1 ଏ ସଦାପ୍ରବୁ, ନିନ୍‌ ନା ମାପୁରୁ; ନାନ୍‌ ନି ଗୌରବ୍‌ କିନା, ନାନ୍‌ ନି ଦର୍‌ତାନ୍‌ ପ୍ରସଂସା କିନା; ଇରିଙ୍ଗ୍‌ ନିନ୍‌ କାବାଆନି ପାଣିକିତିମାନି, ଇରିଙ୍ଗ୍‌, ପୁର୍ବେ କାଡ଼ାଦି ଜୁଗ୍‌ତି ଉପାୟ୍‌ ମାଟେଙ୍ଗ୍‌ ୱିଜୁ ବିସ୍‌ବାସ୍‌ତାନ୍‌ ମାରି ସତ୍‌ତାନ୍‌ ପୁରା କିତିମାନି । 2 ଏଣ୍ତେସ୍‌ ନିନ୍‌ ଗାଡ଼୍‌ତିଙ୍ଗ୍‌ କାସ୍‍ରା ଗାଦି, କାତି ପେର୍‌ତିମାନି ଗାଡ଼୍‌ତିଙ୍ଗ୍‌ ନାସ୍ଟୁ କିତିମାନି; ଆଇଦେସ୍‌ତି ୱାରି ଗାଡ଼୍‌ତିଙ୍ଗ୍ ନାସ୍ଟୁ କିତିମାନି; ଆକା ମାରି ଏସେଙ୍ଗ୍‌ ତିୟାର୍‌ ଆଏତ୍‌ । 3 ଇୟାଉଣ୍ଡିଙ୍ଗ୍‌ ବପୁଦି ଲୋକୁ ମି ଗୌରବ୍‍ କିନାର୍‌ ମାରି ନିସ୍ଟୁର୍‌ତି କୁଡ଼ାଦି ଗାଡ଼୍‌ ନିଙ୍ଗିଁ ତିଲାନାତ୍‌ । 4 ଇରିଙ୍ଗ୍‌ ନିନ୍‌ ସିଲିସାତିୱାରି ମାନୁ ବାସାକିନି କିନ୍ଦା ଆନି, ସିଲିସାତି ଲୋକା କାସ୍ଟୁ ବେଡ଼ାଦୁ ୱାନି, ନିସ୍ଟୁର୍‌ତି ଲୋକା ପୁଣ୍ଡା ନାଣ୍ଡ ନୋପି ୱାଜା ଗଡାଦୁ ମିସାନି ୱାଲେ ନାଣ୍ତ ନୋପିଦିଙ୍ଗ୍‌ ସାନ୍ତି କିନି ବାଡି, ତେର୍‌ୱେଲ୍‌ଦି ବେଡ଼ାଦୁ ନିଡ଼୍‍ଗା ଆତିମାନି । 5 ଏଣ୍ଡେସ୍‌ ମିର୍‌ ୱାର୍‌ତି ବୁମିଦି ଦେସ୍‌ତୁ ତାତିଦିଙ୍ଗ୍‌, ଆୟାୱାଜା ଆଇ ଦେସ୍‌ତି ଲୋକା ଆଉଲିଦିଙ୍ଗ୍‌ ସୁପ୍‍ କିନିଦେର୍‌; ଏଣ୍ଡେସ୍‌ ବାଦଡ଼୍‌ଦି ନିଡ଼୍‍ଗା ଦାନ୍‌ ତାତି ଉଣା ଆତାମାନାତ୍, ଆୟାୱାଜା ନିସ୍ଟୁର୍‌ ଲୋକା ଆଉଲିଦିଙ୍ଗ୍‌ ତିର୍‌ କିଦୁ ।

6 ମାରି, ପେରିସାକ୍ତିଦି ସଦାପ୍ରବୁ ଇୟା ଗରନ୍‌ତୁ ୱିଜୁ କୁଡ଼ାଦି ଉଣ୍ତିଙ୍ଗ୍‌ ନେଗି ନେଗି କାଦି ଜିନିସ୍‌ତି ଉନ୍‌ଡ୍ରି ବଜି, ପାଡ଼ିଇ ଅଙ୍ଗୁର୍‌ରସ୍‌କୁ, କଡ଼୍‌ୱେସ୍‌ତାନ୍‌ ପୁରା ନେଗି କାଦିଙ୍ଗ୍‌, ନେଗେନ୍‌ତାନ୍‌ କିତି ପାଡ଼ିଇ ଅଙ୍ଗୁର୍‌ରସ୍‌ଦି ନେଗି କାଦି ଜିନିସ୍‌କୁ, ଉନ୍‌ଡ୍ରି ବଜି ତିୟାର୍‌ କିନାନ୍‌ । 7 ମାରି, ୱିଜୁ କୁଡ଼ାଦି ମୁସୁକୁ ଆମା ସାଦର ପିଡ଼୍‌କିତାମାନାତ୍‌ ମାରି ୱିଜୁ ଦେସ୍‌ତି ଲୋକା ମୁସୁକୁ ଆମା ପିଡ଼ିଗ୍‌ନି ସାଦର ସାରିତାମାନାତ୍‌, ଆକା ୱାନ୍‌ ଇୟା ଗରନ୍‌ତୁ ସାପିସ୍‌ କିନାନ୍‌ । 8 ୱାନ୍‌ ସାନିଦାନିଙ୍ଗ୍‌ ୱିଜୁଦିନ୍‌ତି ଉଣ୍ତିଙ୍ଗ୍‌ ନାଷ୍ଟୁ କିତାମାନାନ୍‌ ମାରି ମାପୁରୁ, ସଦାପ୍ରବୁ, ୱିଜୁଲୋକା ମକମ୍‍ତି କାଣେର୍‌ ତେଲ୍‌ନା ସିନାନ୍‌ ମାରି ୱିଜୁ ଦୁନିଆଦାନ୍‌ ନିଜେ ଲୋକାଦି ପାପ୍‌ ଆକ କିନାନ୍‌; ଇରିଙ୍ଗ୍‌ ସଦାପ୍ରବୁ ଇୟା ମାଟା ଇର୍ହାମାନାନ୍‌ । 9 ମାରି, ଆୟାଦିନ୍‌ତୁ ଇୟା ମାଟା ଇନାୟ୍‌ ଆନାତ୍‌, "ସୁଡ଼ୁଦୁ, ମା ମାପୁରୁ; ମାପ୍‌ ୱାନିଙ୍ଗ୍‌ କାପ୍‌କିଜିନାପ୍ ମାରି ୱାନ୍‌ ମାଙ୍ଗିଁ ଉଦାର୍‌ କିନାନ୍‌; ଇକାନ୍‌ ନେ ସଦାପ୍ରବୁ; ମାପ୍‌ ୱାନିଙ୍ଗ୍‌ କାପ୍‌କିଜିନାପ୍‌, ମାପ୍‌ ୱାନି କିତି ରକିୟାଦାନ୍‌ ୱେଡ଼ିକା ଆଜି ୱେଡ଼ିକା କିନାପ୍‌ ।"

10 ଇରିଙ୍ଗ୍‌ ଇୟା ସିୟୋନ ଗରନ୍‌ତୁ ସଦାପ୍ରବୁଦି କିୟୁ ତେବାତା ମାନାତ୍, ମାରି ଏଣ୍ଡେସ୍‌କି ଗାତାମ୍‌ ଗାଦିଦି ଏରୁଦାନ୍‌ ପାଦାମ୍‌ତାନ୍‌ ମାଟାନାର୍, ଆୟାୱାଜା ମୋୟାବ ଆୟା ବାଡିଦୁ ମାଟାନାର୍‌ । 11 ମାରି, ପୋଙ୍ଗ୍‌ରାନିକାନ୍‌ ଏଣ୍ଡେସ୍‌ ପୋଙ୍ଗ୍‌ରାଦେଙ୍ଗ୍‌ କିକୁ ସାର୍‌ପ୍‌ନାନ୍‌, ଆୟାୱାଜା ମୋୟାବଦି ଲୋକୁ ଆବେନୁ ନିଜେଦି କିକୁ ସାରାପ୍‌ନାର୍‌; ମାତର୍‌ ସଦାପ୍ରବୁ ୱାନି କିୟୁ ସାର୍‌ପ୍‌ସି ଗର୍ବ କିଜିମାନି ଲୋକାଙ୍ଗ୍‌ ସାପିନ୍‌ କିନାନ୍‌ । 12 ମାରି, ୱାନ୍ ନିରିଇ କାତିଦିଙ୍ଗ୍‌ ଡାଟ୍‌ତି ନିରିଇ ମୁଣ୍ତାଦିଙ୍ଗ୍‌ ନାସ୍ଟୁ କିତାମାନାନ୍‌ ମାରି ଦାନିଙ୍ଗ୍‌ ଦ୍ୱଂସ କିଜି ଦୁଡ଼ିଦୁ ମିସା କିତାମାନାନ୍‌ ।