1 ବେଲ୍‌ ଦେୟାମ୍‌ ତାଲା ପାଡ଼ିକ୍‌ନାତ୍‌, ନବୋ ଦେୟାମ୍‌ ଉଣା ଆନାତ୍‌; ୱାରି ବମେଙ୍ଗ୍‌ ଜାତୁଙ୍ଗ୍‌ ମାରି ଜାତୁଙ୍ଗାଁ ମୁସୁକୁ ଇଡାଇ ଆତେମାନେ; ଆମା ଜିନିସ୍‌ ମିର୍‌ ପିଣ୍ଡ୍‌ଜି ବୁଲାତିଦେର୍‌, ଆକା ବଜୁ ଆତାମାନାତ୍‌, ୱାନ୍ଦିତି ଜାତୁ ୱାଜା ବଜୁ ଆତାମାନାତ୍ । 2 ୱାକ୍‌ ତାଲା ପାଡ଼େକ୍‌ନେ, ୱାକ୍‌ ୱିଜୁ ଅର୍‌ସେ ଆରାନେ ସନେ; ୱାକ୍‌ ବଜୁ ପିଣ୍ତିଦେଙ୍ଗ୍‌ ଆଟ୍‌ଉତେ, ମାତର୍‌ ନିଜେନେ ତରାଇ ଆତେମାନେ । 3 ଏ ଜାକୁବ କୁଟୁମ୍‌, ଏ ଇସ୍ରାଏଲ କୁଟୁମ୍‌ତି ବାକିମାନି ୱିଜେରେ, ନା ମାଟା ୱେଣ୍ଡ୍ରୁ; ମିର୍‌ ବାଲିବାଟା ବୁମିଦାନ୍‌ ୱାତିୱାଲେରାନ୍‌ ନା ମାଣାନ୍‌ ପିଣ୍ଡାତି ମାନିଦେର୍‌, ମିର୍‌ ପଟା ଲୋଇରାନ୍‌ ପିଣ୍ଡାତି ମାନିଦେର୍‌ । 4 ମାରି, ନାନ୍‌ ମି ଡକ୍ରା ଆନି ସାନ୍ଦି ତେବାନା ମାରି ତାଲାଦି କୁକୁଟି ପାଣ୍ତ୍‌ନି ସାନ୍ଦି ନାନ୍‌ ମିଙ୍ଗିଁ ପିଣ୍ଡ୍‌ନା; ନାନ୍‌ ତିଆର୍‌ କିତାମାନା ମାରି ନାନ୍‌ ପିଣ୍ଡ୍‌ନା; ହୁଁ, ନାନ୍‌ ପିଣ୍ଡ୍‌ନା ମାରି ରକିୟା କିନା । 5 ମିରୁ ନାଙ୍ଗି ଆମା ଲୋକା ୱାଜା ମାରି ସମାନ୍‌ କିନିଦେର୍‌ ମାରି ଆମା ୱାନି ୱାଲେ ନାଙ୍ଗି ତୁସ୍‌ନି, ନାନ୍‌ ସମାନ୍‌ ଆନା ? 6 ୱାର୍‌ ବେସ୍‌ଣିଦାନ୍‌ ବାଙ୍ଗାରାମ୍‌ ୱାକ୍‌ନାର୍‌ ମାରି କେଜିଗୁଣ୍ତୁଦାନ୍‌ ୱେଣ୍ତି ତୁସ୍‌ନାର୍‌, ୱାର୍‌ ସୁନାରିଙ୍ଗ୍‌ ପାଣିଦୁ ଲାଗିସ୍‌ କିନାର୍‌ ମାରି ୱାନ୍‌ ଉନ୍‌ଡ୍ରି ଦେୟାମ୍‌ ତିଆର୍‌ କିନାନ୍‌; ୱାର୍‌ ମାଡ଼ିସ୍‌ କିଜି ପୁଜା କିନାର୍‌ । 7 ୱାର୍‌ ତାନିଙ୍ଗ୍‌ ଗୁଜାମି ପିଣ୍ଡ୍‌ନାର୍‌ ମାରି ତାନିଙ୍ଗ୍‌ ପିଣ୍ଡ୍‌ଜି ତାନି ବାଡିଦୁ ତାନିଙ୍ଗ୍‌ ଇଡ୍‌ନାର୍‌, ଆବେଟ୍‌ ଆକା ନିଲ୍‌ନାତ୍‌; ଆକାତ୍‌ ନିଜେଦି ବାଡିଦାନ୍‌ ଗୁସାଏତ୍‌; ମାରି, ଏନ୍‌ ତାନିଙ୍ଗ୍‌ କୁକୁତିଙ୍ଗ୍‌ ବା ଆକାତ୍‌ ୱାର୍‌ଗିଦେଙ୍ଗ୍‌ ଆଟ୍‌ଏତ୍‌, ମାରି କାସ୍ଟୁଦାନ୍‌ ଉଦାର୍‌ କିଦେଙ୍ଗ୍‌ ଆଟ୍‌ଏତ୍‌ । 8 ଏ ଅଦାର୍ମୁଦି ଲୋକୁ, ମିର୍‌ ଇକା ଏତ୍‌ କିଦୁ ମାରି ନାନ୍‌ ମିଙ୍ଗିଁ ଇନିକା କିତାମାର୍ହା; ମନ୍‌ତୁ ଇଡ୍‌ଦୁ । 9 ପାଡ଼ିଇ ମାଟା ୱିଜୁ ଏତ୍‌ କିଦୁ; ଇର୍ରିଙ୍ଗ୍‌ ନାନ୍‌ ନେ ମାପୁରୁ, ମାରି ଏନ୍‌ ସିଲେନ୍‌; ନାନୁ ମାପୁରୁ, ନାଙ୍ଗିଁ ଡ଼ିସ୍‌ତିଙ୍ଗ୍‌ ମାରି ଏନୁ ସିଲେନ୍‌; 10 ନାନ୍‌ ସାରାସାରିଦି ମାଟା ଆଗ୍‌ଡ଼ିନେ ଇନା, ମାରି ଆମାକା ସତ୍‌ ଆଏତ୍‌, ଆକା ପୁର୍ବେ କାଡ଼ାଦାନ୍‌ ନେସ୍‌ପିସ୍‌କିନା, ମାରି ୱେର୍‌ନା, "ନା ମାଟା ତିର୍‌ ଆନାତ୍‌ ମାରି ନାନ୍‌ ନିଜେଦି ୱିଜୁ ପାଣି ପୁରା କିନା," 11 ନାନ୍‌ ୱେଡ଼ା ସନି ତରଟାନ୍‌ ଡେଗା ପଟିଦିଙ୍ଗ୍‌, ଆକରି ଦେସ୍‍ତାନ୍‌ ନା ମାଟାଦାନ୍‌ ଲୋକାଙ୍ଗ୍‌ କୁକୁନା; ନାନ୍‌ ଇୟା ମାଟା ଇର୍ହାମାନା, ମାରି ନାନ୍‌ ଆକା ପୁରା କିନା; ନାନ୍‌ ଅଡ଼୍‌ବିତାମାନା, ମାରି ନାନ୍‌ ଆକା ପୁରା କିନା । 12 ଏ ଦାର୍ମୁଦାନ୍‌ ଆକ ମାନି ଆଟ୍‌ୱା ମନ୍‌ତି ଲୋକୁ, ନା ମାଟା ୱେଣ୍ଡ୍ରୁ । 13 ନାନ୍‌ ନିଜେଦି ଦାର୍ମୁଦି ଲାକ୍‌ତୁ ତାସିନା, ଆକା ଆକ ଆଏତ୍‌ ମାରି ନା ରକିୟା ୱେଡ଼ା ଆଏତ୍‌; ନା ଗୌରବ୍‌ ୱାଜା ଇସ୍ରାଏଲ ଉଣ୍ତିଙ୍ଗ୍‌ ନାନ୍‌ ସିୟନଦୁ ରକିୟା ତିଆର୍‌ କିନା ।