1 ପାରସ୍ୟଦି ରାଜା କୋରସ୍‌ଦି ସାସନ୍‌ଦି ମୁଣ୍ଡ୍ରି ବାର୍ସେକ୍‌ଦୁ ବେଲ୍‌ଟଶତ୍ସର ଦର୍‌ତି ଦାନିୟେଲଦି ଉଣ୍ତିଙ୍ଗ୍‌ ଉନ୍‌ଡ୍ରି ବିସୟ୍‌ ତରାତାତ୍‌ ମାରି ଆକା ସତ୍‌, ଆକା ଉନ୍‌ଡ୍ରି ପେରି ଜୁଦ୍‌ଦି ବିସୟ୍‌; ମାରି, ୱାନ୍‌ ଆକା ବୁଜାତାନ୍‌ ମାରି ଆୟା ବର୍‌ତି ବିସୟ୍‌ ୱାନିଙ୍ଗ୍‌ ବୁଜା ପଡ଼ାତାତ୍‌ ।

2 ଆୟା ସମୟତୁ ନାନ୍‌, ଦାନିୟେଲ, ମୁଣ୍ଡ୍ରି ୱାରାମ୍‌ ସାନ୍ଦି ଆଡ଼୍‌ବାଜି ମାର୍ହା । 3 ପୁରା ମୁଣ୍ଡ୍ରି ୱାରାମ୍‌କୁ ୱିଜ୍‌ନି ସାନ୍ଦି ନାନ୍‌ ଏମେବା ନେଗି କାଦି ଉଣୁଏତା, ବା କାଣ୍ଡା ବା ଅଙ୍ଗୁର୍‌ ରସ୍‌ ନା ୱେୟୁଦୁ ଡୁଗ୍‌ଏତାତ୍‌, ଇର୍ରିଙ୍ଗ୍‌ବା ନାନ୍‌ ଇନି ନିୟୁବା ଉସାଏତା ।

4 ମାରି, ପାର୍‌ତୁମ୍‌ ଲେଜୁଦି ନାଲ୍‌ଗି ଦିନ୍‌ତୁ ନାନ୍‌ ହିଦେକଲ୍‌ ଦର୍‌ତି ପେରି ଗାଡାଦି ପାଡ଼ିଦୁ ମାର୍ରିୱାଲେ, 5 ନାନ୍‌, କାଣୁକୁସାରି ସୁଡ଼ୁତା, ମାରି ସୁଡୁଦୁ, ଅଡ଼ିନି ଆଙ୍ଗିଁ ଆରାତି ଅରେନ୍‌ ଲୋକୁ, ୱାନି ଜୁକି ମୁସୁକୁରି ନେଗି ବାଙ୍ଗାରାମ୍‌ଦି ବେଲ୍‌ଟୁଦାନ୍‌ ତରାତା ମାର୍ହାନ୍‌; 6 ୱାନି ମେନ୍ଦଲ ବାଙ୍ଗାରାମ୍‌ତି ୱାଜା ମାରି ୱାନି ମୋକମ୍‌ ଲାଇନ୍‌ତି ଜାୟ୍‌ତି ୱାଜା ମାରି ୱାନି କାଣୁକୁ କାସ୍‌ନି ଉମ୍‌ଲା ସିସୁ ୱାଜା, ମାରି ୱାନି କିୟୁ ମାରି କାଲ୍‌କୁ ନରାତି କଂସ୍‌ତି ୱାଜା ମାରି ୱାନି ମାଟାଦି ବୋଲୁ ଲୋକାଦି ବୋଲୁ ୱାଜା । 7 ମାରି, ନାନ୍‌, ଦାନିୟେଲ, ଅରେନ୍‌ ବର୍‌ ସୁଡ଼ୁତା; ଇର୍ରିଙ୍ଗ୍‌ ନା ସାଙ୍ଗ୍‌କୁ ଆୟା ବର୍‌ ସୁଡ଼ୁଏତାର୍‌; ମାତର ୱାର୍‌ ନାଣ୍ଡ ତିଲାତାର୍‌ ମାରି ନିଜେ ନିଜେଦିଙ୍ଗ୍‌ ମାର୍‌ଗିଦେଙ୍ଗ୍‌ ଉରୁକ୍‌ତାର୍‌ । 8 ଆବେନୁ ନାନ୍‌ ଅରେନ୍‌ ନେ ମାନ୍‌ଜି ଇୟା ବର୍‌ ସୁଡ଼ୁତା ମାରି ନା ଲାକ୍‌ତୁ ଇନି ସାକ୍ତିଦି ସିଲେଣ୍ଡା ମାର୍ହାତ୍‌; ଇର୍ରିଙ୍ଗ୍‌ ନାନୁ ୱିଜିତା ମାର୍ହାତ୍‌ ମାରି ନାନ୍‌ ଇନି ସାକ୍ତିଦି ଇଡ୍‌ଦେଙ୍ଗ୍‌ ଆଟ୍‌ଏତା । 9 ଇର୍ରିଙ୍ଗ୍‌ବା ନାନ୍‌ ୱାନି ବାକ୍ୟଦି ବଲୁ ୱେର୍ହା; ମାରି, ଏସ୍ତିୱାଲେ ନାନ୍‌ ୱାନି ବାକ୍ୟଦି ବଲୁ ୱେର୍ହା, ନାସ୍ତିୱାଲେ ନାନ୍‌ ନାଣ୍ଡ୍‌ ସୁସ୍‌କାଣାନ୍‌ ଗୁରିତାନ୍ । 10 ଇବେନୁ ସୁଡୁଦୁ, ଉନ୍‌ଡ୍ରି କିୟୁ ମୁଟ୍‌ସି ନାଙ୍ଗି କାଲ୍‌କାଙ୍ଗ୍‌ ମାରି କିକାଙ୍ଗ୍‌ ଆସ୍‌ସି ସାକ୍‌ତି ସିତାନ୍‌ ।

11 ମାରି, ୱାନ୍‌ ନାଙ୍ଗି ଇର୍ହାନ୍‌, ଏ ନା ନେଗି ମାରିନ୍‌ ଦାନିୟେଲ, ମାପ୍‌ ନିଙ୍ଗିଁ ଆମା ଆମା ବାକ୍ୟ ଇନାପ୍‌, ଆକା ବୁଜାଆ ମାରି ସାଡ଼ୁକୁ ଆଜି ନିଲ୍‌ଆ; ଇର୍ରିଙ୍ଗ୍‌ ଇଲେଇ ମାପ୍‌ ନି ଲାକ୍‌ତୁ ୱାତାମାନାପ୍‌; ୱାନ୍‌ ନାଙ୍ଗି ଇୟା ମାଟା ଇର୍ରିଙ୍ଗ୍‌ ନାନ୍‌ ତିରିଗ୍‌ଜି ତିରିଗ୍‌ଜି ନିଙ୍ଗିଁତା ।

12 ଇବେନୁ ୱାନ୍‌ ନାଙ୍ଗି ଇର୍ହାନ୍‌, ଏ ଦାନିୟେଲ, ତିଲାମା; ଇର୍ରିଙ୍ଗ୍‌ ନିନ୍‌ ଆମା ପାର୍‌ତୁମ୍‌ ଦିନ୍‌ତାନ୍‌ ବୁଜାନି ଉଣ୍ତିଙ୍ଗ୍‌ ମାରି ନି ମାପୁରୁଦି ଆଗ୍‌ଡ଼ି ନିଜେଦିଙ୍ଗ୍‌ ସାନ୍ତି କିନି ଉଣ୍ତିଙ୍ଗ୍‌ ନିଜେଦି ମୋନ୍‌ ଡ଼େପ୍‌ତି, ଆୟା ନାଣ୍ତିରାନ୍ ନି ବାକ୍ୟ ୱେନାଇ ଆତାତ୍‌; ମାରି, ନି ବାକ୍ୟ ଉଣ୍ତିଙ୍ଗ୍‌ ମାପ୍‌ ୱାତାମାନାପ୍‌ । 13 ମାତର ପାରସ୍ୟ ରାଜାଦି ପେରିକାନ୍‌ କଡ଼େ ଏକ୍‌ ଦିନ୍‌ ସାନ୍ଦି ମାଙ୍ଗିଁ କାଡ଼ିତାନ୍‌; ମାତର ସୁଡୁଦୁ, ପେରି ଲୋକା ମାଣାନ୍‌ ମିକାୟେଲ ଦର୍‌ତି ଅରେନ୍‌ ଲୋକୁ ମାଙ୍ଗିଁ ସାହାଜ୍ୟ କିଦେଙ୍ଗ୍‌ ୱାତାନ୍‌; ମାରି, ମାପ୍‌ ଆୟା ବାଡିଦୁ ପାରସ୍ୟଦି ରାଜାରି ୱାଲେ ମାର୍ହାପ୍‌ । 14 ଇଲେଇ, ସାରାସାରି କାଡ଼ାଦୁ ମି ଲୋକା ଉଣ୍ତିଙ୍ଗ୍‌ ଆମାକା ଗୋଟାନାତ୍‌, ଆକା ନିଙ୍ଗିଁ ବୁଜାକିଜି ସିଦେଙ୍ଗ୍‌ ମାପ୍‌ ୱାତାମାନାପ୍‌; ଇର୍ରିଙ୍ଗ୍‌ ବର୍‌ ମାରି ନାଣ୍ଡ କାଡ଼ା ସାନ୍ଦି ମାନାତ୍‌ । 15 ୱାନ୍‌ ନାଙ୍ଗି ଇୟାୱାଜା ମାଟା ଇର୍ହି ୱେନ୍‌କା ନାନ୍‌ ବୁମିଦୁ ତୋରିଙ୍ଗ୍ ମୋକମ୍‌ ପାଡ଼୍‌କ୍‌ସି କାବା ଆତା । 16 ଇବେନୁ ସୁଡ଼ୁଦୁ, ଲୋକା ମୁରୁତିଦି ନାନି ଅରେନ୍‌ ଲୋକୁ ନା ୱେପଟିଦୁ ମୁଟ୍‌ତାନ୍‌; ଆଦେଙ୍ଗ୍‌ ନାନ୍‌ ନିଜେଦି ୱେୟୁଦାନ୍‌ ନା ଲାକ୍‌ତୁ ନିଲ୍‌ପ୍‍ତି ମାର୍ରି ଲୋକୁଦିଙ୍ଗ୍‌ ଇର୍ହା, "ଏ ନା ପ୍ରବୁ, ଇୟା ବର୍‌ତାନ୍‌ ନା ମାଲିକ୍‌ ନାଙ୍ଗି କାସ୍ଟୁ ସିତାମାନାନ୍‌ ମାରି ନାନ୍‌ ଇନିବା ସାକ୍ତି ଇଡ୍‌ଦେଙ୍ଗ୍‌ ଆଟ୍‌ଏଜିନା । 17 ଇର୍ରିଙ୍ଗ୍‌ ନା ଇୟା ମାଲିକ୍‌ ସାକର୍‌ ଏଣ୍ଡେସ୍‌ ଇୟା ନା ସାକର ୱାଲେ ୱାର୍‌ଗିନାନ୍‌ ? ଆୟା ଦାପ୍ରେ ନା ଲାକ୍‌ତୁ ଇନି ସାକ୍ତି ନାଙ୍ଗି ପୁଣ୍ଡା ବା ସିଲେତାତ୍‌ ।"

18 ନାସ୍ତିୱାଲେ ଲୋକା ମୁରୁତିଦି ଅରେନ୍‌ ଲୋକୁ ମାରି ଡେସି ନାଙ୍ଗି ମୁଟ୍‌ସି ସାନ୍ତି କିତାନ୍‌ । 19 ମାରି, ୱାନ୍‌ ଇର୍ହାନ୍‌, "ଏ ନେଗି ଲୋକୁ ତିଲାମାଟ୍‌; ମିଙ୍ଗିଁ ସାନ୍ତି ଆପିତ୍‌, ସାକ୍ତି ଆଦୁ, ସାକ୍ତି ଆଦୁ !" ୱାନ୍‌ ନାଙ୍ଗି ଇକା ଇର୍ରିଙ୍ଗ୍‌, ନାନ୍‌ ସାକ୍ତି ଆଜି ଇର୍ହା, "ନା ପ୍ରବୁ ଇନ୍‌ଆ ଇର୍ରିଙ୍ଗ୍‌ ନିନ୍‌ ନାଙ୍ଗି ସାକ୍ତି କିତିମାନି ।"

20 ଆବେନୁ ୱାନ୍‌ ଇର୍ହାନ୍‌, "ମାପ୍‌ ନ ଦାନିଙ୍ଗ୍‌ ନି ଲାକ୍‌ତୁ ୱାତାମାନାପ୍‌, ଆକା ନିନ୍‌ ନେସ୍‌ନି ନୋ ? ଇଲେଇ ମାପ୍‌ ପାରସ୍ୟଦି ପେରି ଲୋକା ୱାଲେ ଜୁଦ୍‍ କିନି ଉଣ୍ତିଙ୍ଗ୍‌ ଡେସି ସନାପ୍‌; ମାରି, ମାପ୍‌ ସତିଙ୍ଗା, ସୁଡୁଦୁ, ଗ୍ରିସ୍‌ଦି ପେରି ଲୋକୁ ୱାନାର୍‌ । 21 ମାତର ସତ୍‌ଦି ବୋଇଦୁ ଆମାକା ରାସାତା ମାନାତ୍‌, ଆକା ମାପ୍‌ ମିଙ୍ଗିଁ ଇନାପ୍‌; ଇୟା ଲୋକା ବିରୁଦ୍ଧତାନ୍‌ ମାପ୍‌ ଆମାକା କିନି ଉଣ୍ତିଙ୍ଗ୍‌ ମି ପେରିକାନ୍‌ ମିକାୟେଲ ଡ଼ିସ୍‌ତିଙ୍ଗ୍‌ ମାରି ଏନ୍‌ ସିଲେନ୍‌ ।"