1 ମାତର୍‌ ପୁର୍ବେ ଆମା ଦେସ୍‌ କାସ୍ଟୁଦୁ ମାର୍ହାତ୍‌, ଆକା ସିକାଟି ଆଜି ମାନ୍‌ଏତ୍‌ । ଆଗ୍‌ଡ଼ିରି କାଡ଼ାଦୁ ଆୟା ସବୁଲୁନ୍ ଦେସ୍‌ ମାରି ନପ୍ତାଲି ଦେସ୍‌ତିଙ୍ଗ୍‌ କାଡ଼ିତା ମାର୍ହାର୍‌, ମାତର୍‌ ୱିଜ୍‌ନି କାଡ଼ାଦୁ ୱାନ୍‌ ଦାନିଙ୍ଗ୍‌ ସାମ୍‌ଦୁର୍‌ତି ସାରିଦି ଲାକ୍‌ତୁରି, ଜର୍ଦନତି ଆୟା ପାଡ଼ିଦି, କୁଟୁମ୍‌ଦି ଗାଲିଲିଦିଙ୍ଗ୍‌ ଗରବ୍‌ କିନାନ୍‌ । 2 ଆମା କୁଟୁମ୍‌ ସିକାଟିଦୁ ବୁଲାତାର୍‌, ୱାର୍‌ ପେରି ଜାୟ୍‌ ସୁଡ଼ୁତାମାନାର୍‌; ଆମାକାର୍‌ ସାତିନିଡ଼ିଗା ୱାଜାଦି ଦେସ୍‌ତୁ ବାସାତାର୍‌, ୱାରି ମୁସୁକୁ ଜାୟ୍‌ ସତାମାନାତ୍‌ । 3 ନିନୁ ଆୟା ଦେସ୍‌ତି ଲୋକାଙ୍ଗ୍‌ ନାଣ୍ଡ୍‌ ଲୋକୁ କିଜି ୱାରି ୱେଡ଼ିକା ପିରିପ୍‌ତି ମାନିଦେର୍‌; ୱାର୍‌ ପାସି କୋୟ୍‌ନି ୱେଡ଼ିକାଦାନ୍‌ ପୁରା ୱେଡ଼ିକା କିନାର୍‌, ଡଙ୍ଗାଁକିତି ଜିନିସ୍‌ ବାଟାକିନି ବେଡ଼ାଦି ୱାଜା ୱେଡ଼ିକା ଆନାର୍‌, 4 ଇରିଙ୍ଗ୍‌ ମିଦିୟନତି ଦିନ୍‌ତୁ ଏଣ୍ଡେସ୍‌, ଆୟାୱାଜା ମିର୍‌ ୱାନି ବଜୁଦି ୱାଜା ପୁନ୍ଦି ମାରି ୱାନି ଗୁଜାମ୍‌ତି ବଜୁ, ୱାନି ସେଇୱାନି ଦଣ୍ଡ ରୁକୁତା ମାନାନ୍‌ । 5 ଇୟାଉଣ୍ଡିଙ୍ଗ୍‌ ଜୁଦଦୁ ସନ୍ୟରି ୱିଜୁ ସାଜୁ ମାରି ନେତେର୍‌ତୁ ମିସାତି ଆଙ୍ଗିଁସକା ୱିଜୁ ଆଡ଼୍‍କିନି ଜିନିସ୍‌, ସିସୁଦି ଉଣ୍ତିଙ୍ଗ୍‌ ୱେର୍‌କୁ ୱାଜା ଆନାତ୍‌ । 6 ଇରିଙ୍ଗ୍‌ ମା ଉଣ୍ତିଙ୍ଗ୍‌ ଅରେନ୍‌ କୋଡ଼ ଜନମ୍‌ ଆତାମାନାନ୍‌, ମା ଉଣ୍ତିଙ୍ଗ୍‌ ଅରେନ୍‌ କୋଡ଼ ସିଆଇଆତା ମାନାନ୍‌ ମାରି ୱାନି ଗୁଜାମି ସାସନ୍‌ କିନି ବଜୁ ସିଆଇ ଆନାତ୍; ମାରି, ୱାନି ଦରୁ କାବାଆନିକା, ମନ୍‌ତ୍ରି, ସାକ୍ତିମାନ୍‌ ମାପୁରୁ, ୱିଜୁଦିନ୍‌ତି ବୁବା, ସାନ୍ତିଦି ରାଜା ଆନାନ୍‌ । 7 ୱାନି କିତି ମାନି ପାଣି ପିରିନାତ୍‌ ମାରି ସାନ୍ତିଦି ଆସା ମାନ୍‌ଏତ୍‌, ୱାନ୍‌ ଦାଉଦଦି ସିଂହାସନତୁ ମାରି ୱାନି ରାଜିଦୁ ମାନ୍‌ଜି ନ୍ୟାୟ୍‌ବିସାର୍‌ ମାରି ଦାର୍ମୁଦାନ୍‌ ଇୟା ଇଲେଇଦାନ୍‌ ଜୁଗ୍‌ ଜୁଗ୍‌ ଦିନ୍‌ ସାନ୍ଦି ଆକା ତିର୍‌ ମାରି ଡାଟ୍‌ କିନାନ୍‌ । ସାକ୍ତିମାନ୍‌ ସଦାପ୍ରବୁଦି ସାକିଦାନ୍‌ ଇକା ପୁରା କିନାନ୍‌ ।

8 ଯାକୁବଦି ଲାକ୍‌ତୁ ମାପୁରୁ ଉନ୍‌ଡ୍ରି ବାକ୍ୟ ପୋକ୍‌ତାନ୍‌ ମାରି ଆକା ଇସ୍ରାଏଲ ମୁସୁକୁ ଆର୍‌ତା ମାନାତ୍‌, 9 ମାରି ୱିଜୁ ଲୋକୁ, ଇପ୍ରୟିମ ମାରି ସମରିୟାଦି ଲୋକୁ ନେ ଆକା ନେସ୍‌ନାର୍‌; ୱାର୍‌ ଆକାର୍‌ଦାନ୍‌ ମାରି ଗର୍ବଦାନ୍‌ ଇନାର୍‌, 10 ଇଟେଙ୍ଗ୍‌ ୱିଜୁ ଆର୍‌ତେମାନେ ସତ୍‌, ମାତର୍‌ ମାପ୍‌ କୋୟ୍‌ତି କାଲୁଦାନ୍‌ ତିଆର୍‌ କିନାଟ୍‌; ତଗା ମାରାକ୍‌ ୱିଜୁ କାତାଇ ଆତେମାନେ ସତ୍‌, ମାତର୍‌ ମାଡ୍‌ ୱାନିକା ବାଦଲୁ ଏରସ ମାରାକୁ ପିରିପ୍‌ନାଟ୍‌ ।

11 ଇୟାଉଣ୍ଡିଙ୍ଗ୍‌ ସଦାପ୍ରବୁ ୱାନି ବିରୁଦ୍‌ତାନ୍‌ ରତ୍‌ସିନଦି ତରିଟି ଲୋକାଙ୍ଗ୍‌ ପେରିସ୍ କିନାନ୍‌ ମାରି ୱାନି ସାତ୍ରୁରିଙ୍ଗ୍‌ ଉଲପ୍‌ନା ପୋକ୍‌ନାନ୍‌; 12 ଆଗ୍‌ଡ଼ି ଅରାମିୟ ଲୋକୁ ମାରି ୱେନ୍‌କା ପଲେସ୍ଟିୟ ଲୋକୁ ଆନାର୍‌; ମାରି, ୱାର୍‌ ୱାଜି ଇସ୍ରାଏଲଦିଙ୍ଗ୍‌ ଆରାକିନାର୍‌ । ଇୟାୱିଜୁ ଆତିଙ୍ଗ୍‌ ବା ୱାରି ରିସା ସାନ୍ତି ଆଏତ୍‌, ମାତର୍‌ ୱାରି କିୟୁ ଆଗ୍‌ଡ଼ିରି ୱାଜା ସାରିତା ମାନାତ୍‌ ।

13 ମାରିବା ଲୋକାଙ୍ଗ୍‌ ଏନ୍‌ ଡାକ୍‌ତାମାନାର୍‌, ୱାନି ଲାକ୍‌ତୁ ୱାର୍‌ ଡ଼େସି ରେଏର୍‌, ମାରି ୱାର୍‌ ସାକ୍ତିମାନ୍‌ ସଦାପ୍ରବୁଦିଙ୍ଗ୍‌ ରେବାଏର୍‌ । 14 ଇୟାଉଣ୍ଡିଙ୍ଗ୍‌ ପ୍ରବୁ ଇସ୍ରାଏଲଦି ତାଲା ମାରି ତକା, କାଜିରି କମା ମାରି ଏରୁଦି ବୁମିଦି ଲାଟା ଉନ୍‌ଡ୍ରେ ଦିନ୍‌ତୁ କୋଇନା ପୋକ୍‌ନାନ୍‌ । 15 ପ୍ରାଚିନର୍‌ ମାରି ୱିଙ୍ଗିଁତି ଲୋକା ଆୟା ତାଲା, ମାରି, ମିସ୍‌ ସିକିୟାସିନି ବବିସତ୍‌ବକ୍ତାଦି ତକା, 16 ଇରିଙ୍ଗ୍‌ ଇୟା ଲୋକା ସାରି ତର୍‌ନିକାର୍‌ ୱାରିଙ୍ଗ୍‌ ବେମ୍‌ରି କିନାର୍‌, ମାରି, ଆମାକାର୍‌ ୱାରି ମାଣାନ୍‌ ସାରି ବୁଲାନାର୍‌, ୱାର୍‌ ନାଷ୍ଟୁ ଆନାର୍‌ । 17 ଆଦେଙ୍ଗ୍‌ ପ୍ରବୁ ୱାରି ମୁରୁଲି କୋଡ଼ରି ଲାକ୍‌ତୁ ୱେଡ଼ିକା କିଏର୍‌, ଇରିଙ୍ଗାଁ ୱାରି ବୁବାସିଲି କୋଡ଼ର୍‌ ମାରି ରାଣ୍ଡି ଆଇମେକା ଉଣ୍ତିଙ୍ଗ୍‌ ଦୟା କିଏର୍‌; ଏଣ୍ତେସ୍‌କି ୱିଜୁ ଲୋକୁ ଦାର୍ମୁସିଲିକାର୍‌ ମାରି ସେଇକାର୍‌ ମାରି ୱିଜେରି ମାଟା ମିଚ୍‌ । ଇୟାୱିଜୁ ଆତିଙ୍ଗାଁ ବା ୱାନି ରିସା ସାନ୍ତି ଆଏତ୍‌, ମାତର୍‌ ୱାନି କିୟୁ ଆଗ୍‌ଡ଼ିରି ୱାଜା ସାରିତା ମାନାତ୍‌ ।

18 ଏଣ୍ତେସ୍‌ ସେଇକା ସିସୁ ୱାଜା କାସ୍‌ନାତ୍‌; ଆକା କାଟାକୋଡ଼ି ମାରି ସାମୁ ମାରାକାଙ୍ଗ୍‌ ୱେପିସ୍‌ କିନାତ୍‌; ମାରିବା, ଆକା ବନୁଦି ସିମ୍ରା ବାଡିଦୁ କାସ୍‌ସି ସିକାଟି ବାଦଡ଼ ୱାଜା ଗୋଇ ଆଜି ମୁସୁକୁ ନିଙ୍ଗିଁନାତ୍‌ । 19 ପେରିସାକ୍ତିଦି ସଦାପ୍ରବୁଦି ରିସାଦାନ୍‌ ଦେସ୍‌ କାଡିତା ମାନାତ୍‌; ଲୋକୁ ସିସୁଦି ଉଣ୍ତିଙ୍ଗ୍‌ ୱେର୍‍କୁ ୱାଜା ଆତାମାନାର୍‌; ଏନ୍‌ ନିଜେଦି ତଡ଼ାନ୍‌ଦିଙ୍ଗ୍‌ ଦୟା କିଏନ୍‌ । 20 ଆବେନୁ ଲୋକୁ ଉଣେରି କିୟୁଦାନ୍‌ ଡ଼ିବିସ୍‌ କିନାର୍‌, ମାରି, ବାଙ୍ଗାଁ ଆନାର୍‌; ମାରି, ଡେବ୍‌ରା କିୟୁଦାନ୍‌ ଉଣାର୍‌ ମାରି ପଟା ପାଜ୍‌ଏର୍‌; ଅର୍‌ଲେନ୍‌ ଦିନ୍‌ ୱାନାତ୍‌, ୱାର୍‌ ୱିଜେରେ ନିଜେ ନିଜେଦି ମାରିନ୍‌କା କାଣ୍ଡା ତିନାର୍‌; 21 ମନଃଶି ଇପ୍ରୟିମଦି ବିରୁଦ୍‌ଦାନ୍‌ ମାରି ଇପ୍ରୟିମ ମନଃସିଦି ବିରୁଦ୍‌ଦାନ୍ ୱାଜା ଆନାର୍‌, ମାରି, ୱାର୍‌ ଉନ୍‌ଡ୍ରେ ମାନୁ ଆଜି ଜିହୁଦାଦି ଲୋକୁ ଆନାର୍‌ । ଇୟାୱିଜୁ ଆତିଙ୍ଗ୍‌ ବା ୱାନି ରିସା ସାନ୍ତି ଆଏତ୍‌, ମାତର୍‌ ୱାନି କିୟୁ ଆଗ୍‌ଡ଼ିରି ୱାଜା ସାରିତା ମାନାତ୍‌ ।