1 ଇରିଙ୍ଗ୍‌ ସଦାପ୍ରବୁ ଯାକୁବଦି ଉଣ୍ତିଙ୍ଗ୍‌ ଦୟା କିନାନ୍‌, ମାରି, ଇସ୍ରାଏଲଦିଙ୍ଗ୍‌ ମାରିଡ଼େସି ଲାକ୍‌ତୁ କିନାନ୍‌ ମାରି ୱାରିଙ୍ଗ୍‌ ୱାରି ଦେସ୍‌ତୁ ଇଡ୍‌ନାନ୍‌, ଆବେଟ୍‌ ଆଇଦେସ୍‌ତି ଲୋକୁ ୱାରି ୱାଲେ ମିସାନାର୍‌, ୱାର୍‌ ଯାକୁବ କୁଟୁମ୍‌ତି ୱାଲେ ମିସାନାର୍‌ । 2 ମାରି, ନାଣ୍ତ କୁଡ଼ାଦି ଲୋକୁ ୱାରିଙ୍ଗ୍‌ ଅସି ୱାରି ନିଜେଦି ବାଡିଦୁ ଇପ୍‌ନାର୍‌; ମାରି, ଇସ୍ରାଏଲ କୁଟୁମ୍‌ ସଦାପ୍ରବୁଦି ଦେସ୍‌ତୁ ୱାରିଙ୍ଗ୍‌ ସାକର୍‌ ସାକ୍‌ରାଣି ୱାଜା ଅଦିକାର୍‌ କିନାର୍‌; ମାରି, ୱାର୍‌ ଏମେୱାରି ତରାଇ ଆତାମାର୍ହାର୍‌, ୱାରିଙ୍ଗ୍‌ ତର୍‌ସି ଅନାର୍‌ ମାରି ୱାର୍‌ ନିଜେଦି ସେଇପାଣିକିନିୱାରି ମୁସୁକୁ ସାସନ୍‌ କିନାର୍‌ ।

3 ମାରି, ଆମା ନାଣ୍ତିଙ୍ଗ୍‌ ସଦାପ୍ରବୁ ମିଙ୍ଗିଁ ମି ଦୁଃକ୍‌ ମାରି କାସ୍ଟୁଦାନ୍‌ ମାରି ଆମା କାସ୍ଟୁଦି ଦାସ୍‌ତାନ୍‌ ମିଙ୍ଗିଁ ସାକର୍‌ ପାଣି କିଦେଙ୍ଗ୍‌ ଆତାତ୍‌, ଆବେଣାନ୍‌ ରୋମ୍‌ନିକା ସିନାନ୍‌,

4 ଆୟା ନାଣ୍ତିଙ୍ଗ୍‌ ନିନୁ ବାବିଲତି ସାସନ୍‌ତି ବିରୁଦ୍‌ତାନ୍‌ ଇୟା କାତାଦି ମାଟା ଅସି ଇନି, ଇରିଙ୍ଗ୍‌, ପାପ୍‌ପାଣି କିନିକାର୍‌ ଆମାଜାକ୍‌ ୱିଜିତା ମାନାତ୍‌ ! ବାଙ୍ଗାରାମ୍‌ ଗାଡ଼୍‌ ଏଣ୍ଡେସ୍‌ ନାସ୍ଟୁ ଆତାମାନାତ୍‌ ! 5 ଆମାକାର୍‌ ରିସାଦାନ୍‌ ଏସୋ କୁଟୁମ୍‌ତିଙ୍ଗ୍‌ ନାଣ୍ଡ୍‌ ଡାକ୍‌ତାର୍‌ ମାରି ଏସୋ ଦେସ୍‌ତି ଲୋକାଙ୍ଗ୍‌ ରିସାଦାନ୍‌ ସାସନ୍‌ କିଜି ନାଣ୍ଡ୍‌ କାସ୍ଟୁ ସିତାର୍‌, 6 ସଦାପ୍ରବୁ ଆୟା ତାଗ୍‌ଇ ଲୋକାଦି କାସ୍ଟୁଦି ବାଡିଗା ମାରି ସାସନ୍‌କିନିୱାରି ରିସା ରୁକୁତା ମାନାନ୍‌ । 7 ୱିଜୁ ଦୁନିଆ ସାନ୍ତି ମାରି ତିର୍‌ ଆତାମାନାତ୍‌; ୱାର୍‌ ୱେଡ଼ିକାଦାନ୍‌ ପାଟା ପାର୍‌ଜିନାର୍‌ । 8 ହୁଁ, ଦେବଦାରୁ ମାରି ଲିବାନୋନଦି ଏରସ ମାରାକୁ ୱିଜୁ ମି ବିସୟ୍‌ଦାନ୍‌ ୱେଡ଼ିକା କିଜି ଇନେ, ମିର୍‌ ଦଂସ ଆତି ମାଣାନ୍‌ ଏନ୍‌ବା କାତ୍‌ନିକାନ୍‌ ମା ବିରୁଦ୍‌ତାନ୍‌ ରେଏନ୍‌ ।

9 ନି ୱାନି ବେଡ଼ାଦୁ ନି ୱାଲେ ବେଟ୍‌ ଆନି ଉଣ୍ତିଙ୍ଗ୍‌ କାପ୍‌କିଜିନାର୍‌; ଆକା ନି ଉଣ୍ତିଙ୍ଗ୍‌ ସାତିଲୋକାଙ୍ଗ୍‌, ଦୁନିଆଦି ପେରି ଲୋକାଙ୍ଗ୍‌ ନେ କାପ୍‌କିବିସ୍‌ନାନ୍‌; ଆକା କୁଡ଼ାୱାରିଙ୍ଗ୍‌ ରାଜାରି ୱିଜୁ ୱାରି ରାଜାଗାଦିଦାନ୍‌ ନିକ୍‌ତାମାନାନ୍‌ । 10 ୱାର୍‌ ୱିଜେରେ ମିଙ୍ଗିଁ ଇନାର୍‌, ମିର୍‌ ବା ଇନିକା ମା ୱାଜା ଅସାକ୍ତି ଆତିଦେର୍‌ ? ମିର୍‌ ଇନିକା ମା ସମାନ୍‌ ଆତିଦେର୍‌ ? 11 ମି ସୁନ୍ଦର୍‌ତିକା ମାରି ମି ଟଇଲାଦି ସର ପାତାଲ୍‌ଦି ସାନ୍ଦି ୱେଙ୍ଗିଁତା ମାନାତ୍‌; ପିଡ଼ୁକୁ ମି ଟାଟି ଆଡ୍‌ଗି ବୁଲାଜି ସାର୍‌ନେ ମାରି ନାଉଡ଼ିଙ୍ଗ୍‌ ମିଙ୍ଗିଁ ପିଡ଼ିକ୍‌ତେ ମାନେ ।

12 ଏ ୱିଗାପି ସୁକା !* ୱିଗ୍‌ଜିନି ମାରିନ୍‌ ! ନିନ୍‌ ଏଣ୍ତେସ୍‌ ମୁସ୍‌କୁପୁର୍‌ଦାନ୍‌ ଆର୍‌ଜି ମୁଜାତି ମାନି ! କୁଡ଼ାଦି ଲୋକାଙ୍ଗ୍‌ ନିନ୍‌ ଜେ ଆଡିଗି କିତି ମାର୍ହି, ନିନ୍‌ ଏଣ୍ତେସ୍‌ ବୁମିଦୁ ପକାଇଆତି ! 13 ମାରି, ନିନ୍‌ ମୋନ୍‌ତୁ ମୋନ୍‌ତୁ ଇର୍ହିମାର୍ହି, ମାପ୍‌ ମୁସୁକୁପୁର୍‌ତୁ ସୋନାପ୍‌, ମାଡ୍‌ ମାପୁରୁଦି ସୁକେଆଙ୍ଗ୍‌ ମୁସୁକୁ ନିଜେଦି ରାଜାଗାଦି ପିରିସ୍‌ କିନାଟ୍‌; ମାଡ୍‌ ଡେବିରି ତରଟି ବାଟାଦି ପବିତ୍ର ଗରନ୍‌ତୁ ବାସ୍‌ନା; 14 ମାଡ୍‌ ବାଦଡ଼୍‌ତି ମୁସୁକୁରି ମୁସୁକୁ ସୋନାଟ୍‌; ମାଡ୍‌ ପେରିସାକ୍ତିଦିୱାନି ୱାଜା ଆନାଟ୍‌ । 15 ମାତର୍‌ ନିନୁ ପାତାଲ୍‌ଦି, ନିର୍‌ଇ ଗୁଟାଦି ଆଡ୍‌ଗିରି ବାଡିଦୁ ପୋକାନି ।

16 ଆମାକାର୍‌ ମିଙ୍ଗିଁ ସୁଡ଼ୁନାର୍‌, ୱାର୍‌ ନେଗେନ୍‌ ତାନ୍‌ ସୁଡ଼ୁଜି ମି ବିସୟ୍‌ ୱାର୍‌ଗିଜି ଇନାର୍‌, ଆମାକାନ୍‌ ପୃଥିବିଦିଙ୍ଗ୍‌ ତରବର କିତାନ୍‌, ଆମାକାନ୍‌ ରାଜିଦିଙ୍ଗ୍‌ ତିର୍‌ଗିସ୍‌ କିତାନ୍‌; 17 ଆମାକାନ୍‌ ଦେସ୍‌ତିଙ୍ଗ୍‌ ବନୁ ୱାଜା କିତାନ୍‌ ମାରି ଆବେଣି ଗାଡ଼୍‌କାଙ୍ଗ୍‌ ବାଦେଲେ କିତାନ୍‌; ଆମାକାନ୍‌ ନିଜେଦି ଜଇଲ୍‌ତୁ ମାର୍ହି ଲୋକାଙ୍ଗ୍ ୱାରି ଇଲ୍‌କାଙ୍ଗ୍‌ ସୋଣ୍ଡ୍ରେଙ୍ଗ୍‌ ଡ଼ିସ୍‌ଏତାନ୍‌, ୱାନ୍‌ ନା ଇୟା ଲୋକୁ ? 18 କୁଡ଼ାଦି ରାଜାର୍‌, ୱାରି ୱିଜେରେ ନେ ଗୌରବ୍‌ଦୁ ନିଜେ ନିଜେଦି ଇଲ୍‌କାଙ୍ଗ୍‌ ଗୁରିତା ମାନାର୍‌ । 19 ମାତର୍‌ ମିର୍‌ କାଡ଼୍‌ତି କମା ୱାଜା, କାଣ୍ତାଦାନ୍‌ କାତ୍‌ତିକା ମାରି ନିର୍‌ଇ ଗୁଟାଦି କାଲୁ ଲୋଇ ପୋକାଜି ସାତି ଲୋକା ମାଣାନ୍‌ ତିଗାଇ ଆଜି, ନିଜେଦି ମୁସ୍‌ତିଗୁଟାଦି ମାଣାନ୍‌ ଆକ ପୋକାଇ ଆତିମାନିଦେର୍‌; ମିର୍‌ ପାଦାମ୍‍ତାନ୍‌ ମାଟ୍‌ତି ମାଡ଼ା ୱାଜା ଆତିମାନିଦେର୍‌ । 20 ମିର୍‌ ୱାରି ୱାଲେ ମୁଜାଇଦେର୍‌, ଇର୍ରିଙ୍ଗ୍‌ ମିର୍‌ ନିଜେଦି ଦେସ୍‌ ନାସ୍ଟୁ କିତିମାନି, ମିର୍‌ ନିଜେଦି ଲୋକାଙ୍ଗ୍ ସାୟାମାର୍‌ଗାଡାକ୍‌ତି ମାନିଦେର୍‌, ସେଇପାଣି କିନିଲୋକାରି କୁଟୁମ୍‌ଦି ଦରୁ ଏସେଙ୍ଗ୍‌ ବା ରାସାଏତ୍‌ । 21 ୱାନି କଡ଼ର୍‌ ନିଙ୍ଗିଁଜି ଏଣ୍ଡେସ୍‌ ଦୁନିଆ ଅଦିକାର୍‌ କିଏର୍‌ ମାରି ଦୁନିଆଦିଙ୍ଗ୍‌ ଗାଡ଼୍‌ତାନ୍‌ ପୁରା କିଏର୍‌, ଇୟାଉଣ୍ଡିଙ୍ଗ୍‌ ମିର୍‌ ୱାରି ପୁର୍ବେଦିଦାଦାରି ପାପ୍‌ ଉଣ୍ତିଙ୍ଗ୍‌ ୱାରି ଉଣ୍ତିଙ୍ଗ୍‌ ସାପିସ୍‌କିନି ବାଡି ତିୟାର୍‌ କିଦୁ ।

22 ମାରି, ପେରିସାକ୍ତିଦି ସଦାପ୍ରବୁ ଇନାନ୍‌, "ମାପ୍‌ ୱାରି ବିରୁଦ୍‌ତାନ୍‌ ନିଙ୍ଗ୍‌ନାଟ୍‌," ସଦାପ୍ରବୁ ଇନାନ୍‌, "ମାପ୍‌ ବାବିଲଦାନ୍‌ ଦରୁ ମାରି ତେବାତିମାନିକାର୍‌, ମାରିନ୍‌କାଙ୍ଗ୍‌, ମାରି ନାତିରିଙ୍ଗ୍‌, ନାସ୍ଟୁ କିନା," 23 ମାରି, ପେରିସାକ୍ତିଦି ସଦାପ୍ରବୁ ଇଜିନାନ୍‌, "ମାପ୍‌ ଆୟା ଗାଡ଼୍‌ତିଙ୍ଗ୍‌ କସ ପଟିଦି ଅଦିକାର୍‌ ମାରି ବାନ୍ଦୁଙ୍ଗାଁ ବାଡ଼ି କିନା ମାରି ମାପ୍‌ ସାପିସ୍‌କିନି ସିପେର୍‌ ଦାନ୍‌ ଦାନିଙ୍ଗ୍‌ ସିପାଜି ପୋକ୍‌ନା ।"

24 ପେରିସାକ୍ତିଦି ସଦାପ୍ରବୁ ପାର୍‍ମାଣ୍ କିଜି ଇର୍ହାମାନାନ୍‌, "ମାପ୍‌ ଆମାକା ଏତ୍‌ କିଜିନାପ୍‌, ସତ୍‌ନେ ଆକା ଗୋଟାନାତ୍‌ ମାରି ମାପ୍‌ ଏଣ୍ଡେସ୍‌ ୱାଜା ଉପାୟ୍‌ କିଜିନାପ୍‌, ଆୟାୱାଜା ତିର୍‌ ଆନାତ୍‌; 25 ମାପ୍‌ ନିଜେଦି ଦେସ୍‌ତି ଅସୁରିୟଦିଙ୍ଗ୍‌ ରୁକୁନା ପୋକ୍‌ନାଟ୍‌ ମାରି ନିଜେଦି ଗରନୁ ମୁସୁକୁ ୱାନିଙ୍ଗ୍‌ ପାଦାମ୍‌ତାନ୍‌ ମାଟ୍‌ନା ପୋକ୍‌ନାଟ୍‌; ଆର୍‌ତିଙ୍ଗ୍‌ ଲୋକା ମାଣାନ୍‌ ୱାନି ପୁନ୍ଦି ମାରି ୱାରି ଗୁଜାମ୍‌ଦାନ୍‌ ୱାନି ବଜୁ ଆକ କିଆଇଆନାତ୍‌ ।" 26 ସାରା ଦୁନିଆ ବିସୟ୍‌ତାନ୍‌ ଇୟା ମାଟା ତିର୍‌ ଆତାମାନାତ୍‌ ମାରି ଇୟା କିୟୁ ୱିଜୁ କୁଡ଼ାଦି ମୁସୁକୁ ସାରିତା ମାନାତ୍‌ । 27 ଇରିଙ୍ଗ୍‌ ପେରିସାକ୍ତିଦି ସଦାପ୍ରବୁ ମାଟା ଇର୍ହାମାନାନ୍‌, ମାରି ଆକା ଏନ୍‌ ଆଇକା କିନାନ୍‌ ? ମାରି ୱାନି କିୟୁ ପେର୍‌ତା ମାନାନ୍‌, ମାରି ଏନ୍‌ ଆକା ଡ଼େପ୍‌ନା ସିନାନ୍‌ ?

28 ଆମା ବାର୍ସୁଦୁ ଆହସ୍‌ ରାଜା ସାତାନ୍‌, ଆୟା ବାର୍ସୁଦି ଇୟା ବାବବାଣି ଆତାତ୍‌ ।

29 ଏ ପଲେସ୍ଟିୟ, ଆମା ଦଣ୍ଡ ମିଙ୍ଗିଁ ଡାକ୍‌ତାନ୍‌, ଆକା ରୁଙ୍ଗିତାମାନାତ୍‌ ଇଜି ମିର୍‌ ୱିଜେରେ ୱେଡ଼ିକା ଆମାଟ୍‌; ଇର୍ରିଙ୍ଗ୍‌ ସାରାସୁଦି ମୁଲ୍‌ତାନ୍‌ ୱିସାମ୍‍ଦି ସାରାସ୍ ସନାତ୍‌ ମାରି ସିସୁଦି ଇମ୍‌ନି ସାରାସୁ ତାନି ନାଣ୍ତ ୱିସାମ୍‌ତି ସାରାସୁ ଆନାତ୍‌ । 30 ମାରି, ସିଲିସାତି ପାର୍‌ତୁମ୍‌ ଜନମ୍‌ଆତି କୋଡ଼ ଉଣାନ୍‌ ମାରି ସିଲିସାତିକାର୍‌ ନେଗେନ୍‌ତାନ୍‌ ଗୁରୁନାର୍‌; ମାରି, ମାପ୍‌ ମର୍‍ଡିଦାନ୍‍ ମି ପଲେସ୍ଟିୟରି ମୁଲ୍‌ ନାଷ୍ଟୁ କିନାପ୍‌ ମାରି ମି ତେବାତିମାନି ଲୋକୁ ନାସ୍ଟୁ ଆନାର୍‌ ।

31 ଏ ଗାଡ଼୍‌ତି ସେର୍‌ଲା, ଆଉଲି ଆଦୁ; ଏ ଗାଡ଼୍‌, ଆଡ଼୍‌ବାଆ; ଏ ପଲେସ୍ଟିୟର୍‌ ମିଦି ୱିଜୁ ତର୍‌ଲେ ଆତାମାନାତ୍‌; ଇରିଙ୍ଗ୍‌ ଡେରିରି ତରିଟାନ୍‌ ଗୋଇ ୱାଜିନାତ୍‌ ମାରି ଏନ୍‌କି ନିଜେଦି ଟିକ୍‌ ବେଡ଼ାଦୁ ଆକ ନିଲ୍‌ଏନ୍‌ ।

32 ମାରି, ଇୟା କୁଡ଼ାଦି ଦୁତ୍‌କାଙ୍ଗ୍‌ ୱେର୍‌ନିଦେର୍‌ ? ଇକା ଜେ, ସଦାପ୍ରବୁ ସିୟନଦି ମୁଲ୍‌କୁନାଦି ତିୟାର୍‌ କିତାମାନାନ୍‌ ମାରି ଆୟା ଲୋଇ ୱାରି ଦୁଃକ୍‌ତି ଲୋକୁ ତେବାନାର୍‌ ।