1 ନିଜେ ଡଙ୍ଗାଁ କିଏତିଙ୍ଗ୍‌ ବା ମିର୍‌ ଜେ ଡଙ୍ଗାଁ କିଜିନିଦେର୍‌; ମାରି, ଲୋକୁ ମି ଉଣ୍ତିଙ୍ଗ୍‌ ଟକେ କିଏତିଙ୍ଗ୍‌ ବା ମିରୁ ଜେ ଟକେ କିଜିନିଦେର୍‌, ମିର୍‌ ଦଣ୍ତ୍‌ ପୋଇନି ଲୋକୁ ! ମିର୍‌ ଡଙ୍ଗାକିତି ୱିସ୍‌ତି ୱେନ୍‌କା ଡଙ୍ଗାଁ ଆନିଦେର୍‌ ମାରି ଟକେ କିତି ୱିସ୍‌ତି ୱେନ୍‌କା ଲୋକୁ ମି ଉଣ୍ତିଙ୍ଗ୍‌ ଟକେ କିନାର୍‌ ।

2 ଏ ପ୍ରବୁ, ମା ଉଣ୍ତିଙ୍ଗ୍‌ ଦୟା କିଆ; ମାପ୍‌ ନିଙ୍ଗିଁ କାପ୍‌କିଜିନାପ୍‌; ନିନ୍‌ ୱିଜୁ ସାଲ୍‌ଦି ୱେଡ଼ାଦୁ ୱାରି ସାକ୍ତି ୱାଜା ଆଆ, ସାନି ୱେଡ଼ାଦୁ ବା ମା ରକିୟା କିନିକାନ୍‌ ୱାଜା ଆଆ । 3 ଜାଟିଙ୍ଗ୍‌କିନି ଆଉଲିଦାନ୍‌ କୁଡ଼ାଦିକାର୍‌ ଉର୍‌କୁତାର୍‌, ମିରୁ ନିଙ୍ଗ୍‌ଦୁ, ଆଇ ଦେସ୍‌ତିକାର୍‌ ଇନିଙ୍ଗାଁ ଆନିଙ୍ଗାଁ ଆତାର୍‌ । 4 ମାରି, ଏଣ୍ତେସ୍‌ ଜିଜିମଇନା ଉଣ୍ଡା କିନାର୍‌, ଆୟାୱାଜା ମି ଡଙ୍ଗାଁ କିତିକା ଉଣ୍ଡାନାତ୍‌; ଏଣ୍ତେସ୍‌ ମାଡ଼ିମାଉକୁ ଗାତ୍‍ନେ, ଆୟାୱାଜା ଲୋକୁ ଆୟା ମୁସୁକୁ ଡାଟ୍‌ନାର୍‌ ।

5 ପ୍ରବୁ ପେରିକାନ୍‌; ଇରିଙ୍ଗ୍‌ ୱାନ୍‌ ୱିଜେରି ମୁସ୍‌କୁ ବାସା କିନାନ୍‌; ୱାନ୍‌ ସିୟନଦିଙ୍ଗ୍‌ ନିୟାଇ ବିସାର୍‌ ମାରି ଦାର୍ମୁଦାନ୍‌ ପୁରା କିତାମାନାନ୍‌ । 6 ମାରି, ମି ବେଡ଼ାଦୁ ତିର୍‌ ଆନାତ୍‌; ରକିୟାଦି, ଗିୟାନ୍‌ଦି ମାରି ବୁଦିଦି ସାକ୍ତି ନାଣ୍ତ ଆନାତ୍‌; ସଦାପ୍ରବୁଦି ତିୟେଲ୍‌ ୱାନି ଇଲୁଦି କୁସିକାଣ୍ତି ଆନାତ୍‌ ।

7 ସୁଡ଼ୁଦୁ, ୱାରି ସାକ୍ତିଦିକାର୍‌ ଆତ୍ରେ ଆଡ଼୍‌ବାଜିନାର୍‌; ସାନ୍ଦି ରେବାନି କାବୁର୍ ସିନିକାର୍‌ ନାଣ୍ଡ୍‌ ଆଡ଼୍‌ବାଜିନାର୍‌ । 8 ରାଜାଦି ସାରି ୱିଜୁ ଲୋକୁ ସିଲିକା ଆତାମାନାତ୍‌, ଆବେନୁ ଏନ୍‌ ସିଲେନ୍‌; ୱାନ୍‌ ନିୟମ୍‌ ରୁକୁତାମାନାନ୍‌, ୱାନ୍‌ ଗାଡ଼୍‌କୁ ୱିଜୁ ଗିଣି କିତାମାନାନ୍‌, ୱାନ୍‌ ଲୋକାଙ୍ଗ୍‌ ଇସାବ୍‌ କିଏନ୍‌ । 9 ଦେସ୍‌ ଆଡ଼୍‌ବାଜି ମାଇତା ମାନାତ୍‌; ଲିବାନୋନ ସେମାର୍‌ ଆଜି ୱାର୍‌ସିନାତ୍‌; ସାରଣ ଗରନୁ ୱାଜା ଆତାମାନାତ୍‌; ମାରି ବାସନ ମାରି କର୍ମିଲ୍‌ ଆକୁ ସାଡ଼୍‌ସିନାନ୍‌ ।

10 ପ୍ରବୁ ଇଜିନାନ୍‌, "ନାନୁ ଇଲେଇ ନିଙ୍ଗ୍‌ନା, ନାନୁ ଇଲେଇ ନିଜେଦିଙ୍ଗ୍‌ ନିକ୍‌ନା ।" ନାନ୍‌ ଇଲେଇ ଶାକ୍ତି ଆନା । 11 ମିରୁ ୱିଜିଦେର୍‌ ଦାରାସିଲି ଉପାୟ୍‌ କିଜିନିଦେର୍‌ ମାରି ମିରୁ କିଜିମାନି ୱିଜୁ ପାଣି ଦର୍‌କାର୍‌ ସିଲିକା । ନା ଆତ୍ମା ସିସୁଦି ୱାଜା ଆମାକା ମିଙ୍ଗିଁ ସାପିସ୍‌ କିନାତ୍‌ । 12 ମାରି, କୁଡ଼ାଦି ଲୋକୁ ୱେତିମାନି କାର୍‌ନି ସୁନ୍‌ ୱାଜା ମାରି ସିସୁଦୁ କାଡ୍‌ନି ସାମୁକୁ ୱାଜା ଆନେ । 13 ଏ ଆକରି ଲୋକୁ ୱିଜେରେ, ମିରୁ ମା କିତି ପାଣିଦି ମାଟା ୱେଣ୍ଡ୍ରୁ; ମାରି, ଏ ଲାକ୍‌ତୁରି ଲୋକୁ ୱିଜେରେ, ମିରୁ ମା ସାକ୍ତି ନେସ୍‌ତୁ ।

14 ସିୟୋନଦୁ ପାପି ଲୋକୁ ତିଲାନାର୍‌; ଅଦାର୍ମୁଦି ଲୋକାଙ୍ଗ୍‌ ଦାପ୍ରେ ଡାକ୍‌ତା ମାନାତ୍ । ମା ମାଣାନ୍‌ ଏନ୍‌ ସାପିସ୍‌ କିନି ସିସୁଦୁ ବାସା କିଦେଙ୍ଗ୍‌ ଆଟ୍‌ନାନ୍‌ ? ମା ମାଣାନ୍‌ ଏନ୍‌ ଏସେଙ୍ଗ୍‌ ୱିଜ୍ଇ ଏରୁଦୁ ବାସା କିଦେଙ୍ଗ୍‌ ଆଟ୍‌ନାନ୍‌ ? 15 ଆମା ଲୋକୁ ଦାର୍ମୁଦି ସାରିଦୁ ବୁଲାନାନ୍‌ ମାରି ଏନ୍‌ ନେଗି ମାଟା ଇନାନ୍‌; ଆମା ଲୋକୁ ସେଇମାଟାଦିଙ୍ଗ୍‌ ଗିଣି କିନାନ୍‌ ମାରି ଲାସ୍‌ ଆସ୍‌ନି ବିସୟ୍‌ତାନ୍‌ ନିଜେଦି କିୟୁ ସାଡ଼୍‍ନା ସିନାନ୍, ଏନ୍‌ କାତ୍‌ନିଗୁତ୍‌ନି ମାଟାଦିଙ୍ଗ୍‌ ୱେନିମାଣାନ୍‌ ନିଜେଦି ଗିତଣିଙ୍ଗ୍‌ ମୁକ୍‌ନାନ୍‌, ମାରି ଦାରିପାଣି ସୁଡ଼ିନି ମାଣାନ୍‌ ନିଜେଦି କାଣୁକୁ ମୁକ୍‌ନାନ୍‌; 16 ୱାନ୍‌ ଉଚା ବାଡିଦୁ ବାସା କିନାନ୍‌; ପିଡ଼ିପି କାଲୁଦି ମେଡ଼୍‌ ଇଲୁ ମି ତେବାନି ବାଡି ଆନାତ୍‌; ୱାନି କାଦି ୱାନିଙ୍ଗ୍‌ ସିଆଇ ଆନାତ୍‌; ୱାନିଙ୍ଗ୍‌ ଏରୁ ଉଣା ଆଏଣ୍ତା ଆନାତ୍‌ ।

17 ମି କାଣାଗା ରାଜାଦିଙ୍ଗ୍‌ ୱାନି ସୁନ୍ଦର୍‌ତାନ୍‌ ସୁଡ଼ୁନାନ୍‌; ଉନ୍‌ଡ୍ରି ଆକରି ଦେସ୍‌ ସୁଡ଼ୁନାନ୍‌ । 18 ମି ମନ୍‌ ତିୟେଲ୍‌ ବିସୟ୍‌ ଏତ୍‌ କିନାତ୍‌; ଆୟା ଇସାବ୍‌ କିନିକାନ୍‌ ଏମେ ? ଅଦ୍‌ଲି ଇସାବ୍‌ କିନିକାନ୍‌ ଏମେ ? ନିର୍‌ଇ ଇଲୁକୁ ଇସାବ୍‌ କିନିକାନ୍‌ ଏମେ ? 19 ମିର୍‌ ଆୟା ଆକରି କୁଡ଼ାଦିଙ୍ଗ୍‌, ଇର୍ରିଙ୍ଗ୍‌, ଆମାୱାରି ବାସା ମିର୍‌ ନେସ୍‌ତେଙ୍ଗ୍‌ ଆଟ୍‌ଏତିଦେର୍‌, ଆମାୱାରି ଆଇ ଦେସ୍‌ତି ଲୋକା ବାସା ମିର୍‌ ବୁଜାଦେଙ୍ଗ୍‌ ଆଟ୍‌ଏତିଦେର୍‌, ଆୟା କୁଡ଼ାଦିଙ୍ଗ୍‌ ମାରି ସୁଡ଼ୁଇଦେର୍‌ । 20 ମା ପବିତ୍ର ବାଡି ସିୟୋନ ଗାଡ଼୍‌ ଉଣ୍ତିଙ୍ଗ୍‌ ସୁଡ଼ୁଦୁ; ମି କାଣୁକୁ ସାନ୍ତିଦି ବାସାନି ବାଡି ଜିରୁସାଲମତିଙ୍ଗ୍‌ ସୁଡ଼ୁନିଦେର୍‌, ଆକା ଆଟ୍‌ୱାଦି ଗୁଡ଼ାଦି ୱାଜା, ଆବେଣି କୁଟିଙ୍ଗ୍‌ ୱିଜୁ ଏସେଙ୍ଗ୍‌ ରେଲାଇ ଆଉ, ମାରିବା ଆବେଣି ଏମେବା ନାସୁ ତେୱେଏତ୍‌ । 21 ମାତର୍‌ ଆବେନୁ ସଦାପ୍ରବୁ ସାକ୍ତିଦାନ୍‌ ମା ୱାଲେ ଅର୍‌ସେ ମାନାନ୍‌, ଅସାର୍‌ତି ଗାଡେଙ୍ଗ୍‌ ମାରି ଏରୁସନି ଜଲା ଜାଗା ୱାଜା ଆନାତ୍‌; ଆୟା ବାଡିଦୁ ଆମା ସାଟ୍‌ୱାଦାନ୍‌ ସାଲାକିନି ଡଙ୍ଗେଙ୍ଗ୍‌ ସାଲାଉ, ମାରିବା ପେରି ଜାହାଜ୍‌କୁ ଆକା ନାତେଙ୍ଗ୍‌ ଆଟ୍‍ଉ । 22 ଇର୍ରିଙ୍ଗ୍‌ ସଦାପ୍ରବୁ ମା ବିସାର୍‌ କିନିକାନ୍‌, ସଦାପ୍ରବୁ ମା ନିୟମ୍‌ ସିନିକାନ୍‌, ସଦାପ୍ରବୁ ମା ରାଜା, ୱାନ୍‌ ମାଙ୍ଗିଁ ରକିୟା କିନିକାନ୍‌ । 23 ମି ପିରି ନାସ୍‍କୁ ୱିଜୁ ଡ଼େବୁ ଆତେ ମାନେ, ଆୟା ୱିଜୁ ନିଜେଦି କାଟାଦିଙ୍ଗ୍‌ ଡାଟ୍‌ ମାରି ନାସୁଦିଙ୍ଗ୍‌ ସାକ୍‍ତେଙ୍ଗ୍‌ ଆଟ୍‌ଏତାତ୍‌; ନାସ୍ତିୱାଲେ ନାଣ୍ଡ୍‌ ଡଙ୍ଗାକିତି ଜିନିସ୍‌ ବାଟା କିୟାଇଆତାତ୍‌; ସଟା ଲୋକୁ ଡଙ୍ଗାକିତି ଜିନିସ୍‌ ଆସ୍‌ତାନ୍‌ । 24 ମାରି, ନାନୁ ରୋଗ୍‌ତୁ ମାନା ଇଜି ସିୟୋନଦୁ ବାସା କିତି ମାନି ଲୋକୁ ଇନ୍‌ଏର୍‌; ଆବେନୁ ବାସାତିଲୋକାଙ୍ଗ୍‌ ଦସ୍‌ କେମା କିଆଇ ଆନାତ୍‌ ।