1 ଏ ସାମ୍‌ଦୁର୍‌ତି ନାଣିମି ମାନି ଦେସ୍‌କୁ ୱିଜୁ, ନା ମାଟା ୱେଣ୍ଡ୍ରୁ; ଏ ଆକଣି କୁଡ଼ାଦି ଲୋକୁ ୱିଜୁ, ମନ୍‌ସିଦୁ; ନାନୁ ୟାୟା ପଟାଦୁ ତେବାତି ୱାଲେରାନ୍‌ ପ୍ରବୁ ନାଙ୍ଗି କୁକୁତା ମାନାନ୍‌; ନାନୁ ୟାୟାଦି ପଟାଦାନ୍‌ ଜନମ୍‌ ଆଇ ଆଗ୍‌ଡ଼ିନେ ୱାନ୍‌ ନା ଦରୁ ରାସ୍‌ତା ମାନାନ୍‌;

2 ମାରି, ୱାନ୍‌ ନା ମୋକମ୍‌ ଦାରାଦି କାଣ୍ତା ୱାଜା କିତାମାନାନ୍‌, ନିଜେଦି କିୟୁଦି ନିଡ଼ାଦାନ୍‌ ୱାନ୍‌ ନାଙ୍ଗି ମାରାକ୍‌ତା ମାନାନ୍‌ ମାରି ୱାନ୍‌ ନାଙ୍ଗି ଦନୁଦି ତିର୍‌ ୱାଜା କିଜି ନିଜେଦି ଦନୁତିର୍‌କୁ ଇଡ୍‌ନି ନାଡ଼ା ମାରାକ୍‌ସି ଇଟ୍‌ତାମାନାନ୍‌; 3 ମାରି, ୱାନ୍‌ ନାଙ୍ଗି ଇର୍ହାନ୍‌, "ନିନ୍‌ ମା ଦାସ୍‌; ନିନ୍‌ ଇସ୍ରାଏଲ, ନି ମାଣାନ୍‌ ମାପ୍‌ ଗୌରବ୍‌ ଆନାପ୍‌ ।" 4 ମାତର୍‌ ନାନ୍‌ ଇର୍ହା, ନାନ୍‌ ସେଡିନେ ପାଣି କିତାମାନା, ନା ବପୁ ଆରେନେ ବେବ୍‌ଆର୍‌ କିତାମାନା; ଇର୍ରିଙ୍ଗ୍‌ ସତ୍‌ନେ ନା ବିସାର୍‌ ପ୍ରବୁଦି ଲାକ୍‌ତୁ ମାରି ନା କାର୍ମୁଦି ପଲ୍‌ ନା ମାପୁରୁଦିମାନୁ ମାନାତ୍‌ । 5 ମାରି, ନାଙ୍ଗି ୱାନି ସେବକ ଆନି ଉଣ୍ତିଙ୍ଗ୍‌ ମାରି ଜାକୁବଙ୍ଗ୍‌ ୱାନି ଲାକ୍‌ତୁ ତାନି ଉଣ୍ତିଙ୍ଗ୍‌ ମାରି ଇସ୍ରାଏଲ ୱାନି ଲାକ୍‌ତୁ ବାସେକିନି ଉଣ୍ତିଙ୍ଗ୍‌ ଏନ୍‌ ନାଙ୍ଗି ଗାର୍ବୁଦାନ୍‌ ତିଆର୍‌ କିତାନ୍‌, ଆୟା ପ୍ରବୁ ଇଲେଇ ଇଜିନାନ୍‌; ଇରିଙ୍ଗ୍‌ ନାନୁ ପ୍ରବୁଦି ଆଗ୍‌ଡ଼ି ଲାଡ୍‌ତିକାନ୍‌ ମାରି ନା ମାପୁରୁ ନା ବପୁ ୱାଜା ଆତାମାନାନ୍‌;

6 ଆଦେଙ୍ଗ୍‌ ୱାନ୍‌ ଇନାନ୍‌,

"ନିନ୍‌ ଜେ ଜାକୁବଦି କୁଟୁମ୍‌ତିଙ୍ଗ୍‌ ନିକ୍‌ନି ଉଣ୍ତିଙ୍ଗ୍‌

ମାରି ଇସ୍ରାଏଲଦି ଇଟ୍‌ତି ଲୋକାଙ୍ଗ୍‌ ମାରିଡ଼େସି ତାନି ଉଣ୍ତିଙ୍ଗ୍‌ ନା ସେବକ ଆନି,

ଇକା ନାଣ୍ଡ ଇସ୍‌ରି ବିସୟ୍‌;

ନିନ୍‌ ଦୁନିଆଦି ୱିଜିତି ସାନ୍ଦି ଆମାଜାକୁ ନା କିତି ରକିୟା ୱାଜା ଆନାତ୍‌,

ଇୟାଉଣ୍ଡିଙ୍ଗ୍‌ ନାନ୍‌ ନିଙ୍ଗିଁ ଆଇ ଦେସ୍‌ତି ଜାୟ୍‌ ୱାଜା ବା କିନା ।"

7 ଆମାୱାନିଙ୍ଗ୍‌ ଲୋକୁ ମାନାଏର୍‌,

ଆମାୱାନିଙ୍ଗ୍‌ ଦେସ୍‌ତି ଲୋକୁ କାଡ଼୍‌ନାର୍‌,

ଆମାକାନ୍‌ ସାସନ୍‌କିନିୱାରି ଦାସ୍‌,

ୱାନିଙ୍ଗ୍‌ ଇସ୍ରାଏଲଦି ରକିୟାକିନିକାନ୍‌ ମାରି ୱାନି ଦାର୍ମୁଦି ପ୍ରବୁ ଇୟା ମାଟା ଇନାନ୍‌,

"ବିସ୍‌ବାସ୍‌ କିତାନ୍‌ ମାରି ଇସ୍ରାଏଲତି ପବିତ୍ର ମାପୁରୁ ଆମା ପ୍ରବୁ ନିଙ୍ଗିଁ ବାସେକିତା ମାନାନ୍‌,

ୱାନି ଉଣ୍ତିଙ୍ଗ୍‌ ରାଜାର୍ ନିଙ୍ଗିଁ ସୁଡ଼ୁତିଙ୍ଗା ନିଙ୍ଗ୍‌ନାର୍‌;

ଅଦିପତିର୍‌ ନିଙ୍ଗିଁ ମାଡ଼ିସ୍‌ କିନାର୍‌ ।"

8 ପ୍ରବୁ ଇୟା ମାଟା ଇଜିନାନ୍‌,

ନାନୁ ନେଗି ୱେଡ଼ାଦୁ ମିଙ୍ଗିଁ ମାଟା ୱାର୍‌ଗିତାମାନା

ମାରି ରକିୟା ଦିନ୍‌ତୁ ନାନ୍‌ ମିଙ୍ଗିଁ ସାକା କିତାମାନା;

ମାରି, ନାନ୍‌ ମିଙ୍ଗିଁ ରକିୟା କିନା

ମାରି ଦେସ୍‌ତି ନେଗିକା କିନି ଉଣ୍ତିଙ୍ଗ୍‌,

ଲୋକାଙ୍ଗ୍‌ ୱାରି ନାସ୍ଟୁଆତି ଅଦିକାର୍‌ ପୟ୍‌ନି ଉଣ୍ତିଙ୍ଗ୍‌

ନାନ୍‌ ମିଙ୍ଗିଁ ଲୋକା ନିୟମ୍‌ ୱାଜା ବାସେକିନା;

9 ମିର୍‌ ଜଇଲ୍‌ତୁ ମାନି ଲୋକାଙ୍ଗ୍‌ ସଅସି ସାଣ୍ଡ୍ରୁ ଇଜି ଇନିଦେର୍‌,

ସିକାଟିଦୁମାନି ଲୋକାଙ୍ଗ୍‌ ନିଜେଦିଙ୍ଗ୍‌ ତର୍‌ତୁ ଇଜି ଇନିଦେର୍‌ ।

ୱାର୍‌ ସାରିଦୁ ସାରାନି ବାଡି ମାରି ମାରାନ୍‌କୁସିଲି ପେରି ଗରକ୍‌ ୱିଜୁ ୱାରି ସାରାନି ବାଡି ଆନାତ୍‌ ।

10 ୱାର୍‌ ବାଙ୍ଗା ଗି ଏର୍‌କି ଆଏର୍‌;

ତେର୍‌ୱେଲ୍‌ ଗି ୱେଡ଼ାଦି ତାତି ୱାରିଙ୍ଗ୍‌ ତାକ୍‌ଏତ୍‌;

ଇର୍ରିଙ୍ଗ୍‌ ଆମାକାନ୍‌ ୱାରିଙ୍ଗ୍‌ ଜିବନ୍‌ନୋନାନ୍‌,

ୱାନ୍‌ ୱାରିଙ୍ଗ୍‌ ସାଲାକିନାନ୍‌, ଜଲାଦି ଏରୁ ସୋଲ୍‌ସି ମାନି ପାଡ଼ି ପାଡ଼ି ସିଜି ୱାନ୍‌ ୱାରିଙ୍ଗ୍‌ ବୁଲାକିଜି ଅନାନ୍‌ ।

11 ମାରି, ନାନ୍‌ ନିଜେଦି ଗରକୁ ୱିଜୁ ଉନ୍‌ଡ୍ରେ ରାସ୍ତା କିନା

ମାରି ନା ପେରି ରାସ୍ତା ୱିଜୁ ଉଚା କିଆଇ ଆନାତ୍‌ ।

12 ସୁଡ଼ୁଦୁ ଇୟାକାର୍‌ ଆକରାନ୍‌ ୱାନାର୍‌;

ଇୟାକାର୍‌ ଡେବ୍‌ରି ତରଟାନ୍‌ ମାରି ୱେଡ଼ା ଆର୍‌ନି ତରଟାନ୍‌ ୱାନାର୍‌;

ମାରି, ଇୟାକାର୍ ସିନିମ୍‌ ଦେସ୍‌ତାନ୍‌ ୱାନାର୍‌ ।

13 ଏ ବାଦଡ଼୍‌ୱିଜୁ, ପାଟା ପାର୍‌ଦୁ; ଏ ଦୁନିଆ, ୱେଡ଼ିକା ଆଆ;

ଏ ଗରକୁ ୱିଜୁ, ନାଣ୍ଡ ଆଉଲିଦାନ୍‌ ପାଟା ପାର୍‌ଦୁ;

ଇରିଙ୍ଗ୍‌ ସଦାପ୍ରବୁ ନିଜେଦି ଲୋକାଙ୍ଗ୍‌ ସାନ୍ତି କିତାମାନାନ୍‌

ମାରି ନିଜେଦି ଦୁଃକ୍‌ ପୟ୍‌ନି ଲୋକାଙ୍ଗ୍‌ ଦୟା କିନାନ୍‌ ।

14 ମାତର୍‌ ସିୟନତି ଲୋକୁ ଇର୍ହାର୍‌,

"ପ୍ରବୁ ନାଙ୍ଗି ଡ଼ିସ୍‌ତା ମାନାନ୍‌,

ମାରି ନାଙ୍ଗି ବାଣାତା ମାନାନ୍‌ ।"

15 ଆବେଟ୍‌ ପ୍ରବୁ ଇର୍ହାନ୍‌,

"ଇନିକା ଆଇମେକ୍‌ ନିଜେଦି ପୁଟ୍‌ତି କଡ଼୍‌ଦିଙ୍ଗ୍‌ ବାଣାନାତ୍‌

ମାରି ୱାଦ୍‌ ପାଲ୍‌ଉଟ୍‌ପିସ୍‌କିନି କଡ଼ଦିଙ୍ଗ୍‌ ବାଣାଦେଙ୍ଗ୍‌ ଆଟ୍‌ନାତ୍‌ ?

ହୁଁ, ଇୟାକେଙ୍ଗ୍‌ ବାଣାଦେଙ୍ଗ୍‌ ଆଟ୍‌ନେ,

ଇର୍ରିଙ୍ଗ୍‌ବା ନାନ୍‌ ଏସାଙ୍ଗ୍‌ ମିଙ୍ଗିଁ ବାଣାଏ ।

16 ସୁଡ଼ୁଦୁ, ନାନ୍‌ ନିଜେଦି କିୟୁଦି ପାପୁଲିଦୁ ମି ବାନିମୁର୍ତି ଦରୁ ରାସ୍‌ତାମାନା;

ନାନ୍‌ ଏସାଙ୍ଗ୍‌ ନିଙ୍ଗିଁ ବାଣାଏ ।"

17 ମି କଡ଼ର୍‌ ଦାପ୍ରେ ୱାଜିନାର୍‌,

ମାରି ମିଙ୍ଗିଁ ଏମାକାର୍‌ ନାସ୍ଟୁକିତାର୍‌, ୱାର୍‌ ମି ମାଣାନ୍‌ ସସି ସନାର୍‌ ।

18 ମିର୍‌ କାଣୁକୁ ବେସ୍‌ସି ସାରିବେଡ଼େତି ସୁଡ଼ୁଦୁ;

ଇୟାୱିଜେରେ ଉନ୍‌ଡ୍ରେ ଆଜି ମି ଲାକ୍‌ତୁ ୱାଜିନାର୍‌ ।

ପ୍ରବୁ ଇନାନ୍‌, "ନାନ୍‌ ଜିବନ୍‌ ମାନି ଉଣ୍ତିଙ୍ଗ୍‌

ମିର୍‌ ବାଙ୍ଗାରାମ୍‌ ୱାଜା ଇୟା ୱିଜେରିଙ୍ଗ୍‌ ଆରିସ୍‌ କିନିଦେର୍‌,

ମାରି ରିପାଦିଙ୍ଗ୍‌ ବାଙ୍ଗାରାମ୍‌ଦାନ୍‌ ଆରିସ୍‌କିତିମାନି ୱାଜା ୱାରିଙ୍ଗ୍‌ ଆରିସ୍‌ନିଦେର୍‌ ।

19 ଇରିଙ୍ଗ୍‌ ସତ୍‌ନେ ଇଲେଇ ମିରୁ, ମି ନାସ୍ଟୁଆତିକା ମାରି ୱାର୍ହି ବାଡି ୱିଜୁ ମାରି ମି ନାସ୍ଟୁ ଆତି ଦେସ୍‌,

ମାତର୍‌ ବାସାତିମାନି ଲୋକା ଉଣ୍ତିଙ୍ଗ୍‌ ଇସ୍ରିକା ଆନାତ୍‌

ମାରି ମି ନାସ୍ଟୁକିନିକାର୍‌

ଆକ ତେବାନାର୍‌ ।

20 ମି ମାଣାନ୍‌ ଆକ ଅତିମାନି ମାରିନ୍‌କୁ,

ୱାର୍‌ ଅର୍‌ଲେନ୍‌ ମିଙ୍ଗିଁ ଇନାର୍‌,

ନା ଉଣ୍ତିଙ୍ଗ୍‌ ଇୟା ବାଡି ବେସି ଇସ୍ରିକା;

ନାଙ୍ଗି ବାଡି ସିଦାଟ୍‌, ନାନ୍‌ ବାସା କିନା ।

21 ନାସ୍ତିୱାଲେ ମିର୍‌ ମନ୍‌ତୁ ମନ୍‌ତୁ ଇନିଦେର୍‌,

ନା କଡ଼୍‌ର ମୁରିତା ମାନାର୍‌, ନାନ୍‌ ଅରେନ୍‌ନେ,

ଜଇଲ୍‌ତାନ୍‌ ୱାଜି ଇନିଙ୍ଗା ଆନିଙ୍ଗାଁ ବୁଲାଜିନା,

ନା ଇୟା ୱିଜେରିଙ୍ଗ୍‌ ଏନ୍‌ ଜନମ୍‌ ସିତାମାନାନ୍‌ ?

ମାରି ୱେରିଙ୍ଗ୍‌ ଏନ୍‌ ପସା କିତାମାନାନ୍‌ ?

ସୁଡ଼ୁଦୁ, ନାନ୍‌ ଅରେତ୍‌ନେ ଏଜିତା ମାର୍ହା;

ଇୟାକାର୍‌ ଏମେବାନ୍‌ ମାର୍ହାର୍‌ ?"

22 ମାପୁରୁ, ସଦାପ୍ରବୁ ଇୟା ମାଟା ଇଜିନାନ୍‌, ସୁଡ଼ୁଦୁ, ମାପ୍‌ ଆଇ ଦେସ୍‌ତି ଲୋକା ଉଣ୍ତିଙ୍ଗ୍‌ ନିଜେଦି କିୟୁ ନିକ୍‌ନାପ୍‌ ମାରି କୁଡ଼ାଦିୱିଜେରି ଉଣ୍ତିଙ୍ଗ୍‌ ନିଜେଦି ଜେଣ୍ତା ପେର୍‌ନା; ଆବେନୁ ୱାର୍‌ ମି ମାରିନ୍‌କାଙ୍ଗ୍‌ ଗାତୁ ତାନାର୍‌ ମାରି ମି ଗାଡ଼୍‌ସିକ୍‌ ୱାରି ଗୁଜାମି ପିଣ୍ଡାଇ ଆନେ । 23 ମାରି, ରାଜାର୍‌ ମି ପୋସାକିନି ବୁବା ମାରି ୱାରି ରାଣିକ୍‌ ମି ପୋସାକିନି ୟାୟେକ୍‌ ଆନେ; ୱାର୍‌ ବୁମିଦୁ ମେଣ୍ତେଙ୍ଗ୍‌ ଗଟ୍‌କିଜି ମିଙ୍ଗିଁ ମାଡ଼ିସ୍‌ କିନାର୍‌ ମାରି ମି ପାଦ୍‌ତି ଦୁଡ଼ି ନାକ୍‌ନାର୍‌; ଆବେନୁ ମାପ୍‌ ଯେ ସଦାପ୍ରବୁ ମାରି ମାଙ୍ଗିଁ କାପ୍‌କିନି ଲୋକୁ ଜେ ସେମାର୍‌ ଆଏର୍‌, ଇକା ମିର୍‌ ନେସ୍‌ନିଦେର୍‌ । 24 ସାକ୍ତିଦିଲୋକା ମାଣାନ୍‌ ଗି ଡଙ୍ଗାକିତି ଜିନିସ୍‌ ଆସ୍‌ତେଙ୍ଗ୍‌ ଆନାତ୍‌, ମାରି ନିୟାଇତାନ୍‌ ଜଇଲ୍‌ତୁ ମାର୍ହି ଲୋକୁ ଇନିକା ମୁକୁଡ଼ା କିଆଇଆନାର୍‌ ? 25 ମାତର୍‌ ସଦାପ୍ରବୁ ଇୟା ମାଟା ଇଜିନାନ୍‌, "ସାକ୍ତିଦିକାନ୍‌ ଜଇଲ୍‌ତୁ ମାର୍ହି ଲୋକୁ ନେ ସିଲେଣ୍ଡା ଆନାର୍‌ ମାରି ନାଣ୍ଡ୍‌ ଲୋକାଦି ଡଙ୍ଗାକିତି ଜିନିସ୍‌ ମୁକୁଡ଼ାନାତ୍‌; ଇର୍ରିଙ୍ଗ୍‌ ମି ବିରୁଦ୍‌ କିନି ଲୋକା ୱାଲେ ମାପ୍‌ ବିରୁଦ୍‌ କିନାପ୍‌ ମାରି ମି ଲୋକାଙ୍ଗ୍‌ ମାପ୍‌ ରକିୟା କିନା । 26 ମାରି, ନାନୁ ମିଙ୍ଗିଁ ସେଇପାଣିକିନିୱାରିଙ୍ଗ୍‌ ୱାରି ନିଜେଦି କାଣ୍ଡା ତିର୍‌ପିସ୍‌ କିନା ମାରି ମିଟା ଅଙ୍ଗୁର୍‌ରସ୍‌ତାନ୍‌ ସୋସ୍‌ନି ୱାଜା ୱାର୍‌ ନିଜେଦି ନେତେର୍‌ତାନ୍‌ ସୋସ୍‌ନାର୍‌; ଆବେନୁ ମାପ୍‌ ଯେ ସଦାପ୍ରବୁ, ମି ରକିୟାକିନିକାନ୍‌ ମାରି ମି ମୁକୁଡ଼ାକିନିକାନ୍‌, ଜାକୁବଦି ସାକ୍ତିମାନିକାନ୍‌, ଇକା ୱିଜେରେ ଲୋକୁ ନେସ୍‌ନାର୍‌ ।"