1 ପ୍ରବୁ ଇଜିନାନ୍‌, "ଆମା ବିରୁଦ୍‌ତି ଲୋକୁ ଉପାୟ୍‌ କିନାର୍‌, ମାତର୍‌ ମା ମାଣାନ୍‌ ସିଲେ; ମାରି, ଆମାକାର୍‌ ପାପ୍‌ ମୁସୁକୁ ପାପ୍‌ କିନି ଉଣ୍ତିଙ୍ଗ୍‌ ପିଡ଼ିକ୍‌ବାନୁ ପିଡ଼ିକ୍‌ନାର୍‌, ମାତର୍‌ ମା ଆତ୍ମାଦି ମାଣାନ୍‌ ସିଲେ, ୱାର୍‌ ଦଣ୍ତ୍‌ ପୋଇନି ଲୋକୁ ! 2 ୱାର୍‌ ମାଙ୍ଗିଁ ୱେନ୍‌ବାଏଣ୍ଡା ପାରଦି ସାକ୍ତିଦାନ୍‌ ନିଜେଦିୱାରିଙ୍ଗ୍‌ ବପୁ କିଦେଙ୍ଗ୍‌ ମାରି ମିସରତି ନିଡ଼ାଦୁ ତେବାନି ଉଣ୍ତିଙ୍ଗ୍‌ ମିସରଦୁ ସୋନି ଉଣ୍ତିଙ୍ଗ୍‌ ସୋଲ୍‌ସିନାର୍‌ । 3 ଇୟାଉଣ୍ଡିଙ୍ଗ୍‌ ପାରଦି ସାକ୍ତି ମିଙ୍ଗିଁ ସେମାର୍‌ଦିକା ଆନାତ୍‌ ମାରି ମିସରତି ନିଡ଼ାଦୁ ତେବାଦେଙ୍ଗ୍‌ ମିଙ୍ଗିଁ ଅପମାନ୍‌ ଆନାତ୍‌ । 4 ଇରିଙ୍ଗ୍‌ ୱାନି ପେରିକାର୍‌ ସୋୟନଦୁ ମାନାର୍‌ ମାରି ୱାନି କାବୁର୍ ସିନିକାର୍‌ ହାନେସଦୁ ୱାତାମାନାର୍‌ । 5 ଆମା କୁଡ଼ା ୱାରି ନେଗେନ୍‌ କିଦେଙ୍ଗ୍‌ ଆଟ୍‌ଏର୍‌, ୱାରି ବିସୟ୍‌ତାନ୍‌ ଆୟାୱିଜେରେ ସେମାର୍‌ ଆନାର୍‌, ଆୟା କୁଡ଼ା ସାକାକିନିକାର୍‌ ମାରି ନେଗେନ୍‌ କିନିକାର୍‌ ଆଏର୍‌, ମାତର୍‌ ସେମାର୍‌ ମାରି ସେଇକାର୍‌ ୱାଜା ।"

6 ଡେବ୍‌ରା ତରଟି ଦେସ୍‌ତି ଜାତୁଙ୍ଗାଁ ବିସୟ୍‌ତି ବବିସତ୍‌ ମାଟା । ଆମା ବାଡିଦାନ୍‌ ମୁରୁଲି ମାରି ଡକ୍ରା ପାର୍ଟାନରେସ୍‌, ନାଗ୍‌ ସାରାସୁ ମାରି ଇମ୍‌ନି ସିସୁଡ଼ିବୁ ସାରାସୁ ୱାନାତ୍‌, ଇୟାୱାଜା ବାଦା ମାରି କାସ୍ଟୁଦି ଦେସ୍‌ ସିଜି ଆମାୱାରି ମାଣାନ୍‌ ୱାରି ନେଗିକା ଆଏତ୍‌, ଇୟାୱାଜା ଉନ୍‌ଡ୍ରି କୁଡ଼ାଦି ଲାକ୍‌ତୁ, ୱାର୍‌ ମୁରୁଲି ଗଦଙ୍ଗା ଗୁଜାମି ନିଜେଦି ଦନ୍‌ ମାରି ଉଟ୍‌କା ମୁଟାମି ମୁସୁକୁ ନିଜେଦି ସମ୍ପତ୍ତି ପିଣ୍ଡିନା ଅନାର୍‌ । 7 ଇରିଙ୍ଗ୍‌ ମିସରତି ମିସ୍‌ତାନ୍‌ ମାରି ବେକାର୍‌ତାନ୍‌ ସାହାଜ୍ୟ କିନା; ଇୟାଉଣ୍ଡିଙ୍ଗ୍‌ ମାପ୍‌ ୱାନିଙ୍ଗ୍‌ ପାଣି କିଏଣ୍‌ଗା ମାନ୍‌ଜିନି ରାହବ ଇଜି ଦରୁ ସିତାମାନା ।

8 ଇଲେଇ ସାଣ୍ଡ୍ରୁ, ୱାରି ଆଗ୍‌ଡ଼ି ଉନ୍‌ଡ୍ରି ପାଟାଦୁ ଆକା ରାସ୍‌ତୁ ମାରି ଆକା ଏଣ୍ଡେସ୍‌ଗି ୱାନି କାଡ଼ାଦି ଉଣ୍ତିଙ୍ଗ୍‌, ୱିଜୁକାଡ଼ା ସାନ୍ଦି ମାନ୍‌ଜିନାତ୍‌, ଇୟାଉଣ୍ଡିଙ୍ଗ୍‌ ଉନ୍‌ଡ୍ରି ତଲୁଦାନ୍‌ ତିଆର୍‌ ଆତିମାନି ବଇଦୁ ଆକା ରାସ୍‌ତୁ । 9 ଇରିଙ୍ଗ୍‌ ୱାର୍‌ ବିରଦ୍‌କିନି କୁଡ଼ା, ମିସ୍‌ ୱେର୍‌ନି ଲୋକୁ, ୱାର୍‌ ସଦାପ୍ରବୁଦି ନିୟମ୍‌ ମାନାଇ ଲୋକୁ; 10 ୱାର୍‌ ଦର୍ସନ ସୁଡ଼ୁନି ଲୋକାଙ୍ଗ୍‌ ଇନାର୍‌, "ମିର୍‌ ତରାଇ ଆମାଟ୍‌" ମାରି ବବିସଦ୍‌ ବକ୍ତାରିଙ୍ଗ୍‌ ଇନାର୍‌, "ମିର୍‌ ମା ଲାକ୍‌ତୁ ଟିକ୍‌ ବାକ୍ୟ ପ୍ରଚାର କିମା ମାରି ମାଙ୍ଗିଁ ନେଗି ମାଟା ୱେର୍‌ଆ ମାରି ବେମ୍‌ରିନାନି ବାକ୍ୟ ପ୍ରଚାର୍‌ କିଦୁ; 11 ମିର୍‌ ସାରିଦାନ୍‌ ସୋସି ସାଣ୍ଡ୍ରୁ, ସାରି ଡ଼ିସ୍‌ସ ସିଦୁ, ଇସ୍ରାଏଲତି ଦାର୍ମୁଦି ମାପୁରୁଙ୍ଗୁଁ ମା ଆଗ୍‌ଡ଼ିରାନ୍‌ ଆକ କିଆ ।"

12 ଇୟାଉଣ୍ଡିଙ୍ଗ୍‌ ଇସ୍ରାଏଲତି ଦାର୍ମୁଦି ମାପୁରୁ ଇୟା ମାଟା ଇନାନ୍‌, "ମିର୍‌ ଇୟା ବାକ୍ୟଦିଙ୍ଗ୍‌ କାଡ଼୍‌ଜିନିଦେର୍‌, ମାରି, ସେଇଦାନିଙ୍ଗ୍‌ ମାରି ସୁରିମାଟାଦୁ ବିସ୍‌ବାସ୍‌ କିଜି ଆୟା ମୁସୁକୁ ଆସା ଇଡ୍‌ଜିନିଦେର୍‌; 13 ଇୟାଉଣ୍ଡିଙ୍ଗ୍‌ ଉଚାଦି କୁନାଦିଦି ନାସ୍ଟୁ ଆନି ଆମା ଗଡାଦି ପାଡିତି ବର, ଦାପ୍ରେନେ ଅର୍‌ସେ ରୁଙ୍ଗୁନା ସନାତ୍‌, ଆୟାଦାନି ୱାଜା ଇୟା ଦସ୍‌ ମି ଉଣ୍ତିଙ୍ଗ୍‌ ଆନାତ୍‌ ।" 14 ମାରି, ଏଣ୍ଡେସ୍‌ଗି କୁମାର୍‌ଦି ସାଟି ପାଟ୍‌ନାର୍‌, ଆୟାୱାଜା ୱାନ୍‌ ଦୟା କିଏଣ୍ଡା ଆକା ଗୁଣ୍ଡାକିଜି କତ୍‌ନା ପୋକ୍‌ନାନ୍‌; ଆବେନୁ ସିସୁ ଗୁଟାଦାନ୍‌ ସିସୁ ମାରି କୁଣ୍ତ୍‌ଦାନ୍‌ ଏରୁ ଅନି ଉଣ୍ତିଙ୍ଗ୍‌ କାଣ୍ଡେକ୍‌ ସାଟିପିଡ଼ା ବା ଆବେଟାନ୍‌ ପୁଟ୍‌ଏତ୍‌ ।

15 ଇରିଙ୍ଗ୍‌ ମାପୁରୁ, ସଦାପ୍ରବୁ ଇସ୍ରାଏଲତି ଦାର୍ମୁଦି ମାପୁରୁ ଇର୍ହାନ୍‌, "ଡ଼େସି ୱାତିଙ୍ଗ୍‌ ମାରି ତିର୍‌ ଆତିଙ୍ଗ୍‌ ମିର୍‌ ରକିୟା ପୋଇନିଦେର୍‌; ତିର୍‌ତାନ୍‌ ମାରି ବିସ୍‌ବାସ୍‌ତାନ୍‌ ମି ବପୁ ଆନାତ୍‌, ମାରି, ମିର୍‌ ରାଜି ଆଏତିଦେର୍‌ । 16 ମାତର୍‌ ମିର୍‌ ଇର୍‌ଇଦେର୍‌, ସିଲେ, ମାପୁ ଗଡ଼ାଦୁ ଏକ୍‌ନାପ୍‌ ଉରୁକ୍‌ନାପ୍‌; ଇୟାଉଣ୍ଡିଙ୍ଗ୍‌ ମିରୁ ଉରୁକ୍‌ନି ଲୋକୁ ଆନିଦେର୍‌; ମାରି ଇର୍ହାନ୍‌, ମାପ୍‌ ନାଣ୍ତ ଉର୍‌କୁନି ଗଡ଼ାଦୁ ଏକ୍‌ନାପ୍‌; ଇୟାଉଣ୍ଡିଙ୍ଗ୍‌ ମି ୱେନ୍‌କା ଉଲ୍‌ପ୍‌ନି ଲୋକୁ ନାଣ୍ତ ଉର୍‌କୁନିକାର୍‌ ଆନାର୍‌ । 17 ଅରେନ୍‌ ଲୋକ୍‌ତି ଆଦ୍‌ରିସ୍‌ କିନି ମାଣାନ୍‌ ଏକ୍‌ ଆଜାର୍‌ ଲୋକୁ ଉରୁକୁନାର୍‌; ପାସ୍‌ ଲୋକ୍‌ ଆଦ୍‌ରିସ୍‌ କିନି ମାଣାନ୍‌ ମିର୍‌ ୱିଜିଦେର୍‌ ଉରୁକୁନିଦେର୍‌; ଆବେନୁ ମିର୍‌ ଗରତି ଟିପୁଦି ଉନ୍‌ଡ୍ରି ସିନା ୱାଜା ଆନିଦେର୍‌ ମାରି ଇସ୍ରି ଗରକାଙ୍ଗ୍‌ ଜେଣ୍ତାଦି ୱାଜା ଆଜି ତେବାନି ମାନିଦେର୍‌ ।" 18 ମାରି, ଆୟାଉଣ୍ତିଙ୍ଗ୍‌ ସଦାପ୍ରବୁ ମି ଉଣ୍ତିଙ୍ଗ୍‌ ଦୟା କିନି ଉଣ୍ତିଙ୍ଗ୍‌ କାପ୍‌କିନାନ୍‌, ମାରି ଆୟାଉଣ୍ତିଙ୍ଗ୍‌ ମି ଉଣ୍ତିଙ୍ଗ୍‌ ଦୟା କିନି ଉଣ୍ତିଙ୍ଗ୍‌ ୱାନ୍‌ ପେରିକାନ୍‌ ଆନାନ୍‌; ଇରିଙ୍ଗ୍‌ ସଦାପ୍ରବୁ ନିୟାଇ ବିସାର୍‌ କିନି ମାପୁରୁ ଆନାନ୍‌; ଆମାକାର୍‌ ୱାନି ଉଣ୍ତିଙ୍ଗ୍‌ କାପ୍‌କିନାର୍‌, ୱାର୍‌ୱିଜେରେ ଆସିର୍ବାଦ୍‌ତିକାର୍‌ ।

19 ଏ ସିୟୋନତି ଲୋକୁ ଜିରୁସାଲମ୍‌ତୁ ବାସା କିନାର୍‌; ମିରୁ ମାରି ଆଡ଼୍‌ବାଇଦେର୍‌; ମି ଆଡ଼୍‌ବାନି ଆଉଲିଦାନ୍‌ ୱାନ୍‌ ସତ୍‌ନେ ମିଙ୍ଗିଁ ଦୟା କିନାନ୍‌; ୱାନ୍‌ ୱେର୍‌ଇ ଦାପ୍‌ରେ ମିଙ୍ଗିଁ ୱେର୍‌ନାନ୍‌ । 20 ମାରି, ଜଦିବା ମାପୁରୁ ମିଙ୍ଗିଁ ଦୁଃକ୍‌ତି କାଦି ମାରି ନାଣ୍ତ କାସ୍ଟୁଦି ଏରୁ ସିନାନ୍‌, ମାରିବା ମିଙ୍ଗିଁ ସିକିୟା ସିନିକାର୍‌ ମାରି ମାରାଗ୍‌ଜି ମାନ୍‌ଏର୍‌, ମାତର୍‌ ମି କାଣୁକୁଦାନ୍‌ ସିକିୟା ସିନି ୱାରିଙ୍ଗ୍ ସୁଡ଼ୁନିଦେର୍‌ । 21 ମାରି, ଡେବ୍‌ରା ତରନ୍‌ ଡ଼େନିୱାନି ୱାଲେ ମି ଗିତଣି ମି ୱେନ୍‌କାରାନ୍‌ ଇୟା ମାଟା ୱେନାତ୍‌, "ସାରି ଇକା, ଇବେନୁ ନେ ମିର୍‌ ବୁଲାଦୁ ।" 22 ମାରି, ମିର୍‌ ନିଜେଦି ୱେଣ୍ତିଦି ଡାଲାୟ୍‌ କିତି ବମେଙ୍ଗ୍‌ ମାରି ସାଜୁଦାନ୍‌ ରସ୍‌ତି ବାଙ୍ଗାରାମ୍‌ ବମେଆଙ୍ଗା ୱିଜୁ ତାଗ୍‌ଇକା କିନିଦେର୍‌; ମିର୍‌ ଆୟା ୱିଜୁଦିଙ୍ଗ୍‌ ତାଗ୍‌ଇ ଜିନିସ୍‌ ୱାଜା ପୋକ୍‌ନିଦେର୍‌; ମିର୍‌ ଇନିଦେର୍‌, "ଇବେଣାନ୍‌ ସୋସ ସାଙ୍ଗାଁଆ ।" 23 ମାରି, ବୁମିଦୁ ୱିତ୍‌ନି ଉଣ୍ତିଙ୍ଗ୍‌ ୱାନ୍‌ ମି ୱିତୁ ଉଣ୍ତିଙ୍ଗ୍‌ ପିରୁ ସିନାନ୍‌; ବୁମିଦାନ୍‌ ନେର୍‌ନି ୱିତୁ ସିନାନ୍‌ ମାରି ଆକା ନେଗିକା ମାରି ନାଣ୍ଡ୍‌ ଆନାତ୍‌; ଆୟା ନାଣ୍ତିଙ୍ଗ୍‌ ମି କଡିଙ୍ଗ୍‌ ମାନ୍ଦା ଅସାର୍‌ତି ସାରାନି ବାଡିଦୁ ସାରାନେ । 24 ବୁମିଦୁ ଡ଼ୁଜିମାନି କଡି, ମୁରୁଲି ଗଦଙ୍ଗ୍‌ ସୋଲିଦୁ ମାରି ସେରିଇଦୁ ଏର୍‌ପେସି ମିସାତି କାଦି ତିନେ । 25 ମାରି, ଆମା ସାପିସ୍‌କିନିୱାରି ଦିନ୍‌ତୁ ପେରି ମେଡ଼୍‌ ଇଲୁକୁ ୱିଜୁ ଆର୍‌ନେ ସନେ, ଆୟା ଦିନ୍‌ତୁ ୱିଜୁ ପେରି ଗୋରକାଣାନ୍‌ ମାରି ୱିଜୁ ଇସ୍ରି ଗୋରକାଣାନ୍‌ ଗାଡା ମାରି ଏରୁଦାନ୍‌ ଜଲା ଆନାତ୍‌ । 26 ମାରିବା, ଆମା ନାଣ୍ତିଙ୍ଗ୍‌ ସଦାପ୍ରବୁ ନିଜେଦି ଲୋକାଙ୍ଗ୍‌ ଡାକ୍‌ତି ମାନି ବାଡି ତର୍‌ନାନ୍‌ ମାରି ଡାକ୍‌ତିକା ୱାରି କାଣ୍ଡିଆ କାବ୍‌ରା ଆତିକା ନେଗେଣ୍ଡ୍‌ କିନାନ୍‌, ଆୟା ନାଣ୍ତିଙ୍ଗ୍‌ ଲେଜୁଦି ଜାୟ୍‌ ୱେଡ଼ାଦି ଜାୟ୍‌ ୱାଜା ଆନାତ୍‌, ମାରି ୱେଡ଼ାଦି ଜାୟ୍‌ ସାତ୍‌ ଦିନ୍‌ତି ଜାୟ୍‌ ୱାଜା ସାତ୍‌ଗୁଣ୍‌ ଆନାତ୍‌ ।

27 ସୁଡ଼ୁଦୁ, ସଦାପ୍ରବୁଦି ଦରୁ ୱାନି ରିସାଦାନ୍‌ କାସ୍‌ସି ମାରି ନାଣ୍ଡ୍‌ ଦୁରି ଆଜି ଆକରାନ୍‌ ୱାଜିନାତ୍‌; ୱାନି ୱେୟୁଦାନ୍‌ ରିସାଦାନ୍‌ ବର୍ତି ଆଜି ମାରି ୱାନି ୱେତଲ୍‌ ୱିଜୁ ଦ୍ୱଂସ କିନି ସିସୁଦି ୱାଜା; 28 ମାରି, ୱାନି ନେଜ୍‌ନିକା ବର୍ତିଆଜି ସଲ୍‌ସିନି ଜଲାଦି ଏରୁ ୱାଜା, ୱିଜୁ ଦେସ୍‌ତି ଲୋକାଙ୍ଗ୍‌ ପାପ୍‌ତି ରୁପ୍‌ ସୋଲିଦୁ ଜୋଲପ୍‌ନି ଉଣ୍ତିଙ୍ଗ୍‌ ୱାନି କୋକ୍‌ଲା ସାନ୍ଦି ନିଙ୍ଗ୍‌ଜିନାତ୍‌; ମାରି, ୱିଜୁ କୁଡ଼ାଦି ଲୋକା ଆଗ୍‌ଡ଼ି ତିଲାନିନାନି ନାସୁ ସିୟାଇଆନାତ୍‌ । 29 ପବିତ୍ର ପଣ୍ଡଇଦି ନାଡ଼ା ଏଣ୍ତେସ୍‍ ଆୟାୱାଜା ମିର୍‌ ପାଟା ପାର୍‌ନିଦେର୍‌; ମାରି, ଲୋକୁ ଏଣ୍ଡେସ୍‌ ପ୍ରବୁଦି ଗରନ୍‌ତୁ, ଇସ୍ରାଏଲଦି ପିଡ଼ିପି କାଲୁ ଲାକୁତୁ ସୋନି ଉଣ୍ତିଙ୍ଗ୍‌ ପିରଡ଼ି ଉକ୍‌ସି ସୋନାର୍‌, ଆୟାୱାଜା ମି ମନ୍‌ ୱେଡ଼ିକା ଆନାତ୍‌ ।

30 ମାରି, ପ୍ରବୁ ନିଜେଦି ନାଣ୍ତ ରିସାଦାନ୍‌ ମାରି ୱିଜୁ ଦ୍ୱଂସ କିନି ସିସୁଦି ଡ଼ିବୁ ୱାଜା, ପିରୁଗାଲି ମାରି ଆଣ୍ତ୍ରାଗା ପିରୁ ନିଜେଦି ଆଉଲିଦାନ୍‌ ୱାନିକାଙ୍ଗ୍‌ ୱେନିସ୍‌ କିନାନ୍‌ ମାରି ନିଜେଦି କିୟୁଦି ସାକ୍ତି ତରପ୍‌ନାନ୍‌ । 31 ଇରିଙ୍ଗ୍‌ ପ୍ରବୁଦି ଆଉଲିଦାନ୍‌ ଅସୁରଦି ମୁକା ମୁକା ଆଜି ଗୁଣ୍ତା ଆନା ସନାତ୍, ୱାନ୍‌ ୱାନି ରାଜି ସାସନ୍‌ କିଜିମାନି ବାଡିଗାଦାନ୍‌ ୱାରିଙ୍ଗ୍‌ ଦଣ୍ଡ ସିନାନ୍‌ । 32 ମାରି, ଏମେ ଇସ୍ରି ତିୟାର୍‌କିତି ବାଡିଗା ସଦାପ୍ରବୁ ଆୟା ମୁସୁକୁ ଇଡ୍‌ନାନ୍‌, ଆବେନୁ ୱାନ୍‌ ୱିଜୁଦୁ ଡାକ୍‌ନି ବେଡ଼ାଦୁ ଡାପୁ ମାରି ଟୋଇଲା ଏସ୍‌ନାର୍‌ ମାରି ୱାନ୍‌ ୱାରି ୱାଲେ ପେରିଜୁଦ୍‌ କିନାନ୍‌ । 33 ଇରିଙ୍ଗ୍‌ ସିସୁ କାସିସ୍‌ କିନି କୁଣ୍ତୁ ପୁର୍ବେ କାଡ଼ାଦାନ୍‌ ତିୟାର୍‌ ଆତାମାନାତ୍‌ ମାରି ଆକା ରାଜାଦି ଉଣ୍ତିଙ୍ଗ୍‌ ତିୟାର୍‌ ଆତାମାନାତ୍‌; ୱାନ୍‌ ଦାନିଙ୍ଗ୍‌ ନିରିକା ମାରି ଅସାର୍‌ କିତାମାନାନ୍‌, ଆବେଣି କାସ୍‌ସି ମୁସ୍‌କୁ ସନି ସିସୁ ମାରି ନାଣ୍ଡ୍‌ ୱେର୍‌କୁ; ମାରି, ସଦାପ୍ରବୁଦି ଆୟା ଗନ୍ଧକ ସଲ୍‌ସି ଏରୁ ୱାଜା ଆକା କାସ୍‌ନାତ୍‌ ।