1 ପ୍ରବୁ ନିଜେଦି ବାସେ କିତି ଲୋକୁ, ମାରିବା, କରସ୍‌ ବିସୟ୍‌ତାନ୍‌ ଇୟା ମାଟା ଇନାନ୍‌, ନାନୁ ୱାନି ଆଗ୍‌ଡ଼ି ନାଣ୍ଡ କୁଡ଼ାଦିଙ୍ଗ୍‌ ଆରା କିନି ଉଣ୍ତିଙ୍ଗ୍‌ ୱାନି ଉଣେରି କିୟୁ ଆସ୍‌ତା ମାନା ମାରି ନାନୁ ରାଜାରି ଜୁକିଦୁ ତରାତିମାନି ବେଲୁଟୁ କୁତ୍‌ନା; ନାନୁ ୱାନି ଆଗ୍‌ଡ଼ି ସେର୍‌ଲେଙ୍ଗ୍‌ ୱିଜୁ ରେନା ମାରି ଗାଡ଼୍‌ତି ସେର୍‌ଲେଙ୍ଗ୍‌ ୱିଜୁ ବନ୍ଦ୍‌ ଆଉ; 2 ନାନ୍‌ ମି ଆଗ୍‌ଡ଼ି ଆଗ୍‌ଡ଼ି ସନା, ଗୁଟାଟେମୁ ବାଡି ୱିଜୁ ସାର୍‌ଦିସ୍‌ କିନା; ନାନୁ କଂସ୍‌ତି ସେର୍‌ଲେଙ୍ଗ୍‌ ୱିଜୁ ରୁକୁସି ମୁକା ମୁକା କିନା ମାରି ଲୁୱାଦି ଗାଡ଼େଙ୍ଗ୍‌ ୱିଜୁ କଇନା ପୋକ୍‌ନା । 3 ମାରି, ନାନ୍‌ ସିକାଟିଦି କାଦି ଇଡ୍‌ନି ଇଲୁ ମାରି ମାର୍‌ଗିତି ବାଡିଦୁ ଉଣ୍ଡାକିତି ଦନ୍‌ ୱିଜୁ ମିଙ୍ଗିଁ ସିନା, ଆବେନୁ ମି ଦର୍‌ ଆସ୍‌ସି କୁକୁନିକାନ୍‌ ନାନ୍‌ ଜେ ପ୍ରବୁ, ଇସ୍ରାଏଲତି ମାପୁରୁ ଆନା, ଇକା ମିର୍‌ ନେସ୍‌ନିଦେର୍‌ । 4 ନା ଦାସ୍‌ ଜାକୁବ ମାରି ନା ବାସେଆତି ଇସ୍ରାଏଲ ଉଣ୍ତିଙ୍ଗ୍‌ ନାନ୍‌ ନି ଦର୍‌ ଆସ୍‌ସି ନିଙ୍ଗିଁ କୁକୁତାମାନା; ନିନ୍‌ ନାଙ୍ଗିଁ ନେସେଏତିଙ୍ଗା ବା ନାନ୍‌ ନିଙ୍ଗିଁ ପଦ୍‌ ସିତାମାନା । 5 ନାନ୍‌ ପ୍ରବୁ, ମାରି ଏନ୍‌ ସିଲେନ୍; ନାଙ୍ଗିଁ ଡ଼ିସ୍‌ତିଙ୍ଗ୍‌ ମାରି ମାପୁରୁ ସିଲେନ୍‌; ନିନ୍‌ ନାଙ୍ଗି ନେସେଏତିଙ୍ଗ୍‌ ବା ନାନ୍‌ ନିଙ୍ଗିଁ ବପୁ କିନା; 6 ଆବେଟ୍‌ ନାଙ୍ଗିଁ ଡ଼ିସ୍‌ତିଙ୍ଗ୍‌ ମାରି ଏନ୍‌ ସିଲେନ୍‌, ଇକା ୱେଡ଼ା ସନି ତରଟି ବାଡିଦାନ୍‌ ନି ୱେଡ଼ାଆର୍‌ନି ସାନ୍ଦିଦି ଲୋକୁ ନେସ୍‌ନାର୍‌; ନାନ୍‌ ପ୍ରବୁ, ମାରି ଏନ୍‌ ସିଲେନ୍‌ । 7 ନାନ୍‌ ଜାୟ୍‌ ତିଆର୍‌ କିନା ମାରି ନାନ୍‌ ସିକାଟି ବା ତିଆର୍‌ କିନା; ନାନ୍‌ ସାନ୍ତି କିନା, ନାସ୍ଟୁ ବା କିନା; ନାନ୍‌ ପ୍ରବୁ ଇକା ୱିଜୁ ପୁରା କିଦେଙ୍ଗ୍‌ ଆଟ୍‌ନା । 8 ଏ ବାଦଡ଼୍‌ୱିଜୁ, ନିନୁ ମୁସୁକୁରାନ୍‌ ପିରୁ ରାପିସ୍‌ଆ, ବାଦଡ଼୍‌ ଦୁରିଦାନ୍‌ ପିରୁ ରାପିତ୍‌; ଏଣ୍ତେସ୍‌ ରକିୟା ଆନାତ୍‌, ଇୟାଉଣ୍ଡିଙ୍ଗ୍‌ ଦୁନିଆ ତାଗ୍‌ଇକା ଆପିତ୍‌ ମାରି ୱାନ୍‌ ଦାର୍ମୁଦିଙ୍ଗ୍‌ ଉଣ୍ଡ୍ରେବାନୁ ନେରିସ୍‌ କିପିତ୍‌; ନାନୁ ପ୍ରବୁ ଇକା ତିଆର୍‌ କିତାମାନା ।

9 ଆମାକାନ୍‌ ନିଜେଦି ତିଆର୍‌କିତିୱାନି ୱାଲେ ବିରୁଦ୍‌ କିନାନ୍‌, ୱାନ୍‌ ଦଣ୍ତ୍‌ ପୟ୍‌ନିକାନ୍‌ ! ସାଟିଦି ପିଡ଼ା ଲୋଇରାନ୍‌ କାଣ୍ଡେକ୍‌ ପିଡ଼ା ! ସିକ୍‌ଲା ଇନିକା ତାନି କୁମାର୍‌ଏନ୍‌ତିଙ୍ଗ୍‌ ଇନାତ୍‌, ନିନ୍‌ ଇନିକା ତିଆର୍‌ କିଜିନି ? ମାରି ନି ପାଣି ଇନିକା ଇନାତ୍‌, ୱାନି କିୟୁ ସିଲେତ୍‌ ? 10 ଆମାକାନ୍‌ ବୁବେଙ୍ଗ୍‌ ଇନାନ୍‌, ନିନ୍‌ ଇନିକା ଜନମ୍‌ କିଜିନି, ମାରି ଆଇମା ଆଇଲିଦିଙ୍ଗ୍‌ ଇନାନ୍‌, ନିନ୍‌ ଇନିକା ଜନମ୍‌ ସିତିମାନି ? ୱାନ୍‌ ଦଣ୍ତ୍‌ ପୟ୍‌ନିକାନ୍‌ ! 11 ପ୍ରବୁ ଇସ୍ରାଏଲତି ମାପୁରୁ ମାରି ୱାନି ତିଆର୍‌କିତିକାନ୍ ଇୟା ମାଟା ଇନାନ୍‌, "ଆଗ୍‌ଡ଼ିରି ଗଟ୍‌ନେଙ୍ଗ୍‌ତି ବିସୟ୍‌ ନାଙ୍ଗି ୱେନ୍‌ବାଦୁ; ମିର୍‌ ନା ଲୋକା ବିସୟ୍‌ତାନ୍‌ ମାରି ନା କିୟୁଦାନ୍‌ କିତି ପାଣି ବିସୟ୍‌ଦାନ୍‌ ନାଙ୍ଗି ଆଦେସ୍‌ ସିଦା । 12 ନାନ୍‌ ଦୁନିଆ ତିଆର୍‌ କିତାମାନା ମାରି ଆୟା ଲୋଇ ଲୋକାଙ୍ଗ୍‌ ତିଆର୍‌ କିତାମାନା; ନାନୁ, ନା କିୟୁ ନେ ବାଦଡ଼୍‌ତିଙ୍ଗ୍‌ ୱିଜୁ କିତାମାନାତ୍‌ ମାରି ଆବେଣି ୱିଜୁ ବିସୟ୍‌ତିଙ୍ଗ୍‌ ନାନ୍‌ ଆଦେସ୍‌ ସିତାମାନା । 13 ନାନୁ ଦାର୍ମୁଦାନ୍‌ ଦାନିଙ୍ଗ୍‌ ତିୟାର୍‌ କିତାମାନା ମାରି ନାନ୍‌ ଦାନି ୱିଜୁ ସାରି ସାଡ଼ୁକୁ କିନିକା; ୱାନ୍‌ ମା ଗାଡ଼୍‌ ପୁନା ତିୟାର୍‌ କିନାନ୍‌ ମାରି ୱାନ୍‌ ମା ଜଇଲ୍‌ତୁ ମାନି ଲୋକାଙ୍ଗ୍‌ ଡ଼ିସ୍‌ନା ସିନାନ୍‌, ଡାବୁଙ୍ଗ୍‌ ଉଣ୍ତିଙ୍ଗ୍‌ ଗି ବାଦ୍‌ଲୁ ଉଣ୍ତିଙ୍ଗ୍‌ ସିଲେ," ଇକା ସଦାପ୍ରବୁ ଇଜିନାନ୍‌ ।

14 ପ୍ରବୁ ଇୟା ମାଟା ଇନାନ୍‌, "ମିସରତି ବେପାର୍‌କିନିକାର୍‌, କୁସଦି ବେପାର୍‌ କିନିକାର୍‌ ମାରି ଡେଙ୍ଗାଁଦିକାର୍‌ ସବାୟିଦି ଲୋକୁ ମି ଲାକ୍‌ତୁ ୱାନାର୍‌ ମାରି ମି ଲୋକୁ ଆନାର୍‌; ୱାର୍‌ ମି ୱେନ୍‌କା ୱାନାର୍‌; ସିକିଣିଦାନ୍‌ ତରାଜି ୱାର୍‌ ୱାନାର୍‌; ମାରି, ୱାର୍‌ ମିଙ୍ଗିଁ ମାଡ଼ିସ୍‌ କିନାର୍‌ ମାରି ମାଡ଼ିସ୍‌ କିଜି ଇନାର୍‌, ସତ୍‌ନେ ମାପୁରୁ ମି ଲାକ୍‌ତୁ ମାନାନ୍‌; ୱାନିଙ୍ଗ୍‌ ଡ଼ିସ୍‌ତିଙ୍ଗ୍‌ ମାରି ଏନ୍‌ ସିଲେନ୍‌, ମାରି ଏନ୍‌ ମାପୁରୁ ସିଲେନ୍‌ ।" 15 ଏ ରକିୟାକିନିକିନ୍ଦା, ଇସ୍ରାଏଲଦି ମାପୁରୁ, ନିନୁ ସତ୍‌ନେ ନିଜେଦିଙ୍ଗ୍‌ ମାର୍‌କ୍‌ସିମାନି ମାପୁରୁ । 16 ବମେଙ୍ଗ୍‌ ତିୟାର୍‌ କିନିକାର୍‌ ୱିଜେରେ ଅର୍‌ସେ ଅପ୍‌ମାନ୍‌ ଆନାର୍‌; ୱାର୍‌ ବେମ୍‌ରି ଆନାର୍‌, ହୁଁ, ୱାର୍‌ ୱିଜେରେ ସେମାର୍‌ ଆନାର୍‌ । 17 ମାତର୍‌ ଇସ୍ରାଏଲ, ପ୍ରବୁଦି ମାଣାନ୍‌ ଏସ୍‌କାଙ୍ଗ୍‌ ୱିଜ୍‌ଇଦିନ୍‌ ସାନ୍ଧି ରକିୟା ପୋଇନାର୍‌; ମିର୍‌ ଜୁଗ୍‌ ଜୁଗ୍‌ ସାନ୍ଧି ସେମାର୍‌ ମାରି ବେମ୍‌ରି ଆଇଦେର୍‍ । 18 ଇରିଙ୍ଗ୍‌, ବାଦଡ଼୍‌ୱିଜୁ ତିଆର୍‌କିତି ସଦାପ୍ରବୁ ଇୟାୱାଜା ଇଜିନାନ୍‌; ୱାନ୍‌ ମାପୁରୁ; ୱାନ୍‌ ପୃଥିବିଦିଙ୍ଗ୍‌ ତିୟାର୍‌ କିଜି ରସ୍‌ତାନ୍‌; ୱାନ୍‌ ଆକା ତିଆର୍‌ କିଜି ଇଟ୍‌ତାନ୍‌, ୱାନ୍‌ ଆକା ୱାରିକା କିଜି ତିଆର୍‌ କିଏଣ୍ଡା ତେବାନି ବାଡି ତିୟାର୍‌ କିତାନ୍‌, ନାନୁ ସଦାପ୍ରବୁ, ମାରି ଅରେନ୍‌ ଏନ୍‌ ସିଲେନ୍‌ । 19 ନାନୁ ମାରାଗ୍‌ଜି ସିକାଟିଦି ଦେସ୍‌ତୁ ଏମେବା ବାଡିଦୁ ଇନ୍‌ଏ; ମିର୍‌ ସେଡିନେ ମାଙ୍ଗିଁ ରେବାନିଦେର୍‌, ଇକା ନାନୁ ଯାକୁବ କୁଟୁମ୍‌ଦିଙ୍ଗ୍‌ ଇନ୍‌ଏ, ନାନୁ ସଦାପ୍ରବୁ ଦାର୍ମୁଦି ବିସୟ୍‌ ୱେର୍‌ନା, ନାନୁ ସତ୍‌ ମାଟା ଇନା ।

20 ଏ ନାଣ୍ଡ୍‌ କୁଡ଼ାଦି ରକିୟା ପୋଇତି ଲୋକୁ, ମିର୍‌ ଉଣ୍ଡ୍ରେବାନୁ ଆଜି ରାଦୁ, ଅର୍‌ସେ ଲାକ୍‌ତୁ ରାଦୁ; ଆମାକାର୍‌ ନିଜେଦି ତିୟାର୍‌କିତି ବମେଙ୍ଗା ୱେର୍‌କୁ ପିଣ୍ଡିଜି ବୁଲାନାର୍‌ ମାରି ରକିୟା କିଦେଙ୍ଗ୍‌ ଆଟ୍‌ଇ ଦେୟାମ୍‌ତି ଲାକ୍‌ତୁ ପାର୍‌ତନା କିନାର୍‌, ୱାରିଙ୍ଗ୍‌ ଇନିବା ବୁଦି ସିଲେତ୍‌ । 21 ମିରୁ ୱାରିଙ୍ଗ୍‌ ୱେର୍‌ତୁ ମାରି ଆକା ତର୍‌ତୁ; ହୁଁ, ୱାର୍‌ ନିଜେନିଜେଦି ମାନୁ ୱାର୍‌ଗିପିର୍‌; ଆଗ୍‌ଡ଼ି କାଡ଼ାଦାନ୍‌ ଏନ୍‌ ଇକା ଇର୍ହାମାନାନ୍‌ ? ପୁର୍ବେ କାଡ଼ାଦାନ୍‌ ଏନ୍‌ ଇକା ଇର୍ହାମାନାନ୍‌ ? ନାନୁ ସଦାପ୍ରବୁ ନାନୁ ଇକା କିଏନୋ ? ନାଙ୍ଗିଁ ଡ଼ିସ୍‌ତିଙ୍ଗ୍‌ ଆଇ ମାପୁରୁ ସିଲେନ୍‌, ନାନୁ ଦାର୍ମୁଦି ମାପୁରୁ ମାରି ରକିୟାକିନିକାନ୍‌; ନାଙ୍ଗିଁ ଡ଼ିସ୍‌ତିଙ୍ଗ୍‌ ମାରି ଏନ୍‌ ସିଲେନ୍‌ । 22 ଏ ଦୁନିଆଦୁ ଆକ ଦେସ୍‌କାଙ୍ଗ୍‌ ବାସାତିମାନି ୱିଜୁ ଲୋକୁ, ମିରୁ ନା ତରିନ୍‌ ସୁଡ଼ୁଜ ରକିୟା ପୋଇଦୁ; ଇର୍ରିଙ୍ଗ୍‌ ନାନ୍‌ ମାପୁରୁ, ନାଙ୍ଗିଁ ଡ଼ିସ୍‌ତିଙ୍ଗ୍‌ ମାରି ଏନ୍‌ ସିଲେନ୍‌ । 23 ନାନ୍‌ ନିଜେଦି ଦର୍‌ ଆସ୍‌ସି ପାର୍‌ମାଣ୍‌ କିତାମାନା ମାରି ସତ୍‌ତି ବାକ୍ୟ ନା ୱେୟୁଦାନ୍‌ ସତା ମାନାତ୍‌, ଆକା ବେକାର୍‌ ସଲ୍‌ଏତ୍‌, ନା ଆଗ୍‌ଡ଼ି ୱିଜେରେ ମେଣ୍ଡେଙ୍ଗ୍‌ ଗଟ୍‌କିନାର୍‌, ୱିଜୁ ୱେତଲ୍‌ ପ୍ରାମାଣାମ୍‌ କିନାତ୍‌ । 24 ଲୋକୁ ନା ବିସୟ୍‌ତାନ୍‌ ଇନାର୍‌, "କେବଲ ପ୍ରବୁଦିମାନୁ ଦାର୍ମୁ ମାରି ବପୁ ମାନାତ୍‌ ।" ୱାନି ଲାକ୍‌ତୁ ଲୋକୁ ୱାନାର୍‌, ମାରି, ଆମାକାର୍‌ ୱାନି ବିରୁଦ୍‌ତାନ୍‌ ରିସା ଆତାମାର୍ହାର୍‌, ୱାର୍‌ ୱିଜେରେ ସେମାର୍‌ ଆନାର୍‌ । 25 ଇସ୍ରାଏଲଦି ୱିଜୁ କୁଟୁମ୍‌ତି ଲୋକୁ ପ୍ରବୁଦି ଲାକ୍‌ତୁ ଦାର୍ମୁଦିକାର୍‌ ଆନାର୍‌ ମାରି ବଡ଼୍‌ପନ୍‌ ଆନାର୍‌ ।