1 ଦାର୍ମୁଦି ଲୋକୁ ନାସ୍ଟୁ ଆଜିନାର୍‌ ମାରି ଆୟା ବିସୟ୍‌ତାନ୍‌ ଏନ୍‌ବା ମୋନ୍‌ ଦିୟାନ୍‌ ସିଏନ୍‌; ମାରି, ଦାର୍ମୁ ଲୋକାଙ୍ଗ୍‌ ଅଆଇ ଆତାମାନାର୍‌, ଦାର୍ମୁଦିକାର୍‌ ଜେ ୱାନି ରାଉଦାନ୍‌ ଅଆଇ ଆତାମାନାର୍‌, ଇକା ଏନ୍‌ବା ଅଡ଼୍‌ବିଏନ୍‌ । 2 ୱାନ୍‌ ସାନ୍ତିଦାନ୍‌ ଡ଼ୁଗୁନାନ୍‌; ନେଗିସାରିଦାନ୍‌ ସନି ଲୋକୁ ୱିଜେରେ ନିଜେ ନିଜେଦି କାଟେଲ୍‌ତୁ ରମ୍‌ନାର୍‌ ।

3 ଏ ଗୁଣିଆଦି ମାରିନ୍‌କୁ, ପେଡ଼ିଆତି ୱେନ୍‌କା ଦାରି କିନିକା ମାରି ଦାରିପାଣିଦି କୁଟୁମ୍‌, ମିରୁ ଲାକ୍‌ତୁ ରାଦୁ । 4 ମିର୍‌ ଏଙ୍ଗ୍‌ ୱେକ୍‌ରିସ୍‌ କିନିକା ? ମିର୍‌ ଆମା ଲୋକା ତରିନ୍‌ ମୋକମ୍‌ ମେଲା କିଜି ୱେତଲ୍ ସପ୍‌ତି ମାନିଦେର୍‌ ? ମିର୍‌ ଇନିକା ଅଦାର୍ମୁଦି ଲୋକୁ ମାରି ଅସତ୍‌ଦି କୁଟୁମ୍‌ ସିଲେ ? 5 ମିର୍‌ ଅଲନ୍‌ ମାରାକା ଲୋଇ, ୱିଜୁ ହରିତ୍‌ ମାରାନୁ ଆଡ୍‌ଗି ଆସ୍‌ତି ୱାଜା ନାଡ଼ାଦୁ ନିଜେଦିଙ୍ଗ୍‌ କି ୱେଡ଼ିକା କିଏପ୍‌; ମିର୍‌ ନାଣ୍ଡ ଗରକାଙ୍ଗ୍‌, ପିଡ଼ିପି କାଲୁଦି ପାଡିତି ମାନି ଆଡ୍‌ଗି କଡ଼ରିଙ୍ଗ୍‌ ଇନିକା ସାୟାମାର୍‌ଗା ଡାକ୍‌ଇଦେର୍‌ ? 6 ଗରକାଣି ସିକ୍‌ସାକ୍‌ଦି କାଲୁକୁ ୱିଜୁ ବାନୁ ମି ବାଗ୍‌, ଆୟା ୱିଜୁ ମି ଅଦିକାର୍‌; ମାରି, ୱାନିକା ଆଗ୍‌ଡ଼ି ମିର୍‌ ସିତି ପୁଜା ୱାକ୍‌ତି ମାନିଦେର୍‌, ପୁଜା ସିଜି କିତିମାନିଦେର୍‌ । ଇୟାୱିଜୁଦି ଉଣ୍ତିଙ୍ଗ୍‌ ମାଡ୍‌ ଇନିକା ସାନ୍ତି ଆନାଟ୍‌ ? 7 ଉଚା ମାରି ନିରିଇ ଗରକା ମୁସୁକୁ ମିର୍‌ ନିଜେଦି ସାଜୁ କିତିମାନିଦେର୍‌; ଆୟା ବାଡ଼ିଦୁ ବା ମିର୍‌ ବଲିଦାନ୍‌ କିନି ଉଣ୍ତିଙ୍ଗ୍‌ ସର୍ହିମାନିଦେର୍‌ । 8 ମାରି, ସେର୍‌ଲାଦୁ ମାରି ଦୁୱାର୍‌ ବନ୍ଦୁ ୱେନ୍‌କା ମିର୍‌ ମି ଏତ୍‌କିନି ମୁଣ୍ଡା ତିୟାର୍‌ କିତିଦେର୍‌; ଇର୍ରିଙ୍ଗ୍‌ ମିରୁ ମା ମାଣାନ୍‌ ଆଇ ବାନୁ ନିଜେଦିଙ୍ଗ୍‌ ସିଜି ମୁସୁକୁ ସର୍ହି ମାନିଦେର୍‌; ମିର୍‌ ନିଜେଦି ସାଜୁ ପିରିପ୍‌ସି ୱାରିୱାଲେ ନିୟମ୍‌ କିତିମାନିଦେର୍‌; ମିର୍‌ ଆମାବାନୁ ୱାରି ବାଡ଼ି ସୁଡ଼ୁତିଦେର୍‌, ଆକା ଜିବନ୍‌ନୋତିଦେର୍‌ । 9 ମାରି, ମିର୍‌ ନିୟୁ ଅସି ମଲେକ୍‌ ଦେୟାମ୍‌ ଲାକ୍‌ତୁ ସର୍ହିଦେର୍‌ ମାରି ନିଜେଦି ବାସ୍‌ନା ନିୟୁ ନାଣ୍ତ କିତିମାନିଦେର୍‌, ମାରି ମିର୍‌ ଆକ ଦେସ୍‌ତୁ ନିଜେଦି ଦୁତ୍‌କାଙ୍ଗ୍‌ ପୋକ୍‌ତି ମାନି ମାରି ପାତାଲ୍‌ଦି ସାନ୍ଦି ନିଜେଦିଙ୍ଗ୍‌ ଆଡ୍‌ଗି କିତିମାନି । 10 ମିର୍‌ ନିଜେଦି ସାରିଦି ଆକଦି ଉଣ୍ତିଙ୍ଗ୍‌ ୱାନ୍ଦିତି ମାର୍ହିଦେର୍‌, ମାରିବା ମାରି ଆସା ସିଲେତ୍‌ ଇଜି ଇନ୍‌ଏତିଦେର୍‌; ମି ସାକ୍ତି ନାଣ୍ଡ ଆତାତ୍‌ ଇଜି ସାକ୍ତି ପୋଇତିଦେର୍‌, ଇୟାଉଣ୍ଡିଙ୍ଗ୍‌ ମିର୍‌ ୱାନ୍ଦ୍‌ଏତିଦେର୍‌ ।

11 ମାରି, ଆମା ଲୋକା ଉଣ୍ତିଙ୍ଗ୍‌ ମିର୍‌ ଇୟାୱାଜା ୱାନ୍ଦ୍‌ଜି ମାରି ତିଲାତିମାନିଦେର୍‌ ଜେ, ମିର୍‌ ମିଚ୍‌ ଇଜିନିଦେର୍‌ ମାରି ମାଙ୍ଗିଁ ଏତ୍‌ କିଇଦେର୍‌, ଗି ନିଜେଦି ମୋନ ଆବେନୁ ସିଇଦେର୍‌ ? ମାପ୍‌ ଗି ନାଣ୍ଡ ସମୟ ଆଲ୍‌ଜି ମାନ୍‌ଏପ୍‌, ଆଦେଙ୍ଗ୍‌ ମିର୍‌ ଗି ମାଙ୍ଗିଁ ତିଲାଇଦେର୍‌ ? 12 ମାପ୍‌ ମି ଦାର୍ମୁ ୱେର୍‌ନାପ୍‌; ମାରି, ମି ପାଣି ୱିଜୁ ମିଙ୍ଗିଁ ନେଗିକା ଆଏତ୍‌ । 13 ମିରୁ ଆମାୱାରିଙ୍ଗ୍‌ ଉଣ୍ଡା କିତିମାନିଦେର୍‌, ମିର୍‌ ଆଡ଼୍‌ବାନି ୱେଡ଼ାଦୁ ୱାର୍‌ ଉଦାର୍‌ କିପିର୍‌; ମାତର୍‌ ଗାଲି ୱାରିଙ୍ଗ୍‌ ଇପ୍‌ନାଅନାତ୍‌, ଉନ୍‌ଡ୍ରେ ପୁଣ୍ଡାନେ ଆୟା ୱିଜେରିଙ୍ଗ୍‌ ଇପ୍‌ନା ଅନାତ୍‌; ମାତର୍‌ ଆମା ଲୋକୁ ମା ଆଡ୍‌ଗି ୱାନାନ୍‌, ୱାନ୍‌ ଦେସ୍‌ ଅଦିକାର୍ କିନାନ୍‌ ମାରି ମା ପବିତ୍ର ଗରତି ଅଦିକାର୍ ଆନାନ୍‌ ।

14 ମାରି, ୱାନ୍‌ ଇନାନ୍‌, "ମିର୍‌ ଉଚା କିଦୁ ଉଚା କିଦୁ, ସାରି ତିୟାର୍‌ କିଦୁ, ମା ଲୋକା ସାରିଦାନ୍‌ କାସ୍ଟୁ ଆକ କିଆ ।"

15 ଇର୍ରିଙ୍ଗ୍‌ ଆମାକାନ୍‌ ଏସେଙ୍ଗ୍‌ୱିଜ୍‌ଇ ଦିନ୍‌ତିକାନ୍‌, ଆମା ଲୋକା ଦରୁ ପବିତ୍ର, ଆୟା ଉଚା ମାରି ନେଗି ଲୋକୁ ଇୟା ମାଟା ଇନାନ୍‌; "ମାଡ୍‌ ମୁସୁକୁ ମାରି ପବିତ୍ର ବାଡିଦୁ ବାସା କିନାଟ୍‌, ମାରି ସାନ୍ତି ଲୋକାଦି ଆତ୍ମାଦିଙ୍ଗ୍‌ ଜିନିକା ମାରି ସେଇକାଆତି ଲୋକା ଜିବନ୍‌କାଙ୍ଗ୍‌ ଜିପିସ୍‌ କିନି ଉଣ୍ତିଙ୍ଗ୍‌ ନାନ୍‌ ମୋନ୍‌ଡ଼େପ୍‌ତି ଲୋକୁ ମାରି ସାନ୍ତି ଲୋକା ୱାଲେ ନେ ମାନ୍‌ଜିନା । 16 ଇର୍ରିଙ୍ଗ୍‌ ନାନ୍‌ ୱିଜୁ ୱେଡ଼ାଦୁ ବିରୁଦ୍‌ କିଏପ୍‌, ମାରିବା ୱିଜୁ ୱେଡ଼ାଦୁ ରିସା କିଏପ୍‌; କିତିଙ୍ଗା, ଆତ୍ମା ମାରି ମାପ୍‌ ତିୟାର୍‌କିତି ଜାତୁଙ୍ଗ୍‌ ୱିଜୁ ମା ଆଗ୍‌ଡ଼ି ସାକି ସିଲିକା ଆନେ । 17 ନାନ୍‌ ୱାନି ଲବ୍‌ ନାନି ଦସ୍‌ ଉଣ୍ତିଙ୍ଗ୍‌ ରିସା ଆଜି ୱାନିଙ୍ଗ୍‌ ଡାକ୍‌ତାପ୍‌, ନାନ୍‌ ନିଜେଦି ମୋକମ୍‌ ମାରାକ୍‌ସି ରିସା ଆତା, ଆବେନୁ ୱାନ୍‌ ମାନାଏଜି ନିଜେଦି ମନ୍‌ତି ସାରିଦୁ ସର୍ହାନ୍‌ ।"

18 ନାନୁ ୱାନି ସନିକା ସୁଡ଼ୁତା ମାନା ମାରି ୱାନିଙ୍ଗ୍ ନେଗେଣ୍ଡ୍‌ କିନା; ବା ନାନ୍‌ ୱାନିଙ୍ଗ୍‌ ସାରି ତର୍‌ନା, ମାରି ୱାନିଙ୍ଗ୍‌ ମାରି ୱାନି ଦୁଃକ୍‌ତି ଲୋକାଙ୍ଗ୍‌ ମାରିଡ଼େସି ସାନ୍ତି ସିନା । 19 ନାନ୍‌ ୱେୟୁଦାନ୍‌ ପଲ୍‌ ତିୟାର୍‌ କିନା; ପ୍ରବୁ ଇଜିନାନ୍‌, "ଆକଣିକାର୍‌ ମାରି ଲାକ୍‌ତୁରିକାର୍‌ ଲୋକା ଉଣ୍ତିଙ୍ଗ୍‌ ସାନ୍ତି, ସାନ୍ତି ଆପିତ୍‌ ମାରି ନାନ୍‌ ୱାନିଙ୍ଗ୍‌ ନେଗେଣ୍ଡ୍‌ କିନା ।" 20 ମାତର୍‌ ତାଗ୍‌ଇ ଲୋକୁ ସାମ୍‌ଦୁର୍‌ତି ଲୋଡ଼ି ୱାଜା, ଇର୍ରିଙ୍ଗ୍‌ ଆକା ତିର୍‌ତାନ୍‌ ତେବାଦେଙ୍ଗ୍‌ ଆଟ୍‌ଏତ୍‌, ମାରି ଆବେଣି ଏରୁଦୁ ଲିଦିଲିଦି ନି ଲାଦି ନିଙ୍ଗ୍‌ନାତ୍‌ । 21 ମା ମାପୁରୁ ଇନାନ୍‌, "ତାଗ୍‌ଇ ଲୋକାଙ୍ଗ୍‌ ଇନିକା ବା ସାନ୍ତି ସିଲେତ୍‌ ।"