ବେଲ୍ଟଶତ୍ସର ଉଣ୍ତିଙ୍ଗ୍ ଗଡାଦୁ ରାସ୍ନିକା
1 ରାଜା ବେଲ୍ଶତ୍ସର ନିଜେଦି ଆଜାର୍ ଆଜାର୍ ପେରି ଲୋକା ଉଣ୍ତିଙ୍ଗ୍ ଉନ୍ଡ୍ରି ବଜି ତିଆର୍ କିତାନ୍ ମାରି ଆୟା ନାଣ୍ଡ ଲୋକା ଆଗ୍ଡ଼ି ଅଙ୍ଗୁର୍ରସ୍ ଉଟାନ୍ । 2 ମାରି, ୱାନି ବୁବା ନବୂଖଦ୍ନିତ୍ସର ଜିରୁସାଲମତି ମନ୍ଦିର୍ତାନ୍ ଆମା ୱିଜୁ ବାଙ୍ଗାରାମ୍ ମାରି ୱେଣ୍ତିଦି ସାଟିଙ୍ଗ୍ ଡଙ୍ଗାଁ କିତା ମାର୍ହାନ୍, ଆବେଟ୍ ରାଜା ମାରି ୱାନି ପେରି ଲୋକୁ, ମାରି ୱାନି ଆଡ଼ିକ୍ ମାରି କଗ୍ରି ଆଡ଼ିକ୍ ଏଣ୍ଡେସ୍ଗି ଉଣେ, ଇୟାଉଣ୍ଡିଙ୍ଗ୍ ବେଲ୍ଶତ୍ସର ଅଙ୍ଗୁର୍ରସ୍ ଉଣୁବୁ ଉଣୁବୁ ଆୟା ୱିଜୁ ସାଟିଙ୍ଗ୍ ତାତେଙ୍ଗ୍ ମାଟା ସିତାନ୍ । 3 ଆବେନୁ ଜିରୁସାଲମଦି ମନ୍ଦିର୍ତାନ୍, ଇର୍ରିଙ୍ଗ୍, ମାପୁରୁଦି ଇଣ୍ଡ୍ରୋଣାନ୍ ଆମା ୱିଜୁ ବାଙ୍ଗାରାମ୍ ସାଟିଙ୍ଗ୍ ଡଙ୍ଗାଁ ଆତେମାର୍ହେ, ଆକା ଲୋକୁ ତାତାର୍; ମାରି, ରାଜା ମାରି ୱାନି ପେରି ଲୋକୁ ୱାନି ଆଡ଼ିକ୍ ମାରି କଗ୍ରି ଆଡ଼ିକ୍ ଆୟା ୱିଜୁ ଉଟେ । 4 ୱାରୁ ଅଙ୍ଗୁର୍ରସ୍ ଉଣୁବୁ ଉଣୁବୁ ବାଙ୍ଗାରାମ୍ ମାରି ୱେଣ୍ତି, ପିତଲ୍, ଲୁୱା, ୱେର୍ଗୁ ମାରି କାଲୁଦାନ୍ ତିଆର୍ ଆତି ଦିୟାମ୍କାଙ୍ଗ୍ ଦନ୍ୟବାଦ୍ କିତାର୍ ।
5 ଆୟା ବେଡ଼ାଦୁ ଲୋକା କିୟୁଦି ଡ଼ାସ୍କା ୱାଜି ରାଜା ମେଡ଼୍ ଇଲୁଦି ଗଡାଦୁ ସୁନ୍ ତିର୍ପାତି ମୁସୁକୁ ଦିୱା ଇଡ୍ନି ଲାକ୍ତୁ ରାସ୍ତାତ୍, ମାରି କିୟୁଦାନ୍ ଆମାକା ରାସ୍ତାତ୍, ରାଜା ଆକା ସୁଡ଼ୁତାନ୍ । 6 ଆବେନୁ ରାଜାଦି ମୋକମ୍ ସିମ୍ରା ଆତାତ୍ ମାରି ୱାନି ମନ୍ ୱାନିଙ୍ଗ୍ କିଲି ବିଲି କିତାତ୍; ମାରି, ୱାନି କାଲୁଦି ସାନ୍ଦିଦି ୱିଜୁ କୁଦିତା ସର୍ହାତ୍ ମାରି ୱାନି ମେଣ୍ଡାଦୁ ମେଣ୍ଡା ଆଟ୍ତାତ୍ । 7 ରାଜା ପାଞ୍ଜି, ଗୁଣିଆ ମାରି କଲ୍ଦିୟର୍ ମାରି ତାନିଉଣ୍ଡିଙ୍ଗ୍ ନାଣ୍ଡ ଆଉଲି ଆଜି କୁକ୍ସି ଇର୍ହାନ୍ । ରାଜା ବାବିଲତି ପଣ୍ତିତ୍ ଲୋକାଙ୍ଗ୍ ଇର୍ହାନ୍, ଏନ୍କି ଇୟା ରାସ୍ତିକା ପୋଡ଼ାନାନ୍ ମାରି ଆବେଣି ଅର୍ତ ନାଙ୍ଗି ବୁଜାକିନାନ୍, ୱାନ୍ ସେର୍ଗା ରଙ୍ଗ୍ଦି ଆଙ୍ଗିଁ ଆରାନାନ୍ ମାରି ୱାନି ମାଟାଦାନ୍ ବାଙ୍ଗାରାମ୍ଦି ସିକ୍ଣି ସିଆଇ ଆନାତ୍, ମାରି ୱାନ୍ ରାଜିଦୁ ମୁଣ୍ଡ୍ରି ଶାସନ୍ କିନିକାନ୍ ଆନାନ୍ । 8 ଆବେନୁ ରାଜାଦି ୱିଜୁ ପଣ୍ତିତ୍ ଲୋକା ଲୋଇରାନ୍ ୱାତାର୍; ମାତର ୱାର୍ ରାସ୍ତିକା ପୋଡ଼ାଦେଙ୍ଗ୍ ଆଟ୍ଏତାର୍, ଇର୍ରିଙ୍ଗା ରାଜାଦିଙ୍ଗ୍ ଆବେଣି ଅର୍ତ ଇଣ୍ଡ୍ରେଙ୍ଗ୍ ଆଟ୍ଏତାର୍ । 9 ଆଦେଙ୍ଗ୍ ବେଲ୍ଶତ୍ସର ନାଣ୍ଡ କିଲିବିଲି ଆତାନ୍ ମାରି ୱାନି ମୋକମ୍ ସିମ୍ରା ଆତାତ୍, ମାରି ୱାନି ପେରି ଲୋକୁ କାବାଆତାର୍ ।
10 ଇୟା ସମୟତୁ ରାଜାଦି ମାରି ୱାନି ପେରି ଲୋକା ମାଟା ଉଣ୍ତିଙ୍ଗ୍ ରାଣି ଉଣି ଇଣ୍ଡ୍ରୋ ୱାତାତ୍; ରାଣି ଇର୍ହାତ୍, "ଏ ରାଜା ନାଣ୍ଡ ଦିନ୍ ଜିଆ; ନି ମନ୍ ନିଙ୍ଗିଁ କିଲିବିଲି କିମାକିତ୍, ଇର୍ରିଙ୍ଗ୍ବା ନି ମୋକମ୍ ସିମ୍ରା ଆମାକିତ୍ । 11 ନି ରାଜିଦି ଲୋଇ ଅରେନ୍ ଲୋକୁ ମାନାନ୍, ୱାନି ଆତ୍ମାଦୁ ପବିତ୍ର ଦିୟାମ୍କା ଆତ୍ମା ମାନେ; ମାରି, ନି ବୁବାଦି ସମୟତୁ ଦିୟାମ୍କା ବୁଦି ୱାଜା ଗ୍ୟାନ୍ତି ଜାୟ୍ ମାରି ବୁଦି ମାରି ଗ୍ୟାନ୍ ୱାନି ଲାକ୍ତୁ ତରାତା ମାର୍ହାତ୍; ମାରି, ନି ବୁବା ରାଜା ନବୂଖଦ୍ନିତ୍ସର, ହୁଁ, ନି ବୁବା ରାଜା, ୱାନିଙ୍ଗ୍ ମନ୍ତ୍ର, ପାଞ୍ଜିସୁଣିକାର୍, କଲ୍ଦିୟର୍ ମାରି ନେଗିକା ସେଇକା କିନିଲୋକା ମୁସୁକୁରାନ୍ ପେରିକାନ୍ କିତାମାର୍ହାନ୍; 12 ଇର୍ରିଙ୍ଗ୍ ଆୟା ଦାନିୟେଲଦି ଜିବନ୍ତୁ ନେଗି ଆତ୍ମା, ଗ୍ୟାନ୍ ମାରି ବୁଦ୍ଧି, ଲୋବ୍ଦି ଅର୍ତ କିଦେଙ୍ଗ୍ ମାରି ୱିଜୁ ମାଟା ଇଣ୍ଡ୍ରେଙ୍ଗ୍ ମାରି ଏତ୍ କିନି ସାକ୍ତି ତରାତାମାର୍ହାତ୍, ରାଜା ୱାନିଙ୍ଗ୍ ବେଲ୍ଟଶତ୍ସର ଦର୍ ସିତାମାର୍ହାନ୍ । ଇଲେଇ ଦାନିୟେଲତିଙ୍ଗ୍ କୁକାଇ ଆପିତ୍, ୱାନ୍ ଅର୍ତ ଇନାନ୍ ।"
ଦାନିୟେଲ ରାସ୍ତି ଅର୍ତ ୱେର୍ନିକା
13 ଆଦେଙ୍ଗ୍ ଦାନିୟେଲତିଙ୍ଗ୍ ରାଜାଦି ଆଗ୍ଡ଼ି ତାତାର୍ ରାଜା ଦାନିୟେଲଦିଙ୍ଗ୍ ଇର୍ହାନ୍, ନା ବୁବା ରାଜା ଜିହୁଦା ଦେସ୍ତାନ୍ ଆମା ୱାରିଙ୍ଗ୍ ତାତାମାର୍ହାନ୍, ଆୟା ତରାୟ୍ଆଜି ୱାତିମାର୍ହି ଜିହୁଦି ଲୋକା ମାଣାନ୍ ଆମା ଦାନିୟେଲ ମାର୍ହାନ୍, ୱାନ୍ ନୋ ନିନ୍ ? 14 ନାନ୍ ନି ବିସୟ୍ତାନ୍ ୱେରାମାନା, ନି ଜିବନ୍ତୁ ଦିୟାମ୍କା ଆତ୍ମା ମାନାତ୍, ମାରି ଗ୍ୟାନ୍ ମାରି ଜାୟ୍, ବୁଦି ମାରି ନେଗି ଗ୍ୟାନ୍ ନି ବାନୁ ତର୍ନାତ୍ । 15 ଇଲେଇ ଇୟା ରାସ୍ତିକା ପଡ଼ାନି ଉଣ୍ତିଙ୍ଗ୍ ମାରି ଆବେଣି ଅର୍ତ ନାଙ୍ଗି ୱେର୍ନି ଉଣ୍ତିଙ୍ଗ୍ ପଣ୍ତିତ୍ ଲୋକୁ ମାରି ପାଞ୍ଜିସୁଣିକାର୍ ନା ଲାକ୍ତୁ ୱାତାମାନାର୍; ମାତର ୱାର୍ ଆବେଣି ଅର୍ତ ଇଣ୍ଡ୍ରେଙ୍ଗ୍ ଆଟ୍ଏତାର୍ । 16 ମାତର୍ ନି ବିସୟ୍ତାନ୍ ନାନ୍ ୱେର୍ହା ମାନା ଜେ, ନିନ୍ ଅର୍ତ ଇଣ୍ଡ୍ରେଙ୍ଗ୍ ମାରି ତିଲାନିକା ଆକ କିଦେଙ୍ଗ୍ ଆଟ୍ନି; ଇଲେଇ ନିନ୍ ଜଦି ଇୟା ରାସ୍ତିକା ପଡ଼ାଜି ଆବେଣି ଅର୍ତ ନାଙ୍ଗି ଇଣ୍ଡ୍ରେଙ୍ଗ୍ ଆଟ୍ନି, ଆଦେଙ୍ଗ୍ ନିନ୍ ସେର୍ଗା ରଙ୍ଗ୍ଦି ଆଙ୍ଗିଁ ଆରାନି, ନି କକ୍ଲାଦୁ ବାଙ୍ଗାରାମ୍ଦି ସିକ୍ଣି ସିଆଇ ଆନାତ୍ ମାରି ନିନ୍ ରାଜିଦୁ ତିନ୍ ଲମ୍ୱର୍ତି ସାସନ୍ କିନିକାନ୍ ଆନି ।
17 ନାସ୍ତିୱାଲେ ଦାନିୟେଲ ରାଜାଦି ଆଗ୍ଡ଼ି ମାରି ଡ଼େସି ଇର୍ହାନ୍, "ନି ଦାନ୍ ନିଙ୍ଗିଁ ମାନିତ୍ ମାରି ନି ପୁରୁସ୍କାର ଆଇୱାରିଙ୍ଗ୍ ସିଆ; ଇର୍ରିଙ୍ଗ୍ବା ନାନ୍ ରାଜାଦି ଆଗ୍ଡ଼ି ଇୟା ରାସ୍ତିକା ପଡ଼ାନା ମାରି ଅର୍ତ ୱାନିଙ୍ଗ୍ ଇନା ।"
18 ଏ ପେରିରାଜା, ପେରି ମାପୁରୁ ନି ବୁବା ନବୂଖଦ୍ନିତ୍ସରତିଙ୍ଗ୍ ରାଜି, ମହିମା, ଗୌରବ୍ ମାରି ସାକ୍ତି ସିତାନ୍; 19 ମାରି, ୱାନ୍ ୱାନିଙ୍ଗ୍ ଇୟାୱାଜା ମହିମା ସିତିଙ୍ଗ୍ ୱିଜୁ କୁଟୁମ୍, ୱିଜୁ ଦେସ୍ତିକାର୍ ମାରି ଆଇ ଆଇ ବାସାଦି ଲୋକୁ ୱାନି ଆଗ୍ଡ଼ି ତିରିଗ୍ଜି ତିଲାତାର୍; ଏଙ୍ଗ୍ ୱାନି ବଦା, ୱାନିଙ୍ଗ୍ ୱାନ୍ ସାପିସ୍ କିତାନ୍ ମାରି ଏଙ୍ଗ୍ ୱାନି ଇଛା, ୱାନ୍ ୱାନିଙ୍ଗ୍ ଜିବନ୍ ଇଟ୍ତାନ୍; ମାରି, ଆମା ୱାନିଙ୍ଗ୍ ୱାନି ବଦା, ୱାନ୍ ୱାନିଙ୍ଗ୍ ମୁସ୍କୁ କିତାନ୍ ମାରି ଆମାୱାନିଙ୍ଗ୍ ୱାନି ବଦା, ୱାନିଙ୍ଗ୍ ୱାନ୍ ଆଡ୍ଗି କିତାନ୍ । 20 ମାତର ୱାନି ଜିବନ୍ ଗର୍ବ ଆତାତ୍ଆକା ମାରି ୱାନି ଆତ୍ମା ଆଟ୍ୱା ଆଜି ୱାନ୍ ଆକାର୍ଦାନ୍ ଜିତାନ୍, ୱାନ୍ ନିଜେଦି ରାଜା ରାଜାଗାଦିଦାନ୍ ରେତାନ୍ ମାରି ୱାନି ଅଦିକାର୍ ୱାନି ମାଣାନ୍ ଅଆୟ୍ ଆତାତ୍, 21 ମାରି, ୱାନ୍ ଲୋକା ମାଣାନ୍ ଆକ ଆତାନ୍; ୱାନି ମନ୍ ଜାତୁଙ୍ଗାଁ ୱାଜା ଆତାନ୍ ମାରି ବନ୍ତି ଗଦଦି ୱାଲେ ୱାନି ବାସାନିକାନ୍ ଆତାନ୍; ୱାନ୍ କଡି ୱାଜା ସାରା ତିର୍ହାନ୍ ମାରି ୱାନି ମେନ୍ଦଲ ବାଦଡ଼୍ତି ମାସୁଦାନ୍ ଉଦିତାନ୍; ନାସ୍ତିୱାଲେ ୱାନ୍ ନେସ୍ତାନ୍ ଜେ, ୱିଜେରି ମାପୁରୁ ଲୋକା ରାଜିଦୁ ସାସନ୍ କିନାନ୍ ମାରି ଆୟା ମୁସୁକୁ ଆମାୱାନିଙ୍ଗ୍ ୱାନି ବଦା, ୱାନିଙ୍ଗ୍ ୱାନ୍ ଅଦିକାର୍ ସିନାନ୍ । 22 ମାରି ଏ ବେଲ୍ଶତ୍ସର, ୱାନି ମାରିନ୍ ଜେ ନିନ୍, ନିନ୍ ଇକାୱିଜୁ ନେସ୍ତିଙ୍ଗାବା ନି ଜିବନ୍ ସାନ୍ତି କିଇ; 23 ମାତର ମୁସ୍କୁପୁର୍ତି ପ୍ରବୁଦି ବିରୁଦ୍ତାନ୍ ନିଜେଦିଙ୍ଗ୍ ପେରିକା କିତିମାନି ମାରି ୱାନି ଇଡ୍ରଣି ୱିଜୁ ସାଟିଙ୍ଗ୍ ନି ଆଗ୍ଡ଼ି ତାତିଙ୍ଗା, ନିନ୍ ମାରି ନି ପେରି ଲୋକୁ, ନି ଆଡ଼ିକ୍ ମାରି ନି କଗ୍ରି ଆଡ଼ିକ୍ ଆୟାୱିଜୁ କୁଡ଼ୁକାଦୁ ଅଙ୍ଗୁର୍ରସ୍ ଉଟା ମାନାର୍; ମାରି ୱେଣ୍ତିଦିକା, ବାଙ୍ଗାରାମ୍ଦିକା, ପିତଲ୍ଦିକା, ଲୁୱାଦିକା, ୱେର୍ଗୁଦିକା ମାରି କାଲୁଦି ଆମା ଦିୟାମ୍କୁ ସୁଡ଼ୁଉ, କି ୱେନ୍ଉ; କି ନେସ୍ଉ, ୱାନିକାଙ୍ଗ୍ ମିର୍ ସେବାକିଜିନିଦେର୍; ମାରି, ମି ପୁଣ୍ଡା ଆମାୱାନି କିଉଦୁ ମାରି ମି ୱିଜୁ ସାରି ଆମାୱାନିଦି, ମିର୍ ଆୟା ମାପୁରୁଦିଙ୍ଗ୍ ସେବା କିଇଦେର୍ । 24 ଇୟା ସମୟତୁ ୱାନି ଲାକ୍ତୁରାନ୍ କିୟୁଦାନ୍ ଡ଼େସିୱାତାତ୍, ମାରି ଇୟା ରାସ୍ତିକା ରାସାଇ ଆତାତ୍ ।
25 ମାରି, ଆମାକା ରାସାଇ ଆତାତ୍, ଆକା ଇୟାକା, ମିନେ ମିନେ, ତକେଲ, ଉପାରସିନ । 26 ଇବେଣି ଅର୍ତ ଇୟା ମିନେ, ମାପୁରୁ ନି ରାଜିଦିଙ୍ଗ୍ ଇସାବ୍ କିତାମାନାନ୍ ମାରି ଆକା ୱିସ୍ତା ମାନାନ୍ । 27 ତକେଲ, ନିନ୍ ତୁସୁନିମାଣାନ୍ ତୁସାତି ମାନି ମାରି ଉଣା ତରିତିମାନି । 28 ପିରସ୍, ନି ରାଜି ବାଗ୍ ଆତାମାନାତ୍, ମାରି ମାଦିୟ ମାରି ପାରସିକ ଲୋକାଙ୍ଗ୍ ସିଆୟ୍ ଆତାମାନାତ୍ ।
29 ନାସ୍ତିୱାଲେ ବେଲ୍ଶତ୍ସର ଆଦେସ୍ ସିତାନ୍, ଲୋକୁ ଦାନିୟେଲତିଙ୍ଗ୍ ସେର୍ଗା କଲର୍ତି ଆଙ୍ଗିଁ ଆରିସ୍ତାର୍ ମାରି ୱାନିଙ୍ଗ୍ ବାଙ୍ଗାରାମ୍ଦି ସିକ୍ଣି ସିତାର୍ ମାରି ୱାନ୍ ଜେ ରାଜିଦି ମୁଣ୍ଡ୍ରି ଶାସନ୍ କିନିକାନ୍ ଆନାନ୍, ୱାନି ବିସୟ୍ତାନ୍ ଇକା ଇର୍ହାନ୍ । 30 ଆୟା ନାଡ଼ା କଲ୍ଦିୟରି ରାଜା ବେଲ୍ଶତ୍ସର ସାତାନ୍ । 31 ମାରି, ମାଦିୟ ଦାରିୟାବସ ରାଜି ପୟ୍ତାନ୍, ଆୟା ସମୟତୁ ୱାନିଙ୍ଗ୍ ସାଟେ ରୁଣ୍ତି ବାର୍ସେକ୍ ବୟସ୍ ଆତାମାର୍ହାତ୍ ।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)