1 "ଏ ଏର୍‌କି ସାତି ଲୋକୁ ୱିଜେରେ, ମିରୁ ଏରୁଦି ଲାକ୍‌ତୁ ରାଦୁ, ମାରି ଆମା ୱାନିଙ୍ଗ୍‌ ଇନି ଡାବୁଙ୍ଗ୍‌ ସିଲୁ, ୱାନ୍‌ ରାପିନ୍‌; ମିର୍‌ ରାଦୁ, କଡ଼୍‌ଜି ଉଣ୍ଡୁ; ହୁଁ, ରାଦୁ, ଡାବୁଙ୍ଗ୍‌ ସିଲେଣ୍ଡା ଅଙ୍ଗୁର୍‌ରସ୍‌ ମାରି ପାଲୁ କଣ୍ଡୁ । 2 ସେଇକାଦି ଜିନିସ୍‌ ଉଣ୍ତିଙ୍ଗ୍‌ ମିର୍‌ ଏନ୍ଦା ଡାବୁଙ୍ଗ୍‌ କାର୍ସୁ କିଜିନିଦେର୍‌ ? ମାରି ଆମାକା ପୋଟା ପାଜ୍‌ଏତ୍‌, ଆୟା ଉଣ୍ତିଙ୍ଗ୍‌ ଏନ୍ଦା ମିର୍‌ ପାଣି କିଜିନିଦେର୍‌ ? ମୋନ୍‌ ସିଜି ମା ମାଟା ୱେଣ୍ଡ୍ରୁ ମାରି ନେଗି ଜିନିସ୍‌ ତିଣ୍ଡ୍ରୁ ମାରି ନେଗି ଜିନିସ୍‌ଦାନ୍‌ ମି ଜିବନ୍‌ତିଙ୍ଗ୍‌ ସାକ୍ତି ଆଦେଙ୍ଗ୍‌ ସିଦୁ । 3 ଗିତଣିଦାନ୍‌ ୱେଣ୍ଡ୍ରୁ ମାରି ମା ଲାକ୍‌ତୁ ରାଦୁ; ୱେଣ୍ଡ୍ରୁ, ଆବେନୁ ମି ଜିବନ୍‌ ଜିନାତ୍‌; ମାରି, ମାପ୍‌ ମି ୱାଲେ ଉନ୍‌ଡ୍ରି ସତ୍‌ତି ନିୟମ୍‌, ଇରିଙ୍ଗ୍‌, ଦାଉଦଦି ଉଣ୍ତିଙ୍ଗ୍‌ ସତ୍‌ତି ଦୟା ତିର୍‌ କିନାପ୍‌ । 4 ସୁଡ଼ୁଦୁ, ମାପ୍‌ ୱାନିଙ୍ଗ୍‌ କୁଟୁମ୍‌ଦିଙ୍ଗ୍‌ ସାକି ୱାଜା କିତା ମାନା, କୁଡ଼ାଦି ଲୋକୁ ଆଗ୍‌ଡ଼ି ସନିକା ମାରି ଆଦେସ୍‌ ସିନିକାନ୍‌ ୱାଜା ସିତା ମାନା ।" 5 ସୁଡ଼ୁଦୁ, ଆମା କୁଡ଼ାଦିଙ୍ଗ୍‌ ମିର୍‌ ନେସ୍‌ଇଦେର୍‌, ୱାନିଙ୍ଗ୍‌ ମିର୍‌ କୁକୁନିଦେର୍‌ ମାରି ଆମା କୁଡ଼ା ମିଙ୍ଗିଁ ନେସ୍‌ଏର୍‌, ୱାର୍‌ ନି ଲାକ୍‌ତୁ ୱାନାର୍‌, ସଦାପ୍ରବୁ ମି ମାପୁରୁ ମାରି ଇସ୍ରାଏଲଦି ପବିତ୍ର ମାପୁରୁ ଉଣ୍ତିଙ୍ଗ୍‌ ଇକା ଗଟାନାତ୍‌; ଇର୍ରିଙ୍ଗ୍‌ ୱାନ୍‌ ମିଙ୍ଗିଁ ଗୌରବ୍‌ କିତାମାନାନ୍‌ । 6 ଆମାସାନ୍ଦି ପ୍ରବୁଦି ଉଦେସ୍‌ ପୁଟ୍‌ସିନାତ୍‌, ଆୟାସାନ୍ଦି ମିରୁ ୱାନିଙ୍ଗ୍‌ ରେବାଦୁ, ଆମା ସାନ୍ଦି ୱାନ୍‌ ଲାକ୍‌ତୁ ମାନାନ୍‌, ଆୟାସାନ୍ଦି ୱାନି ଲାକ୍‌ତୁ ପାର୍‌ତନା କିଦୁ । 7 ତାଗ୍‌ଇ ଲୋକୁ ନିଜେଦି ସାରି ମାରି ଅଦାର୍ମୁ ଲୋକୁ ନିଜେଦି ସେଇକା ଡ଼ିସିନ୍‌; ମାରି, ୱାନ୍‌ ପ୍ରବୁଦି ଲାକ୍‌ତୁ ଡ଼େସିରାପିନ୍‌, ଆବେନୁ ୱାନ୍‌ ୱାନିଙ୍ଗ୍‌ ଦୟା କିନାନ୍‌; ମାରି, ୱାନ୍‌ ମା ମାପୁରୁଦି ଲାକ୍‌ତୁ ଡ଼େସି ରାପିନ୍‌, ଇର୍ରିଙ୍ଗ୍‌ ୱାନ୍‌ ନାଣ୍ଡଦାନ୍‌ କେମା କିନାନ୍‌ । 8 ଏଣ୍ତେସ୍‌ ପ୍ରବୁ ଇଜିନାନ୍‌, "ମା ପାଣିୱିଜୁ ମି ପାଣି ୱାଜା ସିଲେ, ମାରିବା ମି ସାରି ୱିଜୁ ମା ସାରି ୱାଜା ସିଲେ ।" 9 ଇର୍ରିଙ୍ଗ୍‌ ଦୁନିଆଦି ମାଣାନ୍‌ ବାଦଡ଼୍‌ୱିଜୁ ଏଣ୍ତେସ୍‌ ଉଚା, ଆୟାୱାଜା ମା ଉପାୟ୍‌ ୱିଜୁ ମି ସାରି ବାଦ୍‌ଲୁ ମାରି ମା ପାଣିୱିଜୁ ମି ଉପାୟ୍‌ ବାଦ୍‌ଲୁ ଉଚା ଆନେ । 10 ଏନ୍ଦାଇର୍ରିଙ୍ଗ୍‌ ଆମାଜାକୁ ପିରୁ ମାରି ମାସୁ ବାଦଡ଼୍‌ତାନ୍‌ ଆଡ୍‌ଗି ୱାନାତ୍‌ ମାରି ଆବେନୁ ଡ଼େସି ସଲ୍‌ଏତ୍‌, ମାତର ବୁମିଦିଙ୍ଗ୍‌ ଉଦିସ୍‌ କିନାତ୍‌, ମାରି ପଲ୍‌ ମାରି ଲାଟା ନେରିସ୍‌ କିଜି ୱିତ୍‌ନିୱାନିଙ୍ଗ୍‌ ୱିତୁ ମାରି ଉଣି ଲୋକାଙ୍ଗ୍‌ କାଦି ସିନାତ୍‌; 11 ନା ୱେୟୁଦାନ୍‌ ସତି ବାକ୍ୟ ଆୟାୱାଜା ଆନାତ୍‌; ଆକା ସେଇକା ଆଜି ନା ଲାକ୍‌ତୁ ଡ଼େସି ରେଏତ୍‌, ମାତର୍‌ ନାନ୍‌ ଆମାକା ବଦା କିନା, ଆକା ସତ୍‌ କିନା ମାରି ଆମା ପାଣି ଉଣ୍ତିଙ୍ଗ୍‌ ନାନ୍‌ ପୋକ୍‌ତାମାନା, ଆବେନୁ ପାଣି ପୁରା ଆନାତ୍‌ । 12 "ଆଦେଙ୍ଗ୍‌ ମିର୍‌ ୱେଡ଼ିକାଦାନ୍‌ ସସି ସାନ୍ତିଦାନ୍‌ ଆଗ୍‌ଡ଼ି ଆଗ୍‌ଡ଼ି ଅଆୟ୍‌ଆନିଦେର୍‌; ଗରକୁ ମାରି ଇସ୍ରି ଗରକୁ ମି ଆଗ୍‌ଡ଼ି ଆଉଲି ଆଜି ପାଟା ପାର୍‌ନେ ମାରି ବୁମିଦି ମାରାକୁ ୱିଜୁ ପାପୁଡ଼ି ଡାକ୍‌ନେ । 13 ସାମ୍‌ ମାରାକା ବାଦ୍‌ଲୁ ଦେବଦାରୁ ମାରି କାଟାକୋଡ଼ି ବାଦ୍‌ଲୁ ବେତଲା ମାରାକୁ ନେର୍‌ନେ; ମାରି, ଆକା ପ୍ରବୁଦି ଦରୁ ୱାଜା ମାରି ୱିଜ୍‌ଇ ଦିନାମିତି ସିନା ୱାଜା ଆନାତ୍‌ ।"