1 "ଏ ବାଞ୍ଜି ଆଇମା, ଜନମ୍ କିଇ ମାନିକିନ୍ଦା, ମିରୁ ପାଟା ପାର୍‌ଦୁ, ଏ ପଟାଦୁ ନୋପି ସିଲିକିନ୍ଦା, ମିର୍‌ ନାଣ୍ତ ଆଉଲିଦାନ୍‌ ପାର୍‌ଜି ୱେଡ଼ିକା କିଦୁ," ଇର୍ରିଙ୍ଗ୍‌ ସଦାପ୍ରବୁ ଇଜିନାନ୍‌, ପେଡ଼ିଆତି ଆଇମାଦି କୋଡ଼ରି ମାଣାନ୍‌ ଅନାତ୍‌ କୋଡ଼ର୍‌ ନାଣ୍ଡ୍‌ । 2 ମିରୁ ନିଜେଦି ଗୁଡ଼େଙ୍ଗା ବାଡି ପିରିପ୍‌ତୁ ମାରି ୱାର୍‌ ମି ବାସାନିବାଡିଦୁ ପାର୍‌ଦା ଅସାର୍‌ କିପିର୍‌; ଡାବୁଙ୍ଗ୍ ଆରେ କାର୍ସୁ କିମାଟ୍‌; ମି ନାସୁୱିଜୁ ସାକ୍‌ତୁ ମାରି ଗାଡ଼ା ୱିଜୁ ଡାଟ୍‌ କିଦୁ । 3 ଇର୍ରିଙ୍ଗ୍‌ ମିର୍‌ ଉଣେର୍‌ ତରନ୍‌ ମାରି ଡେବ୍‌ରା ତରନ୍‌ ୱେଙ୍ଗ୍‌ନିଦେର୍‌ ମାରି ମି କୁଟୁମ୍‌ ଆଇ ଦେସ୍‌ତୁ ଅଦିକାର୍‌ କିନାର୍‌ ମାରି ଲୋକୁ ସିଲି ଗାଡ଼୍‌କାଙ୍ଗ୍‌ ବାସାନି ବାଡି କିନାର୍‌ । 4 ତିଲାମାଟ୍‌; ଇର୍ରିଙ୍ଗ୍‌ ମିର୍‌ ସେମାର୍‌ ଆଇଦେର୍‍ । ରୁଣ୍ଡିମୋନ୍‌ ଆମାଟ୍‌; ଇର୍ରିଙ୍ଗ୍‌ ମିଙ୍ଗିଁ ସେମାର୍‌ କିଏର୍‌; ମିର୍‌ ନିଜେଦି ମୁରୁଲି କାଡ଼ାଦି ସେମାର୍‌ ବାଣାନିଦେର୍‌ ମାରି ମିର୍‌ ନିଜେଦି ରାଣ୍ତି ଆଇମାଦି କାସ୍ଟୁ ୱାଲେରି ସିନ୍ତା ମାରି ଏତ୍‌କିଇଦେର୍‌ । 5 ଇରିଙ୍ଗ୍‌ ମିଙ୍ଗିଁ ତିୟାର୍‌ କିତିକାନ୍‌ ମି କନ୍‌ଲି ଆନାନ୍‌; ପ୍ରବୁ ୱାନି ଦରୁ ମାରି ଇସ୍ରାଏଲଦି ପବିତ୍ର ମାପୁରୁ ମି ମୁକୁଡ଼ାକିନିକାନ୍‌ ୱାନ୍‌ ୱିଜୁ ଦୁନିଆଦି ମାପୁରୁ ଇଜି ୱେଙ୍ଗ୍‌ଁନାନ୍‌ । 6 ଇର୍ରିଙ୍ଗ୍‌ ମି ମାପୁରୁ ଇଜିନାନ୍‌, ଡ଼ିସାତି ଆଇମା ମାରି ମନ୍‌ତୁଦୁଃକ୍‌ତି ଆଇମା ମାରିବା ରିପା ୱାଲେରାନ୍‌ ଆକ ଆକମାନି ଆଇମାଦି ୱାଜା ପ୍ରବୁ ମିଙ୍ଗିଁ କୁକୁତା ମାନାନ୍‌ । 7 "ମାପ୍‌ ସାଣେକ୍‌ ଉଣ୍ତିଙ୍ଗ୍‌ ମିଙ୍ଗିଁ ଡ଼ିସ୍‌ତା ମାନାପ୍‌; ମାତର୍‌ ନାଣ୍ଡ୍‌ ଦୟାଦାନ୍‌ ମିଙ୍ଗିଁ ଉଣ୍ଡା କିନା । 8 ନାଣ୍ଡ୍‌ ରିସାଦାନ୍‌ ମାପ୍‌ ସାଣେକ୍‌ତିଙ୍ଗ୍‌ ନିଜେଦି ମୋକମ୍‌ ମି ମାଡ଼ାନ୍ ଆଡ଼ାକ୍‍ତାପ୍; ମାତର୍‌ ଜୁଗ୍ ଜୁଗ୍‌ ସାନ୍ଦି ଦୟାଦାନ୍‌ ମାପ୍‌ ମି ଉଣ୍ତିଙ୍ଗ୍‌ ଆର୍ସିବାଦ୍‌ କିନାପ୍‌," ଇକା ମି ମୁକୁଡ଼ାକିନି ପ୍ରବୁ ଇଜିନାନ୍‌ । 9 ଇରିଙ୍ଗ୍‌ ଇକା ମା ଉଣ୍ତିଙ୍ଗ୍‌ ନୋହଦି ବେଡ଼ାଦି ଏରୁ ୱାଜା; ନୋହଦି ବେଡ଼ାଦୁ ଏରୁ ମାରି ପୃଥିବିଦିଙ୍ଗ୍‌ ଏରୁଦାନ୍‌ ମୁଡ଼ୁକ୍‌ଏତ୍‌ ଇଜି ମାପ୍‌ ଏଣ୍ଡେସ୍‌ ପାର୍‌ମାଣ୍‌ କିତାମାନାପ୍‌, ଆୟାୱାଜା ମାପ୍‌ ମି ଉଣ୍ତିଙ୍ଗ୍‌ ରିସା, ମାରି ମିଙ୍ଗିଁ ଆଦ୍‌ରିସ୍‌ କିଏପ୍‌ ଇଜି ପାର୍‌ମାଣ୍‌ କିତାମାନାପ୍‌ । 10 ତାନିୱେନେକା ମି ଉଣ୍ତିଙ୍ଗ୍‌ ଦୟା କିତାମାନାନ୍‌ ଆମା ସଦାପ୍ରବୁ, ୱାନ୍‌ ଇଜିନାନ୍‌, ଗରକୁୱିଜୁ ତର୍‍ଲେ ଆଜି ଗୁସାନେ ମାରି ଇସ୍ରି ଗରକୁ ବା ଗୁସାନେ; ମାତର୍‌ ମା ଦୟା ମି ମାଣାନ୍‌ ଇନିଙ୍ଗା ଆନିଙ୍ଗାଁ ଆଏତ୍‌, ମାରି ମା ସାନ୍ତିଦି ନିୟମ୍‌ ଗୁସାଏତ୍‌ । 11 ଏ ଦୁଃକ୍‌ତିକିନ୍ଦା, ଗାଲିପିରୁଦାନ୍‌ ଦୁଙ୍ଗୁନେ ମାରି ସାନ୍ତି ସିଲିକା, ସୁଡ଼ୁଆ, ମାପ୍‌ ନାଣ୍ଡ୍‌ ସୁନ୍ଦର୍‌ତି ରକମ୍‌ତାନ୍‌ ମି କାଲୁ ବାସାକିନା ମାରି ନିଳମଣି ଦାନ୍‌ ମି ମୁଲ୍‌କୁନାଦି ତିୟାର୍‌ କିନାପ୍‌ । 12 ମାପ୍‌ ପଦ୍ମରାଗ୍‌ ମଣିଦାନ୍‌ ମି ଚୁଡ଼ା ମାରି ସୂର୍ଯ୍ୟକାନ୍ତ ମଣିଦାନ୍‌ ମି ଗାଡ଼୍‌ତି ସେର୍‌ଲେଙ୍ଗ୍‌ ୱିଜୁ ମାରି ନାଣ୍ତ ଦାରାଦି କାଲୁଦାନ୍‌ ମି ୱିଜୁ ସାନ୍ଦି ତିୟାର୍‌ କିନାପ୍‌ । 13 ମି କଡ଼ର୍‌ ୱିଜେରେ ପ୍ରବୁଦି ମାଣାନ୍‌ ସିକିତ୍‌ ଆନାର୍‌ ମାରି ମି କଡ଼ର୍‌ ନାଣ୍ଡ୍‌ ସାନ୍ତି ଆନାର୍‌ । 14 ମିର୍‌ ଦାର୍ମୁଦାନ୍‌ ତିର୍‌ ଆନିଦେର୍‌; ମିର୍‌ ସେଇଲୋକା ମାଣାନ୍‌ ଆକୋ ମାନ୍‌ଜିନିଦେର୍‌, ଇରିଙ୍ଗ୍‌ ମିର୍‌ ତିଲାଇଦେର୍‌; ମାରି ତ୍ରାସଦାନ୍‌ ଆକ ମାନ୍‌ଜିନିଦେର୍‌, ଇରିଙ୍ଗ୍‌ ଆକା ମି ଲାକ୍‌ତୁ ରେଏତ୍‌ । 15 ସୁଡ଼ୁଦୁ, ଲୋକୁ ଉଣ୍ଡ୍ରେବାନୁ ଆଦେଙ୍ଗ୍‌ ଆଟ୍‌ନାର୍‌, ମାତର୍‌ ମା ମାଣାନ୍‌ ସିଲେ; ଏନ୍‌କି ମି ବିରୁଦ୍‌ତାନ୍‌ ଅର୍‌ସେ ଆନାର୍‌, ୱାନ୍‌ ମି ମାଣାନ୍‌ ନାସ୍ଟୁ ଆନାନ୍‌ । 16 "ସୁଡ଼ୁଦୁ, ଆମା କାମାର୍‌ଏନ୍‌ ସିରିକ୍‌ଦାନ୍‌ ସିସୁ କାସିସ୍‌ କିଜି କେତ୍‌ସି ମାରି ନିଜେଦି ପାଣି ଉଣ୍ତିଙ୍ଗ୍‌ ସାଜୁ ତିଆର୍‌ କିନାନ୍‌, ମାପ୍‌ ୱାନିଙ୍ଗି ତିୟାର୍‌ କିତାମାନାପ୍‌ ମାରି ସାପିସ୍‌ କିନି ଉଣ୍ତିଙ୍ଗ୍‌ ସାପିସ୍‌ନିକା ବା ମାପ୍‌ ତିୟାର୍‌ କିତାମାନାପ୍‌ । 17 ଆମାବା ସାଜୁ ମି ମାଣାନ୍‌ ତିୟାର୍‌ ଆନାତ୍‌, ଆକା ସେଡି ଆଏତ୍‌ ମାରି ଆମା ୱିଜୁ ୱେତଲ୍ ମି ବିରୁଦ୍‌ତାନ୍‌ ନିଙ୍ଗ୍‌ନେ, ମିର୍‌ ୱାନିଙ୍ଗ୍‌ ଦସ୍‌ କିନିଦେର୍‌ । ପ୍ରବୁଦି ଦାସ୍‌ରି ଅଦିକାର୍‌ ମାରି ନା ସିତିମାନି ୱାରି ଦାର୍ମୁ ଇକା," ସଦାପ୍ରବୁ ଇଜିନାନ୍‌ ।