1 ସୋରତି ଉଣ୍ତିଙ୍ଗ୍‌ ବାବବାଣି ମାଟା । ଏ ତର୍ସିସ୍‌ତି ଜାହାଜ୍‌କୁ ୱିଜୁ, ମିରୁ ଆଡ଼୍‌ବାଦୁ; ଇରିଙ୍ଗ୍‌ ଆକା ଇୟାୱାଜା ସିନ୍‌ସତର ଆତାତ୍‌ ଜେ, ଆବେନୁ ଏମେବା ଇଲୁ ସିଲେତ୍‌, ମାରି ସନ୍‌ଡ୍ରେ ସାରି ବା ସିଲେତ୍‌; କିତ୍ତିମ୍‌ ଦେସ୍‌ତାନ୍‌ ଇକା ୱାରି ଉଣ୍ତିଙ୍ଗ୍‌ ତରାତାତ୍‌ । 2 ସାମ୍‌ଦୁର୍‌ ନାଣିମିମାନି ଲୋକୁ, ମିର୍‌ ଆଲ୍‌ଜି ମାନ୍‌ଡ୍ରୁ; ସାମ୍‌ଦୁର୍‌ ନାସି ସିଦୋନତି ବେପାର୍‌ କିନିକାର୍‌ ମି ଦେସ୍‌ତୁ ପୁରାବର୍ତି ଆତାର୍‌ । 3 ମାରି, ନାଣ୍ଡ୍‌ ଏରୁଦୁ ସିୟରଦି ୱିତୁ ମାରି ନିଡ଼ି ଗାଡାଦି ପାସି ୱାନି ଲାବ୍‌ ମାର୍ହାତ୍‌; ମାରି, ଆକା ନାଣ୍ତ ଦେସ୍‌ତି ଲୋକା ବେପାର୍‌ ବାଡି ୱାଜା ମାର୍ହାତ୍‌ ।

4 ଏ ସିଦୋନ, ନିନୁ ସେମାର୍‌ ଆଆ, ଇରିଙ୍ଗ୍‌ ସାମ୍‌ଦୁର୍‌, ସାମ୍‌ଦୁର୍‌ତି ଡାଟ୍‌ତି ନିର୍‌ଇ ମୁଣ୍ତା ଇୟା ମାଟା ଇର୍ହାମାନାତ୍‌, "ମାଡୁ କଡ଼ ଜନମ୍‌ କିନି ନୋପି ନେସ୍‌ଇକା, ଜନମ୍‌ କିନି କାସ୍ଟୁ ନେସ୍‌ଇକା ମାରିବା ମୁରୁଲି କଡ଼ରିଙ୍ଗ୍‌ ଜାତୁନ୍‍ କିଏପ୍‌, ମାରି ରିପା ଆଇଲିକାଙ୍ଗ୍‌ ପୋସା କିଏପ୍‌ ।"

5 ଇୟା ମାଟା ମିସରଦୁ ଇତାତ୍‌, ଲୋକୁ ସୋରତି ବିସୟ୍‌ ଉଣ୍ତିଙ୍ଗ୍‌ ମାଟାଦାନ୍‌ ବେସି ଦାନ୍ଦା ଆନାର୍‌ ।

6 ମିରୁ ସାମ୍‌ଦୁର୍‌ ନାଜି ତର୍ସିସ୍‌ତୁ ସାଣ୍ଡ୍ରୁ; ଏ ସାମ୍‌ଦୁର୍‌ ନାଣିମିମାନି ଲୋକୁ, ଆଡ଼୍‌ବାଦୁ । 7 ଇକା ଇନିକା ମି ୱେଡ଼ିକା କିନି ଗାଡ଼୍‌ ? ଇକା ପୁର୍ବେ କାଡ଼ାଦୁ ପାଡ଼୍‌ଇକା ମାର୍ହାତ୍‌; ୱେନିଙ୍ଗ୍‌ ଆକ ଦେସ୍‌ତୁ ବାସାକିନି ଉଣ୍ତିଙ୍ଗ୍‌ ୱେନିଙ୍ଗ୍‌ ଅତାନ୍‌ । 8 ମୁକୁଟ୍‌ ବାଟା କିନିକାର୍‌ ସୋରଦି ବେପାର୍‌ କିନି ଲୋକୁ ୱାଜା, ୱାନି ୱିଜୁ ପେରିଲୋକୁ ଦୁନିଆଦୁ ୱିଙ୍ଗିଁତି ଲୋକୁ; ୱାନି ବିରୁଦ୍‌ଦାନ୍‌ ଇୟା ମାଟା ଏନ୍‌ କିତାମାନାନ୍‌ ? 9 ପେରିସାକ୍ତିଦି ସଦାପ୍ରବୁ ୱାନି ମାନୁମାନି ଆକାର୍‌ତିଙ୍ଗ୍‌ ସାନ୍ତି କିନିକା ମାରି ପୃଥିବିଦି ୱିଙ୍ଗିଁତିମାନି ୱିଜୁ ଲୋକାଙ୍ଗ୍‌ ସେମାର୍‌ କିନି ଉଣ୍ତିଙ୍ଗ୍‌ ଇୟା ଉପାୟ୍‌ କିତା ମାନାର୍‌ ।

10 ଏ ତର୍ସିସ୍‌ତୁ ବାସାକିତି ମାନି ଲୋକୁ ସୋଲ୍‌ସି ସାସ୍‌ କିଦୁ ! ମିଙ୍ଗିଁ ମାରି ରକିୟା କିଦେଙ୍ଗ୍‌ ଏନ୍‌ ସିଲେନ୍‌ । 11 ପ୍ରବୁ ସାମ୍‌ଦୁର୍‌ ମୁସୁକୁ ନିଜେଦି କିୟୁ ପେର୍‌ତା ମାନାନ୍‌, ୱାନ୍‌ ରାଜିଙ୍ଗ୍‌ ୱିଜୁ ଦୁକ୍‌ତା ମାନାନ୍‌; ସଦାପ୍ରବୁ କିଣାନଦି ଡାଟ୍‌ଦି ନିର୍‌ଇ ମୁଣ୍ତେଙ୍ଗ୍‌ ୱିଜୁ ନାଷ୍ଟୁ କିନି ଉଣ୍ତିଙ୍ଗ୍‌ ୱାନି ବିରୁଦ୍‌ତାନ୍‌ ଉପାୟ୍‌ କିତାମାନାନ୍‌ । 12 ମାରି, ୱାନ୍‌ ଇର୍ହାନ୍‌, "ଏ ସିଦୋନତି ନାସ୍ଟୁକିତି ମାନି ରିପା ଆଇଲିକ୍‌, ନିନ୍‌ ମାରି ୱେଡ଼ିକା କିମା, ନିଙ୍ଗିଦୁ, ସାମ୍‌ଦୁର୍‌ ନାଜି କିତ୍ତିମତୁ ସାଣ୍ତ୍ରୁ; ଆବେନୁ ବା ମିର୍ ତେବାଦେଙ୍ଗ୍‌ ଆଟ୍‌ଇଦେର୍‌ ।"

13 କଲ୍‌ଦିୟରି ଦେସ୍‌ତିଙ୍ଗ୍‌ ସୁଡ଼ୁଦୁ; ଇୟା ଲୋକୁ ମାରି ସିଲେର୍‌; ବନୁଦି ଜାତୁଙ୍ଗାଁ ଉଣ୍ତିଙ୍ଗ୍‌ ଅସୁରିୟ ଆକା ତିୟାର୍‌ କିତାମାନାର୍‌; ୱାର୍‌ ନିର୍‌ଇ ମୁଣ୍ତେଙ୍ଗ୍‌ କିଜି ଆବେଣି ପେରି ଇଲୁକୁ ୱିଜୁ ନାସ୍ଟୁ କିତାର୍‌; ୱାନ୍‌ ଆକା ଗଡାଦିଙ୍ଗ୍‌ ଗୁଣ୍ତୁଗୁଣ୍ତା କିତାନ୍‌ ।

14 ଏ ତର୍ସିସ୍‌ଦି ଜାହାଜ୍‌କୁ ୱିଜୁ, ଆଡ଼ାବାଦୁ, ଇର୍ରିଙ୍ଗ୍‌ ମି ନିର୍‌ଇ ମୁଣ୍ତେଙ୍ଗ୍‌ ରୁକ୍‌ତା ମାନାନ୍‌ ।

15 ଆୟା ନାଣ୍ତିଙ୍ଗ୍‌ ଇୟାୱାଜା ଗୋଟାନାତ୍‌ ଜେ, ଅରେନ୍‌ ରାଜାଦି ଅଦିକାର୍‌ଦି ବେଡ଼ା ଇସାବ୍‌ଦାନ୍‌ ସୋର ସତୁରି ବାର୍ସେକ୍‌ ସାନ୍ଦି ବାଣାନାର୍‌; ସତୁରି ବାର୍ସେକ୍‌ ୱିଜିତି ୱେନ୍‌କା, ସୋର ପାଟାଦାନ୍‌ ଦାରିପାଣି ୱାଜା ଗୋଟାନାତ୍‌ ।

16 ଏ ଦାରିପାଣି କିନି ଲୋକ୍‌, ଟଇଲା ଅସି ଗାଡ଼୍‌ତୁ ବୁଲାଦୁ;

ମିରୁ ଏଣ୍ଡେସ୍‌ ନେଗି ସାରିଦୁ ୱାନିଦେର୍‌,

ଇୟାଉଣ୍ଡିଙ୍ଗ୍‌ ନେଗି ସର୍‌ଦାନ୍‌ ଏସ୍‌ତୁ,

ନାଣ୍ଡ୍‌ ପାଟେଙ୍ଗ୍‌ ପାର୍‌ଦୁ ।

17 ମାରିବା, ସତୁରି ବାର୍ସେକ୍‌ ୱିଜିତି ୱେନ୍‌କା ସଦାପ୍ରବୁ ସୋରତି ୱିଜୁ ସୁଡ଼ୁନାନ୍‌, ଆଦେଙ୍ଗ୍‌ ୱାନ୍‌ ନିଜେଦି ଡଡି ପାଣିଦୁ ଡ଼େସି ୱାନାନ୍‌, ମାରି, ବୁମିଦି ୱିଜୁ ପୃଥିବିଦି ୱିଜୁ ରାଜିଙ୍ଗା ୱାଲେ ଦାରିପାଣି କିନାତ୍ । 18 ମାରି, ୱାନି ବେପାର୍‌ ମାରି ବାଡ଼ା ସଦାପ୍ରବୁଦି ଉଦେସ୍‌ତାନ୍‌ ପବିତ୍ର ଆନାତ୍‌; ଆକା ଗୁଦାମ୍‌ ଇଣ୍ଡ୍ର ଇଡାଏତ୍‌ କି ଉଣ୍ଡା କିଆଇ ଆଏତ୍‌; ଇରିଙ୍ଗ୍‌ ଆମାକାର୍‌ ସଦାପ୍ରବୁଦି ମାନୁ ବାସା କିନାର୍‌, ୱାରି ନାଣ୍ତ ପାସି ମାରି ୱିଜୁଦିନ୍‌ତି ଆଙ୍ଗିଁପାସିଆ ଉଣ୍ତିଙ୍ଗ୍‌ ୱାନି ବେପାର୍‌ ଆନାତ୍‌ ।