ଜିସାଇୟ 47

ବାବିଲତି ବିସାର୍‌

1 ଏ ବାବିଲତି ରିପା ଆଇଲିକ୍‌, ମିରୁ ରେସି ଦୁଡ଼ିଦୁ ବାସ୍‌ତୁ; ଏ କଲ୍‌ଦିୟଦି ଆଇଲିକ୍‌, ରାଜାଗାଦି ଡ଼ିସ୍‌ସି, ବୁମିଦୁ ବାସ୍‌ତୁ; ଇରିଙ୍ଗ୍‌ ମିର୍‌ ମାରି ନେଗିକାତ୍‌ ମାରି ସୁନ୍ଧୁରି ଇଜି ୱିଙ୍ଗିଁଇଦେର୍‌ । 2 ଜାତା ଅସି ପାସି ନୁରୁଦୁ, ନି ଅଡ଼ନି କୁତ୍‌ଆ, ଆଙ୍ଗିଁପାସିଆ କୁତ୍‌ସ ପକ୍‌ତୁ, ପାଦାମ୍‌ ତର୍‌ସି ବୁଲାଦୁ, ଗାଡାଦୁ ବୁଲାଜି ସାଣ୍ଡ୍ରୁ । 3 ମି ଡୁମ୍‌ଡାମାନିକା ତରାନାତ୍‌, ହୁଁ, ମି ସେମାର୍‌ତି ବିସୟ୍‌ ଆନାତ୍‌; ମାପ୍‌ ବାଦୁଲ୍‌ ଅନାପ୍‌, ମାରି ଆମା ଲୋକା ମାଟା ୱେନ୍‌ଏପ୍‌ । 4 ମା ମୁକୁଡ଼ାକିନି ଇସ୍ରାଏଲଦି ପବିତ୍ର ମାପୁରୁ, ପେରିସାକ୍ତିଦି ପ୍ରବୁ ୱାନି ଦରୁ । 5 ଏ କଲ୍‌ଦିୟରି ଆଇଲି, ନିନୁ ସିକାଟିଦୁ ସଲ୍‌ସି ଆଲେଜ ବାସ୍‌ଆ; ଇରିଙ୍ଗ୍‌ ୱିଜୁ ଦେସ୍‌ତି ରାଣି ଇଜି ନିନ୍‌ ମାରି ୱିଙ୍ଗିଁଦେଙ୍ଗ୍‌ ଆଟ୍‌ଇ । 6 ନାନୁ ନିଜେଦି ଲୋକା ଉଣ୍ତିଙ୍ଗ୍‌ ରିସା ଆଜି ନିଜେଦି ଅଦିକାର୍‌ ଅପବିତ୍ର କିତାପ୍‌ ମାରି ମି କିୟୁଦୁ ୱାରିଙ୍ଗ୍‌ ସର୍ପେ କିତାପ୍‌; ମିର୍‌ ୱାରି ଉଣ୍ତିଙ୍ଗ୍‌ ଦୟା କିଏତିଦେର୍‌; ମିରୁ ଡକ୍ରା ଲୋକା ମୁସୁକୁ ମି ପୁନ୍ଦି ନାଣ୍ଡ୍‌ ବଜୁ କିଜି ଇଟ୍‌ତିଦେର୍‌ । 7 ମାରି, ମିର୍‌ ଇର୍ହିଦେର୍‌, ନାନୁ ୱିଜୁ ସମୟ୍‌ତୁ ରାଣି ଆଜି ମାନ୍‌ଜିନା; ଇୟାଉଣ୍ଡିଙ୍ଗ୍‌ ମିର୍‌ ଇୟା ୱିଜୁ ବିସୟ୍‌ତାନ୍‌ ମୋନ୍‌ ସିଏତିଦେର୍‌, ମାରିବା ଆବେଣି ସାରାସାରି ମାଟା ଏତ୍‌କିଏତିଦେର୍‌ । 8 ଇୟାଉଣ୍ଡିଙ୍ଗ୍‌ ସାଙ୍ଗ୍‌ଆ ସୁକ୍‌ ପୋଇତି ତାଙ୍ଗିଁ, ଇଲେଇ ଇକା ୱେନ୍‌ଆ, ନିନୁ ତିଲାଏଣ୍ତା ବାସା କିଜି ମୋନ୍‌ତୁ ମୋନ୍‌ତୁ ଇଜିନି, "ନାନୁ ମାନା, ନାଙ୍ଗିଁ ଡ଼ିସ୍‌ତିଙ୍ଗ୍‌ ମାରି ଏନ୍‌ ସିଲେନ୍‌; ମାପ୍‌ ରାଣ୍ଡି ଆଇମା ୱାଜା ବାସ୍‌ଏଟ୍‌, ମାରିବା କଡ଼ ସିଲିକା ନେସ୍‌ଏପ୍‌," 9 ମାତର୍‌ କଡ଼ର୍‌ ସିଲିକା ମାରି ରାଣ୍ତି ଆଇମା ଇୟା ରୁଣ୍ଡି ଉନ୍‌ଡ୍ରେ ବେଡ଼ାଦୁ ଆନାତ୍‌, ଉନ୍‌ଡ୍ରେ ନାଣ୍ତିଙ୍ଗ୍‌ ମି ଉଣ୍ତିଙ୍ଗ୍‌ ଗଟାନାତ୍‌; ମି ବେସି ପାଞ୍ଜିସୁଣିକାର୍‌ ମାରି ନାଣ୍ଡ ଗୁଣିଆର୍‌ ମାର୍ରିଙ୍ଗ୍‌ ବା, ଆୟା ରୁଣ୍ଡି ସତ୍‌ଦାନ୍‌ ମି ଉଣ୍ତିଙ୍ଗ୍‌ ଗଟାନାତ୍‌ । 10 ଇର୍ରିଙ୍ଗ୍‌ ମିରୁ ନିଜେଦି ସେଇଦାନିଙ୍ଗ୍‌ ଆସା କିଜିନିଦେର୍‌; ମିରୁ ଇର୍ହିମାନିଦେର୍‌, ଏନ୍‌ ମାଙ୍ଗିଁ ସୁଡ଼ୁଏନ୍‌, ମି ବୁଦି ମାରି ବିଦ୍ୟା ମିଙ୍ଗିଁ ଆଇ ସାରିଦୁ ଅତାମାନାତ୍‌; ମାରି ମିର୍‌ ନିଜେଦି ମୋନ୍‌ତୁ ମୋନ୍‌ତୁ ଇଜିନିଦେର୍‌, ମାପ୍‌ ମାନାପ୍‌, ନାଙ୍ଗିଁ ଡ଼ିସ୍‌ତିଙ୍ଗ୍‌ ମାରି ଏନ୍‌ ସିଲେନ୍‌; 11 ଇୟାଉଣ୍ଡିଙ୍ଗ୍‌ ମିଙ୍ଗିଁ କାସ୍ଟୁ ଗଟାନାତ୍‌, ମିର୍‌ ଆୟାକା ୱାନିକା ନେସ୍‌ଇଦେର୍‌; ମାରି, ମି ମୁସୁକୁ ରାଉ ଗଟାନାତ୍‌, ମିର୍‌ ଆକା ଆକୋ କିଦେଙ୍ଗ୍‌ ଆଟ୍‌ଇଦେର୍‌; ମାରି, ଆମାକା ମିର୍‌ ନେସ୍‌ଇଦେର୍‌, ଇୟାୱାଜା ସାନିକା ଦାପ୍ରେନେ ମି ମୁସୁକୁ ଗଟାନାତ୍‌ । 12 ମିର୍‌ ଇସ୍ରି ୱାଲେରାନ୍‌ ନିଜେଦି ଆମା ଗୁଣିଆ ମାରି ମନ୍ତ୍ରଜ୍ଞ ପାଣି କିଜି ୱାତିମାନିଦେର୍‌, ଇଲେଇ ଆକା ଡ଼ିସ୍‌ତୁ । ଏମୋ ମାରି ମିର୍‌ ଲାବ୍‌ ପୋଇନିଦେର୍‌, ଏମୋ ମାରି ମିରୁ ଜିଣାଦେଙ୍ଗ୍‌ ଆଟ୍‌ନିଦେର୍‌ । 13 ମିରୁ ନିଜେଦି ନାଣ୍ଡ୍‌ ମାଟାଦାନ୍‌ ୱାନ୍ଦିତି ମାନିଦେର୍‌; ଇଲେଇ ପାଞ୍ଜି ସୁଡ଼ୁନିକାର୍‌ ନି ସୁକେଙ୍ଗ୍‌ ସୁଡ଼ୁନିକାର୍‌, ଲେଜୁ ଲୋଇ ଜଗ୍‌ ୱେର୍‌ନିକାର୍‌ ନିଲ୍‌ତୁ ମାରି ମି ଉଣ୍ତିଙ୍ଗ୍‌ ଆମାକା ଆମାକା ଗଟାନାତ୍‌, ଆବେଣାନ୍‌ ମିଙ୍ଗିଁ ରକିୟା କିପିର୍‌ । 14 ସୁଡ଼ୁଦୁ, ୱାର୍‌ କାସ୍‌ରା ୱାଜା ଆନାର୍‌; ସିସୁ ୱାରିଙ୍ଗ୍‌ କାଡିସ୍‌ କିନାତ୍‌; ୱାର୍‌ କାସ୍‌ସିନି ସିସୁଦି ସାକ୍ତିଦାନ୍‌ ନିଜେଦିଙ୍ଗ୍‌ ଉଦାର୍‌ କିଦେଙ୍ଗ୍‌ ଆଟ୍‌ଏର୍‌ । ଆକା ଉସୁମ୍‌ ଆନି ଉଣ୍ତିଙ୍ଗ୍‌ କାସ୍‌ନି ଡ଼ିବୁକା ମାରି ଆୟା ଆଗ୍‌ଡ଼ି ବାସ୍‌ନି ଉଣ୍ତିଙ୍ଗ୍‌ ସିସୁଦି ୱାଜା ଆଏତ୍‌ । 15 ଆମା ଆମା ବିସୟ୍‌ତାନ୍‌ ମିର୍‌ ପାଣି କିତି ମାନିଦେର୍‌, ଆୟା ୱିଜୁ ମି ଉଣ୍ତିଙ୍ଗ୍‌ ଇୟାୱାଜା ଆନାତ୍‌; ମି ରିପା କାଡ଼ାଦାନ୍‌ ଆମାକାର୍‌ ମି ୱାଲେ ବେପାର୍‌ କିତାମାନାର୍‌, ୱାର୍‌ ୱିଜେରେ ଇନିଙ୍ଗା ଆନିଙ୍ଗାଁ ବୁଲାଜି ନିଜେ ନିଜେଦି ବାଡିଦୁ ସନାର୍‌, ମିଙ୍ଗିଁ ରକିୟା କିଦେଙ୍ଗ୍‌ ଏନ୍‌ବା ତେବାଏର୍‌ ।