1 ମାରିବା ଏ ନା ଦାସ୍‌ ଜାକୁବ ମାରି ନା ଆସ୍‌କିତି ମାନି ଇସ୍ରାଏଲ, ଇଲେଇ ୱେନ୍‌ଆ; 2 ଆମାକାନ୍‌ ନିଙ୍ଗିଁ ତିଆର୍‌ କିତାନ୍‌ ମାରି ପଟାଦାନ୍‌ ନିଙ୍ଗିଁ ତିଆର୍‌ କିତାନ୍‌, ଆମାକାନ୍‌ ନିଙ୍ଗିଁ ସାକା କିନାନ୍‌, ଆୟା ପ୍ରବୁ ଇୟା ମାଟା ଇନାନ୍‌; "ଏ ନା ଦାସ୍‌ ଜାକୁବ, ଏ ନା ଆସ୍‌କିତି ମାନି ଜିସୁରୁଣ*, ତିଲାମା । 3 ଇର୍ରିଙ୍ଗ୍‌ ନାନ୍‌ ଏର୍‌କି ଆତି ଲୋକା ମୁସୁକୁ ଏରୁ ମାରି ୱାର୍‌ତି ବୁମି ମୁସୁକୁ ଜଲାଦି ଏରୁ ୱାକ୍‌ନା; ନାନ୍‌ ମି କୁଟୁମ୍‌ ମୁସୁକୁ ନିଜେଦି ଆତ୍ମା ମାରି ମି ମାରିନ୍‌କା ମୁସୁକୁ ନିଜେଦି ଆର୍ସିବାଦ୍‌ ସିନା; 4 ଆବେଟ୍‌ ୱାର୍‌ ଜଲାଦି ଏରୁ ଲାକ୍‌ତୁରି ବାଇଶି ଦରୁଦି ମାରାନ୍‌ ୱାଜା ଲାଟାଦି ଲୋଇରାନ୍‌ ନେର୍‌ନାର୍‌ । 5 ଅରେନ୍‌ ଇନାନ୍‌, ନାନୁ ପ୍ରବୁଦି ଲୋକୁ; ଆଇକାନ୍‌ ଜାକୁବ ଦର୍‌ତାନ୍‌ ନିଜେଦିଙ୍ଗ୍‌ ୱିଙ୍ଗିଁସି କିନାନ୍‌; ମାରି, ଅରେନ୍‌ ପ୍ରବୁଦି ଉଦେସ୍‌ତାନ୍‌ ନିଜେଦି କିୟୁଦାନ୍‌ ସନ୍ତକ୍‌ କିନାନ୍‌ ମାରି ଇସ୍ରାଏଲତି କୁଡ଼ା ଦର୍‌ତାନ୍‌ ନିଜେଦିଙ୍ଗ୍‌ ୱେଙ୍ଗିସ୍‌ନାନ୍‌ ।" 6 ପ୍ରବୁ, ଇସ୍ରାଏଲତି ରାଜା ମାରି ୱାନିଙ୍ଗ୍‌ ମୁକୁଡ଼ାକିତି ପେରିସାକ୍ତିଦି ପ୍ରବୁ ଇୟା ମାଟା ଇନାନ୍‌; "ନାନୁ ପାର୍‌ତୁମ୍‌ ମାରି ନାନୁ ସାରାସାରି, ମାରି ନାଙ୍ଗିଁ ଡ଼ିସ୍‌ତିଙ୍ଗ୍‌ ମାପୁରୁ ମାରି ଏନ୍‌ ସିଲେନ୍‌ । 7 ମାପ୍‌ ଆୟା ଆଗ୍‌ଡ଼ିରି ଲୋକାଙ୍ଗ୍‌ ତିୟାର୍‌କିତି ସମୟ୍‌ତାନ୍‌ ନା ୱାଜା ଏନ୍‌ କୁକୁନାନ୍‌ ମାରି ଆକା ୱେର୍‌ନାନ୍‌ ମାରି ଦାଡ଼ିଦାନ୍‌ ମା ଉଣ୍ତିଙ୍ଗ୍‌ ଆକା ସଜେ କିନାନ୍‌ ? ମାରି, ଆମାକା ଆମାକା ଲାକ୍‌ତୁ ମାରି ଆମାକା ଆମାକା ଗଟାନାତ୍‌, ଆକା ୱାର୍‌ ୱେର୍ହିର୍‌ । 8 ମିରୁ ତିରିଗ୍‌ଜି ତିଲାମାଟ୍‌; ନାନୁ ଇନିକା ଆଗ୍‌ଡ଼ିରାନ୍‌ ମି ଲାକ୍‌ତୁ ୱେର୍‌ଏ ମାରି ମିଙ୍ଗିଁ ଆକା ଇନ୍‌ଏ ? ମିର୍‌ ନା ସାକି । ନାଙ୍ଗିଁ ଡ଼ିସ୍‌ତିଙ୍ଗ୍‌ ମାରି ଆମା ମାପୁରୁ ମାନାନ୍‌ ? ଆଇ ସାକ୍ତିଦି ଦିୟାମ୍‌ ସିଲେତ୍‌; ନାନୁ ଏଙ୍ଗ୍‌ ନେସ୍‌ଏ ।"

9 ଆମାକାର୍‌ ସିକିଲା ବମେଙ୍ଗ୍‌ ତିୟାର୍‌ କିନାର୍‌, ୱାର୍‌ ୱିଜେରେ ସେଇକାର୍‌ ମାରି ୱାରି ମୋନ୍‌ତି ବିସୟ୍‌କୁ ନେଗିକା ଆଏତ୍‌; ୱାର୍‌ ଏଣ୍ଡେସ୍‌ଗି ସେମାର୍‌ ଆନାର୍‌, ଇୟାଉଣ୍ଡିଙ୍ଗ୍‌ ୱାରି ନିଜେ ସାକି ଲୋକୁ ସୁଡ଼ୁଏର୍‌, ଗି ନେସ୍‌ଏର୍‌ । 10 ଆମା ବିସୟ୍‌ତାନ୍‌ ଲାବ୍‌ ସିଲେତ୍‌, ଇୟାୱାଜା ଦେୟାମ୍‌ ଏନ୍‌ ତିୟାର୍‌ କିତାମାନାନ୍‌, ମାରି ଆମାକାନ୍‌ ସଞ୍ଚ୍‌ତାନ୍‌ ବମେଙ୍ଗ୍‌ ତିୟାର୍‌ କିଜିନାନ୍‌ ? 11 ସୁଡ଼ୁଦୁ, ୱାନି ସାଙ୍ଗ୍‌କୁ ୱିଜେରେ ସେମାର୍‌ ଆନାର୍‌; ମାରି, ତିୟାର୍‌ କିନିକାର୍‌ ଲୋକୁ ମାତର୍‌; ୱାର୍‌ ୱିଜେରେ ଉଣ୍ତ୍ରେମାନୁ ଆଜି ୱାର୍‌ ନିଲିର୍‌; ୱାର୍‌ ତିରିଗ୍‌ନାର୍‌, ୱାର୍‌ ଅର୍‌ସେ ସେମାର୍‌ ଆନାର୍‌ ।

12 କାମାର୍‌ଏନ୍‌ ଲୁୱାଦିଙ୍ଗ୍‌ ସାଜୁ ତିଆର୍‌ କିଜି କାସ୍‌ସିମାନି ସିସୁ ଡ଼ିପ୍‌କାଣାନ୍‌ ପାଣି କିନାନ୍‌ ମାରି ମୁଟ୍‌ଲାଦାନ୍‌ ଆକା କତ୍‌ସି ତିଆର୍‌ କିଜି ନିଜେଦି ସାକ୍ତିଦି ମାଣାନ୍‌ କିୟୁଦାନ୍‌ ଆକା ତିଆର୍‌ କିନାନ୍‌; ହୁଁ, ୱାନ୍‌ ବାଙ୍ଗା ଆନାନ୍‌ ମାରି ୱାନି ସାକ୍ତି ଉଣା ଆନାତ୍‌, ୱାନ୍‌ ଏରୁ ଉଣୁଏଣ୍ଡା ୱାନ୍ଦ୍‌ନାନ୍‌ ।

13 କର୍‌ତିୟାର୍‌ ନୁଲୁତାନ୍‌ ଗାର୍‌ ରେନାନ୍‌; ୱାନ୍‌ କାଡ଼ାଦାନ୍‌ ସିନ୍‌ କିନାନ୍‌, ୱାନ୍‌ ସିତର୍‌ ଡାକ୍‌ସି ମାର୍‌ସି ସିନା କିଜି ଇସାବ୍‌ କିନି ସାଜୁଦାନ୍‌ ସିନ୍‌ କିନାନ୍‌ ମାରି ଇଲୁଦୁ ବାସା କିନି ଉଣ୍ତିଙ୍ଗ୍‌ ଲୋକାଦି ବମା ମାରି ସୁନ୍ଦରତି ଇସାବ୍‌ଦାନ୍‌ ଆକା ତିଆର୍‌ କିନାନ୍‌ । 14 ୱାନ୍‌ ନିଜେଦି ଉଣ୍ତିଙ୍ଗ୍‌ ଏରସ ମାରାନ୍‌ କାତ୍‌ନାନ୍‌, ତର୍ସା ମାରି ଅଲନ୍‌ ମାରାନ୍‌ ଅନାନ୍‌, ୱାନ୍‌ ବନୁଦି ମାରାକା ମାଣାନ୍‌ ଉନ୍‌ଡ୍ରି ମାରାନୁ ନିଜେଦି ଉଣ୍ତିଙ୍ଗ୍‌ ଡାଟ୍‌ କିନାନ୍‌; ୱାନ୍‌ ଦେବଦାରୁ ମାରାକୁ ଉର୍‌ନାନ୍‌ ମାରି ପିରୁ ଆକା ପିରିସ୍‌ନାତ୍‌ । 15 ଇୟାୱେନ୍‌କା ଆକା ଲୋକାଦି ସିସୁକାସିସ୍‌ନି ୱେର୍‌ଗୁ ଆନାତ୍‌; ୱାନ୍‌ ଆବେଣାନ୍‌ କାଣ୍ଡେକ୍‌ ସିସୁ ଅନାନ୍‌; ମାରି, ୱାନ୍‌ ଆକା କାସିସ୍‌ସି କାଦି ୱେପିସ୍‌ କିନାନ୍‌; ମାରି, ଉନ୍‌ଡ୍ରି ଦେୟାମ୍‌ କିଜି ତାନିଙ୍ଗ୍‌ ପୁଜା କିନାନ୍‌; ୱାନ୍‌ ଉନ୍‌ଡ୍ରି ବମା ତିଆର୍‌ କିଜି ତାନି ଆଗ୍‌ଡ଼ି ମାଡ଼ିସ୍‌କିନାନ୍‌ । 16 ୱାନ୍‌ ଆବେଣାନ୍‌ ଏସ ୱେର୍‌କୁ ସିସୁଦୁ ଆଡ଼ାକ୍‌ନାନ୍‌; ଆଇ ତରିନ୍‌ ୱାନ୍‌ କାଣ୍ଡା ୱେପିସ୍‌ କିଜି ତିନାନ୍‌ ମାରି ସାୱି କାଣ୍ଡା ୱାର୍‌ଜି ପଟା ପାଜିସ୍‌ନାନ୍‌, ମାରି ୱାନ୍‌ ସିସୁ କାଇଜି ଇନାନ୍‌, ଆୟ୍‌, ନାନ୍‌ ଉସୁମ୍‌ ଆତା, ନାନ୍‌ ସିସୁ ସୁଡ଼ୁତା । 17 ମାରି, ୱାନ୍‌ ଆବେଣି ତେବାତିମାନି ମାଣାନ୍‌ ଉନ୍‌ଡ୍ରି ଦେୟାମ୍‌, ନିଜେଦି ୱାଜା ବମା ତିଆର୍‌ କିନାନ୍‌; ୱାନ୍‌ ତାନି ଆଗ୍‌ଡ଼ି ମାଡ଼ିସ୍‌ କିଜି ପୁଜା କିନାନ୍‌ ମାରି ତାନି ଲାକ୍‌ତୁ ପାର୍‌ତନା କିଜି ଇନାନ୍‌, "ନାଙ୍ଗି ରକିଆ କିଆ, ନିନ୍‌ ନା ଦେୟାମ୍‌ ।"

18 ୱାର୍‌ ନେସ୍‌ଏର୍‌, ଗି ବିସାର୍‌ କିଏର୍‌, ଇରିଙ୍ଗ୍‌ ୱାର୍‌ ଏଣ୍ତେସ୍‌ ସୁଡ଼ୁଦେଙ୍ଗ୍‌ ଆଟ୍‌ଏର୍‌, ଇୟା ଉଣ୍ତିଙ୍ଗ୍‌ ୱାରି କାଣୁକୁ ମାରି ୱାର୍‌ ଏଣ୍ତେସ୍‌ ବୁଜାଦେଙ୍ଗ୍‌ ଆଟ୍‌ଏର୍‌, ଇୟାଉଣ୍ଡିଙ୍ଗ୍‌ ୱାରି ମନ୍‌ ୱାନ୍‌ କେରେପ୍‌ତାମାନାନ୍‌ । 19 ଏନ୍‌ବା ଅଡ଼୍‌ବିଏନ୍‌, ମାରିବା ଇକା ଇଣ୍ଡ୍ରେଙ୍ଗ୍‌ ଏଙ୍ଗ୍‌ ବୁଦି ସିଲେତ୍‌, "ଆବେଣି କାଣ୍ଡେକ୍‌ ବାଗ୍‌ ଅସି ମାପ୍‌ ସିସୁଦୁ ଆଡ଼ାକ୍‌ନାପ୍‌ ମାରି ଆବେଣି ୱେତି; ଡ଼ିବ୍‌କୁ ଅସି ରୁଟି ୱେପିସ୍‌ତା କିତାମାନାପ୍‌, ମାରି କାଣ୍ଡା ୱେପିସ୍‌ କିଜି ତିର୍ହା ମାନାପ୍‌, ଆବେଣି ଏଜିତିକା ଅସି ଗି କାଡ଼ିନି ଜିନିସ୍‌ ତିୟାର୍‌ କିନାଟ୍‌ ? ମାଡ୍‌ ଏସ ୱେର୍‌କା ଆଗ୍‌ଡ଼ି ମାଡ଼ିସ୍‌ କିନାଟ୍‌ ? 20 ୱାନ୍‌ ନିରୁ ତିନାନ୍‌; ୱାନ୍‌ ଏଣ୍ଡେସ୍‌ ନିଜେଦି ଜିବନ୍‌ ଜିପିସ୍‌ କିଦେଙ୍ଗ୍‌ ଆଟ୍‌ଏନ୍‌, ମାରିବା ନା ଉଣେରି କିୟୁଦୁ ଇନିକା ମିସ୍‌ ସିଲେତ୍‌, ଇକା ଇଣ୍ଡ୍ରେଙ୍ଗ୍‌ ଆଟ୍‌ଏନ୍‌, ଇୟାଉଣ୍ଡିଙ୍ଗ୍‌ ବେମ୍‌ରି କିନି ମନ୍‌ ୱାନିଙ୍ଗ୍‌ ଆଇ ସାରିଦୁ ଅତାମାନାତ୍‌ ।"

21 ଏ ଯାକୁବ, ଏ ଇସ୍ରାଏଲ, ମିରୁ ଇୟାୱିଜୁ ମାଟା ଏତ୍‌ କିଦୁ, ଇର୍ରିଙ୍ଗ୍‌ ନିନ୍‌ ନା ଦାସ୍‌; ନାନୁ ନିଙ୍ଗିଁ ତିୟାର୍‌ କିତାମାନା; ନିନ୍‌ ନା ଦାସ୍‌; ଏ ଇସ୍ରାଏଲ, ନିନୁ ନା ମାଣାନ୍‌ ୱେର୍‌ଏ ଆମା । 22 ନାନୁ ମି ଅଦାର୍ମୁ ୱିଜୁ ନାଣ୍ତ ଦୁରିଦି ୱାଜା ମାରି ମି ପାପ୍‌ ୱିଜୁ ବାଦଡ଼୍‌ ୱାଜା ଗୁସା କିତାମାନା; ନା ଲାକ୍‌ତୁ ଡ଼େସି ରାଦୁ; ଇର୍ରିଙ୍ଗ୍‌ ନାନୁ ମିଙ୍ଗିଁ ମୁକୁଡ଼ା କିତାମାନା । 23 ଏ ବାଦଡ଼୍‌ୱିଜୁ, ପାଟା ପାର୍‌ଦୁ, ଇର୍ରିଙ୍ଗ୍‌ ପ୍ରବୁ ଇକା ପୁରା କିତାମାନାନ୍‌; ଏ ପୃଥିବିଦି ଆଡ୍‌ଗିରି ବାଡିୱିଜୁ, ୱେଡ଼ିକା କିଦୁ; ଏ ଗରକୁ, ଏ ବନୁ ମାରି ଆବେଣି ୱିଜୁ ମାରାକୁ, ମିରୁ ନାଣ୍ଡ୍‌ ଆଉଲିଦାନ୍‌ ପାର୍‌ଦୁ; ଇର୍ରିଙ୍ଗ୍‌ ପ୍ରବୁ ଜାକୁବଙ୍ଗ୍‌ ମୁକୁଡ଼ା କିତାମାନାନ୍‌ ମାରି ଇସ୍ରାଏଲଦୁ ନିଜେଦିଙ୍ଗ୍‌ ଗୌରବ୍‌ କିନାନ୍‌ । 24 ମି ମୁକୁଡ଼ାକିନି ପ୍ରବୁ, ପଟାଦାନ୍‌ ଆମାକାନ୍‌ ମିଙ୍ଗିଁ ତିୟାର୍‌ କିତାନ୍‌, ୱାନ୍‌ ଇକା ଇୟାୱାଜା ଇନାନ୍‌; "ନାନୁ ପ୍ରବୁ, ନାନୁ ୱିଜୁ ପାଣି କିନା ନାନୁ ଅରେନ୍‌ନେ ବାଦଡ଼୍‌ ସାର୍‌ପାନା; ମାପ୍‌ ପୃଥିବିଦିଙ୍ଗ୍‌ ସାଲାକିଜିନା; ମା ସାଙ୍ଗ୍‌ ଏନ୍‌ ? 25 ନାନୁ ମିସ୍‌ ଇନି ଲୋକାଙ୍ଗ୍‌ ୱିଜୁ ମାଟା ସେଏଣ୍ଡ୍‌ କିନା ମାରି ଗୁଣିଆରିଙ୍ଗ୍‌ ନାସ୍ଟୁ କିନିକା; ନାନୁ ବୁଦିଦିଲୋକାଙ୍ଗ୍‌ ୱେନ୍‌କା କିନା ମାରି ୱାରି ବୁଦି ମୁର୍କ କିନା; 26 ନାନୁ ନିଜେଦି ଦାସ୍‌ଦି ବାକ୍ୟ ଡାଟ୍‌ କିନା ମାରି ନିଜେଦି କାବୁରୁଅନି ଦୁତ୍‌କା ମାଟା ସତ୍‌ କିନା; ନାନୁ ଜିରୁସାଲମ ବିସୟ୍‌ତାନ୍‌ ଇନା, ଆକା ବାସାନି ବାଡି ୱାଜା ଆନାତ୍‌ ମାରି ଜିହୁଦାଦି ଗାଡ଼୍‌କା ବିସୟ୍‌ତାନ୍‌ ଇନା, ଆକା ୱିଜୁ ପୁନା ତିୟାର୍‌ ଆନାତ୍‌, ମାରି ମାପ୍‌ ଆବେଣି ରୁକ୍‌ତି ବାଡ଼ି ୱିଜୁ ମାରିଡ଼େସି ତିଆର୍‌ କିନା ; 27 ନାନୁ ନାଣ୍ଡ୍‌ ଏରୁଦିଙ୍ଗ୍‌ ଇନା, ୱାର୍‌ଆ; ମାରି ନାନୁ ମି ଗାଡେଙ୍ଗ୍‌ ୱିଜୁ ୱାରିସ୍‌ କିନିକା; 28 ନାନୁ କୋରସ୍‌ ବିସୟ୍‌ତାନ୍‌ ୱେର୍‌ସିନା, ୱାନ୍‌ ମା ମାନ୍ଦାଦି ଗଡ଼ୁଏନ୍‌ ମାରି ମା ବଦା ପୁରା କିନାନ୍‌; ୱାନ୍‌ ଜିରୁସାଲମ ବିସୟ୍‌ତାନ୍‌ ୱେର୍‌ନାନ୍‌, ଆକା ପୁନା ତିୟାର୍‌ ଆନାତ୍‌ ମାରି ମନ୍ଦିର୍‌ତିଙ୍ଗ୍‌ ଇନାନ୍‌, ମି କୁନାଦି ତିୟାର୍‌ ଆନାତ୍‌ ।"