1 ସୁଡ଼ୁଦୁ, ସଦାପ୍ରବୁଦି କିୟୁ ଇସ୍ରିକା ଆଏତ୍‌ ଜେ, ଆକା ରକିୟା କିଦେଙ୍ଗ୍‌ ଆଟ୍‌ଏନ୍‌, ମାରି ୱାନି ଗିତଣି ବୋଇରା ଆଏନ୍‌, ଜେ ଆକା ୱେନ୍‌ଣ୍ଡ୍ରେଙ୍ଗ୍‌ ଆଟ୍‌ଏନ୍‌ । 2 ମାତର୍‌ ମି ପାପ୍‌ ୱିଜୁ, ମିଙ୍ଗିଁ ମାରି ମି ମାପୁରୁଦି ଲୋଇ ୱେରେଏ କିତାମାନାନ୍‌ ମାରି ମି ପାପ୍‌ ୱିଜୁ ମି ମାଣାନ୍‌ ୱାନି ମୋକମ୍‌ ମାରାକ୍‌ତା ମାନାନ୍‌, ଇୟାଉଣ୍ଡିଙ୍ଗ୍‌ ୱାନ୍‌ ୱେନ୍‌ଏନ୍‌ । 3 ଇରିଙ୍ଗ୍‌ ମି କିୟୁ ନେତେର୍‌ଦାନ୍‌ କିଟିଙ୍ଗ୍‌ ଆତାମାନାତ୍‌ ମାରି ମି ଡ଼ାସ୍‌କା ତାଗ୍‌ଇ ପାଣି କିତାମାନାତ୍‌ ମାରି ମିରୁ ମିସ୍‌ ଇର୍ହିମାନିଦେର୍‌, ମାରି ମି ୱେତଲ୍‌ ସେଇ ମାଟା ଇନାତ୍‌;

4 ଆମାକାନ୍‌ ନିୟାଇଦୁ ଗୁୱାରି ୱେନ୍‌ଏନ୍‌ ମାରି ଆମାକାନ୍‌ ସତ୍‌ତାନ୍‌ ଜାଟିଜଗ୍‌ଡ଼ା କିଏନ୍‌; ୱାର୍‌ ସେଇପାଣିଦୁ ଆସା କିନାର୍‌ ମାରି ମିସ୍‌ ମାଟା ଇନାର୍‌; ୱାର୍‌ ସେଇଦାନିଙ୍ଗ୍‌ ପଟାଦୁ ଆସ୍‌ନାର୍‌ ମାରି ଦସ୍‌ ଜନମ୍‌ କିନାର୍‌ । 5 ୱାର୍‌ ୱିସାମ୍‌ତି ସାରାସ୍‌ତି ଗୁଡୁଙ୍ଗ୍‌ ପାଟ୍‌ନାର୍‌ ମାରି ଗନ୍ଦୁରୁ ଜାଲୁ କିନାର୍‌; ଆମାକାନ୍‌ ୱାରି ଗୁଡୁଙ୍ଗ୍‌ ତିନାନ୍‌, ୱାନ୍‌ ସାନାନ୍‌, ମାରି ଆକା ମାଟ୍‌ତିଙ୍ଗ୍‌ ଆବେଣାନ୍‌ ସାରାସ୍‌କୁ ସନେ । 6 ୱାରି ଜାଲୁ ଆଙ୍ଗିଁପାସିଆ ଆଏତ୍‌, ମାରି ୱାର୍‌ ନିଜେଦି ପାଣିଦାନ୍‌ ନିଜେଦିଙ୍ଗ୍‌ ପିଡ଼ିକାଏର୍‌; ୱାରି ପାଣିୱିଜୁ ସେଇ ପାଣି ମାରି ୱାରି କିୟୁଦୁ ସେଇ ପାଣି ମାନାତ୍‌ । 7 ୱାରି ପାଦାମ୍‌କୁ ଦାରିପାଣି ତରନ୍‌ ସନାତ୍‌ ମାରି ୱାର୍‌ ଦସ୍‍ସିଲି ଲୋକା ନେତେର୍‌ ସୋପ୍‌ତେଙ୍ଗ୍‌ ଦାନ୍ଦା ଆନାର୍‌; ୱାରି ସିନ୍ତା ୱିଜୁ ଅଦାର୍ମୁଦି ସିନ୍ତା; ୱାରି ସାରିଦୁ ନାସ୍ଟୁ ମାରି ସାନିକା ମାନାତ୍‌ । 8 ସାନ୍ତିଦି ସାରି ୱାର୍‌ ନେସ୍ଏର୍‌ ମାରି ୱାରି ସାରିଦୁ ଆମାବା ବିସାର୍‌ ସିଲେତ୍‌; ୱାର୍‌ ନିଜେଦିୱାରି ଉଣ୍ତିଙ୍ଗ୍‌ ୱେକଣି ସାରି କିତାମାନାର୍‌; ଆମାକାନ୍‌ ଆବେନୁ ବୁଲାନାନ୍‌, ୱାନ୍‌ ସାନ୍ତି ନେସ୍‌ଏନ୍‌ ।

9 ଇୟାଉଣ୍ଡିଙ୍ଗ୍‌ ବିସାର୍‌ ମା ମାଣାନ୍‌ ଆକ ମାନ୍‌ଜିନାତ୍‌, ଦାର୍ମୁ ମା ୱାଲେ ମାନ୍‌ଏତ୍‌; ମାଡ୍‌ ଜାୟ୍‌ ଉଣ୍ତିଙ୍ଗ୍‌ କାପ୍‌କିନାଟ୍‌, ମାତର୍‌ ସୁଡ଼ୁଦୁ, ସିକାଟି; ଜାଇଦିଙ୍ଗ୍‌ କାପ୍‌କିପିତ୍‌, ମାତର୍‌ ମାଡ୍‌ ସିକାଟିଦୁ ବୁଲାନାଟ୍‌ । 10 ମାଡ୍‌ କାଣା ଲୋକା ୱାଜା ଗଡାଦିଙ୍ଗ୍‌ ରେବାନାଟ୍‌, ହୁଁ, କାଣୁକୁ ସିଲି ଲୋକା ୱାଜା ମାଡ୍‌ ରେବାନାଟ୍‌; ମାଡ୍‌ ମିଲିମିଲିକା ୱାଜା ୱେଡ଼େକାବା ତାକାନାଟ୍‌; ମାଡ୍‌ ମୋଟାଦି ଲୋକା ମାଣାନ୍‌ ସାତି ଲୋକା ୱାଜା ମାନାଟ୍‌ । 11 ମାଡ୍‌ ୱିଜେରେ ଅଡ଼୍‍ଜୁ ୱାଜା ଆଉଲି ଆନାଟ୍‌ ମାରି ପର୍‌ସ ୱାଜା ନାଣ୍ଡ୍‌ ଆଡ଼୍‌ବାନାଟ୍‌; ମାଡ୍‌ ବିସାର୍‌ଦିଙ୍ଗ୍‌ କାପ୍‌କିନାଟ୍‌, ମାତର୍‌ ଆକା ସିଲେତ୍‌; ରକିୟାଦିଙ୍ଗ୍‌ କାପ୍‌କିନାଟ୍‌, ମାତର୍‌ ଆକା ମା ମାଣାନ୍‌ ଆକ ମାନାତ୍‌ ।

12 ଇରିଙ୍ଗ୍‌ ନି ଆଗ୍‌ଡ଼ି ମା ଅଦାର୍ମୁ ନାଣ୍ତ ଆତାମାନାତ୍‌ ମାରି ମା ପାପ୍‌ ମା ବିରୁଦ୍‌ତାନ୍‌ ସାକି ସିଜିନାତ୍‌; ଏନ୍ଦା ଇର୍ରିଙ୍ଗା ମା ଅଦାର୍ମୁ ୱିଜୁ ମା ୱାଲେ ୱାଲେ ମାନାତ୍‌ ମାରି ମା ପାପ୍‌ ୱିଜୁ ମାପ୍‌ ନେସ୍‌ନାପ୍‌; 13 ଆକା ଦସ୍‌ ମାରି ସଦାପ୍ରବୁଙ୍ଗ୍‌ ମାନାଇକା ମାରି ମା ମାପୁରୁଦି ମାଣାନ୍‌ ଆକ ଆନିକା, ସେଇପାଣି ମାରି ରିସାଦି ମାଟା ଇନିକା, ମିସ୍‌ ମାଟା ଆସ୍‌ସି ମନ୍‌ତାନ୍‌ ସପ୍‌ନିକା । 14 ଇୟାଉଣ୍ଡିଙ୍ଗ୍‌ ବିସାର୍‌ ୱେନ୍‌କା ସର୍ହାମାନାତ୍‌ ମାରି ଦାର୍ମୁ ଆକ ନିଲ୍‌ତା ମାନାତ୍‌; ଡେଣା ବାଡିଦୁ ସତ୍‌ ସିଲେଣ୍ଡା ନାସ୍ଟୁ ଆତା ମାନାତ୍‌ ମାରି ସାନ୍ତି ମାଟା ଡ଼ୁଗୁଦେଙ୍ଗ୍‌ ଆଟ୍‌ଏଜିନାତ୍‌ । 15 ହୁଁ, ସତ୍‌ତିକା ଉଣା ଆତାମାନାତ୍‌ ମାରି ଆମାକାନ୍‌ ଦାରିପାଣି ଡ଼ିସ୍‌ନାନ୍‌, ୱାନ୍‌ ନିଜେଦିଙ୍ଗ୍‌ ଡଙ୍ଗାଁକିତି ୱାଜା କିନାନ୍‌; ମାରି, ପ୍ରବୁ ଇକା ସୁଡ଼ୁତାନ୍‌ ମାରି, ନିୟାଇବିସାର୍‌ ସିଲିଙ୍ଗ୍‌ ୱେଡ଼ିକା ଆଏତାନ୍‌ ।

16 ମାରି, ୱାନ୍‌ ସୁଡ଼ୁତାନ୍‌ ଜେ, ଆମାବା ମେମାର୍‌ଏନ୍‌ ଲୋକୁ ଇଲେଇ ସିଲେର୍‌, ମାରି ନାଣିମି ଏର୍‌ ସିଲେର୍‌ ଇଜି କାବା ଆତାନ୍‌; ଇୟାଉଣ୍ଡିଙ୍ଗ୍‌ ୱାନି ନିଜେ କିୟୁ ୱାନି ଉଣ୍ତିଙ୍ଗ୍‌ ରକିୟା ପୁରା କିତାନ୍‌ ମାରି ୱାନି ଦାର୍ମୁନେ ୱାନିଙ୍ଗ୍‌ ନିଲ୍‌ପ୍‌ତା ଇଟ୍‌ତାତ୍‌ । 17 ମାରି, ୱାନ୍‌ ବକାଦୁ ତରାନି ସାଜୁ ୱାଜା ଦାର୍ମୁ ମାରି ରକିୟାଦି ଟପି ନିଜେଦି ତାଲାଦୁ ଆରାତାନ୍‌; ମାରି, ୱାନ୍‌ ବାଦ୍‌ଲୁ ଅନି ୱାଜା ଆଙ୍ଗିଁସକା ଆରାତାନ୍‌ ମାରି ଜିବନ୍‌ ରକିୟା କିନି ଆଙ୍ଗିଁ ୱାଜା ୱେଡ଼ିକାଦି ୱାଜା ଆଙ୍ଗିଁସକା ଆରାତାନ୍‌ । 18 ୱାରି ପାଣି ଇସାବ୍‌ତାନ୍‌ ୱାନ୍‌ ନିଜେଦି ବିରୁଦ୍‌କିନିୱାରିଙ୍ଗ୍‌ ନାଣ୍ଡ୍‌ ରିସାଦି ୱାଜା ସିନିକା ମାରି ନିଜେଦି ସତ୍ରୁରିଙ୍ଗ୍‌ ବାଦ୍‌ଲୁ ସିନାନ୍‌; ସାମ୍‌ଦୁର୍‌ତି ନାଣିମିମାନି ଦେସ୍‌କାଙ୍ଗ୍‌ ବାଦ୍‌ଲୁ ଅନି ଦାନ୍‌ ସିନାନ୍‌ । 19 ଆବେନୁ ଲୋକୁ ୱେଡ଼ା ଆର୍‌ନି ତରଟାନ୍‌ ପ୍ରବୁଦି ଦରୁତିଙ୍ଗ୍‌ ମାରି ୱେଡ଼ା ସନି ତରଟାନ୍‌ ଲୋକୁ ୱାନି ଜାୟ୍‌ତିଙ୍ଗ୍‌ ତିଲାନାର୍‌; ଇର୍ରିଙ୍ଗ୍‌ ପ୍ରବୁଦି ନେଜ୍‌ନିପୁଣ୍ଡାଦାନ୍‌ ସାଲାଜି ନାଣ୍ଡ୍‌ ଗାଲିପିରୁୱାଜା ସାତ୍ରୁ ତିଗ୍‌ଜି ୱାନାନ୍‌ ।

20 ମାରି, ସଦାପ୍ରବୁ ଇଜିନାନ୍‌, "ସିୟୋନଦିଙ୍ଗ୍‌ ମାରି ଜାକୁବ ଲାକ୍‌ତୁ ଆମାକାର୍‌ ପାପ୍‌ତାନ୍‌ ଡ଼େସିୱାନାର୍‌, ୱାରି ଲାକ୍‌ତୁ ଉନ୍‌ଡ୍ରି ମୁକୁଡ଼ାକିନିକାନ୍‌ ୱାନାନ୍‌ ।" 21 ନିଜେଦି ବିସୟ୍‌ଦାନ୍‌ ପ୍ରବୁ ଇଜିନାନ୍‌, "ୱାରି ୱାଲେ ମା ରାଜିନାମା ଇକା, ମା ଆମା ଆତ୍ମା ମି ମୁସୁକୁ ୱାନାତ୍‌ ମାରି ମା ଆମାୱିଜୁ ବାକ୍ୟ ନାନ୍‌ ମି ୱେୟୁଦୁ ସିତାମାନା, ଆକା ମି ୱେୟୁଦାନ୍‌ ମାରି ମି କୁଟୁମ୍‌ ୱେୟୁଦାନ୍‌ ମାରି ମି କୁଟୁମ୍‌ଦି କୁଟୁମ୍‌ ୱେୟୁଦାନ୍‌ ନେରୁଦାନ୍‌ ଜୁଗ୍‌ ଜୁଗ୍‌ କାଡ଼ା ସାନ୍ଦି ଆକ କିଆଇ ଆଏତ୍‌," ଇକା ପ୍ରବୁ ଇଜିନାନ୍‌ ।