1 -ମାରି, ମାଦିୟ ଦାରିୟାବସଦି ଅଦିକାର୍‌ଦି ପାର୍‌ତୁମ୍‌ ବାର୍ସେକ୍‌ଦୁ ମାପ୍‌ ୱାନିଙ୍ଗ୍‌ ସାନ୍ତି ମାରି ସାକ୍ତି କିଦେଙ୍ଗ୍‌ ନିଲ୍‌ତାପ୍‌ ।

2 ଇଲେଇ, ମାପ୍‌ ମିଙ୍ଗିଁ ସତ୍‌ ମାଟା ଇନାପ୍‌ । ସୁଡୁଦୁ, ପାରସ୍ୟଦୁ ମାରି ମୁଣ୍ଡ୍ରି ରାଜାର୍‌ ଜନମ୍‌ ଆନାର୍‌ ମାରି ନାଲ୍‌ଗି ଲମର୍‌ଦି ରାଜା ଆୟା ୱିଜେରି ମାଣାନ୍‌ ନାଣ୍ଡ୍‌ ସାଉକାର୍‌ ଆନାନ୍‌; ମାରି, ୱାନ୍‌ ନିଜେଦି ଦନ୍‌ତାନ୍‌ ସାକ୍ତି ଆତାନ୍‌ ଗ୍ରିସ୍‌ ରାଜି ବିରୁଦ୍ଧତାନ୍‌ ୱିଜେରିଙ୍ଗ୍‌ ତିଲିସ୍‌ କିନାନ୍‌ ।

3 ଆଦେଙ୍ଗ୍‌ ଅରେନ୍‌ ସାକ୍ତିଦି ରାଜା ଜନମ୍‌ ଆନାନ୍‌, ୱାନ୍‌ ନାଣ୍ଡ୍‌ କାସ୍ଟୁ ସିଜି ସାସନ୍‌ କିନାନ୍‌ ମାରି ୱାନି ବଦାଦାନ୍‌ ପାଣି କିନାନ୍‌ । 4 ମାରି, ୱାନ୍‌ ଜନମ୍‌ ୱେନେକା ୱାନି ରାଜି ରୁଙ୍ଗ୍‌ନା ସନାତ୍‌ ମାରି ବାଦଡ଼୍‌ଦି ନାଲ୍‌ଗି ତରିନ୍‌ ବାଟା ଆନାତ୍‌; ମାତର୍‌ ୱାନି କୁଟୁମ୍‌ ଉଣ୍ତିଙ୍ଗ୍‌ ମାରି ୱାନ୍‌ କିନି ସାସନ୍‌ଦି ଉଣ୍ତିଙ୍ଗ୍‌ ସିଲେ; ଇର୍ରିଙ୍ଗ୍‌ ୱାରି ଉଣ୍ତିଙ୍ଗ୍‌ ସିଲେ, ମାତର ଆଇ ଲୋକା ଉଣ୍ତିଙ୍ଗ୍‌ ୱାନି ରାଜି ରୁଙ୍ଗ୍‌ନାତ୍‌ ।

5 ମାରି, ମିସର ଦେସ୍‍ତି ରାଜା ନାଣ୍ତ ସାକ୍ତିଦିକାନ୍‌ ଆନାନ୍‌ ମାତର ୱାନି ଲୋକା ମାଣାନ୍‌ ଅରେନ୍‌ ୱାନି ମାଣାନ୍‌ ନାଣ୍ଡ ସାକ୍ତି ଆଜି ସାସନ୍‌ କିନିକାନ୍ ଆନାନ୍‌; ୱାନି ରାଜି ଉନ୍‌ଡ୍ରି ପେରି ରାଜି ଆନାତ୍‌ । 6 ମାତର ଏସୋ ବାର୍ସେକ୍‌ ୱେନ୍‌କା ୱାର୍‌ ନିଜେ ନିଜେ ମିସାନାର୍ ମାରି ମିସର ଦେସ୍‌ତି ରାଜାଦି ଆଇଲି ନିୟମ୍‌ କିଜି ସିରିଆ ଦେସ୍‌ତି ରାଜାଦି ଲାକ୍‌ତୁ ୱାନାତ୍‌; ମାତର ଆଇଲି ନିଜେ ସାକ୍ତିଦାନ୍‌ ରକ୍‌ୟା କିଦେଙ୍ଗ୍‌ ଆଟ୍‌ଏତ୍‌; ଇର୍ରିଙ୍ଗ୍‌ ବା ରାଜା ମାରି ୱାନି ସାକ୍ତି ଦାଇ ଆଏତ୍‌; ମାତର ଆୟା ଆଇଲି ମାରି ଆମାକାର୍‌ ଦାନିଙ୍ଗ୍‌ ତାତାର୍‌ ମାରି ଏନ୍‌ ଦାନିଙ୍ଗ୍‌ ଜନମ୍‌ ସିତାନ୍‌, ମାରି ଆୟା ୱେଡ଼ାଦୁ ଏନ୍‌ ଦାନିଙ୍ଗ୍‌ ସାକ୍ତି ସିତାନ୍‌, ୱିଜେରେ ସର୍ପେ ଆନାର୍‌ । 7 ମାତର ଆଇଲିଦି ମୁଲ୍‌ତାନ୍‌ ଉନ୍‌ଣ୍ତ୍ରି ମାଣାନ୍‌ ଅରେନ୍‌ ନେଗି ବାଡିଦୁ ଜନମ୍‌ ଆନାନ୍‌, ୱାଦ୍‌ ସନ୍ୟରିଙ୍ଗ୍‌ ରେସିୱାଜି ସିରିଆ ଦେସ୍‌ତି ରାଜାଦି ଗାଡ଼୍‌ତୁ ଡ଼ୁଗ୍‌ନାର୍ ମାରି ୱାରିଙ୍ଗ୍ ଆରା କିଜି ଜିଣାନାତ୍‌; 8 ମାରି, ୱାନ୍‌ ୱାରି ରସ୍‌ତି ବମାଦି ୱାଲେ ୱାରି ଦିୟାମ୍‌କାଙ୍ଗ୍‌ ବନ୍ଦି କିଜି ୱେଣ୍ତି ମାରି ବାଙ୍ଗାରାମ୍‌ଦି ୱେଡ଼ିକାସାର୍‌ଦାଦି କୁଡ଼ୁକା ୱାଲେ ମିସରଦୁ ଅନାନ୍‌ ମାରି ୱାନ୍‌ ଏସୋ ବାର୍ସେକ୍‌ ସାନ୍ଦି ସିରିଆ ଦେସ୍‌ତି ରାଜାଦି ମାଣାନ୍‌ ସାନ୍ତିଦାନ୍‌ ତେବାନାର୍‌ । 9 ମାରି, ସିରିଆଦି ରାଜା ମିସର ଦେସ୍‌ତି ରାଜାଦି ରାଜିଦୁ ୱାନାନ୍, ମାତର ନିଜେଦି ଦେସ୍‌ତୁ ୱାନ୍ ଡ଼େସିସନାନ୍‌ ।

10 ମାରି, ତାନି ମାରିନ୍‌କୁ ଜୁଦ୍‌ କିନାର୍‌ ମାରି ନାଣ୍ତ ସନ୍ୟ ଲୋକୁ ଉଣ୍ତାକିନାର୍‌, ୱାର୍‌ ୱାଜି ପିରିଜି ନାଣ୍ଡ ଆଜି ନିଙ୍ଗ୍‌ନାର୍‌; ମାରି, ୱାର୍‌ ଡ଼େସି ୱାନି ଗାଡ଼୍‌ ସାନ୍ଦି ଜୁଦ୍‌ କିନାର୍‌ 11 ଆବେନୁ ମିସର ଦେସ୍‌ତି ରାଜା ରିସା ଆଜି ସିରିଆ ଦେସ୍‌ତି ରାଜାଦି ବିରୁଦ୍ଧତାନ୍‌ ଜୁଦ୍ଧ କିନାନ୍‌; ଆବେଟ୍‌ ୱାନ୍‌ ମିସର ଦେସ୍‌ତି ରାଜାଦି ଲୋକୁ ଜୁଦ୍ଧ କିନାର୍‌, ମାତର ଆୟା ଲୋକୁ ୱାନି ସିରିଆ ଦେସ୍‌ତି ରାଜାଦି କିଉଦୁ ସର୍ପେ ଆନାର୍‌ । 12 ମାରି, ଆୟା ଲୋକୁ ନାଣ୍ଡ ରିସା ଆତିଙ୍ଗ୍‌, ୱାନି ତାଲା ନାଣ୍ଡ ରିସା ଆନାନ୍ ମାରି ନାଣ୍ଡଦାନ୍ ନାଣ୍ଡ ଲୋକାଙ୍ଗ୍‌ ସାପିସ୍ କିନାନ୍; ଇର୍ରିଙ୍ଗ୍‌ ବା ୱାନ୍‌ ଜିଣାଏନ୍‌ । 13 ମାରି, ସିରିଆ ଦେସ୍‌ତି ରାଜା ଡେସି ଆଗିଡ଼ିରି ମାଣାନ୍‌ ଉଣ୍ତ୍ରି ନାଣ୍ଡ ଲୋକାଙ୍ଗ୍‌ ଉଣ୍ତାକିନାନ୍‌; ମାରି ୱାନ୍‌, ଆୟା କାଡ଼ାଦୁ ଇର୍ରିଙ୍ଗ୍‌, ଇଲେଇତି ୱିଜ୍‌ନି କାଡ଼ାଦୁ ନାଣ୍ଡ ଲୋକୁ ମାରି ନାଣ୍ଡ କାଣ୍ଡା କାତି ଆସ୍‌ସିୱାନାର୍‌ । 14 ମାରି, ଆୟା ସମୟତୁ ନାଣ୍ଡ ଲୋକୁ ମିସର ଦେସ୍‌ତି ରାଜା ବିରୁଦ୍ଧତାନ୍‌ ନିଙ୍ଗ୍‌ନାର୍‌; ବା ମି ଲୋକା ମାଣାନ୍‌ ଲୋକୁ ସାପିସ୍ ଲୋକୁ ଇୟା ଦର୍ଶନ ନେଗେଣ୍ଡ୍‌ତାନ୍‌ ନିଜେଦିଙ୍ଗ୍‌ ଉନ୍ନତି କିନାର୍‌; ମାତର ୱାର୍‌ ମୁଜାନାର୍‌ । 15 ଇୟାୱାଜା ସିରିଆ ଦେସ୍‌ତି ରାଜା ୱାନାନ୍‌ ମାରି ଗାଡ଼୍‌ତିଙ୍ଗ୍‌ ବନ୍ଦି କିଜି ୱିଜୁ ଗାଡ଼୍‌ତିଙ୍ଗ୍‌ ଆସ୍‌ନାନ୍‌; ଆବେଣି ମିସର ଦେସ୍‌ତି ସାକା କିନିକାର୍‌ ମାରି ଆସ୍‌କିତି ଲୋକୁ ବାଦା ସିଦେଙ୍ଗ୍‌ ଆଟ୍‌ଏର୍‌; ଇର୍ରିଙ୍ଗ୍‌ବା ବାଦା କିନି ଉଣ୍ତିଙ୍ଗ୍‌ ଏମେ ବା ସାକ୍ତି ସିଲେଣ୍ଡା ମାନ୍‌ଜିନାତ୍‌ । 16 ମାତର ଏନ୍‌ ୱାନି ବିରୁଦ୍ଧତାନ୍‌ ୱାନାନ୍‌, ୱାନ୍‌ ନିଜେଦି ବଦାଦାନ୍‌ ପାଣି କିନାନ୍‌ ମାରି ୱାନି ଆଗ୍‌ଡ଼ି ଏନ୍‌ ନିଲ୍‌ଏନ୍‌; ମାରି, ୱାନ୍‌ ଇସ୍ରାଏଲ ଦେସ୍‌ତୁ ନିଲ୍‌ନାନ୍‌ ମାରି ୱାନି କିଉଦୁ ସାପିସ୍‌ନିକା ମାନ୍‌ଜିନାତ୍‌ ।

17 ମାରି, ୱାନ୍‌ ନିଜେଦି ୱିଜୁ ରାଜିଦି ଲୋକା ୱାଲେ ୱାନି ଉଣ୍ତିଙ୍ଗ୍‌ ନିଜେଦି ମୋନ୍‌ କିନାନ୍‌ ମାରି ସାନ୍ତି ଲୋକୁ ୱାନି ୱାଲେ ୱାନାର୍‌; ୱାନ୍‌ ନିଜେଦି ବଦାଦାନ୍‌ ପାଣି କିନାନ୍‌; ୱାନ୍‌ ନାସ୍ଟୁ କିନିଉଣ୍ଡିଙ୍ଗ୍‌ ଆଇମାଦି ଆଇଲି ୱାନିଙ୍ଗ୍‌ ସିନାନ୍‌; ମାତର ଆଇଲି ତିର୍ ମାନ୍‌ଏତ୍‌, ଇର୍ରିଙ୍ଗ୍‌ ବା ଦାନି ଉଣ୍ତିଙ୍ଗ୍‌ ଆଏତ୍‌ । 18 ଇୟାୱେନ୍‌କା ୱାନ୍‌ ସାମ୍‌ଦୁର୍‌ ଲାକ୍‌ତୁମାନି ଲୋକା ବିରୁଦ୍‌ତାନ୍‌ ସୋଲ୍‌ସି ନାଣ୍ଡ ଲୋକାଙ୍ଗ୍‌ ଆସ୍‌ନାନ୍‌; ମାତର ଅରେନ୍‌ ପେରିକାନ୍‌ ୱାନି କିତି ଅପମାନ୍‌ ତେବା କିନାନ୍‌; ମାରି, ୱାନ୍‌ ୱାନି ଅପମାନ୍‌ ୱାନି ମୁସୁକୁ ୱାକ୍‌ନାନ୍‌ । 19 ଆଦେଙ୍ଗ୍‌ ୱାନ୍‌ ନିଜେଦି ଦେସ୍‌ତି ଗାଡ଼୍‌ ତରିନ୍‌ ଡେସି ସୋନାନ୍; ମାତର ୱାନ୍‌ ତାକାଜି ମେଡ଼େନାନ୍‌; ମାରି, ୱାନ୍‌ ତର୍‌ଏନ୍‌ ଆନାନ୍‌ । 20 ତାନି ୱେନେକା ଆମାକାନ୍‌ ୱାନି ପଦ୍‌ ପୋଇନାନ୍‌, ୱାନ୍‌ ରାଜିଦି ସବା ବାଡିଦୁ ସୋନି ଉଣ୍ତିଙ୍ଗ୍‌ ଅରେନ୍‌ ଦାସଦିଙ୍ଗ୍ ଲୋସ୍‌ନି ୱାନିଙ୍ଗ୍‌ ପୋକ୍‌ନାନ୍‌; ମାତର ଅଡ଼ପ୍ ଦିନ୍‌ତୁ ୱାନ୍‌ ନାଷ୍ଟୁ ଆନାନ୍‌, ମାତର ରିସାଦାନ୍‌ ସିଲେ, ବା ଜୁଦ୍‌ଦାନ୍‌ ସିଲେ ।

21 ମାରି, ଏମେକାର୍‌ ୱାନିଙ୍ଗ୍‌ ୱାର୍‌ ରାଜାଦି ସମ୍ମାନ୍‌ ସିଏଣ୍ଡା ମାର୍ହାର୍‌, ଇୟାୱାଜା ଅରେନ୍‌ କାଡ଼ିତି ଲୋକୁ ୱାନି ପଦ ପୋଇନାନ୍‌; ମାତର ୱାନ୍‌ ଟିକ୍‌ ବେଡ଼ାଦୁ ୱାନାନ୍‌ ମାରି ସୁର୍ରି ମାଟାଦାନ୍‌ ରାଜି ପୋଇନାନ୍‌ । 22 ମାରି, ଗାଲିପିରୁନାନି ସୌନ୍ୟରି ଦଲ୍‌ ମାଣାନ୍‌ ୱାର୍‌ ୱାନି ଆଗିଡ଼ିରାନ୍‌ ମୁଡ଼ୁଗ୍‌ନା ସୋନାର୍‌ ମାରି ନାସ୍ଟୁ ଆନାର୍‌; ହୁଁ, ନିୟମ୍‌ତି ନେତା ବା ମୁଡୁଗ୍‌ନା ସୋନାନ୍‌ । 23 ମାରି, ୱାନିୱାଲେ ନିୟମ ତିର୍‌କିତି ୱେନ୍‌କା ୱାନ୍‌ ଟକେକିନି ପାଣି କିନାନ୍‌; ଇର୍ରିଙ୍ଗ୍‌ ୱାନ୍‌ ୱାଜି ଉଣା ଲୋକାମାଣାନ୍‌ ପେରିକାନ୍‌ ଆନାନ୍‌ । 24 ୱାନ୍‌ ଟିକ୍‌ ସମୟତୁ ଦେସ୍‌ତି ନାଣ୍ଡ ନେଗି ବାଡିଦୁ ଡ଼ୁଗୁନାନ୍‌ ମାରି ୱାନି ଡକ୍‌ରାଦାଦାର୍‌ ମାରି ବୁବାସିର୍‌ ଆମାକା କିଏର୍‌ ମାର୍ହାନ୍‌, ଆକା ୱାନ୍‌ କିନାନ୍‌; ୱାନ୍‌ ୱାରିମାଣାନ୍‌ ଡଙ୍ଗାକିତି ଜିନିସ୍‌ ମାରି ତାତି ଜିନିସ୍‌ ମାରି ଦନ୍‌ ୱିତ୍‌ନା ସିନାନ୍‌ ମାରି ପେରି ଗଡ୍‌ୱିଜୁଦି ବିରୁଦ୍‌ତାନ୍‌ ୱାନ୍‌ ଏସୋ ବାର୍ସେକ୍‌ ସାଲାକି ଜଜନା କିନାନ୍‌ ।

25 ମାରି, ୱାନ୍‌ ନାଣ୍ଡ୍‌ ସନ୍ୟରିଙ୍ଗ୍‌ ୱାଲେ ଅସି ମିସର ଦେସ୍‌ତି ରାଜା ବିରୁଦ୍ଧତାନ୍‌ ନିଜେଦି ସାକ୍ତିଦି ମାରି ସାହାସ୍‌ ତରପ୍‌ନାନ୍‌; ଆବେନୁ ମିସର ଦେସ୍‌ତି ରାଜା ନାଣ୍ଡ୍‌ ମାରି ନାଣ୍ଡଲୋକୁ ସନ୍ୟରିଙ୍ଗ୍‌ ତାସି ୱାନି ୱାଲେ ଜୁଦ୍‍ କିନାନ୍‌; ମାତର ୱାନ୍‌ ଆଲ୍‌ଜି ମାନ୍‌ଏନ୍‌; ଇର୍ରିଙ୍ଗ୍‌ ୱାର୍‌ ୱାନି ବିରୁଦ୍‌ତାନ୍‌ ନାଣ୍ଡ୍‌ ଏତ୍‌ କିନାର୍‌ । 26 ଆମାକାର୍‌ ୱାନି କାଦି ଉଣାର୍‌, ୱାର୍‌ ୱାନିଙ୍ଗ୍‌ ସାପିସ୍‌ କିନାର୍‌, ମାରି ୱାନି ସନ୍ୟର୍‌ ସୋନାର୍‌ ମାରି ନାଣ୍ଡ୍‌ ଲୋକୁ ସାନାସନାର୍‌ । 27 ମାରି, ଇୟା ରୁଣ୍ଡି ରାଜାର୍ ତାଲା କୋଇଦେଙ୍ଗ୍‌ ତିୟାର୍‌ ଆନାର୍‌ ମାରି ୱାର୍‌ ଉନ୍‌ଡ୍ରି ଟେବୁଲ୍‌ତୁ ବାସ୍‌ସି ମିସ୍‌ ମାଟା ଇନାର୍‌; ମାତର୍‌ ଆକା ପୁରା ଆହେତ୍‌; ଇର୍ରିଙ୍ଗ୍‌ ନାସ୍ତିୱାଲେ କାସ୍ଟୁଦି ଟିକ୍‌ ବେଡ଼ାଦି କାପ୍‌କିନାନ୍‌ । 28 ନାସ୍ତିୱାଲେ ୱାନ୍‌ ନାଣ୍ଡ ସମ୍ପତି ଅସି ନିଜେଦି ଦେସ୍‌ତୁ ଡ଼େସି ସୋନାନ୍‌ ମାରି ୱାନି ଜିବନ୍‌ ପବିତ୍ର ନିୟମ୍‌ଦି ୱାଜା ଆନାତ୍‌; ମାରି, ୱାନ୍‌ ନେଗି ପାଣି କିଜି ନିଜେଦି ଦେସ୍‌ତୁ ଡ଼େସି ସୋନାନ୍‌ ।

29 ଆମା ବେଡ଼ାଦୁ ୱାନ୍‌ ଡ଼େସି ମିସର ଦେସ୍‌ତୁ ଡ଼ୁଗୁନାନ୍‌; ମାତର ଆଗ୍‌ଡ଼ି ଏଣ୍ଡେସ୍‌ ଆତାମାର୍ହାତ୍‌, ସାରା ସାରି ବେଡ଼ାଦୁ ଆୟା ୱାଜା ଆଏତ୍‌ । 30 ଇର୍ରିଙ୍ଗ୍‌ କିତିମଦି ଜାହାଜ୍‌ ୱିଜୁ ୱାନି ବିରୁଦ୍‌ତାନ୍‌ ୱାନେ, ଇୟା ଉଣ୍ତିଙ୍ଗ୍‌ ୱାନ୍‌ ଦୁଃକୁ ଆଜି ଡ଼େସି ସୋନାନ୍‌ ମାରି ପବିତ୍ର ନିୟମ୍‌ଦି ବିରୁଦ୍‌ତାନ୍‌ ରିସା ଆଜି ନିଜେଦି ବଦାଦାନ୍‌ ପାଣି କିନାନ୍‌; ୱାନ୍‌ ଡ଼େସି ସୋନାନ୍‌ ମାରି ପବିତ୍ର ନିୟମ ମାନାଇ ଲୋକାଙ୍ଗ୍‌ ମାନା କିନାନ୍‌ । 31 ମାରି, ୱାନି ତରଟି ସନ୍ୟର୍‌ ନିଙ୍ଗ୍‌ଜି ମନ୍ଦିର୍‍ଦିଙ୍ଗ୍‌ ଅଶୁଚି କିନାର୍‌ ମାରି ଦିନାମି ପୁଜା ସିନିକା ତେବା କିନାର୍‌, ମାରି ସାପିସ୍‌ କିନି କାଡ଼୍‌ନି ଜିନିସ୍‌ ତିୟାର୍‌ କିନାର୍‌ । 32 ମାରି, ଆମାକାର୍‌ ନିୟମତି ବିରୁଦ୍‌ତାନ୍‌ ସେଇ ପାଣି କିନାର୍‌, ୱାନ୍‌ ସୁରି ମାଟାଦାନ୍‌ ୱାରିଙ୍ଗ୍‌ ଆଇସାରିଦୁ ଅନାନ୍‌, ମାତର୍‌ ଏମେ ଲୋକୁ ନିଜେଦି ମାପୁରୁଙ୍ଗୁଁ ନେସ୍‌ନାର୍‌, ୱାର୍‌ ସାକ୍ତିଦି ଲୋକୁ ଆନାର୍‌ ମାରି ପେରି ପାଣିଙ୍ଗ୍‌ କିନାର୍‌ । 33 ମାରି, ଲୋକା ମାଣାନ୍‌ ବୁଦି ଲୋକୁ ନାଣ୍ଡ୍‌ ଲୋକାଙ୍ଗ୍‌ ଆଦେସ୍ ସିନାର୍‌; ଇର୍ରିଙ୍ଗ୍‌ବା ନାଣ୍ଡ ଦିନ୍ ସାନ୍ଦି ୱାର୍‌ କାଣ୍ଡାଦାନ୍‌, ସିସୁଦାନ୍‌, ବନ୍ଦିଦାନ୍‌ ମାରି ଡଙ୍ଗାଁଦାନ୍‌ ମୁଜାନାର୍‌ । 34 ନାସ୍ତିୱାଲେ ୱାର୍‌ ମୁଜାନାର୍‌, ନାସ୍ତିୱାଲେ ୱାର୍‌ ଅଡ଼ପ୍‌ ସାହାଜ୍ୟ ପୋଇନାର୍; ମାତର ନାଣ୍ଡ ଲୋକୁ ସୁରି ମାଟାଦାନ୍‌ ୱାରି ୱାଲେ ମିସାନାର୍‌ । 35 ମାରି, ୱାରି ମାଣାନ୍‌ ବୁଦିଦି ଲୋକୁ ୱାରିଙ୍ଗ୍‌ ନେଗିକା, ଜାୟ୍‌ ମାରି ଇୟା ଦସ୍‌ କିନି ଉଣ୍ତିଙ୍ଗ୍‌ ସେଇ ପାଣିଦି ବେଡ଼ାଦି ସାନ୍ଦି ଇଗା ୱାନାର୍‌; ଇର୍ରିଙ୍ଗ୍‌ ଆକା ଟିକ୍‌ ବେଡ଼ାଦୁ କାପ୍‌କିନାର୍ । 36 ମାରି, ରାଜା ନିଜେଦି ବଦାଦାନ୍‌ ପାଣି କିନି ମାରି ୱିଜୁ ବମେଙ୍ଗା ମାଣାନ୍‌ ନିଜେଦିଙ୍ଗ୍‌ ପେରିକାନ୍‌ ଇଜି ର୍ଗାବୁ କିନାନ୍‌, ମାରି ମାପୁରୁଦି ମାପୁରୁଦି ବିରୁଦ୍‌ତାନ୍‌ କାବା ଆନି ମାଟା ଇନାନ୍‌ ମାରି ରିସା ସତ୍‌ ଆନି ସାନ୍ଦି ପିରିନାତ୍‌; ଇର୍ରିଙ୍ଗ୍‌ ଆମାକା ତିୟାର୍‌ ଆତା ମାନାତ୍‌, ଆକା କିଆଇ ଆନାତ୍‌ । 37 ୱାନ୍‌ ନିଜେଦି ଡକ୍‌ରାଦାଦାରି ଦିୟାମ୍‌କାଙ୍ଗ୍‌ ମାନାଏନ୍‌; ବା ଆଇମେକା ବଦାଦିଙ୍ଗ୍‌ ବା ଇନି ଦିୟାମ୍‌ତିଙ୍ଗ୍‌ ମାନାଏନ୍‌; ଇର୍ରିଙ୍ଗ୍‌ ୱାନ୍‌ ୱିଜେରି ମାଣାନ୍‌ ନିଜେଦିଙ୍ଗ୍‌ ପେରିକା କିନାନ୍‌ । 38 ମାତର ନିଜେଦି ବାଡିଦୁ ୱାନ୍‌ ଗଡାଦି ଦିୟାମ୍‌ତିଙ୍ଗ୍‌ ସମ୍ମାନ୍‌ ସିନାନ୍‌ ମାରି ୱାନି ବୁବାର୍‌ ନେସ୍‌ଇ ଦିୟାମ୍‌ତିଙ୍ଗ୍‌ ବାଙ୍ଗାରାମ୍‌, ୱେଣ୍ଡି, ନାଣ୍ଡ ଦାରାଦି କାଲୁ ମାରି ସୁନ୍ଦର୍‌ଦି ଜିନିସ୍‌ ସିଜି ସମ୍ମାନ୍‌ କିନାନ୍‌ । 39 ମାରି, ୱାନ୍‌ ଆଇ ଦେସ୍‍ତି ଦିୟାମ୍‌ତି ସାକାଦାନ୍‌ ଡାଟ୍‌ଦାନ୍‌ ଗଡାଦି ବିରୁଦ୍‌ତାନ୍‌ ପାଣି କିନାନ୍‌, ଆମାକାନ୍‌ ୱାନିଙ୍ଗ୍‌ ମାନାନାନ୍‌, ୱାନ୍‌ ୱାନି ଗୌରବ୍‍ ପିରିସ୍‌ କିନାନ୍‌ ମାରି ନାଣ୍ଡ ଲୋକା ମୁସୁକୁ ୱାରିଙ୍ଗ୍‌ ପାଣି କିନି ପଦ୍‌ ସିନାନ୍‌ ମାରି ପୁରସ୍କାର୍‌ ୱାଜା ବୁମି ବାଟା କିନାନ୍‌ ।

40 "ମାରି ସେସ୍‌ କାଡ଼ାଦୁ ମିସରଦି ରାଜା ୱାନି ୱାଲେ ବିରୁଦ୍‌ କିନାନ୍ ମାରି ମିସରଦି ରାଜା ରତ, ଗୋଡ଼େଏଙ୍ଗ୍‌ ମାରି ନାଣ୍ତ ଜାହାଜ୍‌ ଅସି ୱାନି ବିରୁଦ୍‍ଦାନ୍ ଗାଲିପିରୁ ୱାଜା ୱାନାନ୍ ମାରି ୱାନ୍ ଆଇ ଆଇ ଦେସ୍ ମାଡ଼ାନ୍ ଡ଼ୁଗିଜି ପିରିଜି ଗାଲି କିଜି ସନାତ୍ । 41 ୱାନ୍ ବା ରମ୍ୟ ଇସ୍ରାଏଲ ଦେସ୍‍ତୁ ଡୁଗ୍‍ନାନ୍, ଆବେଟ୍‌ ନାଣ୍ତ ଦେସ୍‍କୁ ଆରାନେ; ମାତର ଇଦୋମ ମାରି ମୋୟାବ ମାରି ଅମ୍ମୋନ-ମାରିନ୍‌କା ପେରି ଅଦିକାର୍ ୱାନି କିୟୁଦାନ୍ ରକିଆ ପୋଇନାର୍ । 42 ମାରି, ୱାନ୍ ଆଇ ଆଇ ଦେସ୍ ମୁସୁକୁ ନିଜେଦି କିୟୁ ସାକ୍‌ନାନ୍‌ ମାରି ମିସର ଦେସ୍‌ ରକିୟା ପୋଇଏତ୍ । 43 ମାତର୍‌ ମିସରତି ବାଙ୍ଗାଁରାମ୍ ମାରି ୱେଣ୍ତିଦି ଇଲୁକୁ ୱିଜୁ ମାରି ଦାରାଦି ଜିନିସ୍‌ ୱିଜୁ ୱାନି ଅଦିକାର୍‌; ମାରି ଲୁବିୟ ମାରି କୁସିୟର ୱାନି ଅଦିକାର୍‌ ଆନାର୍ । 44 ମାତର ଆଗିଡ଼ି ମାରି ସିରିଆ ଦେସ୍‍ଦାନ୍ ୱାନି କାବୁର୍ ୱାନିଙ୍ଗ୍‌ ତିଲିସ୍ କିନାନ୍; ଆବେଟ୍‌ ୱାନ୍ ନାଣ୍ତ ଲୋକାଙ୍ଗ୍ କାସ୍ଟୁ ସିଜି ମାରି ୱିଜେରିଙ୍ଗ୍‌ ନାଷ୍ଟୁ କିନି ଉଣ୍ତିଙ୍ଗ୍‌ ନାଣ୍ତ ରିସାଦାନ୍ ସୋସି ସନାର୍‌ । 45 ମାରି, ୱାନ୍ ସାମୁଦୁରୁ ମାରି ରମ୍ୟ ପବିତ୍ର ଗରତି ମାଡ଼ାନ୍ ନିଜେଦି ରାଜାଦି ତମୁଗୁଡ଼ା ତିର୍ହାର୍ କିତାନ୍;ଇରିଙ୍ଗ୍‌ ୱାନି ସାରାସାରି କାଡ଼ା ଇଗା ୱାତାତ୍‌ନି, ମାରି ଏନ୍ ୱାନି ସାକା ଆନିକାର୍‌ ସିଲେର୍ ।"