1 ନାନୁ ସତ୍‍ ଇଜିନା, କ୍ରିସ୍ତଦି ଆତାମାନାଆକା ନାନୁ ପବିତ୍ର ଆତ୍ମାଦିଙ୍ଗ୍‌ ମିସ୍‌ ୱେର୍‍ଏ । 2 ନାନୁ ଜେ ଏସା କାସ୍ଟୁ ନି ନାଣ୍ତ ଦୁକ୍‍ତୁ ନା ଜିବନ୍‌ ଆଡ଼୍‍ବାଜିନାତ୍‍, ଇୟା ମାଟା ନାନୁ ସାଲାକି କିଜି ଇନ୍‍ଏ । ପବିତ୍ର ଆତ୍ମାଦାନ୍‌ ସାଲାଜି ନା ଜିବନ୍‌ ତେନି ସାକି । 3 ନା ନିଜେଦି ଜିହୁଦି ଜାତିଦି ତଡ଼ାନ୍‍କା ଉଣ୍ତିଙ୍ଗ୍‍ଁ ନାନୁ ନିଜେ କ୍ରିସ୍ତଦି ମାଣାନ୍‌ ୱେର୍‍ଏ ଆଜି ମାପୁରୁଦି ମାଣାନ୍‌ ଆନାଦୁରିଆ ଆନି ଉଣ୍ତିଙ୍ଗ୍‌ ନାନୁ ବଦା କିଜିନା । 4 ଇରିଙ୍ଗ୍‍ଁ ୱାରୁ ମାପୁରୁଦି ଲୋକୁ । ମାପୁରୁ ୱାରିଙ୍ଗ୍ ନିଜେଦି କଡ଼ରି ୱାଜା ଆସ୍‌ସି ୱାରି ଲାକ୍‍ତୁ ନିଜେଦି ମହିମା ତର୍‍ତାମାର୍ହାନ୍‍; ୱାରି ୱାଲେ ମାଟା ଇଡ୍‍ଜି ୱାରିଙ୍ଗ୍‍ଁ ନିୟମ୍‌ ସିତାମାର୍ହାନ୍‍, ୱାର୍‌ ସତ୍‌ତାନ୍‌ ଉପାସନା କିନାର୍‌; ୱାର୍‌ ମାପୁରୁଦିମାଣାନ୍‌ ମାଟେଙ୍ଗ୍‌ ପୟ୍‍ତାମାନାର୍‍, 5 ମା ୱେଙ୍ଗିଁତି ଜିହୁଦି ଡକ୍ରାଦାଦାରି ୱାର୍‌ କୁଟୁମ୍‌ତିକାର୍‍ ମାରି ଲୋକ୍‍ ୱାଜା କ୍ରିସ୍ତ ଆୟା କୁଟୁମ୍‌ତାନ୍‌ ଜନମ୍‍ । ଆୟା ୱିଜେରିଙ୍ଗ୍‍ଁ ସାସନ୍‍କିନି ମାପୁରୁ ଜୁଗ୍‌ ଜୁଗ୍‌ ଦନ୍ୟ ଆପିନ୍‌ । ଆମେନ୍‍ ।

6 ମାପୁରୁଦି ପାର୍‍ମାଣ୍‍ ଆରାତାମାନାତ୍‍ ଇଜି ନାନୁ ଇନ୍‍ଏ, ଇରିଙ୍ଗ୍‌ ଇସ୍ରାଏଲ୍‌ ଲୋକୁ ୱିଜେରେ ମାପୁରୁଦି ଲୋକୁ ଆଏର୍‍, 7 ମାରି ଅବ୍ରାହାମତି କୁଟୁମ୍‌ତିକାର୍‍ ୱିଜେରେ ମାପୁରୁଦି କଡ଼ର୍‍ ସିଲେ । ମାପୁରୁ ଅବ୍ରାହାମ୍‍ତିଙ୍ଗ୍‌ ଇର୍ହାମାର୍ହାନ୍‍, "ନି ଆମା କୁଟୁମ୍‌ତିରି ବିସୟ୍‍ତାନ୍‍ ମାପ୍‌ ପାର୍‍ମାଣ୍‍ କିତାମାର୍ହାପ୍‍, ୱାର୍‌ ଇସ୍‍ହାକ୍‍ମାଣାନ୍‍ ଜନମ୍‍ ଆନାର୍‍ ।" 8 ତେନି ଅର୍ତ ଆଜିନାତ୍‍, ଲୋକୁ ଆତିମାନିଙ୍ଗ୍‌ ମାପୁରୁଦି କଡ଼ର୍‍ ଆଦେଙ୍ଗ୍‌ ଆଟ୍‍ଏର୍‍ । ମାପୁରୁଦି ପାର୍‍ମାଣ୍‍ ଇସାବ୍‍ତାନ୍‍ ଜନମ୍‍ ଆତିମାନି କଡ଼ର୍‍ ମାପୁରୁଦି ଆଗ୍‍ଡ଼ି ସତ୍‌ତାନ୍‌ କଡ଼ ୱାଜା ୱେଙ୍ଗ୍‍ଁନାର୍‍ । 9 ମାପୁରୁ ଇୟା ପାର୍‍ମାଣ୍‍ କିତାମାର୍ହାନ୍, "ଟିକ୍‍ ଇୟା କାଡ଼ାଦୁ ମାପ୍‌ ଡ଼େସି ୱାନାପ୍‍, ନାସ୍ତିୱାଲେ ସାରା କଡ଼ ପୟ୍‍ନା ମାନାତ୍‌ ।"

10 ଇରିଙ୍ଗ୍‌ ଇୟାୱାଜା ସିଲେ । ରିବିକାଦି ରିଏର୍‌ କଡ଼ର୍‍ ଅରେନ୍‍ ବୁବା ଇସ୍‍ହାକ୍‍ତି ମାଣାନ୍‌ ଜନମ୍‍ ଆତାମାର୍ହାର୍‍, 11 ଏସ୍ତିୱାଲେ କଡ଼ର୍‍ ଜନମ୍‍ ଆଏର୍‍ ମାର୍ହାର୍‌, ମାରି ନେଗିକା ନି ସେଇକା ଇନିକା କିଏର୍‌ ମାର୍ହାର୍‌, ନାସ୍ତିୱାଲେ ପାଣି ଉଣ୍ତିଙ୍ଗ୍‍ଁ ସିଲେ, ମାତର୍‌ କୁକ୍‍ତିମାନି ୱାନି ବଦା ଉଣ୍ତିଙ୍ଗ୍‍ଁ ବାସେକିତି ଇସାବ୍‍ତାନ୍‍ ମାପୁରୁଦି ଉଦେସ୍‍ ଏଣ୍ତେସ୍‌ ତିର୍‍ ତେବାନାତ୍‍, 12 ଇୟାଉଣ୍ତିଙ୍ଗ୍‍ଁ ଇୟା ମାଟା ୱାନିଙ୍ଗ୍‍ଁ ଇନାୟ୍‍ ଆତାମାର୍ହାତ୍‍, "ପେରି ତଡ଼ାନ୍‌ ଇସ୍ରିୱାନିଙ୍ଗ୍‌ ସେବା କିନାନ୍‍ ।" 13 ଏଣ୍ତେସ୍‌ ରାସାତାମାନାତ୍‌, "ଜାକୁବଙ୍ଗ୍‍ଁ ମାପ୍‌ ଜିବନ୍‍ନୋତାପ୍‍, ମାତର୍‌ ଏସୌଙ୍ଗ୍‌ କାଡ଼ିତାପ୍‍ ।"

14 ଆର୍‌ତିଙ୍ଗ୍‌ ମାଡ୍‌ ଇନିକା ଇନାଟ୍‍ ? ମାପୁରୁମାନୁ ଇନି ଅନ୍ୟାୟ୍‌ ମାନାତ୍‌ ? ଆକା ଏସାଙ୍ଗ ବା ସିଲେ । 15 ଇରିଙ୍ଗ୍‌ ୱାନ୍‌ ମୋସାଦିଙ୍ଗ୍‍ ଇର୍ହାମାର୍ହାନ୍‍, ଆମାୱାନି ମୁସ୍‌କୁ ମା ଦୟା ମାନାତ୍‌, ୱାନିଙ୍ଗ୍‍ଁ ମାପ୍‌ ଦୟା କିନାପ୍‍, ମାରି ଆମାୱାନି ମୁସ୍‌କୁ ମା ଦୟା ମାନାତ୍‌, ୱାନିଙ୍ଗ୍‍ଁ ମାପ୍‌ ଦୟା କିନାପ୍‍ । 16 ଆଦେଙ୍ଗ୍‌ ଏନ୍‌ ବଦା କିନାନ୍‍ ମାରି ଏନ୍‌ ପାଣି କିନାନ୍‍, ୱାନି ମାଣାନ୍‌ ଇକା ଆଏତ୍‍, ମାତର୍‌ ମାପୁରୁଦି ଦୟାଦାନ୍‍ ଆନାତ୍‌ । 17 ଦାର୍ମୁସାସ୍ତ୍ର ଇସାବ୍‍ତାନ୍‍ ମାପୁରୁ ମିସର୍‍ତି ରାଜେଙ୍ଗ୍‍ ଇର୍ହାମାର୍ହାନ୍‍, "ନି ମାଣାନ୍‌ ମା ସାକ୍ତି ତର୍‍ତେଙ୍ଗ୍‍ଁ ଇଜି ମାରି ୱିଜୁ ଦୁନିଆଦୁ ମା ମହିମା ତର୍‍ତେଙ୍ଗ୍‍ଁ ଇଜି ମାପ୍‌ ନିଙ୍ଗିଁ ରାଜା କିତାମାନାପ୍‍ ।" 18 ଆଦେଙ୍ଗ୍‌, ମାପୁରୁ ଆମାୱାନିଙ୍ଗ୍‍ଁ ବଦା କିନାନ୍‍, ୱାନିଙ୍ଗ୍‌ ଦୟା କିନାନ୍‍, ମାରି ଆମାୱାନିଙ୍ଗ୍‍ଁ ବଦା କିନାନ୍‍, ୱାନିଙ୍ଗ୍‍ଁ ଆଟ୍‍ୱା ଲୋକ୍‍ କିନାନ୍‍ ।

19 ମି ଲୋଇ ଏନ୍‌ ନାଙ୍ଗିଁ ଇନ୍‌ଡ୍ରେଙ୍ଗ୍‌ ଆଟ୍‍ନାନ୍‍ ? "ଆର୍‍ତିଙ୍ଗ୍‍ଁ ମାପୁରୁ ଏନ୍ଦା ଏଙ୍ଗ୍‍ଁ ଦସି କିନାନ୍‍ ? ଏନ୍‌ ଇନିକା ମାପୁରୁଦି ବଦା ବିରୁଦ୍‍ତାନ୍‍ ଇନିକା କିଦେଙ୍ଗ୍‍ ଆଟ୍‍ନାନ୍‍ ?" 20 ମାତର୍‌ ବନ୍ଧୁ, ମାପୁରୁଦି ମାଟାଦୁ ଡ଼େସି ୱାର୍‍ଗିଦେଙ୍ଗ୍‍ ନିନୁ ଏନ୍‌ ? "ନାଙ୍ଗିଁ ଇୟାୱାଜା ଏନ୍ଦା ରସ୍‍ତି" ଇଜି ସାଟି କୁମାର୍‍ତିଙ୍ଗ୍‍ଁ ୱେନ୍‍ବାଦେଙ୍ଗ୍‍ଁ ଆଟ୍‍ଏତ୍‍ । 21 ସିକ୍‍ଲାଦିଙ୍ଗ୍‍ଁ ନିଜେ ବଦା ଇସାବ୍‍ତାନ୍‍ ବ୍ୟବହାର୍ କିଜି ସାଟି ରସ୍‍ତେଙ୍ଗ୍‍ଁ ଇଜି କୁମାର୍‍ତି ପୁରା ଅଦିକାର୍‌ ମାନାତ୍‌ । ଇକା ସିକ୍‍ଲା ଗୁଡ଼ିଦାନ୍‍ ୱାନ୍‌ ରୁଣ୍ତି ରକମ୍‍ତି ସାଟି ରସ୍‍ତେଙ୍ଗ୍‍ଁ ଆଟ୍‍ନାନ୍‍, ଉଣ୍ତ୍ରି ବିସେସ୍‍ ଦିନ୍‍କାଙ୍ଗ୍‍ଁ ନି ମାରି ଉଣ୍ତ୍ରି ଇସ୍ରି ପାଣିଦୁ ବ୍ୟବହାର୍ ଆଦେଙ୍ଗ୍‍ଁ ଇଜି ।

22 ମାପୁରୁ ବା ଟିକ୍‍ ଆୟାୱାଜା କିତାମାନାନ୍‌ । ୱାନ୍‌ ବଦାକିଜିମାର୍ହାନ୍‍ ୱାନି ରିସା ତର୍‍ତେଙ୍ଗ୍‍ ମାରି ବପୁ ତର୍‍ତେଙ୍ଗ୍‍ । ମାତର୍‌ ଏମେକାର୍‌ ୱାନି ରିସାଦି ଲୋକୁ ଆଜି ନାସ୍ଟୁ ଆନିକାମାର୍ହାତ୍‍, ୱାରି ଉଣ୍ତିଙ୍ଗ୍‍ଁ ମାପୁରୁ ନାଣ୍ତ ସାସ୍‍ଆସ୍‍ସି ଦୟା କିତାନ୍‍ । 23 ମାରି ୱାନ୍‌ ୱାନି ନାଣ୍ତ ଗୌରବ୍‍ ତର୍‍ତେଙ୍ଗ୍‍ଁ ଇଜି ମାଙ୍ଗିଁ ବିସେସ୍‍ ଦୟାଦି ଲୋକ୍‍ ୱାଜା ଆଗ୍‍ଡ଼ିରାନ୍‍ ବାସେକିତା ମାର୍ହାନ୍‍ । 24 ଆୟାଉଣ୍ତିଙ୍ଗ୍‌ ତୋ ୱାନ୍‌ କେବଲ ଜିହୁଦିଲୋକା ମାଣାନ୍‌ ସିଲେ, ମାତର୍‌ ଅଣଜିହୁଦି ମାଣାନ୍‌ ବା ମାଙ୍ଗିଁ କୁକ୍‌ତାମାନାନ୍‌ । 25 ଇୟା ବିସୟ୍‌ତାନ୍‌ ହୋସେୟ ବଇଦୁ ମାପୁରୁ ଇର୍ହାମାନାନ୍‌ :

"ଏମେକାର୍‌ ମା ଲୋକୁ ସିଲେତାର୍‍;

ୱାରିଙ୍ଗ୍‍ଁ ନିଜେଦି ଲୋକୁ ୱାଜା କୁକ୍‍ନାପ୍‍ ।

ଏମେ ଜାତିଦିଙ୍ଗ୍‍ଁ ମାପ୍‌ ଜିବନ୍‍ନୋଏପ୍‌ ମାର୍ହାପ୍‍,

ୱାରିଙ୍ଗ୍ ମା ଲାଡ୍‍ତିକାନ୍‍ ଇଜି କୁକ୍‍ନାପ୍‍ ।

26 ଏମେ ବାଡିଦୁ ୱାରିଙ୍ଗ୍‍ଁ ଇର୍ହାମାର୍ହାପ୍‍, ‘ମିର୍‌ ମା ଲୋକୁ ଆଇଦେର୍‍,’

ଆବେ ୱାର୍‌ ଜିବନ୍‌ମାନି ମାପୁରୁଦି କଡ଼ର୍‍ ଇଜି ଦର୍‍ପୟ୍‍ନାର୍‍ ।"

27 ମାରି ଇସ୍ରାଏଲ୍‌ ବିସୟ୍‍ତାନ୍‍ ଜିସାଇୟ ଇର୍ହାମାନାନ୍‌, "ଜଦିବା ଇସ୍ରାଏଲ୍‍ତିକାର୍‍ ସାମ୍‍ଦୁର୍‍ତି ବାଲି ୱାଜା ଆତିଙ୍ଗ୍‌ବା, ୱାରି ଲୋଇ ଉଣା ଏସ ମାତର୍‌ ରକିୟା ପୟ୍‍ନାର୍‍ । 28 ଇରିଙ୍ଗ୍‍ଁ ପ୍ରବୁ ପୁରା ଦାପ୍ରେ ଦୁନିଆଦୁ ପୁରା ନ୍ୟାୟ୍‍ ବିଚାର୍‍ କିନାନ୍ ।" 29 ଏଣ୍ତେସ୍‌ ଜିସାଇୟ ମାରି ବା ଇର୍ହାମାର୍ହାନ୍‍, "ପେରିମାପୁରୁ ପ୍ରବୁ ମା ଏସ ଲୋକା କୁଡ଼ାଦିୱାରିଙ୍ଗ୍‍ ରକିୟା କିଏନ୍‌ ମାର୍ହାନ୍‍, ମା ଅବସ୍ତା ସଦମ୍‍ ଗମୋରାଦି ଲୋକାୱାଜା ଆତାତ୍‍ମାନ୍ଦି ।"

30 ଆଦେଙ୍ଗ୍‌ ଅଣଜିହୁଦି ଲୋକା ବିସୟ୍‍ତାନ୍‍ ଇକା ଇନ୍‍ଡ୍ରେଙ୍ଗ୍‍ଁ ଆଟ୍‍ନିକା, ୱାର୍‌ ଦାର୍ମୁତିକାର୍‍ ଆଦେଙ୍ଗ୍‍ଁ ସେସ୍ଟା କିଏଜିମାର୍ହାର୍‍, ମାତର୍‌ ୱାରି ବିସ୍‍ବାସ୍‍ ଉଣ୍ତିଙ୍ଗ୍‍ଁ ଦାର୍ମୁତିକାର୍‍ ଇଜି ୱେଙ୍ଗିଁତାମାନାର୍‍ । 31 ମାତର୍‌ ଇସ୍ରାଏଲ୍‌ ଦାର୍ମୁଦି ଲୋକୁ ନିୟମ୍‍ତାନ୍‍ ଦାର୍ମୁତିକାର୍‍ ଆଦେଙ୍ଗ୍‍ଁ ଇଜି ସେସ୍ଟା କିଜି ଆରାତା ମାନାର୍‌ । 32 ଏନ୍ଦା ସିଲେ ? ୱାର୍‌ ନିଜେଦି ସେସ୍ଟାଦି ମୁସ୍‌କୁ ଆସା କିଜିମାର୍ହାର୍‍, ବିସ୍‍ବାସ୍‍ ମୁସ୍‌କୁ ସିଲେ । ଆୟାଉଣ୍ତିଙ୍ଗ୍‌ ୱାର୍‌ ବାଦା ସିଜିମାନି କାଲୁଦୁ ଡୁକାୟ୍‌ଆଜି ତାକାତାର୍‍ । 33 ଏଣ୍ତେସ୍‌ ସାସ୍ତ୍ରଦୁ ରାସାତାମାନାତ୍‌ :

"ସୁଡ଼୍‍ଦୁ, ନାନୁ ସିୟୋନତୁ ଉନ୍‍ଣ୍ତ୍ରି କାଲୁ ମାରି ଉନ୍‌ଡ୍ରି ପେରିକାଲୁ ତିଆର୍‌ କିତାମାନାପ୍‌ ।

ଆବେନୁ ଡୁକାୟ୍‌ ଆଜି ଲୋକୁ ତାକାୟ୍‌ ଆନାର୍‌,

ମାତର୍‌ ଏନ୍‌ ୱାନିମାନୁ ବିସ୍‍ବାସ୍‍ କିନାନ୍‍, ୱାନ୍‌ ନିରାସ୍‍ ଆଏନ୍‍ ।"