1 ଇୟାୱେନ୍‌କା ନବୂଖଦ୍‌ନିତ୍ସରଦି ଶାସନ କାଡ଼ାଦି ରୁଣ୍ଡି ବାର୍ସେକ୍‌ଦୁ, ନବୂଖଦ୍‌ନିତ୍ସର ଲୋବ୍‌ ସୁଡ଼ୁତାନ୍‌; ଆବେନୁ ୱାନି ଜିବନ୍‌ ତିର୍‌ଗିତାତ୍‌ ମାରି ୱାନି ସୁସ୍‍କାଣୁକୁ ରୁଙ୍ଗିତେ । 2 ଆଦେଙ୍ଗ୍‌ ରାଜା ୱାନି ଲୋବ୍‌ ସୁଡ଼ୁତିକା ନେସ୍‌ନି ଉଣ୍ତିଙ୍ଗ୍‌ ରାଜା ମନ୍ତ୍ର, ଜାଦୁ କିନିୱାରିଙ୍ଗ୍‌, ପାଞ୍ଜି ସୁଣିୱାରିଙ୍ଗ୍‌ ବିଦ୍ୟାକିନିୱାରିଙ୍ଗ୍‌ ମାରି କଲଦିୟରିଙ୍ଗ୍‌ କୁକ୍‌ନି ଉଣ୍ତିଙ୍ଗ୍‌ ଆଦେସ୍‌ ସିତାନ୍‌ । ଆବେଟ୍‌ ୱାର୍‌ ୱାଜି ରାଜାଦି ଆଗ୍‌ଡ଼ି ନିଲ୍‌ତାର୍‌ । 3 ମାରି, ରାଜା ୱାରିଙ୍ଗ୍‌ ଇର୍ହାନ୍‌, "ନାନ୍‌ ଉନ୍‌ଡ୍ରି ଲୋବୁ ସୁଡ଼ୁତା ମାନା, ମାରି ଆୟା ଲୋବୁ ବୁଜାନି ଉଣ୍ତିଙ୍ଗ୍‌ ନା ମୋନ୍‌ ଚିନ୍ତା ଆଜିନାତ୍‌ ।"

4 ଆବେନୁ କଲ୍‌ଦୀୟର୍‌ ଅରାମିୟ ବାସାଦାନ୍‌ ରାଜାଦିଙ୍ଗ୍‌ ଇର୍ହାର୍‌, "ଏ ରାଜା, ନାଣ୍ତ ଦିନ୍‌ ଜିଜ ମାନ୍‌ଆ; ନି ଦାସ୍‌ରିଙ୍ଗ୍‌ ଲୋବୁ ୱେର୍‌ଆ, ମାପୁ ଆବେଣି ଅର୍ତ ନିଙ୍ଗିଁ ୱେର୍‌ନାପ୍‌ ।"

5 ରାଜା କଲ୍‌ଦିୟରିଙ୍ଗ୍‌ ମାଟା ସିଜି ଇର୍ହାନ୍‌, "ନା ମାଣାନ୍‌ ମାଟା ସୋତା ସର୍ହାମାନାତ୍‌; ମିର୍‌ ଜଦି ଆୟା ଲୋବୁ ମାରି ଆବେଣି ଅର୍ତ ନାଙ୍ଗିଁ ଇନ୍‌ଏତିଙ୍ଗାଁ, ଆର୍‌ତିଙ୍ଗ୍‌ ମିରୁ ମୁକା ମୁକା ଆଜି କାତାନିଦେର୍‌ ମାରି ମି ଇଲ୍‌କୁ ଗାତାମ୍‌ ଗାଦି କିଆଇ ଆନାତ୍‌ । 6 ମାତର ଯଦି ମିର୍‌ ଲୋବୁ ମାରି ଆବେଣି ଅର୍ତ ୱେର୍‌ନିଦେର୍‌, ଆଦେଙ୍ଗ୍‌ ମିର୍‌ ନା ମାଣାନ୍‌ ଦାନ୍‌, ଇନାମ୍‌ ମାରି ନାଣ୍ଡ ସନ୍‌ମାନ୍‌ ପୋଇନିଦେର୍‌; ଇୟା ଉଣ୍ତିଙ୍ଗ୍‌ ଆୟା ଲୋବୁ ମାରି ଆବେଣି ଅର୍ତ ନା ଲାକ୍‌ତୁ ୱେର୍‌ତୁ ।"

7 ୱାର୍‌ ରିଜା ମାଟା ସିଜି ଇର୍ହାର୍‌, "ରାଜା, ନି ଦାସ୍‌ରିଙ୍ଗ୍‌ ଲୋବୁ ଇନ୍‌ଆ, ଆବେଟ୍‌ ମାପ୍‌ ଅର୍ତ ୱେର୍‌ନାପ୍‌ ।"

8 ରାଜା ମାଟା ସିଜି ଇର୍ହାନ୍‌, "ନା ମାଣାନ୍‌ ମାଟା ସୋତା ସର୍ହାମାନାତ୍‌, ଇକା ସୁଡ଼ୁଜି ମିର୍‌ ୱେଡ଼ା କିଦେଙ୍ଗ୍‌ ଇଛା କିଜିନିଦେର୍‌, ଇକା ନାନ୍‌ ସତ୍‌ନେ ନେସ୍‌ନା । 9 ମାତର୍‌ ମିର୍‌ ଜଦି ଆୟା ଲୋବୁ ନାଙ୍ଗିଁ ଇନ୍‌ଏତିଙ୍ଗାଁ; ଆଦେଙ୍ଗ୍‌ ମି ଉଣ୍ତିଙ୍ଗ୍‌ ଉଣ୍ତ୍ରେ ଦଣ୍ତ୍‌ ମାନାତ୍‌; ଇରିଙ୍ଗ୍‌ ୱେଡ଼ା ଆନି ସାନ୍ଦି ମିର୍‌ ନା ଆଗ୍‌ଡ଼ି ମିସ୍‌ ନି ଟକୁଆ ମାଟା ଇନି ଉଣ୍ତିଙ୍ଗ୍‌ ତିଆର୍‌ କିତିମାନିଦେର୍‌; ଇୟାଉଣ୍ଡିଙ୍ଗ୍‌ ମିର୍‌ ଲୋବୁ ନାଙ୍ଗିଁ ଇଣ୍ଡ୍ରୁ, ଆଦେଙ୍ଗ୍‌ ମିର୍‌ ଜେ ଆବେଣି ଅର୍ତ ନା ଲାକ୍‌ତୁ ଇଣ୍ଡ୍ରେଙ୍ଗ୍‌ ଆଟ୍‌ନିଦେର୍‌, ଇକା ନାନ୍‌ ନେସ୍‌ନା ।" 10 କଲ୍‌ଦିୟର୍‌ ରାଜାଦି ଆଗ୍‌ଡ଼ି ମାଟା ସିଜି ଇର୍ହାର୍‌, "ରାଜାଦି ବିସୟ୍‌ଦାନ୍‌ ଏନ୍‌ ଇଣ୍ଡ୍ରେଙ୍ଗ୍‌ ଆଟ୍‌ନାନ୍‌, ଦେସ୍‌ତୁ ଇୟାୱାଜା ଏମେ ଲୋକୁ ସିଲେନ୍‌; ଇର୍ରିଙ୍ଗ୍‌ ଏମେବା ରାଜା, ପ୍ରବୁ ବା ସାସନ୍‌କିନିକାନ୍‌ ଏମେବା ଗୁଣିଆରିଙ୍ଗ୍‌ ବା ପାଞ୍ଜିସୁଣିୱାରିଙ୍ଗ୍‌ ଇର୍ରିଙ୍ଗା କଲ୍‌ଦୀୟରିଙ୍ଗ୍‌ ଇୟାୱାଜା ମାଟା ୱେନ୍‌ବାଏର୍‌ । 11 ମାରି, ରାଜା ଆମାକା ବଦା କିନାନ୍‌, ଆକା ସାମାନ୍‌ତି ବିସୟ୍‌ ମାରି ଆମା ଲୋକା ନିଜେଦି କାଣ୍ଡା ମେନ୍ଦଲତୁ ସିଲେତ୍‌, ଆୟା ଦିୟାମ୍‌କା ମାଣାନ୍‌ ମାରି ଏନ୍‌ ରାଜାଦି ଆଗ୍‌ଡ଼ି ଆକା ଇଣ୍ଡ୍ରେଙ୍ଗ୍‌ ଆଟ୍‌ଏନ୍‌ ।"

12 ଇୟା ଉଣ୍ତିଙ୍ଗ୍‌ ରାଜା ରିସା ନି ନାଣ୍ଡ ରିସା ଆଜି ବାବିଲଦି ୱିଜୁ ପଣ୍ତିତ୍‌ ଲୋକାଙ୍ଗ୍‌ ଡାକ୍‌ତେଙ୍ଗ୍‌ ଆଦେସ୍‌ ସିତାନ୍‌ । 13 ଆବେଟ୍‌ ମାଟା ପ୍ରଚାର ଆତାତ୍‌ ଜେ, ପଣ୍ତିତ୍‌ ଲୋକୁ ସାନାର୍‌; ମାରି, ଲୋକୁ ଦାନିୟେଲତିଙ୍ଗ୍‌ ମାରି ୱାନି ସଙ୍ଗ୍‌ରିଙ୍ଗ୍‌ ଡାକ୍‌ତେଙ୍ଗ୍‌ ପୋଇତାର୍‌ ।

14 ନାସ୍ତିୱାଲେ ଅରିୟୋକ୍‌ ଦର୍‌ତି ଆମା ରାଜାଦି ସେନାପତି ବାବିଲତି ପଣ୍ତିତ୍‌ ଲୋକାଙ୍ଗ୍‌ ଡାକ୍‌ତେଙ୍ଗ୍‌ ଆଦେସ୍ ଆତାମାର୍ହାତ୍‌, ତାନିଙ୍ଗ୍‌ ଦାନିୟେଲ ଅଡ଼୍‍ବିଜି ମାରି ବୁଦିଦାନ୍‌ ଉତ୍ତର ସିତାନ୍‌; 15 ଆୟା ରାଜା ସେନାପତି ଅରିୟୋକ୍‌ଦିଙ୍ଗ୍‌ ମାଟା ସିଜି ଇର୍ହାନ୍‌, ରାଜାଦି ଆଦେସ୍‌ ନିସା ଦାନ୍ଦା ଏନ୍ଦା ? ଆବେଟ୍‌ ଅରିୟୋକ୍‌ ଦାନିୟେଲତିଙ୍ଗ୍‌ ମାଟା ୱେର୍‌ତାନ୍‌ ।

16 ଆବେଟ୍‌ ଦାନିୟେଲ ରାଜାଦି ଲାକ୍‌ତୁ ସଲ୍‌ସି ନିଜେଦି ଉଣ୍ତିଙ୍ଗ୍‌ ଉନ୍‌ଡ୍ରି ସମୟ ତିଆର୍‌ କିଦେଙ୍ଗ୍‌ ମାଡ଼ିସ୍‌ କିତାନ୍‌, ଆକା କିତିଙ୍ଗାଁ ରାଜାଦି ଲାକ୍‌ତୁ ଲୋବୁଦି ଅର୍ତ ୱେର୍‌ନା ଇଜି ଇର୍ହାନ୍‌ । 17 ଆବେଟ୍‌ ଦାନିୟେଲ ନିଜେଦି ଇଣ୍ଡ୍ରୋ ସର୍ହାନ୍‌, ମାରି ୱାନି ସାଙ୍ଗ୍‌କୁ ହନାନିୟ, ମିସାୟେଲ ମାରି ହଜାରିୟ ଏଣ୍ଡେସ୍‌କି ବାବିଲଦି ଆଇ ଆଇ ପଣ୍ତିତ୍‌କା ୱାଲେ ନାସ୍ଟୁ ଆଏର୍‌, 18 ଇୟା ଉଣ୍ତିଙ୍ଗ୍‌ ଇୟାୱିଜୁ ବିସୟ୍‌ତାନ୍‌ ମୁସ୍‌କୁପୁର୍‌ତି ମାପୁରୁଦି ଦୟାଦି ପାର୍‌ତନା କିନି ଉଣ୍ତିଙ୍ଗ୍‌ ବାବିଲତି ୱିଜେରେ ପଣ୍ତିତ୍‌କା ୱାଲେ ଦାନିୟେଲ ନିଜେଦି ସାଙ୍ଗ ହନନିୟ, ମିସାୟେଲ ମାରି ଅସରିୟଙ୍ଗ୍‌ ଆକା ୱିଜୁ କାତା ୱେର୍‌ତାନ୍‌ । 19 ଇୟାୱେନ୍‌କା ନାଡ଼ାରି ଲୋବୁ ସୁଡ଼ୁତି ଆୟା ମାର୍‌ଗିତି ୱିଜୁ ବିସୟ୍‌ ଦାନିୟେଲତି ଉଣ୍ତିଙ୍ଗ୍‌ ତରାଇ ଆତାତ୍‌ । ଆବେଟ୍‌ ଦାନିୟେଲ ମୁସ୍‌କୁପୁର୍‌ତି ମାପୁରୁଦିଙ୍ଗ୍‌ ଦନ୍ୟବାଦ୍‌ କିତାନ୍‌ ।

20 ଦାନିୟେଲ ମାଟା ସିଜି ଇର୍ହାନ୍‌,

"ମାପୁରୁଦି ଦରୁ ୱିଜୁ ୱାଲେ ଦନ୍ୟ ଆପିତ୍‌;

ଇର୍ରିଙ୍ଗ୍‌ ବୁଦି ମାରି ସାକ୍‌ତି ୱାନିଦି;

21 ମାରି, ୱାନ୍‌ ବେଡ଼ା ମାରି କାଡ଼ା ବାଦ୍‌ଲେକିନାନ୍‌;

ୱାନ୍‌ ରାଜାରିଙ୍ଗ୍‌ ପଦ୍‌ତାନ୍‌ ରେପ୍‌ନାନ୍‌

ମାରି ରାଜାରିଙ୍ଗ୍‌ ପଦ ସିନାନ୍‌;

ୱାନ୍‌ ଗ୍ୟାନି ଲୋକାଙ୍ଗ୍‌ ଗ୍ୟାନ୍‌ ମାରି ବୁଦିଦି ଲୋକାଙ୍ଗ୍‌ ୱେର୍‌ନାନ୍‌;

22 ୱାନ୍‌ ଲୋଇରିକା ମାରି ମାର୍‌ଗିତି ବିସୟ୍‌ୱିଜୁ ୱେର୍‌ନାନ୍‌;

ସିକାଟିଦୁ ଆମାକା ମାନାତ୍‌, ଆକା ୱାନ୍‌ ନେସ୍‌ନାନ୍‌

ମାରି ୱାନି ଲାକ୍‌ତୁ ଜାୟ୍‌ ବାସାକିନାତ୍‌ ।

23 ଏ ନା ଡକ୍ରା ଦାଦାରି ମାପୁରୁ, ନାନ୍‌ ନିଙ୍ଗିଁ ଦନ୍ୟବାଦ୍‌ ମାରି ପ୍ରଶଂସା କିଜିନା,

ନିନ୍‌ ନାଙ୍ଗିଁ ଗ୍ୟାନ୍‌ ମାରି ବୁଜାନିସାକ୍‌ତି ସିତିମାନି

ମାରି ନି ଲାକ୍‌ତୁ ମା ଗୁୱାରିକିତି ବିସୟ୍‌ ଇଲେଇ ନାଙ୍ଗିଁ ଇର୍ହିମାନି;

ଇର୍ରିଙ୍ଗ୍‌ ନିନ୍‌ ରାଜାଦି ମାଟା ମାଙ୍ଗିଁ ଇର୍ହିମାନି ।"

24 ଇୟାଉଣ୍ଡିଙ୍ଗ୍‌ ବାବିଲିୟ ପଣ୍ତିତ୍‌କାଙ୍ଗ୍‌ ସାପିସ୍‌ କିନି ଉଣ୍ତିଙ୍ଗ୍‌ ରାଜାଦି ପାଣିକିନି ଅରିୟୋକ୍‌ ଲାକ୍‌ତୁ ଦାନିୟେଲ ସର୍ହାନ୍‌; ୱାନ୍‌ ସଲ୍‌ସି ୱାନିଙ୍ଗ୍‌ ଇୟାୱାଜା ଇର୍ହାନ୍‌, "ବାବିଲିୟ ପଣ୍ତିତ୍‌କାଙ୍ଗ୍‌ ଡାକ୍‌ମାଟ୍‌; ରାଜାଦି ଲାକ୍‌ତୁ ନାଙ୍ଗିଁ ଅତୁ, ନାନ୍‌ ରାଜାଦି ଲାକ୍‌ତୁ ଅର୍ତ ଇନା ।"

25 ଆବେନୁ ଅରିୟୋକ୍‌ ଦାନିୟେଲଦିଙ୍ଗ୍‌ ଦାପ୍ରେ ରାଜା ଆଗ୍‌ଡ଼ି ଅସି ରାଜେଙ୍ଗ୍‌ ଇୟାୱାଜା ଇର୍ହାନ୍‌, "ତର୍‌ଆଜି ୱାତିମାନି ଜିହୁଦାଦି ଲୋକାମାଣାନ୍‌ ନାନ୍‌ ଅରେନ୍‌ ଲୋକୁଦିଙ୍ଗ୍‌ ପୋଇତା ମାନା, ୱାନ୍‌ ରାଜାଦିଙ୍ଗ୍‌ ଅର୍ତ ୱେର୍‌ନାନ୍‌ ।"

26 ରାଜା ଆୟା ଦାନିୟେଲ, ଏମେୱାନି ଦରୁ ବେଲ୍‌ଟଶତ୍ସର ମାର୍ହାତ୍‌, ୱାନିଙ୍ଗ୍‌ ମାଟା ସିଜି ଇର୍ହାନ୍‌, ନାନ୍‌ ଆମା ଲୋବ୍‌ ସୁଡ଼ୁତା ମାନା, ନିନ୍‌ ନା ଆୟାକା ମାରି ଆବେଣି ଅର୍ତ ନାଙ୍ଗିଁ ନେସ୍‌ପିସ୍‌ ନି ? 27 ଦାନିୟେଲ ରାଜାଦି ଆଗ୍‌ଡ଼ି ମାଟା ସିଜି ଇର୍ହାନ୍‌, ଏ ରାଜା ଆମା ମାଟା ୱେନ୍‌ବାତି ମାନି, ଆକା ପଣ୍ତିତ୍‌ ଲୋକୁ ମାରି ଗୁଣିଆର୍‌ ମାରି ପାଞ୍ଜିସୁଣିକାର୍‌ ମାରି କଲଦିୟର୍‌ ରାଜାଦି ଆଗ୍‌ଡ଼ି ଇଣ୍ଡ୍ରେଙ୍ଗ୍‌ ଆଟ୍‌ଏର୍‌; 28 ମାତର ଏନ୍‌ ମାର୍‌ଗିତି ଇୟାୱିଜୁ ବିସୟ୍‌ ଇନାନ୍‌, ଇୟାୱାଜା ଅରେନ୍‌ ମାପୁରୁ ମୁସ୍‌କୁପୁର୍‌ତୁ ମାନାନ୍‌, ମାରି ୱିଜ୍‌ନି ୱେଡ଼ାଦୁ ଆମାକା ଆମାକା ଗଟାନାତ୍‌, ଆକା ୱାନ୍‌ ରାଜା ନବୂଖଦ୍‌ନିତ୍ସରତିଙ୍ଗ୍‌ ଇର୍ହାମାନାନ୍‌ । ନି ଲୋବୁ ମାରି ଗୁରିତି ବାଡିଦି ନି ମୋନ୍‌ତି ବର୍‌ ଇକା;

29 ଏ ରାଜା, ଡରିତି ବାଡିଦୁ ନି ମୋନ୍‌ତୁ ୱାଜିନି ଦିନ୍‌ତି ଗଟ୍‌ନା ବିସୟ୍‌ଦି ଚିନ୍ତା ଇଗା ୱାତାତ୍‌; ମାରି ମାପୁରୁ ଇୟାୱିଜୁ ବିସୟ୍‌ ଇନାନ୍‌, ୱାନ୍‌ ଆମାକା ଗଟାନାତ୍‌, ଆକା ନି ଉଣ୍ତିଙ୍ଗ୍‌ ଇର୍ହା ମାନାନ୍‌ । 30 ମାତର ଏମେ ଜିବନ୍‌ମାନି ଲୋକା ମାଣାନ୍‌ ନା ଜ୍ଞାନ୍‌ ନାଣ୍ଡ ମାନାତ୍‌ ଇଜି ଜେ ଇୟା ମାର୍‌ଗିତି ବିସୟ୍‌ ତରାତାମାନାତ୍‌ ଇଜି, ଆକା ସିଲେ, ମାତର୍‌ ରାଜେଙ୍ଗ୍‌ ଏଣ୍ଡେସ୍‌କି ଅର୍ତ ବୁଜାକିଦେଙ୍ଗ୍‌ ଆନାତ୍‌ ମାରି ମିର୍‌ ଏଣ୍ଡେସ୍‌କି ନିଜେ ମୋନ୍‌ତି ଚିନ୍ତା ନେସ୍‌ନିଦେର୍‌, ଇୟାଉଣ୍ଡିଙ୍ଗ୍‌ ଆକା ନା ଉଣ୍ତିଙ୍ଗ୍‌ ତରାତାମାନାତ୍‌ ।

31 ଏ ରାଜା, "ନିନୁ ସୁଡ଼ୁବୁ ସୁଡ଼ୁବୁ ଉନ୍‌ଡ୍ରି ପେରି ବମା ସୁଡ଼ୁତି, ନାଣ୍ଡ ସାକ୍ତିଦିକା ମାରି ନାଣ୍ଡ ଜାୟ୍‌ ଆୟା ବମା ନି ଆଗ୍‌ଡ଼ି ନିଲ୍‌ତାତ୍‌ ମାରି ଆକା ସୁଡ଼୍‌ଦେଙ୍ଗ୍‌ ନାଣ୍ଡ ତିଲାନିକା ମାର୍ହାତ୍‌ । 32 ଆୟା ବମାଦି ତାଲା ନେଗି ବାଙ୍ଗାରାମ୍‌ଦି ୱାଜା, ତାନି ବକା ନି କିକୁ ୱେଣ୍ତି, ତାନି ପଟା ମାରି କୁର୍‌ଗୁ ପିତଲ୍‌ଦି ୱାଜା, 33 ତାନି କାଲ୍‌କୁ ଲୁୱା ମାରି ତାନି ପାଦାମ୍‌କା ଏସବାଗ୍‌ ଲୁୱା, ଏସ ସିକ୍‌ଲାଦିକା ୱାଜା ମାର୍ହାତ୍‌ । 34 ନିନୁ ସୁଡ଼ୁବୁ ସୁଡ଼ୁବୁ ଆବେନୁ କିୟୁ ସିଲେଣ୍ଡା କାତ୍‌ତି ଉନ୍‌ଡ୍ରି କାଲୁ ଆୟା ବମାଦି ଲୁୱା ମାରି ସିକ୍‌ଲାଦି ପାଦାମ୍‌ତିଙ୍ଗ୍‌ ଡାକ୍‌ସି ମୁକା ମୁକା କିଜି ରୁକୁତା ପୋକ୍‌ତାତ୍‌ । 35 ଆବେଟ୍‌ ଲୁୱା, ସିକ୍‌ଲା, କଂସ୍‌, ୱେଣ୍ତି ମାରି ବାଙ୍ଗାରାମ୍‌ ଅରସେ ମୁକା ମୁକା ଆଜି ରୁଙ୍ଗିତା ସର୍ହାତ୍‌, ମାରି ଜେଟାପ୍‌ ଲେଜୁଦି କାଡ଼ାତୁ ଇପ୍‌ନି କୁଲିଙ୍ଗ୍‌ ସେଟ୍‌କୁ ୱାଜା ଆତାତ୍‌; ମାରି, ଗାଲି ଆୟା ୱିଜୁଦିଙ୍ଗ୍‌ ଇପ୍‌ତା ଅତାତ୍‌ ମାରି ଆୟା ୱିଜୁଦି ଉଣ୍ତିଙ୍ଗ୍‌ ବାଡି ପୁଟ୍‌ଏତାତ୍‌; ମାରି, ଆୟା ବମାଦିଙ୍ଗ୍‌ ଡାକ୍‌ତାତ୍‌ ଆମା କାଲୁ, ଆକା ପିର୍‌ଜି ଉନ୍‌ଡ୍ରି ପେରିଗରନୁ ଆତାତ୍‌, ମାରି ୱିଜୁ ଦେସ୍‌ତିଙ୍ଗ୍‌ ପିଡ଼ିକ୍‌ତାତ୍‌ ।"

36 ଲୋବୁ ସୁଡ଼ୁତିକା ଇକା; ଇଲେଇ ମାଡୁ ରାଜାଦି ଆଗ୍‌ଡ଼ି ଆବେଣି ଅର୍ତ ଇନାପ୍‌ । 37 ଏ ରାଜା, ନିନୁ ରାଜାଦି ରାଜା; ମୁସ୍‌କୁପୁର୍‌ତି ମାପୁରୁ ନିଙ୍ଗିଁ ରାଜି, ସାକ୍‌ତି, ଅଦିକାର୍‌ ମାରି ସନ୍‌ମାନ୍‌ ସିତାମାନାତ୍‌ । 38 ମାରି, ଆମା ବାଡିଦୁ ଲୋକୁ ବାସାନାର୍, ଆୟା ବାଡିଦି ବୁମିଦୁ ବୁଲାନି ଜାତୁଙ୍ଗ୍‌ ମାରି ବାଦଡ଼ତି ପଟିଆଙ୍ଗ୍‌ଁ ୱାନ୍‌ ନି କିୟୁଦୁ ସର୍ପେ କିତାମାନାନ୍‌ ମାରି ଆୟା ୱିଜୁ ମୁସୁକୁ ନିଙ୍ଗିଁ ସାସନ୍‌କିଦେଙ୍ଗ୍‌ ସିତାମାନାନ୍‌; ନିନ୍‌ନେ ଆୟା ବାଙ୍ଗାରାମ୍‌ ତାଲାଦିକିନ୍ଦା । 39 ମାରି, ନି ୱେନ୍‌କା ନି ମାଣାନ୍‌ ଇସ୍‌ରି ମାରି ଉନ୍‌ଡ୍ରି ରାଜି ନିଙ୍ଗ୍‌ନାତ୍‌ ମାରି ଆୟା ୱେନ୍‌କା ପିତଲ୍‌ଦି ତିନ୍‌ ଗୋଟା ରାଜି ଉନ୍‌ଡ୍ରି ରାଜି ନିଙ୍ଗ୍‌ନାତ୍‌, ଆକା ୱିଜୁ ଦେସ୍‌ତି ମୁସୁକୁ ସାସନ୍‌ କିନାତ୍‌ । 40 ମାରି, ନାଲ୍‌ଗି ରାଜି ଲୁୱା ୱାଜା ଆଟ୍‌ୱା ଆନାତ୍‌; ଇର୍ରିଙ୍ଗ୍‌ ଲୁୱା ଏଣ୍ଡେସ୍‌କି ୱିଜୁ ଜିନିସ୍‌ ମୁକା ମୁକା କିଜି ଅଦିକାର୍‌ କିନାତ୍‌ ମାରି ଲୁୱା ଏଣ୍ତେସ୍‌ ଇୟାୱିଜୁଦିଙ୍ଗ୍‌ ଗୁଣ୍ଡା କିନାତ୍‌, ଆୟା ୱାଜା ଆୟା ରାଜି ମୁକା ମୁକା କିଜି ରୁକୁସି ୱିଜୁ ଗୁଣ୍ଡା କିନାତ୍‌ । 41 ମାରି, ନିନୁ ଏଣ୍ଡେସ୍‌ ସୁଡ଼ୁତି ଜେ, ପାଦାମ୍‌ ନି ପାଦାମ୍‌ତି ଡ଼ାସ୍‌କେଙ୍ଗ୍‌ ଏସୋ କୁମାର୍‌ତି ସିକ୍‌ଲାଦି ୱାଜା ମାରି ଏସୋ ଲୁୱାଦି ୱାଜା ମାର୍ହେ, ଆୟାୱାଜା ଆୟା ରାଜି ବାଟା ଆନାତ୍‌; ମାତର ଆବେନୁ ଲୁୱାଦି ସାକ୍‌ତି ତେବାନାତ୍‌, ଇର୍ରିଙ୍ଗ୍‌ କର୍ଦମଦୁ ଲୁୱା ମିସାତିକା ନିନୁ ସୁଡ଼ୁତି । 42 ମାରି, ପାଦାମ୍‌ତି ଡ଼ାସ୍‌କେଙ୍ଗ୍‌ ୱିଜୁ ଏଣ୍ଡେସ୍‌କି କାଣ୍ଡେକ୍‌ ଲୁୱା ମାରି କାଣ୍ଡେକ୍‌ ସିକ୍‌ଲା ମାର୍ହାତ୍‌, ଆୟାୱାଜା ରାଜିଦି ଉନ୍‌ଡ୍ରି ବାଗ୍‌ ଡାଟ୍‌ ମାରିଉଣ୍ଡ୍ରି ବାଗ୍‌ ଡାଟ୍‌ ସିଲିକାତ୍‌ ଆନାତ୍‌ । 43 ମାରି, ନିନୁ ଏଣ୍ଡେସ୍‌କି କର୍ଦମତି ୱାଲେ ଲୁୱା କୁଡ଼ିତି ମାର୍ରିକା ସୁଡ଼ୁତି, ଆୟାୱାଜା ୱାର୍‌ ଲୋକାୱାଲେ ନିଜେ କୁଡ଼ୁନାର୍‌; ମାତର ଲୁୱା ଏଣ୍ଡେସ୍‌ ସିକ୍‌ଲାଦୁ କୁଡ଼ୁଏତ୍‌, ଆୟାୱାଜା ୱାର୍‌ ନିଜେ ନିଜେ ଲୋଇ କୁଡ଼ୁଜି ମାନ୍‌ଏର୍‌ । 44 ମାରି, ଆୟା ରାଜାରି ସମୟତୁ ମୁସ୍‌କୁପୁର୍‌ତି ମାପୁରୁ ଉନ୍‌ଡ୍ରି ରାଜି ତିଆର୍‌ କିନାତ୍‌, ଆକା ଏସେଙ୍ଗ୍‌ବା ନାଷ୍ଟୁ ଆଏତ୍‌, ଇର୍ରିଙ୍ଗ୍‌ବା ଆବେଣି ପେରିକାର୍‌ ଆଇ ଲୋକା କୁଟୁମ୍‌ଦୁ ସୋଲ୍‌ଏର୍‌; ମାତର ଆକା ଇୟା ୱିଜୁ ରାଜିଙ୍ଗା ମୁକା ମୁକା ମାରି ନାଷ୍ଟୁ କିଜି ନିଜେ ୱିଜୁଦିନ୍‌ ତେବାନିକାତ୍‌ ଆନାତ୍‌ ।

45 ଇରିଙ୍ଗ୍‌ ଗରତାନ୍‌ କିୟୁ ସିଲେଣ୍ଡା ତିଗିତି ଉନ୍‌ଡ୍ରି କାଲୁ ଜେ ଆୟା ଲୁୱା, କଂସ୍‌, ସିକ୍‌ଲା, ୱେଣ୍ଡି ମାରି ବାଙ୍ଗାରାମ୍‌ତିଙ୍ଗ୍‌ ଗୁଣ୍ଡା କିତାତ୍‌, ଇକା ନିନୁ ସୁଡ଼ୁତି; ଆମାକା ଇୟାୱେନ୍‌କା ଗଟାନାତ୍‌, ଆକା ପେରି ମାପୁରୁ ରାଜାଦିଙ୍ଗ୍‌ ନେସ୍‌ପିସ୍‌ତା ମାନାନ୍‌; ମାରି, ଇୟା ଲୋବୁ ସତ୍‌ନେ ମାରି ଆବେଣି ଅର୍ତ ସତ୍‌ ।

46 ନାସ୍ତିୱାଲେ ରାଜା ନବୂଖଦ୍‌ନିତ୍ସର ମୋକମ୍‌ ପାଡ଼୍‌କ୍‌ସି ଦାନିୟେଲଦିଙ୍ଗ୍‌ ମାଡ଼ିସ୍‌ କିତାନ୍‌ ମାରି ଲୋକୁ ଏଣ୍ଡେସ୍‌କି ୱାନି ଉଣ୍ତିଙ୍ଗ୍‌ ପୁଜା ମାରି ବାସ୍‌ନା ଦୁପ୍‌ଣି ସିନାର୍‌, ଇକା ଆଦେସ୍‌ ସିତାନ୍‌ । 47 ରାଜା ଦାନିୟେଲଦିଙ୍ଗ୍‌ ଡ଼େସି ଇର୍ହାନ୍‌, "ନିନୁ ଇୟା ମାର୍‌ଗିତି ମାଟା ଇଣ୍ଡ୍ରେଙ୍ଗ୍‌ ଆଟ୍‌ତି ମାନି, ଇୟାଉଣ୍ଡିଙ୍ଗ୍‌ ସତ୍‌ନେ ମି ମାପୁରୁ ଦିୟାମ୍‌କା ମୁସ୍‌କୁ ମାପୁରୁ ମାରି ରାଜାରି ପ୍ରବୁ ମାରି ମାର୍‌ଗିତି ବିସୟ୍‌ତିକା ଇଣ୍ଡ୍ରେଙ୍ଗ୍‌ ଆଟ୍‌ନିକାନ୍‌ ।" 48 ଆଦେଙ୍ଗ୍‌ ରାଜା ଦାନିୟେଲଦିଙ୍ଗ୍‌ ପେରିକାନ୍‌ କିଜି ନାଣ୍ଡଦାରାଦି ଇନାମ୍‌ ସିତାନ୍‌, ମାରି ବାବିଲଦି ୱିଜୁ ରାଜି ମୁସୁକୁ ସାସନ୍ କିନି ପଦ୍‌ ସିଜି ବାବିଲତୁ ମାନି ପଣ୍ତିତ୍‌ ଲୋକା ମୁସୁକୁ ୱାନିଙ୍ଗ୍‌ ପେରିକାନ୍‌ କିତାନ୍‌ । 49 ମାରି, ଦାନିୟେଲ ରାଜା ଲାକ୍‌ତୁ ବାତିଙ୍ଗ୍‌ମାଲିତାନ୍‌, ରାଜା ଶଦ୍ରକ୍‌, ମୈଶକ୍‍ ମାରି ଅବେଦ୍‌ନଗୋଦିଙ୍ଗ୍‌ ବାବିଲତି ରାଜିଦି ପାଣିଦୁ ଦାୟିତ୍‌ ସିତାନ୍‌; ମାତର ଦାନିୟେଲ ରାଜାଦି ଇଲୁଦୁ ତେବାତାନ୍‌ ।