମିସ୍‌ ମାଟା ଇର୍ହାର୍‌ । ମାତର୍‌ ଆୟାୱାଜା ଇନି ପାରାମାଣ୍‌ ପୟ୍‌ଏତାର୍‌ । ସାରାସାରିୱେନ୍‌କା ରିଏର୍‌ ନିଙ୍ଗିଁତାର୍‍ । 61 ୱାର୍‌ ଇର୍ହାର୍‌, "ଇୟାକାନ୍‌ ଇର୍‌ଆ ମାର୍ହାନ୍‌, ନାନ୍ ମାପୁରୁଦି ମନ୍ଦିର୍‌ତିଙ୍ଗ୍‌ ରୁକୁନାନୋ ମୁନେଟି ୱେନ୍‌କା ତାନିଙ୍ଗ୍‌ ମାରିଡ଼େସି ତିଆର୍‌ କିଦେଙ୍ଗ୍‌ ଆଟ୍‍ନା ।"

62 ୱିଜେରିଙ୍ଗ୍‌ପେରି ଜାଜକ ନିଲ୍‌ତାନ୍‌ନୋ ଜିସୁଙ୍ଗୁଁ ୱେନ୍‌ବାତାନ୍‌, "ନିନ୍‌ ଏନ୍ଦା ଇନିକା ଇନ୍‍ଇଜିନି ? ଇୟା ମାଟାଦିଙ୍ଗ୍‌ ରୁକୁତେଙ୍ଗ୍‌ ନିନୁ ଇନିକା ୱେର୍‌ନିକା ମାନାତ୍‌ ?"

63 ମାତର୍‌ ଜିସୁ ଆଲେତାତେବାତାନ୍‌ । ୱିଜେରିଙ୍ଗ୍‌ପେରି ଜାଜକ ୱାନିଙ୍ଗ୍‌ ଇର୍ହାନ୍‌, "ଜିବନ୍‌ମାନି ମାପୁରୁଦି ଦର୍‌ତାନ୍‌ ନାନ୍ ନିଙ୍ଗିଁ ପାର୍‌ମାଣ୍‌ ସିଜି ୱେନ୍‌ବାଜିନା, ସତ୍‌ତାନ୍‌ ଇନ୍‌ଆଁ, ନିନ୍‌ ଇନିକା ମାପୁରୁଦି ମାରିନ୍‌ କ୍ରିସ୍ତ ଅର୍ତ ମସିହ ?"

64 ଜିସୁ ୱାନିଙ୍ଗ୍‌ ଇର୍ହାନ୍‌, "ନିନ୍‌ ଟିକ୍‌ ୱେର୍‌ତିମାନି । ମାତର୍‌ ନାନ୍ ମିଙ୍ଗିଁ ୱିଜେରିଙ୍ଗ୍‌ ଇଜିନା, ମନୁସ୍ୟପୁତ୍ର ୱିଜୁ ସାକ୍ତିମାନିୱାରି ଉଣି ତରିନ୍‌ ବାସ୍‌ତିମାନିକା ସୁଣି, ମାରି ୱାନିଙ୍ଗ୍‌ ମୁସ୍‌କୁପୁର୍‌ତାନ୍‌ ମେଗେମାଲାଦି ୱାଲେ ରେତାଜି ୱାନିକା ନିନ୍‌ ସୁଡ଼୍‌ନି ।"

65 ଇକା ୱେର୍‌ଆନ୍‌ନୋ ୱିଜେରିଙ୍ଗ୍‌ ପେରି ଜାଜକ ନିଜେଦି ଆଙ୍ଗିଁଦିଙ୍ଗ୍‌ କିସ୍‌ସି ପୋକ୍‌ସି ଇର୍ହାନ୍‌, "ଇକାନ୍‌ ମାପୁରୁଙ୍ଗୁଁ ନିନ୍ଦାକିତାନ୍‌ । ମାରି ଆଇ ସାକି ଦର୍‌କାର୍‌ ସିଲେ । ଇୟାଦାପ୍ରେନେ ଇୟାୱାନି ମାପୁରୁଙ୍ଗୁଁ ନିନ୍ଦା ତୋ ମିର୍‌ ୱେର୍‌ଇଦେର୍‌ । 66 ଇୟା ବିସୟ୍‌ତାନ୍‌ ମି ବଦା ଇନିକା ?"

ୱାର୍‌ ଇର୍ହାର୍‌, "ୱାନ୍‌ ଦସି, ୱାନ୍‌ ସାନିଦଣ୍ତ୍‌ତି ଜଗ୍‌ ।"

67 ତାନେୱେନ୍‌କା ୱାର୍‌ ଜିସୁଦି ମକମ୍‌ତୁ ପୁସ୍‌କାଡ଼ାମ୍‌ପୁସ୍‌ସି ୱାନିଙ୍ଗ୍‌ ଡାକ୍‌ତାର୍‌; ମାରି ଏନ୍‌ ଏନ୍‌ ୱାନିଙ୍ଗ୍‌ ସାପାଡ଼ା ଡାକ୍‌ସି ଇର୍ହାର୍‌, 68 "ଇକାନ୍‌ କ୍ରିସ୍ତ ! ନିନ୍‌ ପରା ବାବବାଦି, ମାଙ୍ଗିଁ ୱେର୍‌ଆ ତୋ, ଏନ୍‌ ନିଙ୍ଗିଁ ଡାକ୍‌ତାନ୍‌ !"

69 ୱିଜେରିଙ୍ଗ୍‌ପେରି ଜାଜକରି ଆତ୍‍ରେରି ଦୁଆର୍‌ତୁ ପିତର୍‌ ବାସ୍‌ତି ମାରିଇୱାଲେ ଅରେତ୍‌ ସାକର୍‌ ଆଇମା ଲାକ୍‌ତୁ ୱାଜି ଇର୍ହାତ୍‌, "ନିନ୍‌ ବା ଗାଲିଲିଦି ଜିସୁଦି ୱାଲେମାରିଇ ।"

70 ମାତର୍‌ ପିତର୍‌ ୱିଜେରି ଆଗ୍‌ଡ଼ି ଇୟା ମାଟା ନେସ୍‍ଏଜି ଇର୍ହାନ୍‌, "ନିନ୍‌ ଇନିକା ଇଜିନି, ନାନ୍ ନେସ୍‌ଏଜିନା ।" 71 ଇକା ଇନ୍‌ଞ୍ଜି ୱାନ୍‌ ଆୟା ଦୁଆର୍‌ତି କେର୍‌ପି ଲାକ୍‌ତୁ ସୋର୍ହାନ୍‌ । ମାରି ଅରେତ୍‌ ସାକର୍‌ ଆଇମା ୱାନିଙ୍ଗ୍‌ ସୁଡ଼ୁଜି ଆବେନୁ ମାନି ଲୋକାଙ୍ଗ୍‌ ଇର୍ହାତ୍‌, "ଇୟାକାନ୍‌ ନାଜରିୟତିୟ ଜିସୁଦି ୱାଲେ ମାର୍ହାନ୍‌ ।"

72 ପିତର୍‌ ମାରିଡ଼େସି ନେସ୍‍ଏଜି ଇର୍ହାନ୍‌, "ପାର୍‌ମାଣ୍‌ କିଜି ୱେର୍‌ସିନା, ଆୟା ଲୋକ୍‌ତିଙ୍ଗ୍‌ ନାନ୍ ନେସେଏ ।"

73 ଏସ ସମୟ୍ ୱେନ୍‌କା ଆବେନୁ ନିର୍‌ଇମାରିଇ ଲୋକୁ ପିତରତି ଲାକ୍‌ତୁ ୱାଜି ଇର୍ହାର୍‌, "ନିନୁ ସତେନେ ୱାରି ଲୋଇରାନ୍‌ ଅରେନ୍‍ । ନି ୱାର୍‌ଗିନିମାଣୁକୁ ଇକା ଜାଣାପଡ଼ାଜିନାତ୍‌ ।"

74 ପିତର୍‌ ଇର୍ହାନ୍‌, "ପାର୍‌ମାଣ୍‌ କିଜି ୱେର୍‌ସିନା, ନା ମାଟା ସତ୍‍ନେ । ଆକା ଆଏତିଙ୍ଗ୍‍ ମାପୁରୁ ନାଙ୍ଗିଁ ଦଣ୍ଡ୍‌ ସିପିନ୍‌ । ଆୟା ଲୋକ୍‌ତିଙ୍ଗ୍‌ ନାନ୍ ନେସେଏ ।"

ଆୟାଦାପ୍ରେନେ କର୍‌ରୁ କେଡ଼ିତାତ୍‌ । 75 ମାରି ଜିସୁ ଇନିକା ଇର୍‌ଆ ମାର୍ହାନ୍‌, "ପିତର୍‌ ମନ୍‌ତୁ ଏତ୍‌କିତାନ୍‌ କର୍‌ରୁ କେଡ଼େନି ଆଗ୍‍ଡ଼ିନେ ନାଙ୍ଗିଁ ନେସେଏ ଇଜି ନିନୁ ମୁନ୍‌ଡ୍ରି ଦେବେଙ୍ଗ୍‌ ଇନି ।" ୱାନ୍‌ ଆତେରେ ସର୍ହାନ୍‌ନୋ ନାଣ୍ତବର୍‌କୁକ୍‌ସି ଆଡ଼୍‍ବାତାନ୍‍ ।