1 ଜିହୁଦାଦି ରାଜା ଜିହୋୟାକିମଦି ସାସନ୍‌ କାଡ଼ାଦି ମୁଣ୍ତ୍ରି ବାର୍ସେକ୍‌ଦୁ ବାବିଲଦି ରାଜା ନବୂଖଦ୍‌ନିତ୍ସର ଜିରୁସାଲମତୁ ୱାଜି ଆକା ନାଷ୍ଟୁ କିତାନ୍‌ । 2 ମାରି, ପ୍ରବୁ ଜିହୁଦାଦି ରାଜା ଜିହୋୟାକିମଦିଙ୍ଗ୍‌ ମାରି ମାପୁରୁଦି ଇଡ୍ରଣି ଏସୋ ଡୁବାଇଙ୍ଗୁଁ ୱାନି କିୟୁଦୁ ସର୍ପେ କିଜି ସିତାନ୍‌; ଆବେଟ୍‍କୁ ୱାନ୍‌‍ ସିନିୟଦି ଦେସ୍‌ତୁ ମାନି ନିଜେଦି ଦିୟାମ୍‌ ମନ୍ଦିର୍‌ତୁ ଆୟାୱିଜୁ ଅତାନ୍‌ ମାରି ଡୁବାଇଙ୍ଗୁଁ ୱିଜୁ ୱାନ୍‌ ନିଜେଦି ଦିୟାମ୍‌ ଇଲୁଦୁ ଇଟ୍‌ତାନ୍‌ ।

3 ମାରି, ରାଜା ଆସ୍‌ପେନାସ୍‌ତିଙ୍ଗ୍‌ ଆଦେସ୍‌ ସିତାନ୍‌ ଇସ୍ରାଏଲଦି ଲୋକା ମାଣାନ୍‌, ଇର୍ରିଙ୍ଗ୍‌, ରାଜା କୁଟୁମ୍‌ତାନ୍‌ ମାରି ପେରି କୁଟୁମ୍‌ଦାନ୍‌ 4 ସିନା ସିଲିକାର୍‌, ସୁନ୍ଦର୍‌ ମାରି ୱିଜୁ ବୁଦିମାନ୍‌, ନେଗେନ୍‌ତାନ୍‌ ସାକ୍ତି, ବେଗି ଅଜାଦେଙ୍ଗ୍‌ ଆଟ୍‌ନିକାନ୍‌ ମାରି ମେନ୍ଦଲ୍‌ ରୋଗ୍‌ତାନ୍‌ ନେଗେନ୍‌ ମାନିକାମାନାନ୍‌ ମାରି ରାଜା ମେଡ଼େ ଇଲୁଦୁ ନିଲ୍‌ଦେଙ୍ଗ୍‌ ଜଗ୍‌ ଏସୋ ମୁରୁଲିରିଙ୍ଗ୍‌ ତାତେଙ୍ଗ୍‌ ମାରି କଲଦିୟ ବିଦ୍ୟା ମାରି ବାସା ଅଜାକିଦେଙ୍ଗ୍‌ ନିଜେଦି ବେଜୁରି ନେତା ଅସ୍ପନସ୍‌ଦିଙ୍ଗ୍‌ ଇର୍ହାନ୍‌ । 5 ମାରି, ୱାର୍‌ ଏଣ୍ଡେସ୍‌କି ମୁଣ୍ତ୍ରି ବାର୍ସେକ୍‌ ୱେନେକା ରାଜାଦି ଲାକ୍‌ତୁ ନିଲ୍‌ନାର୍‌, ଇୟା ଉଣ୍ତିଙ୍ଗ୍‌ ରାଜା ୱାରି ଉଣ୍ତିଙ୍ଗ୍‌ ରାଜାଦି ଉଣି ଜିନିସ୍‌ଦାନ୍‌ ମାରି ଏରୁଦି ଅଙ୍ଗୁର୍‌ ରସ୍‍ଦାନ୍‌ ଦିନ୍‌କେ ସମାନ୍‌ କାଦି ସିନି ଉଣ୍ତିଙ୍ଗ୍‌ ମାରି ମୁଣ୍ତ୍ରି ବାର୍ସେକ୍‌ ସାନ୍ଦି ୱାରିଙ୍ଗ୍‌ ପୋସାକିନି ଉଣ୍ତିଙ୍ଗ୍‌ ତିଆର୍‌ କିତାନ୍‌ । 6 ୱେରି ମାଣାନ୍‌ ଜିହୁଦା କୁଟୁମ୍‌ଦି ଦାନିୟେଲ, ହନାନିୟ, ମିସାୟେଲ ମାରି ଅସରିୟ ମାର୍ହାର୍‌ । 7 ମାରି, ବେଜୁରି ନେତା ୱାରିଙ୍ଗ୍‌ ଦରୁ ଇଟ୍‌ତାନ୍‌; ୱାନ୍‌ ଦାନିୟେଲଦିଙ୍ଗ୍‌ ବେଲ୍‌ଟଶତ୍ସର, ହନାନିୟଙ୍ଗ୍‌ ଶଦ୍ରକ୍‌, ମିସାୟେଲଦିଙ୍ଗ୍‌ ମୈଶକ୍‍ ମାରି ଅସରିୟଙ୍ଗ୍‌ ଅବେଦ୍‌ନଗୋ ଦରୁକୁ ଇଟ୍‌ତାନ୍‌ ।

8 ମାତର୍‌ ରାଜାଦି ଉଣି ଜିନିସ୍‌ଦାନ୍‌ ମାରି ୱାନି ଏରୁଦି ଅଙ୍ଗୁର୍‌ ରସ୍‌ଦାନ୍‌ ନିଜେଦିଙ୍ଗ୍‌ ଅଶୁଚି କିଇ ଉଣ୍ତିଙ୍ଗ୍‌ ଦାନିୟେଲ ନିଜେ ମୋନ୍‌ତୁ ତିର୍‌ କିତାନ୍‌; ଇୟାଉଣ୍ଡିଙ୍ଗ୍‌ ୱାନ୍‌ ଏଣ୍ଡେସ୍‌ଗି ନିଜେଦିଙ୍ଗ୍‌ ଅଶୁଚି କିଏନ୍‌ଆନାନ୍‌, ଇୟାଉଣ୍ଡିଙ୍ଗ୍‌ ୱାନ୍‌ ବେଜୁରି ନେତା ମାଡ଼ିସ୍‌ କିତାନ୍‌ । 9 ନାସ୍ତିୱାଲେ ମାପୁରୁ ଆୟା ବେଜୁରି ନେତାଦି କାଣାଗାଦୁ ଦାନିୟେଲଦିଙ୍ଗ୍‌ ଦୟା ମାରି ଦୟାଦି କାନ୍‌ କିତାନ୍‌ । 10 ଆବେନୁ ବେଜୁରି ନେତା ଆସ୍‌ପେନାସ୍‌ ଦାନିୟେଲଦିଙ୍ଗ୍‌ ଇର୍ହାନ୍‌, ଏନ୍‌ ମି ଉଣିକା ମାରି ଏରୁଦି ଜିନିସ୍‌ ତିଆର୍‌ କିତାମାନାନ୍‌, ନାନ୍‌ ମି ମାପୁରୁଙ୍ଗୁଁ ଆୟା ପେରି ରାଜେଙ୍ଗ୍‌ ତିଲାନା; ଇର୍ରିଙ୍ଗ୍‌ ୱାନ୍‌ ମି ବୟସ୍‌ ମୁରୁଲିରି ମୋକମ୍‌ ବାଦ୍‌ଲୁ ମି ମୋକମ୍‌ ଏନ୍ଦା ସିମ୍‌ରା ସୁଡ଼ୁନାନ୍‌ ? ଆଦେଙ୍ଗ୍‌, ମିର୍‌ ରାଜାଦି ଲାକ୍‌ତୁ ନା ତାଲାଦିଙ୍ଗ୍‌ କୋଇନିଦେର୍‌ ।

11 ଆବେଟ୍‌ ବେଜୁରି ନେତା; ଦାନିୟେଲ, ହନାନିୟ, ମିସାୟେଲ ମାରି ଅସରିୟଦି ମୁସୁକୁ ଆମା ଇଲୁଦି ପେରିୱାନିଙ୍ଗ୍‌ ନିଲିପ୍‌ତା ମାର୍ହାନ୍‌, ୱାନିଙ୍ଗ୍‌ ଦାନିୟେଲ ଇର୍ହାନ୍‌; 12 "ଦୟା କିଜି ନିଜେଦି ଦାସରିଙ୍ଗ୍‌ ଦାସ୍ ଦିନ୍‌ ପରିକା କିଆ;" ମାଙ୍ଗିଁ ଉଣି ଉଣ୍ତିଙ୍ଗ୍‌ କୁସାପୁଲା ମାରି ଏରୁ ସିଦା । 13 ତାନିୱେନ୍‌କା ନିଜେଦି ଆଗ୍‌ଡ଼ି ମା ମୋକମ୍‌ ମାରି ରାଜାରି କାଦି ଉଣି ମୁରୁଲି ଲୋକା ମୋକମ୍‌ ସୁଡ଼ୁଦେଙ୍ଗ୍‌ ଆପିତ୍‌; ଆବେଟ୍‌ ନିନୁ ଏଣ୍ଡେସ୍‌ ସୁଡ଼ୁନି, ଆୟା ଇସାବ୍‌ଦାନ୍‌ ନି ଦାସରି ଉଣ୍ତିଙ୍ଗ୍‌ ବ୍ୟବହାର୍‌ କିଆ ।

14 ଆବେଟ୍‌ ୱାନ୍‌ ଇୟା ବିସୟ୍‌ତାନ୍‌ ୱାରି ମାଟା ଆସ୍‌ସି ଦାସ୍‌ ଦିନ୍‌ ସାନ୍ଦି ୱାରିଙ୍ଗ୍‌ ପରିକା କିତାନ୍‌ । 15 ମାରି, ଦାସ୍‌ ଦିନ୍‌ତି ସେସ୍‌ତୁ ରାଜାଦି କାଦି ଉଟି ୱିଜୁ ମୁରୁଲିରି ମୋକମ୍‌କା ମାଡ଼ାନ୍‌ ୱାରି ମୋକମ୍‌କୁ ସୁନ୍ଦର୍‌ ତୋରିତାତ୍‌ ମାରି ୱାର୍‌ ନାଣ୍ଡ ମୋଟାରଟା ତରିତାର୍‌ । 16 ଇବେନୁ ଇଣ୍ତ୍ରଣି ମାଲିକ୍‌ ୱାରି ଆୟା ଉଣିକା ମାରି ଉଣି ଅଙ୍ଗୁର୍‌ ରସ୍‌ ତେବାକିଜି ୱାରିଙ୍ଗ୍‌ କୁସାବୁଲା ସିତାନ୍‌ ।

17 ମାରି, ମାପୁରୁ ଆୟା ନାଲ୍‌ଗି ମୁରୁଲିରିଙ୍ଗ୍‌ ୱିଜୁ ବିଦ୍ୟା ମାରି ବୁଦିଦାନ୍‌, ବୁଦି ମାରି ବେଗି ଅଜାନିକା ସିତାନ୍‌ ମାରି, ଦାନିୟେଲ ବର୍‌ ନି ଲୋବେରି ବିସୟ୍‌ଦାନ୍‌ ଅର୍ତ ୱେର୍‌ତେଙ୍ଗ୍‌ ବୁଦିମାନ୍‌ ଆତାନ୍‌ ।

18 ମାରି, ରାଜା ୱାରିଙ୍ଗ୍‌ ଲାକ୍‌ତୁ ତାନି ଉଣ୍ତିଙ୍ଗ୍‌ ଆମା ମୁଣ୍ତ୍ରି ବାର୍ସେକ୍‌ ସମୟ ସିତାମାର୍ହାନ୍‌, ଆକା ୱିଜିତିଙ୍ଗ୍‌, ବେଜୁରି ନେତା ଆସ୍‌ପେନାସ୍‌ ୱାରିଙ୍ଗ୍‌ ନବୂଖଦ୍‌ନିତ୍ସର ରାଜା ଆଗ୍‌ଡ଼ି ତାତାନ୍‌ । 19 ମାରି, ରାଜା ୱାରି ୱାଲେ ୱାର୍‌ଗିତାନ୍‌; ମାରି, ଆୟା ୱିଜୁଲୋକା ମାଣାନ୍‌ ଦାନିୟେଲ, ହନାନିୟ, ମିସାୟେଲ ମାରି ଅସରିୟ ସାମାନ୍ ଏନ୍‌ ତରିତାର୍‌; ଆବେଟ୍‌ ୱାର୍‌ ରାଜାଦି ପାଣିଙ୍ଗ୍‌ ସେବା କିଦେଙ୍ଗ୍‌ ପଦ୍‌ ପୋଇତାର୍‌ । 20 ମାରି, ଜ୍ଞାନ୍‌ ମାରି ବୁଦି ବିସୟ୍‌ତାନ୍‌ ଏମେବା ମାଟା ରାଜା ୱାରିଙ୍ଗ୍‌ ୱେନ୍‌ବାତାନ୍‌, ଆୟା ୱିଜୁ ବିସୟ୍‌ତାନ୍‌ ୱାନ୍‌ ନିଜେଦି ୱିଜୁ ଦେସ୍‌ତି ଲୋଇରି ମନ୍ତ୍ର କିନିୱାରି ନି ପାଞ୍ଜି ସୁଣିୱାରି ମାଣାନ୍‌ ୱାରି ବୁଦି ଦସ୍‌ଗୁଣତାନ୍‌ ନାଣ୍ଡ ତରିତାତ୍‌ । 21 ମାରି, ଦାନିୟେଲ କୋରସ୍‌ ରାଜାଦି ପାର୍‌ତୁମ୍‌ ବାର୍ସେକ୍‌ ସାନ୍ଦି ୱାନି ସେବାଦୁ ମାର୍ହାନ୍‌ ।