1 ଜିରୁସାଲାମ୍‌ତି ବିସୟ୍‌ତାନ୍‌ ବାବବାଣି ମାଟା । ଇଲେଇ ମିଦି ଇନିକା ଆଜିନାତ୍‌ ଜେ, ମିର୍‌ ୱିଜେରେ ଇଲୁଦି ସାତ୍‌ ମୁସୁକୁ ସର୍ହିମାନିଦେର୍‌ ? 2 ଏ ୱେଡ଼ିକାଦି ଆଉଲିଦାନ୍‌ ପୁରା ମାନି ଗାଡ଼୍‌, ଆଉଲିଦାନ୍‌ ମିସାତି ମାନି ଗାଡ଼୍‌; ମି ସାତି ଲୋକୁ କାଣ୍ତାଦାନ୍‌ ସାଏର୍‌, ମାରିବା ୱାର୍‌ ଜୁଦ୍‌ତାନ୍‌ ସାଏର୍‌ । 3 ମି ସାସନକିନିକାର୍‌ ୱିଜେରେ ଅର୍‌ସେ ଉରୁକ୍‌ତାର୍‌, ୱାର୍‌ ଧନୁ ରେଲ୍‌ଇ ଆଗ୍‌ଡ଼ିରାନ୍‌ ଲୋକା ମାଣାନ୍‌ ତରାତାର୍‌; ମି ମାଣାନ୍‌ ଦାରାସିତି ୱିଜୁ ଲୋକୁ ଅର୍‌ସେ ତରାତାର୍‌, ୱାର୍‌ ଆକ ସର୍ହାର୍‌ । 4 ଇୟାଉଣ୍ଡିଙ୍ଗ୍‌ ନାନ୍‌ ଇର୍ହା, "ନାଙ୍ଗି ଡ଼ିସିଆ ଆଇ ତରିନ୍‌ ବେସ୍‌ଆ, ନାନ୍‌ ନାଣ୍ଡ୍‌ ଆଡ଼୍‌ବାନା; ନା କୁଡ଼ାଦି ସାତି ବିସୟ୍‌ତାନ୍‌ ନାଙ୍ଗିଁ ସାନ୍ତି କିନି ଉଣ୍ତିଙ୍ଗ୍‌ ସେସ୍ଟା କିମାଟ୍‌ । 5 ପେରିସାକ୍ତିଦି ସଦାପ୍ରବୁଦି ତିର୍‌ କିତିମାନି ଦିନ୍‌ ଆନାତ୍‌, ଇରିଙ୍ଗ୍‌ ଜିରୁସାଲମ୍‌ତି ଗରକାଣି ବାଟାବାଇଲୁଦୁ ଆଉଲି ମାରି ୱିଦ୍‌ନିକା ମାରି କିଲିବିଲି ଆନାତ୍‌ ଗାଡ଼୍‌ତି କାତି ରୁଙ୍ଗ୍‌ନିକା ମାରି ଆଡ଼୍‌ବାନି ଆଉଲି ଗରକା ସାନ୍ଦି ସନାତ୍‌ ।"

6 ମାରି, ଏଲମ୍‌ ରତ ମାରି ଗଡ଼ା ସାଲାକିନି ସନ୍ୟରି ୱାଲେ ଦନୁ ତିର୍‌ ଆସ୍‌ତାର୍‌ ମାରି କିର୍‌ତି ସନ୍ୟ ଆଡୁକାକିନିକା ଡ଼ିସ୍‌ତାନ୍‌ । 7 ମାରି, ଯିହୁଦାଦି ମି ଗରତି ନିମା ବାଡିଙ୍ଗ୍‌ ୱିଜୁ ରତଙ୍ଗା ପୁରାବର୍ତି ଆତେ ମାର୍ହେ ମାରି ଗଡ଼େଙ୍ଗ୍‌ ସାଲାକିନିକାର୍‌ ଗାଡ଼୍‌ତି ସେର୍‌ଲାଦୁ ତିଆର୍‌ ଆତା ମାର୍ହାର୍‌ । 8 ମାରି, ପ୍ରବୁ, ଜିହୁଦାଦି ୱିଜୁ ରକିୟା କିନି ସାରିଦିଙ୍ଗ୍‌ ରୁକ୍‌ତା ପୋକ୍‌ତାନ୍‌ ମାରି ଆୟା ନାଣ୍ତିଙ୍ଗ୍‌ ମିର୍‌ ବନୁତୁ ମାନି ଇଣ୍ଡ୍ରଣି ଜୁଦ୍ଧକିନି ସାଜୁଦିଙ୍ଗ୍‌ ସୁଡ଼ୁତାନ୍‌ । 9 ମାରି, ଦାଉଦ ଗାଡ଼୍‌ତି ନାସ୍ଟୁଆତି ବାଡିଙ୍ଗ୍‌ ନାଣ୍ଡ୍‌ ଇଜି ମିର୍‌ ସୁଡ଼ୁତିଦେର୍‌ ମାରି ଆଡ୍‌ଗିରି ବାନ୍ଦୁଙ୍ଗାଣି ଏରୁ ୱିଜୁ ଉଣ୍ଡ୍ରେବାନୁ କିତାନ୍‌ । 10 ମାରି, ମିରୁ ଜିରୁସାଲମତି ଇଲ୍‌କୁ ୱିଜୁ ଇସାବ୍‌ କିତିଦେର୍‌ ମାରି ଗଡା ଆଟୁୱା କିନି ଉଣ୍ତିଙ୍ଗ୍‌ ଇଲ୍‌କୁ ୱିଜୁ ରୁକ୍‍ତିଦେର୍‌ । 11 ମିରୁ ପାଡ଼ିଇ ବାନ୍ଦୁଙ୍ଗାଣି ଏରୁ ଉଣ୍ତିଙ୍ଗ୍‌ ରିଆଙ୍ଗାଁଦି ଗଡେଙ୍ଗାଁଣି ନାଣିମି ବାଡିଦୁ ଏରୁ କୁଣ୍ତି ତିୟାର୍‌ କିତାର୍‌; ମାତର୍‌ ଏନ୍‌ ଇକା ତିଆର୍‌ କିତାନ୍‌, ମିର୍‌ ୱାନି ଉଣ୍ତିଙ୍ଗ୍‌ ସୁଡ଼ୁଏତିଦେର୍‌, ମାରିବା ଏନ୍‌ ନାଣ୍ତଦିନ୍‌ତାନ୍‌ ତାନିଙ୍ଗ୍‌ ତିଆର୍‌ କିତାନ୍‌, ମିରୁ ୱାନିଙ୍ଗ୍‌ ଜିବନ୍‌ନୋଏତିଦେର୍‌ ।

12 ମାରି, "ଆୟା ନାଣ୍ତିଙ୍ଗ୍‌ ମାପୁରୁ, ପେରିସାକ୍ତିଦି ସଦାପ୍ରବୁ ଆଡ଼୍‌ବାଦେଙ୍ଗ୍‌ ମାରି ଏତ୍‌କିଦେଙ୍ଗ୍‌ ମାରି ତାଲା ଟାଙ୍ଗୁରୁ କିଦେଙ୍ଗ୍‌ ମାରି ଜୁକିଦୁ ତୋରାଦେଙ୍ଗ୍‌ ବାସ୍ତା ଆରାଦେଙ୍ଗ୍‌ କୁକୁତାନ୍‌; 13 ମାତର୍‌ ସୁଡ଼ୁଦୁ, ୱେଡ଼ିକା କିଜି, କଡିସାପିସ୍‌ନିକା ମାରି ମେଣ୍ଡା ଡାକ୍‌ସି, କାଣ୍ଡା ତିନିକା ମାରି ଅଙ୍ଗୁର୍‌ ରସ୍‌ ଉଣୁଜିନିକା; ରାଦୁ, ମାଡ୍‌ ଉଣାଟ୍‌ ତିନାଟ୍‌, ଇର୍ରିଙ୍ଗ୍‌ ୱିଗେ ମାଡ୍‌ ସାନାଟ୍‌ ।"

14 ମାରି, ସଦାପ୍ରବୁ ନିଜେ ମା ଗିତଣିଆଙ୍ଗ୍‌ ଇର୍ହାନ୍‌, ସତ୍‌ନେ ମି ସାନି ସାନ୍ଦି ମି ଇୟା ପାପ୍‌ କେମା ଆଏତ୍‌, ମାପୁରୁ ସଦାପ୍ରବୁ ଇୟାୱାଜା ଇନାନ୍‌ । 15 ମାପୁରୁ, ପେରିସାକ୍ତିଦି ସଦାପ୍ରବୁ ଇୟା ମାଟା ଇନାନ୍‌, ମିର୍‌ ଇୟା ଗୁମୁସ୍ତା ଲାକ୍‌ତୁ, ଇର୍ରିଙ୍ଗ୍‌, ରାଜା ଇଲୁଦି ଗୁମୁସ୍ତା ସିବ୍‌ନ ଲାକ୍‌ତୁ ସୋଲ୍‌ସି ଇଣ୍ଡ୍ରୁ, 16 ନିନୁ ଇବେନୁ ଇନିକା କିଜିନି ? ମାରି ଇବେନୁ ନିଙ୍ଗିଁ ଏନ୍‌ ସାରି ମାନାନ୍‌ ଜେ, ନିନ୍‌ ନିଜେଦି ଉଣ୍ତିଙ୍ଗ୍‌ ଉନ୍‌ଡ୍ରି ମୁସାନିଗୁଟା କାର୍‌ଜିନି ? ୱାନ୍‌ ଉଚା ବାଡିଦୁ ନିଜେଦି ଗୁଟା କାରିତାମାନାନ୍‌ ମାରି ପିଡ଼ିପିକାଲୁଦୁ ନିଜେଦି ଉଣ୍ତିଙ୍ଗ୍‌ ବାସାକିନି ବାଡି କାରିତା ମାନାନ୍‌ ! 17 ସୁଡ଼ୁଦୁ, ପ୍ରବୁ ୱାନି ବପୁଦାନ୍‌ ମିଙ୍ଗିଁ ଆସ୍‌ସି ପେର୍‌ଜି ଆକ ପୋକ୍‌ନାନ୍‌ । 18 ସତ୍‌ନେ ୱାନ୍‌ ବଲୁ ୱାଜା ମିଙ୍ଗିଁ ତିର୍‌ପିସି ଆସ୍‌ସି ପେରି ଦେସ୍‌ତୁ ପୋକ୍‌ନାନ୍‌; ଆବେନୁ ନିନୁ ଗର୍ବ କିଜିମାନି ରତ୍‌ ଲାକ୍‌ତୁ ସାନି, ନିନୁ ନିଜେଦି ସାଉକାର୍‌ତି ଇଣ୍ଡ୍ରଣି ସେମାର୍‌ ୱାଜା । 19 ମାରି, ମାପ୍‌ ନିଙ୍ଗିଁ ନି ପୋଦତାନ୍‌ ରେପ୍‌ନାପ୍‌ ମାରି ୱାନ୍‌ ନିଙ୍ଗିଁ ନି ପଦ୍‌ତାନ୍‌ ରେଲ୍‌ଜିତାସି ଆଡ୍‌ଗି ଆର୍‌ପ୍‌ନାର୍‌ ।

20 ମାରି, ଆୟା ନାଣ୍ତିଙ୍ଗ୍‌ ମାପ୍‌ ନିଜେଦି ଦାସ୍‌ତିଙ୍ଗ୍‌, ହିଲ୍‌କିୟଦି ମାରିନ୍‌ ଇଲିୟାକିମ୍‌ଦିଙ୍ଗ୍‌ କୁକୁନାଟ୍‌; 21 ମାରି, ମାପ୍‌ ନି ଆଙ୍ଗିଁ ୱାନିଙ୍ଗ୍‌ ଆରିସ୍‌କିନିକା ମାରି ନି ଜୁକିଦାନ୍‌ ୱାନିଙ୍ଗ୍‌ ସାକ୍ତି କିନିକା ମାରି ନିଙ୍ଗିଁ ସିଆତିମାନି ଅଦିକାର୍‌ ୱାନି କିୟୁଦୁ ସର୍ପେ କିନିକା; ଆବେନୁ ୱାନ୍‌ ଜିରୁସାଲମତି ଲୋକୁ ମାରି ଜିହୁଦା କୁଟୁମ୍‌ଦି ବୁବାସି ଆନାନ୍‌ । 22 ମାରି, ମାପ୍‌ ଦାଉଦ କୁଟୁମ୍‌ଦି ତାଲାମ୍‌ କାଣ୍ତି ୱାନି କିୟୁଦୁ ସିନାପ୍‌, ୱାନ୍‌ ରେତିଙ୍ଗା, ଏନ୍‌ ବନ୍ଦ କିଏର୍‌ ମାରି ୱାନ୍‌ ବନ୍ଦ କିତିଙ୍ଗା, ଏନ୍‌ ବା ରେଏର୍‌ । 23 ମାରି, ମାପ୍‌ କୁଟି ୱାଜା ଉନ୍‌ଡ୍ରି ନେଗି ବାଡିଦୁ ୱାନିଙ୍ଗ୍‌ ଡାକ୍‌ନାପ୍‌ ମାରି ୱାନ୍‌ ନିଜେଦି କୁଟୁମ୍‌ଦି ଗୌରବ୍‍ ରାଜାଗାଦିଦି ୱାଜା ଆନାନ୍‌ ।

24 ମାରି, ଲୋକୁ ୱାନି କୁଟୁମ୍‌ଦି ୱିଜୁ ଗୌରବ୍‍, କଡ଼୍‌ର୍‌ଆଇଲିକ୍‌ ମାରି ଉଣି ଡୁବାଇଣାନ୍‌ ନକି ସାନ୍ଦି ୱିଜୁ ଇସ୍‌ରି ଡୁବାଇ ଆୟା ମୁସୁକୁ ଡ଼ନିଦେର୍‌ । 25 ପେରିସାକ୍ତିଦି ସଦାପ୍ରବୁ ଇନାନ୍‌, "ଆମା କୁଟି ନେଗି ବାଡିଦୁ ଡାକାତା ମାର୍ହାତ୍‌, ଆକା ଆୟା ନାଣ୍ତିଙ୍ଗ୍‌ ୱିଜ୍‌ନା ସୋନାତ୍‌ ମାରି ଆକା କତାଇ ଆଜି ଆଡ୍‌ଗି ଆର୍‌ନାତ୍‌, ମାରି ଆୟା ମୁସୁକୁ ମାର୍ହି ବଜୁ ନାସ୍ଟୁ ଆନାତ୍‌, ଇରିଙ୍ଗ୍‌ ସଦାପ୍ରବୁ ଇକା ଇର୍ହାମାନାନ୍‌ ।"