1 ମାଦିୟ କୁଟୁମ୍‌ଦୁ ଜନମ୍‌ଆତି ଅକଶ୍ୱେରସଦି ମାରିନ୍‌ ଜେ ଦାରିୟାବସ କଲଦିୟ ରାଜି ମୁସୁକୁ ରାଜା ଆତା ମାର୍ହାନ୍‌, ୱାନି ପାର୍‌ତୁମ୍‌ ବାର୍ସୁଦୁ । 2 ୱାନି ସାସନ୍ କାଡ଼ାଦି ପାର୍‌ତୁମ୍‌ ବାର୍ସୁଦୁ ନାନ୍‌, ଦାନିୟେଲ, ସାସ୍ତ୍ରଦି ଇସାବ୍‌ଦି କାଡ଼ା, ଇର୍ରିଙ୍ଗ୍‌, ଜିରୁସାଲମଦି ନାସ୍ଟୁ ଆନି ବେଡ଼ାଦି ସତୁରି ବାର୍ସେକ୍‌ ଆନି ବିସୟ୍‌ତାନ୍‌ ପ୍ରବୁଦି ଆମା ମାଟା ଜିରିମିୟ ବବିସ୍ୟଦ୍‌ବକ୍ତାଦି ଲାକ୍‌ତୁ ଇତା ମାର୍ହାତ୍‌, ଆକା ନାନ୍‌ ବୁଜାତା । 3 ମାରି ନାନ୍‌ ଉପାସ୍‌ଦାନ୍‌, ବାସ୍‌ତା ଆରାତା ମାରି ନିରୁ ଉସାଜି ପାର୍‌ତନା ମାରି ବାତିଙ୍ଗ୍‌ମାଲ୍‌ଜି ପ୍ରବୁ ମାପୁରୁଦିଙ୍ଗ୍‌ ସେବା କିନି ଉଣ୍ତିଙ୍ଗ୍‌ ୱାନି ଉଣ୍ତିଙ୍ଗ୍‌ ମୋନ୍‌ସିତା । 4 ମାରି, ନାନ୍‌ ପ୍ରବୁ ନା ମାପୁରୁ ଲାକ୍‌ତୁ ପାର୍‌ତନା କିତା ମାରି ପାପ୍ ମାନାଜି ଇର୍ହା, "ଏ ପ୍ରବୁ, ନିନ୍‌ ପେରିକାନ୍‌ ମାରି ସାକ୍ତିଦି ମାପୁରୁ, ଆମାକାର୍‌ ନିଙ୍ଗିଁ ଜିବନ୍‌ ନୋନାର୍‌ ମାରି ନି ମାଟାଦାନ୍‌ ସାଲାନାର୍‌, ନିନ୍‌ ୱାରି ଉଣ୍ତିଙ୍ଗ୍‌ ନିୟମ ମାରି ଦୟା ରକ୍‌ୟା କିଜିମାନି ।"

5 ମାପ୍‌ ପାପ୍ ମାରି ସେଇପାଣି କିତା ମାନାପ୍‌ ମାରି ବୁଲ୍‌ କିଜି ସେଇକା ଆତାମାନାପ୍‌, ମାରି ନି ମାଟା ମାରି ସାସନ୍‌ କିନି ସାରି ଡ଼ିସ୍‌ତା ମାନାପ୍‌ । 6 ମାରି, ନି ଆମା ସାକର୍‌ ବବିସ୍ୟଦ୍‌ବକ୍ତାର୍‌ ମା ରାଜାରିଙ୍ଗ୍‌, ମା ପେରିଲୋକାଙ୍ଗ୍‌ ମାରି ମା ଡକ୍‌ରାଦାରିଙ୍ଗ୍‌ ମାରି ଦେସ୍‌ତି ଲୋକାଙ୍ଗ୍‌ ଆଗ୍‌ଡ଼ି ନି ଦର୍‌ତାନ୍‌ ମାଟା ଇର୍ହାର୍‌, ୱାରି ମାଟା ମାପୁ ୱେନ୍‌ଏତାପ୍‌ । 7 ଏ ପ୍ରବୁ ଦାର୍ମୁ ନିଦିନେ, ମାତର ଇଲେତି ନ୍ୟାୟ୍‌ ମୋକମ୍‌ଦି ସିମ୍ରା ମାଦି; ନି ବିରୁଦ୍‌ତାନ୍‌ କିନି ସତ୍ ମାନାଇ ଉଣ୍ତିଙ୍ଗ୍‌ ଜିହୁଦାଦି ଲୋକୁ ମାରି ଜିରୁସାଲମଦି ଲୋକୁ ମାରି ନି ମାଣାନ୍ କସ୍ଟ ପୋୟ୍‌ତି ୱିଜୁ ଦେସ୍‌ତି ଲୋକା ଲାକ୍‌ତୁ ମାରି ଆକରି ୱିଜୁ ଇସ୍ରାଏଲ ଲୋକୁ ମାରି ମାନାଇ ଲୋକୁ । 8 ଏ ପ୍ରବୁ, ମୋକମ୍‌ଦି ସିମ୍ରା ମାଦି, ମା ରାଜାରି, ମା ପେରିଲୋକାଦି ମାରି ମା ଡକ୍‌ରାଦାଦାରିଦି, ଇର୍ରିଙ୍ଗ୍‌ ମାପ୍‌ ନି ବିରୁଦ୍‌ତାନ୍‌ ପାପ୍ କିତା ମାନାପ୍‌ । 9 ୱିଜୁ ରକମ୍‌ଦି ଦୟା ମାରି କେମା ମା ମାପୁରୁଦିକା; ଇର୍ରିଙ୍ଗ୍‌ ମାପ୍‌ ୱାନି ବିରୁଦ୍‌ତାନ୍‌ ସେଇ ପାଣି କିତା ମାନାପ୍‌ 10 ମାରି ୱାନ୍‌ ନିଜେଦି ଦାସ୍‌ ବବିସ୍ୟଦ୍‌ବକ୍ତାଦି ମାଣାନ୍‌ ନିଜେଦି ଆମା ନିୟମ୍‌ ୱିଜୁ ମା ଆଗ୍‌ଡ଼ି ଇଟ୍‌ତି, ଆୟା ଇସାବ୍‌ଦାନ୍‌ ମାନାନି ଉଣ୍ତିଙ୍ଗ୍‌ ମାପ୍‌ ପ୍ରବୁ ମା ମାପୁରୁଦି ମାଟା ମାନାଏତାପ୍‌ । 11 ହୁଁ, ୱିଜୁ ଇସ୍ରାଏଲ ନି ନିୟମ୍‌ ମାନାଏତାର୍, ନି ମାଟାଦିଙ୍ଗ୍‌ ଏଣ୍ଡେସ୍‌ ୱାର୍‌ ମାନାଏତାର୍‌, ନି ମାଟାଦାନ୍‌ ଏଣ୍ଡେସ୍‌ ୱାର୍‌ ମାନାଏତାର୍‌, ଇୟା ଉଣ୍ତିଙ୍ଗ୍‌ ୱାର୍‌ ସାରି ବାଣାତାମାନାର୍‌, ଇୟାଉଣ୍ଡିଙ୍ଗ୍‌ ଆନାଦୁରିଆ ମାରି ମାପୁରୁଦି ସେବାକିନିକାନ୍‌ ମୋଶାଦି ନିୟମ୍‌ଦୁ ରାସାତି ପାର୍‌ମାଣ୍‌ ମା ମୁସୁକୁ ୱାକାଇ ଆତାମାନାତ୍‌; ଇର୍ରିଙ୍ଗ୍‌ ମାପ୍‌ ୱାନି ବିରୁଦ୍‌ତାନ୍‌ ପାପ୍ କିତାମାନାପ୍‌ । 12 ମାରି, ୱାନ୍‌ ମା ମୁସୁକୁ ପେରି ସେଇ ଗଟ୍‌ନା ଗଟେକିତି ମାଣାନ୍‌ ମା ବିରୁଦ୍‌ତାନ୍‌ ମାରି ଆମା ବିସାର୍‌କିନିକାର୍‌ ମାଙ୍ଗିଁ ବିସାର୍ କିତାର୍‌, ୱାରି ବିରୁଦ୍‌ତାନ୍‌ ଆମାକା ଇର୍ହା ମାର୍ହାନ୍‌, ନିଜେଦି ଆୟା ମାଟା ୱାନ୍‌ ସତ୍‌ କିତାମାନାନ୍‌; ଇର୍ରିଙ୍ଗ୍‌ ଜିରୁସାଲମତି ଉଣ୍ତିଙ୍ଗ୍‌ ଆମାକା କିଆଇ ଆତାମାନାତ୍‌, ୱିଜୁ ବାଦଡ଼୍‌ ଆଡ୍‌ଗି ଆୟା ୱାଜା କିଆଇ ଆଏତ୍‌ । 13 ମୋଶାଦି ନିୟମ୍‌ଦି ରାସ୍‌ତି ଇସାବ୍‌ଦାନ୍‌ ଇୟାୱିଜୁ ସେଇକା ମା ମୁସୁକୁ ଗଟାଜିନାତ୍‌; ଇର୍ରିଙ୍ଗ୍‌ ବା ମାପ୍‌ ନିଜେ ନିଜେଦି ପାପ୍ ଦାନ୍‌ ଡ଼େସିମାନି ଉଣ୍ତିଙ୍ଗ୍‌ ମାରି ନି ସତ୍‌ଦିଙ୍ଗ୍‌ ବୁଜାନି ଉଣ୍ତିଙ୍ଗ୍‌ ପ୍ରବୁ ମା ମାପୁରୁଦି ଲାକ୍‌ତୁ ମାଡ଼ିସ୍‌ କିଏପ୍‌ । 14 ଇୟାଉଣ୍ଡିଙ୍ଗ୍‌ ପ୍ରବୁ ପାପ୍‌ଦି ମାଣାନ୍‌ ଜାଗାର୍‍ତା ଆଜି ମା ଉଣ୍ତିଙ୍ଗ୍‌ ଆମାକା ଆମାକା ଗୋଟାକିତା ମାନାନ୍‌; ଇର୍ରିଙ୍ଗ୍‌ ପ୍ରବୁ ମା ମାପୁରୁ ଆମାକା ଆମାକା କିନାନ୍‌, ନିଜେଦି ଆୟା ୱିଜୁ ପାଣିଦାନ୍‌ ୱାନ୍‌ ଦାର୍ମୁଦିକାନ୍‌ ନେ, ମାତର ମାପ୍‌ ୱାନି ମାଟାଦିଙ୍ଗ୍‌ ମୋନ୍‌ ସିଏତାପ୍‌ ।

15 ଆଦେଙ୍ଗ୍‌ ଇଲେଇ ଏ ପ୍ରବୁ, ମା ମାପୁରୁ, ନିନ୍‌ ସାକ୍ତିଦି କିୟୁଦାନ୍‌ ମିସର ଦେସ୍‌ତାନ୍‌ ନିଜେଦି ଲୋକାଙ୍ଗ୍‌ ସୋପ୍‌ସି ତାସି ଇଲେଇତି ନ୍ୟାୟ୍‌ ଲାବ୍‌ କିତି ମାନି; ମାପ୍‌ ପାପ୍ କିତାମାନାପ୍‌, ମାପ୍‌ ସେଇ ପାଣି କିତାମାନାପ୍‌ । 16 ଏ ପ୍ରବୁ, ମାଡ଼ିସ୍‌ କିନା, ନି ୱିଜୁ ଦାର୍ମୁଦି ଇସାବ୍‌ଦାନ୍‌, ନି ଗାଡ଼୍‌ ଜିରୁସାଲମ, ନି ପବିତ୍ର ଗରତି ଉଣ୍ତିଙ୍ଗ୍‌ ନି ରିସା ମାରି ନାଣ୍ତ ରିସା ସାନ୍ତି ଆପିତ୍‌; ଇର୍ରିଙ୍ଗ୍‌ ମା ପାପ୍ ମାରି ମା ଆଗ୍‌ଡ଼ିରି ଡକ୍‌ରାଦାଦାରି ପାପ୍‌ଦି ଉଣ୍ତିଙ୍ଗ୍‌ ଜିରୁସାଲମ ମାରି ମି ଲୋକୁ ମା ୱିଜୁ ତରଟି ଲୋକାଦି ନିନ୍ଦାଦି ଲୋକୁ ଆତାମାନାର୍‌ । 17 ଇୟାଉଣ୍ଡିଙ୍ଗ୍‌ ଏ ମା ମାପୁରୁ, ଇଲେଇ ନି ଦାସଦି ପାର୍‌ତନା ମାରି ବାତିଙ୍ଗ୍‌ମାଲ୍‌ନିକା ୱେନ୍‌ଆ ମାରି ନି ଇୟା ଏମେ ମନ୍ଦିର୍‌ ନାସ୍ଟୁ ଆତାମାନାତ୍‌, ଆକା ମାରିଡ଼େସି ତିଆର୍‌ କିଆ, ଆବେଟ୍‌ ୱିଜେରେ ସୁଡ଼ୁଜି ନେସ୍‌ନାର୍‌ ନିନୁ ମାପୁରୁ । 18 ଏ ନା ମାପୁରୁ, ଗିତୋଣି କୋରପ୍‌ସି ୱେନ୍‌ଆ; ନି କାଣାଗାଦାନ୍‌ ସୁଡ଼ୁଜି ମା ବାସ୍‌ଡ଼ାତି ଉଣ୍ତିଙ୍ଗ୍‌ ମାରି ନି ଦରୁତାନ୍‌ ୱିଙ୍ଗିଁତିମାନି ଇୟା ଗାଡ଼୍‌ତି ଉଣ୍ତିଙ୍ଗ୍‌ ସୁଡୁଆ; ଇର୍ରିଙ୍ଗ୍‌ ମାପୁ ନିଜେ ଦାର୍ମୁଦି ମାଣାନ୍‌ ସିଲେ, ମାତର୍‌ ନି ପେରି ସାକା ଉଣ୍ତିଙ୍ଗ୍‌ ନି ଲାକ୍‌ତୁ ମାପ୍‌ ବାତିଙ୍ଗ୍‌ମାଲ୍‌ଜିନାପ୍‌ । 19 ଏ ପ୍ରବୁ, ୱେନ୍‌ଆ; ଏ ପ୍ରବୁ, କେମା କିଆ; ଏ ପ୍ରବୁ, ମୋନ୍‌ ସିଜି ପାଣି କିଆ; ବେଡ଼ା କିମା; ଏ ପ୍ରବୁ ନା ମାପୁରୁ, ନିଜେ ଇସାବ୍‌ଦାନ୍‌ ପାଣି କିଆ, ଇର୍ରିଙ୍ଗ୍‌ ନି ଗାଡ଼୍‌ ମାରି ନି ଲୋକୁ ନି ଦର୍‌ତାନ୍‌ ୱିଜୁ ନେସ୍‌ନାର୍‌ ।

20 ଇୟାୱାଜା ନାନ୍‌ ପାର୍‌ତନା କିଜି ମାର୍ହା, ମାରି ନା ପାପ୍‌ ମାରି ନା ଇସ୍ରାଏଲ ଲୋକା ପାପ୍‌ ମାନାଜି ମାର୍ହା, ମାରି ନା ମାପୁରୁଦି ପବିତ୍ର ଗରନୁତି ଉଣ୍ତିଙ୍ଗ୍‌ ପ୍ରବୁ ନା ମାପୁରୁଦି ଆଗ୍‌ଡ଼ି ନିଜେଦି ପାର୍‌ତନା କିଜି ମାର୍ହା; 21 ଇୟାୱାଜା ନାନ୍‌ ପ୍ରାର୍ଥନା କିବୁ କିବୁ ଆଗ୍‌ଡ଼ି ବର୍‌ତୁ ନାନ୍‌ ଆମାୱାନିଙ୍ଗ୍‌ ସୁଡ଼ୁତା, ଆୟା ଲୋକୁ ଗାବ୍ରିଏଲ ଦାପ୍ରେ ଇମ୍‌ନି ୱାଜି ନା ଲାକ୍‌ତୁ ମିଲିମିଲିକା ପୁଜାସିନି ୱେଡ଼ାଦୁ ୱାଜି ନାଙ୍ଗିଁ ମୁଟ୍‌ତାନ୍‌ । 22 ମାରି, ୱାନ୍‌ ନାଙ୍ଗିଁ ସିକିୟା ସିତାନ୍‌ ମାରି ନା ୱାଲେ ୱାର୍‌ଗିଜି ଇର୍ହାନ୍‌, "ଏ ଦାନିୟେଲ, ନାନ୍‌ ଇଲେଇ ନିଙ୍ଗିଁ ବୁଦିଦି ମାଟା ସିଦେଙ୍ଗ୍‌ ୱାତା । 23 ନି ବାତିଙ୍ଗ୍‌ମାଲ୍‌ନିକା ଆରାମ୍‌ତାନ୍‌ନେ ମାଟା ସତାତ୍‌, ମାରି ନିଙ୍ଗିଁ ୱେର୍‌ନି ଉଣ୍ତିଙ୍ଗ୍‌ ନାନ୍‌ ୱାତା ମାନା, ଇର୍ରିଙ୍ଗ୍‌ ନିନ୍‌ ନାଣ୍ଡ ଜିୟୁଦିକାନ୍‌; ଇୟାଉଣ୍ଡିଙ୍ଗ୍‌ ଇୟା ବିସୟ୍‌ ନେସ୍‌ଆ ମାରି ବର୍‌ ବୁଜାଆ ।"

24 "ମାଟା ମାନାଇକା ୱିସ୍‌ନି ଉଣ୍ତିଙ୍ଗ୍‌ ମାରି ପାପ୍‌ଦିଙ୍ଗ୍‌ ୱିସ୍‌ନି ଉଣ୍ତିଙ୍ଗ୍‌ ମାରି ଅଦାର୍ମୁଦିଙ୍ଗ୍‌ କେମାକିନି ଉଣ୍ତିଙ୍ଗ୍‌, ମାରି ଏସେଙ୍ଗ୍‌ୱିଜ୍‌ଇ ଦାର୍ମୁ ତାନି ଉଣ୍ତିଙ୍ଗ୍‌, ମାରି ବର୍‌ ମାରି ବବିସ୍ୟଦ୍‌ବାକ୍ୟ ଟାପ୍ ଡାକ୍‌ନି ଉଣ୍ତିଙ୍ଗ୍‌ ମାରି ପବିତ୍ର ବାଡିଦିଙ୍ଗ୍‌ ଆର୍ସିବାଦ୍‌ କିଦେଙ୍ଗ୍‌ ନି ଲୋକାଙ୍ଗ୍‌ ମାରି ନି ପବିତ୍ର ଗାଡ଼୍‌ତି ଉଣ୍ତିଙ୍ଗ୍‌ ସତୁରି ଗୋଟା ୱାରେଙ୍ଗ୍‌ ତିଆର୍‌ ଆତାମାନାତ୍‌ । 25 ଇୟାଉଣ୍ଡିଙ୍ଗ୍‌ ନିନୁ ନେସ୍‌ଆ ମାରି ବୁଜାଦୁ ଜେ, ଜିରୁସାଲମତିଙ୍ଗ୍‌ ମାରିଡ଼େସି ତିଆର୍‌ ଆନିକା ମାରି ତିଆର୍‌ କିନି ମାଟା ୱିଙ୍ଗିନି ବେଡ଼ାଦି ମାଣାନ୍‌ ପେରିନେତା, ବାସେଆତି ଲୋକ୍‌ତି ସାନ୍ଦି ସାତ୍‌ ଗୋଟା ୱାରେଙ୍ଗ୍‌ ଆନାତ୍‌; ମାରି, କାସ୍ଟୁଦି ୱେଡ଼ାଦୁ ନେ ଆକା ସାକ୍‌ଡ଼ି ନି ଗୁଟାଦି ୱାଲେ ସାଟେ ରୁଣ୍ତି ବାର୍ସେକ୍‌ ଦିନ୍‌ତି ଲୋଇ ମାରିଡ଼େସି ତିଆର୍‌ ଆନାତ୍‌ । 26 ମାରି, ସାଟେ ରୁଣ୍ତି ବାର୍ସେକ୍‌ ୱେନ୍‌କା ମାପୁରୁଦି ମାଣାନ୍‌ ବାସେଆତି ଲୋକ୍‌ ୱେରେଏ ଆନାନ୍‌ ମାରି ୱାନ୍‌ ୱାରିକା ଆନାନ୍‌; ମାରି, ୱାଜିନିଦିନ୍‌ତି ପେରିଲୋକାଦି ଗାଡ଼୍‌ ନି ମନ୍ଦିର୍‌ ନାସ୍ଟୁ କିନାର୍‌ ମାରି ଗାଲିପିରୁଦାନ୍‌ ଆକା ସେସ୍‌ ଆନାତ୍‌, ମାରି ୱିଜ୍‌ନିଦିନ୍‌ ସାନ୍ଦି ଜୁଦ୍‌ ଆନାତ୍‌; ୱିଜୁ ବାସ୍‌ଡ଼ାତିକା ତିଆର୍‌ ଆତା ମାନାତ୍‌ । 27 ମାରି, ୱାନ୍‌ ସାତ୍ ନମ୍ୱର୍‌ତି ବାର୍ସୁ ସାନ୍ଦି ନାଣ୍ତ ଲୋକା ୱାଲେ ଆଟ୍‌ୱା ନିୟମ୍‌ କିନାନ୍‌ ମାରି ମୁଣ୍ତ୍ରି ବାର୍ସେକ୍‌ତି ଅଦା କାଡ଼ା ମାରି ଜଜ୍ଞ କିନିକାନି ମାରି ପୁଜା ସିନିକା ବନ୍ଦ କିବିସ୍‌ନାନ୍‌; ମାରି, କାଡ଼୍‌ନିନାନି ଜିନିସ୍‌ଦି ୱିଜୁ ତରଟି ମୁସୁକୁ ନାସ୍ଟୁ କିନିକାନ୍‌ ୱାନାନ୍‌; ମାରି, ତିୟାର୍‌କିତି ପୁରା ସାନ୍ଦି ନାସ୍ଟୁ କିନିୱାନି ମୁସୁକୁ ରିସା ୱାକାଇ ଆନାତ୍‌ ।"