1 ପ୍ରବୁ ଇୟା ମାଟା ଇଜିନାନ୍‌, ମାପ୍‌ ଆମା ସିଟି ଦାନ୍‌ ମି ୟାୟାଦିଙ୍ଗ୍‌ ଡ଼ିସ୍‌ତା ମାନାପ୍‌, ଦାନି ଆୟା ଆଡ଼ିସିଙ୍ଗ୍‌ ଡ଼ିସ୍‌ନି ଆକୁ ଏମେ ? ମାରିବା ମା ବେପାର୍‌ କିନି ଲୋକା ଲୋଇରାନ୍‌ ଆମାୱାନି ଲାକ୍‌ତୁ ମିଙ୍ଗିଁ ପୋର୍‌ତା ମାନାପ୍‌ ? ସୁଡ଼ୁଦୁ, ମିର୍‌ ନିଜେଦି ଦସ୍‌ ଉଣ୍ତିଙ୍ଗ୍‌ ପୋରାତି ମାର୍ହିଦେର୍‌ ମାରି ମି ଅଦାର୍ମୁ ଉଣ୍ତିଙ୍ଗ୍‌ ମି ୟାୟା ଡ଼ିସାଇ ଆତାମାର୍ହାତ୍‌ । 2 "ମାପ୍‌ ଏସ୍ତିୱାଲେ ୱାତାପ୍‌ ଏନ୍ଦା ଏନ୍‌ବା ସିଲେଣ୍ଡା ମାର୍ହିଦେର୍‌ ? ମାପ୍‌ ଏସ୍ତିୱାଲେ କୁକୁତାପ୍‌ ଏନ୍ଦା ଏନ୍‌ବା ୱେର୍‌ତେଙ୍ଗ୍‌ ସିଲେତିଦେର୍‌ ? ମା କିୟୁ ଇନିକା ଗୁରିକା ଆତାମାନାତ୍‌ ନୋ, ଆକା ମୁକୁଡ଼ା କିଦେଙ୍ଗ୍‌ ଆଟ୍‌ଏତ୍‌ ? ମାରି ଉଦାର୍‌ କିନି ଉଣ୍ତିଙ୍ଗ୍‌ ନେ ମା ସାକ୍ତି ସିଲେତ୍‌ ? ସୁଡ଼ୁଦୁ, ମାପ୍‌ ଆଦ୍‌ରିସ୍‌ କିଜି ସାମ୍‌ଦୁର୍‌ତିଙ୍ଗ୍ ୱାରିସ୍‌ କିନାପ୍‌, ମାପ୍‌ ଗାଡାଦିଙ୍ଗ୍‌ ବାଟାବାଇଲୁ ବାଡି କିନାପ୍‌; ଆବେଣି ମିନ୍‌କୁ ଏରୁ ସିଲି ଉଣ୍ତିଙ୍ଗ୍‌ ଏର୍‌କି ଆଜି ସାଜି କାପୁ ଆନେ । 3 ମାପ୍‌ ବାଦଡ଼୍‌ଦିଙ୍ଗ୍‌ ସିକାଟି ଆରିସ୍‌କିନାପ୍‌ ମାରି ବାସ୍ତା ଆଙ୍ଗିଁଦିଙ୍ଗ୍‌ ଆୟା ୱିଜୁଦିଙ୍ଗ୍‌ ପିଡ଼୍‌ଗିସ୍‌କିନାପ୍‌ ।"

4 ନାନ୍‌ ଏଣ୍ଡେସ୍‌ ୱାନ୍ଦିତି ଲୋକାଙ୍ଗ୍‌ ବାକ୍ୟଦାନ୍‌ ତିର୍‌ କିଦେଙ୍ଗ୍‌ ଆଟ୍‌ନା, ଇୟାଉଣ୍ଡିଙ୍ଗ୍‌ ମାପୁରୁ, ପ୍ରବୁ ନାଙ୍ଗି ସିକିତ୍‌ ଲୋକା ୱେତଲ୍ ସିତାମାନାନ୍‌; ୱାନ୍‌ ୱିଜୁ ସାଲ୍‌ଦି ଜାଗ୍ରାତା କିନାନ୍‌, ସିକିତ୍‌ ଲୋକା ୱାଜା ୱେନି ଉଣ୍ତିଙ୍ଗ୍‌ ୱାନ୍‌ ନା ଗିତଣିଙ୍ଗା ଜାଗ୍ରାତା କିନାନ୍‌ । 5 ପ୍ରବୁ ନା ଗିତଣିଙ୍ଗ୍‌ ମୁକୁଡ଼ା କିତାମାନାନ୍‌, ମାରି ନାନ୍‌ ବିରୁଦ୍‌ କିନିକାନ୍‌ ଆଏ, ଗି ୱେନ୍‌କା ଡ଼େସି ସୋନ୍‌ଏ । 6 ନାନ୍‌ ଡାକ୍‌ନି ଲୋକା ଉଣ୍ତିଙ୍ଗ୍‌ ନିଜେଦି ମୁଟାମ୍‌, ମେସାମ୍‌ ରେନି ଲୋକା ଉଣ୍ତିଙ୍ଗ୍‌ ନିଜେଦି ବୁଗ୍‌ଲି ତର୍‌ତାସିତା; ନାନ୍‌ ଅପମାନ୍‌ ମାରି ପୁସ୍‌ତେଙ୍ଗ୍‌ ନା ମୋକମ୍‌ ମାରେକ୍‌ଏତା । 7 ଇର୍ରିଙ୍ଗ୍‌ ମାପୁରୁ, ସଦାପ୍ରବୁ ନାଙ୍ଗି ସାହାଜ୍ୟ କିନାନ୍‌; ଇୟାଉଣ୍ଡିଙ୍ଗ୍‌ ନାନୁ ବେମ୍‌ରି ଆଏ; ଇୟାଉଣ୍ଡିଙ୍ଗ୍‌ ନାନ୍‌ ସିକ୍‌ସାକ୍‌ କାଲୁ ୱାଜା ନିଜେଦି ମୋକମ୍‌ ଇଟ୍‌ତାମାନା, ମାରି ନାନ୍‌ ଜେ ସେମାର୍‌ ଆଏ, ଇକା ନେସ୍‌ତୁ । 8 ଆମାକାନ୍‌ ନାଙ୍ଗି ଦାର୍ମୁ କିନାନ୍‌, ୱାନ୍‌ ଲାକ୍‌ତୁନେ; ଏନ୍‌ ନା ୱାଲେ ବିରୁଦ୍‌ କିନାନ୍‌ ? ରାଦୁ, ମାଡ୍‌ ଉଣ୍ଡ୍ରେବାନୁ ନିଲ୍‌ନାଟ୍‌; ନା ସାତ୍ରୁ ଆମାକାନ୍‌ ? ୱାନ୍‌ ନା ଲାକ୍‌ତୁ ରାପିନ୍‌ । 9 ସୁଡୁଦୁ, ମାପୁରୁ, ପ୍ରବୁ ନାଙ୍ଗି ସାହାଜ୍ୟ କିନାନ୍‌; ନାଙ୍ଗି ଦସ୍‌ କିନାନ୍‌ ଏନ୍‌ ? ସୁଡ଼ୁଦୁ, ୱାର୍‌ ୱିଜେରେ ଆଙ୍ଗିଁ ୱାଜା ପାଡ଼ିଇକା ଆନାର୍‌; ସେଦା ୱାରିଙ୍ଗ୍‌ ତିନେ । 10 ଆମାକାନ୍‌ ସଦାପ୍ରବୁଦିଙ୍ଗ୍‌ ତିଲାନାନ୍‌ ମାରି ୱାନି ସେବାକିନି ଲୋକାଦି ମାଟା ମାନା ନାନ୍‌, ମି ମାଣାନ୍‌ ଇୟାୱାଜା ଏନ୍‌ ମାନାନ୍‌ ? ଆମା ଲୋକୁ ସିକାଟିଦୁ ବୁଲାନାନ୍‌ ମାରି ଜାଇଦୁ ରେଏନ୍‌, ୱାନ୍‌ ସଦାପ୍ରବୁଦି ଦର୍‌ତାନ୍‌ ବିସ୍‌ବାସ୍‌ କିପିନ୍‌ ମାରି ନିଜେଦି ମାପୁରୁଦି ମୁସୁକୁ ଆସା କିପିନ୍‌ । 11 ସିସୁ କାସିସ୍‌ନିଦେର୍‌, ମାରି ସିସୁ ମୁଟୁଲା ନିଜେଦି ଜୁକିଦୁ ତରାତିମାନିଦେର୍‌ ଜେ ମିର୍‌, ମିର୍‌ ୱିଜେରେ ସୁଡ଼ୁଦୁ : ମିର୍‌ ନିଜେଦି ସିସୁ ମାରି ନିଜେଦି କାସ୍‌ନି ସିସୁଗୁଟାଦୁ ସାଣ୍ଡ୍ରୁ । ନା କିୟୁଦାନ୍‌ ଇକା ମିର୍‌ ପୋଇନିଦେର୍‌; ମିର୍‌ ଦୁଃକ୍‌ତାନ୍‌ ଡର୍‌ନିଦେର୍‌ ।