1 ବାବିଲଦି ରାଜା ବେଲ୍‌ଶତ୍ସରଦି ସାସନକିନି ପାର୍‌ତୁମ୍‌ ବାର୍ସୁଦୁ ଦାନିୟେଲ ନିଜେଦି ଗୁରିତି ବାଡିଦାନ୍‌ ଲୋବ୍‌ ମାରି ବର୍‌ ପୟ୍‌ତାନ୍‌; ଆଦେଙ୍ଗ୍‌ ୱାନ୍‌ ଆୟା ଲୋବେରୁ ରାସ୍‌ସି ମାଟାଦି ଅର୍ତ ଇର୍ହାନ୍‌ । 2 ଦାନିୟେଲ ଇର୍ହାନ୍‌, "ନାନ୍‌ ନାଡ଼ା ବର୍‌ତାନ୍‌ ସୁଡ଼ୁତା ଜେ, ସୁଡ଼ୁଦୁ, ପେରି ସାମ୍‌ଦୁର୍‌ ମୁସୁକୁ ବାଦଡ଼ତି ସାରିବେଡ଼େତି ଦାନ୍‌ ଗାଲି ନାଣ୍ଡ ଆଜି ଇମିତାତ୍‌ । 3 ମାରି, ଉନ୍‌ଡ୍ରି ତରିଟାନ୍‌ ଆଇ ନାଲ୍‌ଗି ପେରି ଜାତୁଙ୍ଗ୍‌ ସାମ୍‌ଦୁର୍‌ତାନ୍‌ ନିଙ୍ଗ୍‌ଜି ୱାତେ । 4 ପ୍ରାତୁମ୍‌ତି ଜାତୁ ନରେସ୍‌ ୱାଜା ମାରି ଡେଗାଦି ରେକା ୱାଜା ତାନି ରେକା ମାର୍ହାତ୍‌; ନାନ୍‌ ସୁଡ଼ୁବୁ ସୁଡ଼ୁବୁ ଦାନି ଆୟା ରେକା କୁଦିତାତ୍‌, ମାରି ୱାଦ୍‌ ଦୁନିଆଦାନ୍‌ ନିକାଇଆତାତ୍‌ ମାରି ଲୋକା ୱାଜା ରୁଣ୍ଡି କାଲୁଦାନ୍‌ ଦାନିଙ୍ଗ୍‌ ନିଲ୍‌ପାତାତ୍‌, ମାରି ଦାନିଙ୍ଗ୍‌ ଲୋକାଦି ଆତ୍ମା ସିଆଇ ଆତାତ୍‌ । 5 ଇୟାୱେନ୍‌କା ସୁଡ଼ୁଦୁ, ମାରି ଉନ୍‌ଡ୍ରି, ଇର୍ରିଙ୍ଗ୍‌, ଦୁଇନମ୍ୱରଦି ଜାତୁ ଅଡ଼ୁଜୁ ୱାଜା ମାର୍ହାତ୍‌, ୱାଦ୍‌ ଉଣ୍ତ୍ରି ତରିଟାନ୍‌ ନିଙ୍ଗିଁତାତ୍‌ ମାରି ତାନି ୱେୟୁଦି ପାଲୁଦୁ ମୁଣ୍ଡ୍ରି ମକା ପାଞ୍ଜ୍‌ରା ମାର୍ହାତ୍‌; ମାରି, ତାନିଙ୍ଗ୍‌ ଇୟା ମାଟା ଇନାୟ୍‌ ଆତାତ୍‌, ନିଙ୍ଗ୍‌ଆ, ନାଣ୍ଡ କାଣ୍ତା ତିନ୍‌ଆ ।"

6 ଇୟାୱେନ୍‌କା ନାନ୍‌ ସୁଡ଼ୁତା, ସୁଡ଼ୁଦୁ, ଚିତା ନରେସ୍ ୱାଜା ମାରି ଉନ୍‌ଡ୍ରି ଜାତୁ, ତାନି ମୁଟାମ୍‌ତୁ ନାଲ୍‌ଗି ରେକେଙ୍ଗ୍‌ ମାର୍ହେ; ବା ଆକା ଜାତୁଙ୍ଗାଁ ନାଲ୍‌ଗି ତାଲେକ୍‌ ମାର୍ହେ ମାରି, ତାନିଙ୍ଗ୍‌ ଅଦିକାର୍‌ ସିଆଇ ଆତାତ୍‌ ।

7 ଇୟାୱେନ୍‌କା ନାନ୍‌ ନାଡ଼ାରି ବର୍‌ତୁ ସୁଡ଼ୁତା, ସୁଡ଼ୁଦୁ, ନାଲ୍‌ଗି ଲମର୍‌ଦି ଜାତୁ, ୱାଦ୍‌ ବୟ୍‌ଙ୍କାର୍‌ତିକା, ଅଦିକାର୍‌ତିକାତ୍‌ ମାରି ନାଣ୍ଡ ସାକ୍‌ତି ମାରି ୱାନି ପେରି ପେରି ଲୁୱାଦି ପାଲ୍‌କୁ ମାର୍ହେ; ୱାଦ୍‌ ଡ଼ିଙ୍ଗିଁତାତ୍‌ ମାରି ରୁକ୍‌ସି ଗୁଣ୍ଡା କିତାତ୍‌ ମାରି ଆମାକା ଏଜିତି ମାର୍ହାତ୍‌, ଆକା ପାଦାମ୍‌ ଆଡ୍‌ଗି ମୁସ୍‌ତାତ୍‌; ମାରି, ୱାଦ୍‌ ତାନି ଆଗ୍‌ଡ଼ିରି ୱିଜୁ ଜାତୁଙ୍ଗାଁ ମାଣାନ୍‌ ୱେରେଏ; ମାରି ତାନିଙ୍ଗ୍‌ ଦାସ୍ ଗୋଟା କୋମ୍‌କୁ ମାର୍ହେ । 8 ନାନ୍‌ ଆୟା କୋମ୍‌କା ବିସୟ୍‌ତାନ୍‌ ଏତ୍‌ କିବୁ କିବୁ ସୁଡ଼ୁଦୁ, ଆୟାୱିଜୁଦି ନାଣିମି ମାରି ଉନ୍‌ଡ୍ରି କୋମୁ ସତାତ୍‌, ଆକା ଇସ୍ରିକା, ତାନି ଆଗ୍‌ଡ଼ି ପାର୍‌ତୁମ୍‌ କୋମ୍‌କାଣି ମାଣାନ୍‌ ମୁଣ୍ଡ୍ରି କୋମ୍‌କୁ ଆବେନୁ ସୋତେ; ମାରି ସୁଡ଼ୁଦୁ, ଇୟା କୋମ୍‌କାଙ୍ଗ୍‌ ଲୋକାଦି କାଣେକେଙ୍ଗା ୱାଜା କାଣେକେଙ୍ଗ୍‌ ମାରି ଆକାର୍‌ଦି ମାଟା ୱେର୍‌ନି ୱେୟୁ ମାର୍ହାତ୍‌ ।

9 ନାନ୍‌, ସୁଡ଼ୁବୁ ସୁଡ଼ୁବୁ, ଏସୋଗୋଟା ରାଜାଗାଦିଙ୍ଗ୍‌ ତିଆର୍‌ ଆତେ, ମାରି ନାଣ୍ଡ କାଡ଼ାଦି ଡକ୍ରା ବାସ୍‌ତାନ୍‌ । ୱାନି ଆଙ୍ଗିଁ ବରପ୍‌ ୱାଜା ଅଡ଼ିନିକା, ମାରି ୱାନି ତାଲାଦି କୁକୁଟି ରିସା ମେଣ୍ଡାଦି ମେଣ୍ଡା ବୁରୁବୁସେଙ୍ଗ୍‍ ୱାଜା ମାର୍ହାତ୍‌ । ୱାନି ରାଜାଗାଦି ସିସୁ ୱାଜା ମାରି ଆବେଣି ତିର୍‍ବିନି ଇସ୍ରି କାସ୍‌ନି ସିସୁ । 10 ୱାରି ଆଗ୍‌ଡ଼ିରାନ୍‌ ସିସୁ ଏରୁ ସୋସି ସର୍ହାତ୍‌; ଆଜାର୍‌ ଆଜାର୍‌ ୱାରିଙ୍ଗ୍‌ ସେବା କିତାର୍ ମାରି ଆଜାର୍‌ ଆଜାର୍‌ ଲୋକୁ ୱାରି ଆଗ୍‌ଡ଼ି ନିର୍ହାର୍‌ । ବିସାର୍ କିଦେଙ୍ଗ୍ ବାସ୍‌ତାର୍ ମାରି ବୋଇ ୱିଜୁ କୁତ୍‌ତାର୍‌ ।

11 ଆୟା କୋମ୍‌କାଣି ଗର୍ବ ୱାର୍‌ଗିନି ମାଟାଦି ଉଣ୍ତିଙ୍ଗ୍‌ ଆୟା ବେଡ଼ାଦୁ ନାନ୍‌ ସୁଡ଼ୁତା; ଜେ, ନାସ୍‌ତି ୱାଲେ ଆୟା ଜାତୁ ସାତା ସରାତ୍ ମାରି ତାନି ମେନ୍ଦଲ ନାଷ୍ଟୁ ଆତାତ୍‌ ମାରି ଆୟା ସିସୁଦୁ ୱେନି ଉଣ୍ତିଙ୍ଗ୍‌ ସର୍ପେ ଆତାତ୍‌ । 12 ମାରି, ଆଇ ଜାତୁଙ୍ଗାଁ ମାଣାନ୍‌ ୱାନିକା ସାସନ୍‌ ଅୟାୟ୍‌ ଆତାତ୍‌; ଇର୍ରିଙ୍ଗ୍‌ବା ଉନ୍‌ଡ୍ରି ଉଣା ବେଡ଼ାଦି ସାନ୍ଦି ୱାନିକା ବାର୍ସୁ ନାଣ୍ତ କିଆୟ୍‌ ଆତାତ୍‌ ।

13 ନାନ୍‌ ନାଡ଼ା ବେଡ଼ାଦୁ ଦର୍ସନ ସୁଡ଼ୁତା, ମାରି ସୁଡ଼ୁଦୁ, ମନୁସ୍ୟପୁତ୍ର ଅରେନ୍‌ ଲୋକୁ ମୁସୁକୁରି ବାଦଡ଼୍‌ତାନ୍‌ ୱାତାନ୍‌; ୱାନ୍‌ ନାଣ୍ତ କାଡ଼ାଦି ଆୟା ଡକ୍ରା ଲାକ୍‌ତୁ ୱାତିଙ୍ଗ୍‌, ୱାର୍‌ ୱାନି ଲାକ୍‌ତୁ ୱାନିକାଙ୍ଗ୍‌ ତାତାର୍‌ ।

14 ମାରି, ୱିଜୁ କୁଟୁମ୍‌, ଦେସ୍‌ତି ଲୋକୁ ମାରି ଆଇ ଆଇ ବାସାଦି ଲୋକୁ ଏଣ୍ଡେସ୍‌ ୱାନି ସେବା କିନାର୍‌, ଇୟା ଉଣ୍ତିଙ୍ଗ୍‌ ୱାନିଙ୍ଗ୍‌ ଅଦିକାର୍‌, ମହିମା ମାରି ରାଜି ସିଆୟ୍‌ ଆତାତ୍‌; ୱାନି ଅଦିକାର୍‌ ଏସାଙ୍ଗ୍‌ ୱିଜ୍‌ଇ ଅଦିକାର୍‌, ଆକା ମାର୍‌ଗିଏତ୍‌, ମାରି ୱାନି ରାଜି ୱିଜୁଦିନ୍‌ ମାନ୍‌ଜିନାତ୍‌ ।

15 ନାନ୍‌ ଦାନିୟେଲ, ନା ଆତ୍ମା ନା ମେନ୍ଦଲତୁ ଆଡ଼୍‌ବାତାତ୍‌ ମାରି ନା ମୋନ୍‌ ନାଙ୍ଗି ତିଲିସ୍‌ କିତାତ୍‌ । 16 ନା ଲାକ୍‌ତୁ ଆମାକାର୍‌ ନିଲ୍‌ତା ମାର୍ହାର୍‌, ୱାରି ମାଣାନ୍‌ ଅରେନ୍‌ ଲୋକା ଲାକ୍‌ତୁ ନାନ୍‌ ସୋଲ୍‌ସି ଇୟା ୱିଜୁଦି ଅର୍ତ ୱେନ୍‌ବାତା । ଆବେନୁ ୱାନ୍‌ ନାଙ୍ଗି ଆୟା ୱିଜୁଦି ଅର୍ତ ଇର୍ହାନ୍‌ । 17 ଆୟା ନାଲ୍‌ଗି ପେରି ଜାତୁଙ୍ଗ୍‌ ନାଲ୍‌ଗି ରାଜାର୍‌, ୱାର୍‌ ଦୁନିଆଦାନ୍‌ ଜନମ୍‌ ଆନାର୍‌ । 18 ମାତର ପେରି ମାପୁରୁଦି ପବିତ୍ର ଲୋକୁ ରାଜି ପୋଇନାର୍‌ ମାରି ୱିଜୁ ଦିନ୍‌, ଇର୍ରିଙ୍ଗ୍‌, ଦେସ୍‌ୱିଜ୍‌ନି ସାନ୍ଦି ରାଜିଦୁ ଶାସନ କିନାର୍‌ ।

19 ନାସ୍ତିୱାଲେ ଆମା ନାଲ୍‌ଗି ଜାତୁ, ଜେ ଆଇ ୱାନିକା ମାଣାନ୍‌ ୱେରେଏ, ନାଣ୍ଡ ସେଇକା, ତାନି ପାଲ୍‌କୁ ଲୁହାଦି ୱାଜା ମାରି ଗରକୁ ୱିଜୁ ପିତଲ୍‌ଦିକେଙ୍ଗ୍‌ ମାର୍ହେ, ଜେ ନାଷ୍ଟୁ କିତାନ୍‌, ରୁକୁସି ଗୁଣ୍ଡାକିତାତ୍‌ ମାରି ଏଜିତି ୱିଜୁଦିଙ୍ଗ୍‌ ପାଦାମ୍‌ ଆଡ୍‌ଗି ମାଟ୍‌ତା ପୋକ୍‌ତାତ୍‌, ତାନି ବିସୟ୍‌ ନେସ୍‌ତେଙ୍ଗ୍‌ ନାନ୍‌ ବଦା କିତା; 20 ମାରି, ତାନି ତାଲାଦୁ ଆମା ଦାସ୍‌ ଗୋଟା କୋମ୍‌କୁ ମାର୍ହେ ମାରି ଆଇ ଆମା କୋମ୍‌କୁ ସୋତେ ମାରି ଆମା ଏମେତାନି ଆଗ୍‌ଡ଼ି ମୁଣ୍ଡ୍ରି କୋମ୍‌କୁ ଆର୍‌ତେ; ଇର୍ରିଙ୍ଗ୍‌, ଆୟା ଏମେ କୋମ୍‌କାଙ୍ଗ୍‌ କାଣୁକୁ ମାରି ଆକାର୍‌ ମାଟାଦି ୱେୟୁ ମାର୍ହାତ୍‌, ତାନି ବିସୟ୍‌ ନେସ୍‌ତେଙ୍ଗ୍‌ ନାନ୍‌ ବଦା କିତା ।

21 ନାନ୍‌ ସୁଡ଼ୁତା, ମାରି ଆୟା କୋମୁ ପବିତ୍ର ଲୋକାୱାଲେ ଜୁଦ୍‌ କିତାତ୍‌ ମାରି ୱାରିଙ୍ଗ୍‌ ଆରାକିତାତ୍; 22 ଆୟା ବେଡ଼ାଦୁ ଆୟା ନାଣ୍ଡ କାଡ଼ାଦି ଡକ୍ରା ୱାତାନ୍‌ ମାରି ପେରି ମାପୁରୁଦି ପବିତ୍ର ଲୋକାଙ୍ଗ୍‌ ବିସାର୍ କିନି ବଜୁ ସିଆୟ୍‌ ଆତାତ୍‌ ମାରି ପବିତ୍ର ଲୋକାଦି ରାଜି ଶାସନ କିନି ସମୟ ଇଗାୱାତାତ୍‌ । 23 ୱାନ୍‌ ଇୟା ୱାଜା ଇର୍ହାନ୍‌, "ନାଲ୍‌ଗି ଲମର୍‌ଦି ଜାତୁ ଦେସ୍‌ତି ନାଲ୍‌ଗି ରାଜି ଆନାତ୍‌, ଆକା ୱିଜୁଦି ରାଜିଦି ମାଣାନ୍‌ ୱେରେଏ ଆନାତ୍‌ ମାରି ୱିଜୁ ଦେସ୍‌ତିଙ୍ଗ୍‌ ନାଷ୍ଟୁ କିନାତ୍‌, ମାରି ଗୁଣ୍ଡା କିଜି ମୁକା ମୁକା କିନାତ୍‌ ମାରି ଆକା ରୁକ୍‌ସି ପକ୍‌ନାତ୍‌ । 24 ମାରି, ଆୟା ଦାସ୍‌ ଗୋଟା କୋମ୍‌କାଣି ଅର୍ତ ଇୟାକା ଜେ, ଆୟା ରାଜିଦାନ୍‌ ଦାସ୍ ଲୋକୁ ରାଜାର୍‌ ଜନମ୍‌ ଆନାର୍‌; ୱାରି ୱେନ୍‌କା ମାରି ଅରେନ୍‌ ଜନମ୍‌ ଆନାନ୍‌ । ୱାନ୍‌ ଆଗ୍‌ଡ଼ିରି ଲୋକା ମାଣାନ୍‌ ୱେରେଏ ଆନାନ୍‌ ମାରି ୱାନ୍‌ ମୁଣ୍ଡ୍ରି ରାଜାରିଙ୍ଗ୍‌ ଡାକ୍‌ନାନ୍‌ । 25 ମାରି, ୱାନ୍‌ ମାପୁରୁଦି ବିରୁଦ୍‌ତାନ୍‌ ମାଟା ଇନାନ୍‌ ମାରି ମାପୁରୁଦି ପବିତ୍ର ଲୋକାଙ୍ଗ୍‌ ଡାକ୍‌ନାନ୍‌; ମାରି, ୱାନ୍‌ ସାନିକା ମାରି ନିୟମ୍‌ଦିଙ୍ଗ୍‌ ବାଦ୍‌ଲେ କିଦେଙ୍ଗ୍‌ ବିସାର୍ କିନାନ୍‌; ମାରି, ଉନ୍‌ଡ୍ରି କାଡ଼ାଦୁ, ରୁଣ୍ଡି ପବିତ୍ର ପଣ୍ଡୟ୍‌ ମାରି ଅଦା ପବିତ୍ର ପଣ୍ଡୟ୍‌ ସାନ୍ଦି ମାରି, ଉନ୍‌ଡ୍ରି କାଡ଼ା, ରୁଣ୍ଡି ପବିତ୍ର ପଣ୍ଡୟ୍‌ ମାରି ଅଦା ପଣ୍ଡୟ୍‌ ସାନ୍ଦି ଇର୍ରିଙ୍ଗ୍‌ ମୁଣ୍ଡ୍ରି ବାର୍ସେକ୍‌ ଅଦା ବାର୍ସୁ ସାନ୍ଦି ୱାର୍‌ ୱାନି କିଉଦୁ ସର୍ପେ ଆନାର୍‌ । 26 ମାତର ବିସାର୍ କୁଟୁମ୍‌ ବାସ୍‌ନାର୍‌ ମାରି ୱାର୍‌ ୱିଜ୍‌ନି ସାନ୍ଦି ୱାନି ସାସନ୍‌ଦି ମାରି ନାସ୍ଟୁ କିନି ଉଣ୍ତିଙ୍ଗ୍‌ ୱାନି ମାଣାନ୍‌ ଆକା ଅନାର୍‌ । 27 ମାରି, ସାସନ୍ କାଡ଼ାଦି ମାରି ସାସନ୍‌ କିନିକା ମାରି ବାଦଡ଼୍‌ତି ଆଡ୍‌ଗିରି ରାଜି ୱିଜୁଦି ମହିମା, ପେରି ମାପୁରୁଦି ପବିତ୍ର ଲୋକୁ ସିଆୟ୍‌ ଆନାତ୍‌; ୱାରି ରାଜି ଏସେଙ୍ଗ୍‌ ୱିଜ୍‌ଇ ରାଜି ମାରି ଇଲେତି ସାସନ୍‌ କିନିକାନ୍‌ ୱାନି ସେବା କିନାନ୍‌ ମାରି ୱାନି ମାଟା ୱେନାନ୍‌ । 28 ଇବେନୁ ମାଟା ୱିଜିତାତ୍‌ ନାନ୍‌ ଦାନିୟେଲ, ନା ମନ୍‌ ଅଡ଼୍‌ବିନିକା ନାଙ୍ଗିଁ କିଲି ବିଲି କିତାତ୍‌ ମାରି ନା ମୋକମ୍‌ ୱାର୍‌ତା ସର୍ହାତ୍‌, ମାତର ନାନ୍‌ ଆୟା ମାଟା ନିଜେଦି ମୋନ୍‌ତୁ ଇଟ୍‌ତା ।"