1 ପ୍ରବୁ ଇୟା ମାଟା ଇଜିନାନ୍‌, "ମିର୍‌ ନିୟାଇ ବିସାର୍‌ ମାନାଦୁ; ଦାର୍ମୁକାର୍ମୁ କିଦୁ; ଇରିଙ୍ଗ୍‌ ନା ରକିୟା କିନିକା ମାରି ନା ଦାର୍ମୁଦି ତର୍‌ନିକା ଇଗାୱାତାତ୍‌ । 2 ଆମା ଲୋକୁ ଇକା କିନାନ୍‌ ମାରି ଆମା ଲୋକୁ ଇକା ନେଗେନ୍‌ତାନ୍‌ ମାନାଏନ୍‌; ଆମାକାନ୍‌ ରମ୍‌ନିଦିନ୍‌ତିଙ୍ଗ୍‌ ମାନାଜି ଆକା ତାଗ୍‌ଇକା କିଏନ୍‌ ମାରି ୱିଜୁ ରକମ୍‌ଦି ତାଗ୍‌ଇପାଣିଦାନ୍‌ ନିଜେଦି କିୟୁଦିଙ୍ଗ୍‌ ଡ଼ିସ୍‌ନାନ୍‌, ୱାନ୍‌ ନେଗିକାନ୍‌ ।"

3 "ସତ୍‌ନେ ପ୍ରବୁ ନିଜେଦି ଲୋକାମାଣାନ୍‌ ନାଙ୍ଗି ୱେରେଏ କିନାନ୍‌," ଇକା ପ୍ରବୁଦିମାନୁ ଆଇଦେସ୍‌ତି ଲୋକୁ ଇନ୍‌ମାକିନ୍‌; ମାରିବା "ସୁଡ଼ୁଦୁ, ନାନ୍‌ ଉନ୍‌ଡ୍ରି ୱାର୍‌ତି ମାରାନୁ, ଇକା ବେଜୁ ଇନ୍‌ମାକିନ୍‌ ।" 4 ଇରିଙ୍ଗ୍‌, ବେଜୁରି ବିସୟ୍‌ତାନ୍‌ ସଦାପ୍ରବୁ ଇୟା ମାଟା ଇଜିନାନ୍‌, "ଆମାକାର୍‌ ମା ରମ୍‌ନିଦିନ୍‌ତିଙ୍ଗ୍‌ ମାନାନାର୍‌ ମାରି ମା ୱେଡ଼ିକା ବିସୟ୍‌ତିଙ୍ଗ୍‌ ମୋନ୍‌କିନାର୍‌ ମାରି ମା ନିୟମ୍‌ ମାନାନାର୍‌; 5 ୱାରିଙ୍ଗ୍‌ ନାନୁ ମା ଇଲୁ ଲୋଇ ମାରି ମା କାତି ଲୋଇ କଡ଼ର୍‌ ଆଇଲିକା ବାଦ୍‌ଲୁ ନେଗି ଏତ୍‌କିନି ମୁଣ୍ତା ମାରି ଦରୁ ସିନାଟ୍‌; ମାପ୍‌ ୱାରିଙ୍ଗ୍‌ ଏସ୍‌କାଙ୍ଗ୍‌ ୱିଜ୍‌ଇଦିନ୍‌ତି ଦରୁ ସିନାଟ୍‌, ଆକା କୟାଏତ୍‌ ।"

6 ମାରି, ଆମା ଆଇ ଦେସ୍‌ତି ଲୋକୁ ସଦାପ୍ରବୁଦି ପାଣି କିନି ଉଣ୍ତିଙ୍ଗ୍‌ ମାରି ସଦାପ୍ରବୁଦି ଦର୍‌ତିଙ୍ଗ୍‌ ଜିବନ୍‌ନୋନି ଉଣ୍ତିଙ୍ଗ୍‌ ମାରି ୱାନି ଦାସ୍‌ ଆନି ଉଣ୍ତିଙ୍ଗ୍‌ ସଦାପ୍ରବୁଦିମାନୁ ଆସା ଆନାର୍‌, ଇର୍ରିଙ୍ଗ୍‌, ଆମାକାର୍‌ ରୋମ୍‌ନି ଦିନ୍‌ତିଙ୍ଗ୍‌ ମାନାଜି ଦାନିଙ୍ଗ୍‌ ଅସୁଚି କିଏନ୍‌ ମାରି ମା ନିୟମ୍‌ ମାନାନାର୍‌; 7 ଆୟା ୱିଜେରିଙ୍ଗ୍‌ ମାପ୍‌ ନିଜେଦି ପବିତ୍ର ଗରନ୍‌ତୁ ତାନାପ୍‌ ମାରି ମା ପାର୍‌ତନା କିନି ଇଣ୍ଡ୍ରୋ ୱାରିଙ୍ଗ୍‌ ୱେଡ଼ିକା କିନାଟ୍‌; ୱାରି ହୋମବଲି ମାରି ପୁରାସିନି ପୁଜାୱିଜୁ ମା ବେଦି ମୁସୁକୁ ଆଡ଼ାକାନାତ୍‌; ଇର୍ରିଙ୍ଗ୍‌ ମା ଇଲୁ ୱିଜୁକୁଡ଼ାଦି ଲୋକା ପାର୍‌ତନାଇଲୁ ଇଜି ୱେଙ୍ଗ୍‌ନାତ୍‌ ।

8 ଆମାକାନ୍‌ ଇସ୍ରାଏଲଦି ଆକ ଆତି ମାନି ଲୋକାଙ୍ଗ୍‌ ଉଣ୍ଡା କିନାନ୍‌, ଆୟା ମାପୁରୁ, ପ୍ରବୁ ଇଜିନାନ୍‌, "ୱାନି ଉଣ୍ଡା କିତି ମାନି ନିଜେ ଲୋକା ମାଣାନ୍‌ ମାପ୍‌ ଆଇ ଲୋକାଙ୍ଗ୍‌ ୱାନି ଲାକ୍‌ତୁ ଉଣ୍ଡା କିନାଟ୍‌ ।"

9 ଏ ବୁମିଦି ଜାତୁଙ୍ଗ୍‌ୱିଜୁ, ଏ ବନୁଦି ଜାତୁଙ୍ଗ୍‌ୱିଜୁ, ମିର୍‌ ତିନ୍‌ଡ୍ରେଙ୍ଗ୍‌ ରାଦୁ । 10 ଦାନି କାପ୍‌କିନିକାନ୍‌ କାଣା, ୱାର୍‌ ୱିଜୁ ଲୋକୁ ବୁଦିସିଲିକାର୍‌; ୱାର୍‌ ୱିଜେରେ ଗୁଲା ନୁକୁଡ଼ିଙ୍ଗ୍‌, ୱାକ୍‌ ଆଉଲି ଆଦେଙ୍ଗ୍‌ ଆଟ୍‌ଉଁ; ୱାକ୍‌ ଲବସୁଣିକାର୍‌, ଗୁରୁଦେଙ୍ଗ୍‌, କରଜି କରଜି ଗୁରୁଦେଙ୍ଗ୍‌ ନେଗେଣ୍ଡ୍‌ ଇନାର୍‌ । 11 ମାରିବା, ଆୟା ନୁକୁଡ଼ିଙ୍ଗ୍‌ କାୱିରିଙ୍ଗ୍‌, ୱାକୁ ଏସେଙ୍ଗ୍‌ ପୋଟା ପାଜ୍‌ଉଁ; ମାରି, ଇୟାକାର୍‌ ଅଡ଼୍‌ବିଦେଙ୍ଗ୍‌ ସାକ୍ତି ସିଲି ଗଡ଼ୁ; ୱାର୍‌ ୱିଜେରେ ୱିଜୁତରିନ୍‌ ନିଜେ ନିଜେଦି ଲାବ୍‌ ଉଣ୍ତିଙ୍ଗ୍‌ ନିଜେ ନିଜେଦି ସାରି ତରିନ୍‌ ଡ଼େସିୱାତାମାନାର୍‌ । 12 ୱିଜେରେ ଇନାର୍‌, "ରାଦୁ, ମାଡ୍‌ ଅଙ୍ଗୁର୍‌ରସ୍‌ ତାନାଟ୍‌ ମାରି ମାଡ୍‌ କାଡ଼ୁଦାନ୍‌ ସୋସ୍‌ନାଟ୍‌; ମାରି, ଏଣ୍ତେସ୍‌ ନେରୁ, ଆୟାୱାଜା ୱିଗେରିଙ୍ଗ୍‌ ଆନାତ୍‌, ଆକା ଇସାବ୍‌ସିଲି ପେରିଦିନ୍‌ ଆନାତ୍‌ ।"