1 ✝ବିସ୍‍ବାସ୍‍ତୁ ଏନ୍‌ ସାକ୍ତି ସିଲେନ୍‌, ୱାନିଙ୍ଗ୍‌ ଆସ୍‌ତୁ, ମାତର୍‌ ୱାନି ଜିବନ୍‍ତି ବିସୟ୍‍ତାନ୍‍ ୱାର୍‍ଗିମାଟ୍‍ । 2 ଅରେନ୍‍ ବିସ୍‍ବାସ୍‍ କିନାନ୍‍, ୱାନ୍‌ ଆମା କାଦିବା ଉଣ୍ତେଙ୍ଗ୍ଁ ଆଟ୍‍ନାନ୍‍, ମାରି ଅରେନ୍‍ ଡାଟ୍‍ ସିଲି ବିସ୍‍ବାସି କେବଲ କୁସା କାଦି ଉଣାନ୍‍ । 3 ଆମା କାଦିବା ଉଣ୍ତେଙ୍ଗ୍‍ଁ ଆମାୱାନି ଇନି ବାଦା ସିଲେତ୍‍, ୱାନ୍‌ କୁସା କାଦିଦିଙ୍ଗ୍‍ଁ କାଡ଼୍‍ମାକିନ୍‍ । ମାରି କୁସା କାଦି ଉଣିକାନ୍‍ କାଣ୍ତା ତିନି ୱାନିଙ୍ଗ୍‍ଁ ଦସ୍‌ ଅଡ଼୍‍ବିମାକିନ୍‍ । ଇରିଙ୍ଗ୍‍ଁ ମାପୁରୁ ୱାନିଙ୍ଗ୍‍ଁ ବା ବାସେକିତା ମାନାନ୍‌ । 4 ମିରୁ ଆଇୱାନି ଦାସ୍‍ତିଙ୍ଗ୍‍ ବିସାର୍‍ କିଦେଙ୍ଗ୍‌ ଇଜି ମିର୍‌ ଏରୁ ? ୱାନ୍‌ ୱାନି ପାଣିଦୁ ଏସା ଆକ ଜିଣାଜିନାନ୍‍ ମାରି ଆରାଜିନାନ୍‍, ଆକା ୱାନି ମାଲିକ୍‌ ବିସାର୍‍ କିନାନ୍‍ । ୱାନ୍‌ ସତେନେ ଜିଣାନାନ୍‍, ଇରିଙ୍ଗ୍‍ଁ ପ୍ରବୁ ୱାନି ଦାସ୍‍ତିଙ୍ଗ୍‍ଁ ଜିଣାକିଦେଙ୍ଗ୍‍ଁ ଇଜି ଡାଟ୍‍ ।

5 ଅରେନ୍‍ୱାନି ଇସାବ୍‍ତାନ୍‍ ଆଇ ଦିନ୍‍କା ବାଦ୍‍ଲୁ ଉନ୍‍ଣ୍ତ୍ରି ଟିକ୍‍ ଦିନ୍‍ ନାଣ୍ତ ନେଗେତ୍‍ । ମାରି ଅରେନ୍‍ ଅଡ଼୍‌ବିନାନ୍‌, ୱିଜୁ ଦିନ୍‍ ସାମାନ୍‍ । ମାତର୍‌ ଏନ୍‌ ଆମା ଇସାବ୍‍ତାନ୍‍ ଟିକ୍‍ ବିସାର୍‍ କିଜି ଟିକ୍‌ ମାନାପିନ୍‌ । 6 ଏନ୍‌ ଉନ୍‍ଣ୍ତ୍ରି ଦିନ୍‍ତିଙ୍ଗ୍‍ ନେଗିକା ଇଜି ଅଡ଼ବିନାନ୍‍, କେବଲ ପ୍ରବୁଦି ଗୌରବ୍‍ ଉଣ୍ତିଙ୍ଗ୍‍ଁ ୱାନ୍‌ ଆକା କିପିନ୍‍ । ଆମାୱାନି ଇନି କାଦି ଉଣ୍ତେଙ୍ଗ୍‌ ବାଦା ସିଲେତ୍‍, ମାପୁରୁଙ୍ଗ୍‍ଁ ଦନ୍ୟବାଦ୍‍ ସିଜି ୱାନ୍‌ ଆକା ଉଣିନ୍‍; ଆବେଣାନ୍‍ ମାପୁରୁ ଗୌରବ୍‍ ପୟ୍‍ନାନ୍‍ । ଏମେ ଲୋକ୍‍ କାଦି ଉଣୁଏନ୍‌, ୱାନ୍‌ ଇକା ମାପୁରୁଦି ଗୌରବ୍‍ ଉଣ୍ତିଙ୍ଗ୍‍ଁ କିପିନ୍‍ ମାରି ଇୟାଉଣ୍ତିଙ୍ଗ୍‍ଁ ମାପୁରୁଙ୍ଗ୍‍ଁ ଦନ୍ୟବାଦ୍‍ ସିପିନ୍‍ । 7 ଏନ୍‌ କେବଲ ନିଜେଦି ଉଣ୍ତିଙ୍ଗ୍‍ଁ ଜିଏନ୍‍, ମାରି ନିଜେଦି ଉଣ୍ତିଙ୍ଗ୍ଁ ସାଏନ୍‍ । 8 ପ୍ରବୁଦି ଉଦେସ୍‍ ଜିନି ଉଣ୍ତିଙ୍ଗ୍‌ ମାଡ଼ୁ ଜିତାମାନାପ୍‍ ମାରି ସାନାପ୍‍ । ଆଦେଙ୍ଗ୍‍ଁ ଜିବନ୍‌ ନି ସାନିମାନୁ ମାପ୍‌ ପ୍ରବୁଦି ଲୋକ୍‍ । 9 ଇରିଙ୍ଗ୍‌ କ୍ରିସ୍ତ ମାରିଡ଼େସିଜିନି ମାଣାନ୍‌ ରିଏର୍‌ ଜିନିକା ନି ସାନି ଲୋକା ୱିଜେରି ୱାନ୍‌ ପ୍ରବୁ ଆତାମାନାନ୍‌ । 10 ✝ଆଦେଙ୍ଗ୍‍ଁ ମିର୍‌ ଏନ୍ଦା ନିଜେଦି ତଡ଼ାନ୍‍ତି ବିସାର୍‍ କିଜିନିଦେର୍‍ ? ଏନ୍ଦା ମାରି ନିଜେଦି ତଡ଼ାନ୍‍ତିଙ୍ଗ୍‍ଁ କାଡ଼୍‍ଜିନିଦେର୍‍ ? ମାଡ୍‌ ୱିଜେରେ ବିଚାର୍‍ ଆଦେଙ୍ଗ୍‍ଁ ଇଜି ମାପୁରୁଦି ଆଗ୍‍ଡ଼ି ନିନ୍‍ଡ୍ରେଙ୍ଗ୍‍ଁ ପଡ଼ାନାତ୍‍ । 11 ଏଣ୍ତେସ୍‌ ସାସ୍ତ୍ର ଇନାତ୍‍ :

"ପ୍ରବୁ ଇଜିନାନ୍‌, ଏଣ୍ତେସ୍‍କି ମାପ୍‌ ଜିବନ୍‍ତି ମାପୁରୁ,

ୱିଜେରେ ମା ଆଗ୍‍ଡ଼ି ମେଣ୍ତେଙ୍ଗ୍‍ଁ ଗଟ୍‍କିନାର୍‍ ।

ମାପ୍‌ ମାପୁରୁ ଇଜି ୱିଜେରେ ମାନାନାର୍‌ ।"

12 ମା ୱିଜେରିଙ୍ଗ୍‍ଁ ମାପୁରୁଦି ଲାକ୍‍ତୁ ନିଜେ ନିଜେଦି ଇସାବ୍‌ ସିଦେଙ୍ଗ୍‌ ପଡ଼ାନାତ୍‍ ।

13 ଆଦେଙ୍ଗ୍‍ଁ ଆଇୱାରିଙ୍ଗ୍‌ ବିସାର୍‍ କିମାଟ୍‌ । ଇୟାୱାଜା ବା ଇନିକା କିମାଟ୍‌, ଆମାମାଣାନ୍‍ କି ମି ତଡ଼ାନ୍‍ ତାକାୟ୍‌ ଆଜି ପାପ୍‍ କିନାନ୍‍ । 14 ଜିସୁଦି ମାଣାନ୍‌ ଆଦେସ୍‌ ପୟ୍‍ଜି ସତ୍‍ତାନ୍‌ ଇଜିନା, ଆମା କାଦି ତାଗ୍‍ଇକା ସିଲେ । ମାତର୍‌ ଜଦି ଏନ୍‌ ଆମା କାଦି ତାଗ୍‍ଇକା ଇଜି ବିସ୍‍ବାସ୍‍ କିନାନ୍‍, ୱାନି ଉଣ୍ତିଙ୍ଗ୍‌ ଆକା ତାଗ୍‌ଇକା ଆନାତ୍‌ । 15 ମିର୍‌ ଇନି କାଦି ଉଣି ମାଣାନ୍‌ ଜଦି ଅରେନ୍‍ ତଡ଼ାନ୍‍ତି ମନ୍‍ତୁ ଦୁକ୍‍ ସିନିଦେର୍‍, ଆର୍‍ତିଙ୍ଗ୍‍ଁ ୱାନି ଉଣ୍ତିଙ୍ଗ୍‍ଁ ମି ଜିବନ୍‍ନୋନିକା ତର୍‍ଇଜିନିଦେର୍‍ । ଆମା ତଡ଼ାନ୍‍ତି ଉଣ୍ତିଙ୍ଗ୍‍ଁ କ୍ରିସ୍ତ ସାତାନ୍‍, କାଣ୍ତେକ୍‍ କାଦି ଉଣ୍ତିଙ୍ଗ୍‍ଁ ୱାନିଙ୍ଗ୍‌ ନାସ୍ଟୁ କିମାଟ୍‌ । 16 ମିର୍‌ ଆମାୱାନିଙ୍ଗ୍‍ଁ ନେଗିକାନ୍‍ ଇଜି ଅଡ଼୍‍ବିଜିନିଦେର୍‍, ଆବେଣ୍‌କୁ ମି ତାଗ୍‍ଇକା ଆମାପିତ୍‍ । 17 ମାପୁରୁଦି ରାଜିଦି ତିନିକା ନି ଉଣିକା ସିଲେ । ଆକା ପବିତ୍ର ଆତ୍ମାଦି ମାଣାନ୍‌ ସିଆୟ୍‍ ଆତି ଦାର୍ମୁତିକା, ସାନ୍ତି ମାରି ୱେଡ଼ିକା । 18 ଏନ୍‌ଆପିନ୍‌ ଇୟାୱାଜା ଇସାବ୍‍ତାନ୍‍ କ୍ରିସ୍ତଦି ସେବା କିନାନ୍‍; ୱାନ୍‌ ମାପୁରୁଙ୍ଗ୍‍ଁ ୱେଡ଼ିକା କିବିସ୍‍କିନାନ୍‍, ଲୋକାମାନୁ ବା ଦର୍‍ ପୟ୍‍ନାନ୍‍ ।

19 ଆଦେଙ୍ଗ୍‍ଁ ରାଦୁ, ନିଜେ ନିଜେମାନୁ ସାନ୍ତି ତିଆର୍‌ କିଦେଙ୍ଗ୍‍ଁ ନି ପିରିସ୍‍ କିଦେଙ୍ଗ୍‍ଁ ଇଜି ଆମା ୱିଜୁ ଦର୍‍କାର୍‍ ମାନାତ୍‌, ତାନିଙ୍ଗ୍‍ଁ ସୁଣାଟ୍‍ । 20 କାଣ୍ତେକ୍‍ କାଦି ଉଣ୍ତିଙ୍ଗ୍‍ଁ ମାପୁରୁ ଆମା ପାଣି କିତାମାନାନ୍‌, ଆକା ନାସ୍ଟୁ କିମାଟ୍‌ । ଏନ୍‌ ଇନି କାଦି ଉଣି ମାଣାନ୍‌ ଜଦି ମିର୍‌ ଆଇୱାରି ତାକାନି ପାଣି ଆନାତ୍‌, ଆର୍‍ତିଙ୍ଗ୍‍ଁ ଆୟା କାଦି ଉଣିକା ନେଗେତ୍‌ ସିଲେ । 21 ମି କାଣ୍ତା ତିନିକା, କାଡ଼ୁ ଉଣିକା ୱିଜୁ ଜଦି ମି ତଡ଼ାନ୍‍ତିଙ୍ଗ୍‍ଁ ବାଦା କିନାତ୍‍, ଆର୍‍ତିଙ୍ଗ୍‍ଁ ଆୟାୱିଜୁ ମାଣାନ୍‌ ବନ୍ଦ୍‍ ଆନିକା ମିଙ୍ଗିଁ ନେଗେତ୍‌ । 22 ଇୟା ବିସୟ୍‌ତାନ୍‌ ମି ନିଜେଦି ବିସ୍‍ବାସ୍‍ କେବଲ ମାପୁରୁ ନେସିନ୍‍ । ଏମେ ଲୋକ୍‍ ନେଗିକା ବିଚାର୍‌ କିଜି ପାଣି କିନାନ୍‍, ମାରି ଆୟାଉଣ୍ତିଙ୍ଗ୍‌ ୱାନିଙ୍ଗ୍‍ଁ ୱେନ୍‌କା ଅଡ଼୍‍ବିଦେଙ୍ଗ୍‍ଁ ଆଏତ୍‍, ୱାନ୍‌ ଦନ୍ୟ । 23 ମାତର୍‌ ଇନି କାଦି ଉଣିକା ନୋ ସିଲେ, ମନ୍‍ତୁ ରୁଣ୍ତି ମନ୍ ଅଡ଼୍‌ବିଜି ଏନ୍‌ ଆକା କିନାନ୍‍; ମାପୁରୁଦି ଆଗ୍‍ଡ଼ି ୱାନ୍‌ ଦସି ଆନାନ୍‍, ଇରିଙ୍ଗ୍‍ଁ ଆକା ୱାନି ବିସ୍‍ବାସ୍‍ତି ମୁସ୍‌କୁ ପାଣି ସିଲେ । ବିସ୍‍ବାସ୍‍ ମୁସ୍‌କୁ ଆମାକା ଆଏତ୍‍, ଆକା ପାପ୍‍ ।