1 ମିସରତି ଉଣ୍ତିଙ୍ଗ୍‌ ବବିସତ ମାଟା । ସୁଡ଼ୁଦୁ, ପ୍ରବୁ ଦାପ୍ରେନେ ୱାଜିମାନି ଦୁରିଦାନ୍‌ ରେସି ମିସରତୁ ୱାଜିନାନ୍‌; ମାରି, ୱାନି ଆଗ୍‌ଡ଼ି ମିସରଦି ବମେଙ୍ଗ୍‌ ତିରିଗ୍‌ନେ ମାରି ମିସରତି ଲୋକା ଜିବନ୍‌ ୱାରିମାଣାନ୍‌ ତରଲେ ଆନାତ୍‌ । 2 ମାରି, "ମାପ୍‌ ମିସ୍ରୀୟଲୋକାଙ୍ଗ୍‌ ମିସ୍ରିୟରି ବିରୁଦ୍‌ତାନ୍‌ ୱେରେଏ କିନିକା; ଆବେନୁ ୱାର୍‌ ୱିଜେରେ ନିଜେ ନିଜେଦି ତଡ଼ାନ୍‌ ମାରି ୱିଜେରେ ନିଜେ ନିଜେଦି ଲୋକା ବିରୁଦ୍‌ତାନ୍‌ ଜୁଦ୍‌ କିନାର୍‌; ଗାଡ଼୍‌ ଗାଡ଼୍‌ ବିରୁଦ୍‌ତାନ୍‌, ରାଜି ରାଜି ବିରୁଦ୍‌ତାନ୍‌, ଜୁଦ୍‌ କିନାର୍‌ । 3 ମାରି, ମିସରଦି ଆତ୍ମା ମୋନ୍ ୱିଜୁ ରୁକ୍‍ନା ପୋକ୍‍ନାନ୍ ମାରି ମାପୁ ୱାରି ଉପାୟ୍‌ ନାସ୍ଟୁ କିନାପ୍ ଆବେଟ୍‍କୁ ୱାରି ବମେଙ୍ଗ୍‌, ଦିସାରି, ମାରି ଗୁଣିଆରିଙ୍ଗ୍‌ ରେବାନାର୍‌ । 4 ମାରି, ମାପ୍‌ ମିସ୍ରିୟରିଙ୍ଗ୍‌ ଉନ୍‌ଡ୍ରି ସିନା ମାପୁରୁ କିୟୁଦୁ ସୋର୍ପେ କିନାଟ୍‌ ମାରି ଅରେନ୍‌ କ୍ରୁର ରାଜା ୱାରି ମୁସୁକୁ ସାସନ୍‌ କିନାନ୍‌," ଇକା ସଦାପ୍ରବୁ ଇଜିନାନ୍‌ ।

5 ମାରି, ସାମ୍‌ଦୁର୍‍ତି ଏରୁ ସିଲେଣ୍ଡା ଆନାତ୍‌ ମାରି ଗାଡାଦି ଏରୁ ନିକ୍‌ସି ୱାର୍‌ନାତ୍‌ । 6 ମାରି, ଗାଡେଙ୍ଗ୍‌ ୱିଜୁ କାପୁ ଆନାତ୍‌; ମିସରତି ଗାଡାୱିଜୁ ଇସ୍ରିକା ଆଜି ୱାର୍‌ନାସନାତ୍‌; ନାଡ଼ୁ ମାରି ଏରୁ ଲାଟା ସିଲେଣ୍ଡା ୱାର୍‌ନା ସନାତ୍‌ । 7 ନିଡ଼ି ଗାଡାଦି ଲାକ୍‌ତୁରି, ନିଡ଼ି ଗାଡାଦି ସାରିବେଡ଼େତିଦି ପାଡ଼ିଆୱିଜୁ ମାରି ନିଡ଼ି ଗାଡାଦି ଲାକ୍‌ତୁ ଆମାକାବା ୱିତ୍‌ତିଙ୍ଗା, ଆକା ୱିଜୁ ୱାର୍‌ସି ଇମ୍‌ନାସନାତ୍‌ ମାରି ମାନ୍‌ଏତ୍‌ । 8 ମିନୁକୁଆସ୍‍ନିକାର୍ ବା ଆଡ଼୍‌ବାନାର୍‌ ମାରି ଆମାକାର୍‌ ନିଡ଼ି ଗାଡାଦୁ ଜାଡ଼ି ପୋକ୍‌ନାର୍‌, ୱାର୍‌ ୱିଜେରେ ଆଡ଼୍‌ବାନାର୍‌, ମାରି, ଆମାକାର୍‌ ଏରୁଦୁ ଜାଡ଼ି ପୋକ୍‌ନାର୍‌, ୱାର୍‌ ବୁଡାନା ସନାର୍‌ । 9 ମାରି, ଆମାକାର୍‌ ନେଗି ନୁଲୁ ପାଣି କିନାର୍‌ ମାରି ଆମାକାର୍‌ ଅଡ଼ିନି ଆଙ୍ଗିଙ୍ଗ୍‌ ତିୟାର୍‌ କିନାର୍‌, ୱାର୍‌ ସେମାର୍‌ ଆନାର୍‌ । 10 ମାରି, ୱାନି ମୁଣ୍ଡେଙ୍ଗ୍‌ ୱିଜୁ ରୁକୁସି ମୁକା ମୁକା ଆନାତ୍‌, ଡାବୁଙ୍ଗା ଉଣ୍ତିଙ୍ଗ୍‌ ପାଣି କିନି ଲୋକୁ ୱିଜେରେ ଜିବନ୍‌ତାନ୍‌ ଦୁଃକ୍‌ ଆନାର୍‌ ।

11 ସୋୟନଦି ସାସନ୍‌କିନିକାର୍‌ ସତ୍‌ନେ ବୁଦିସିଲିକାର୍‌; ପାରୋଦି ବୁଦିମାନି ମନ୍ତ୍ରିର୍‌ ବିରୁଦ୍‌ତାନ୍‌ ୱାର୍‌ଗିନି ମାଟା ବେକାର୍‌ ୱାଜା ଆତାମାନାତ୍‌, ମିର୍‌ ଏଣ୍ଡେସ୍‌ ପାରୋ ରାଜେଙ୍ଗ୍‌ ଇଜିନିଦେର୍‌, ମାପ୍‌ ବୁଦିମାନି ଲୋକା ମାରିନ୍‌, ପେରିକାର୍‌ ରାଜାରି ମାରିନ୍‌ ? 12 ଆଦେଙ୍ଗ୍‌ ମି ବୁଦି ଲୋକୁ ଏମେମାନୁ ? ୱାର୍‌ ଇଲେଇ ମିଙ୍ଗିଁ ନେସ୍‌ପିସ୍‌କିପିର୍‌ ମାରି ପେରିସାକ୍ତିଦି ସଦାପ୍ରବୁ ମିସର ବିସୟ୍‌ତାନ୍‌ ଆମା ଉପାୟ୍‌ ଇର୍ହାମାନାନ୍‌, ଆକା ୱାର୍‌ ନେସିର୍‌ । 13 ସୋୟନଦି ଅଦିପତିର୍‌ ବୁଦିସିଲିକାର୍‌ ଆତାମାନାର୍‌, ନୋଫଦି ଅଦିପତିର୍‌ ବେମ୍ରିରି ଆତାମାନାର୍‌; ଆମାକାର୍‌ ମିସରତି କୁଡ଼ାଦିୱାରି କନାଦିକାଲୁ ୱାଜା, ୱାର୍‌ ମିସରତିଙ୍ଗ୍‌ ଆଇ ସାରିଦୁ ବୁଲାକିଜିନାର୍‌ । 14 ସଦାପ୍ରବୁ ମିସର ନାଡ଼ିମି କିଲ୍‍ବିଲ୍ ଆତ୍ମା ମିସା କିତାମାନାନ୍‌; ମାରି, ସସ୍‍ସ୍ତି ଲୋକୁ ଏଣ୍ଡେସ୍‌ୱାଜା ନିଜେଦି କାକ୍‍ନିମାନୁ ତେର୍‍ବିଜି ସାଜିମାନାନ୍, ଆୟାୱାଜା ୱାର୍‌ ମିସରଦିଙ୍ଗ୍‌ ଆବେଣି ୱିଜୁ ପାଣିଦାନ୍‌ ୱେରେଏ କିବିସ୍‌ କିତାମାନାନ୍‌ । 15 ମାରି ତାଲା ମାରି ତୋକା, ମାରି କାଜିରି କମା ମାରି ଏରୁଦୁମାନି ଲାଟା ଆମାକା କିଦେଙ୍ଗ୍‌ ଆଟ୍‌ନାନ୍‌, ଇୟାୱାଜା ଏମେବା ପାଣି ମିସର ଉଣ୍ତିଙ୍ଗ୍‌ କିୟାଇ ଆଏତ୍‌ ।

16 ଆୟା ନାଣ୍ତିଙ୍ଗ୍‌ ମିସରତି ଲୋକୁ ଆଇମା ଆଇଲିକା ୱାଜା ତିଲାନାର୍‌, ମାରି, ପେରିସାକ୍ତିଦି ସଦାପ୍ରବୁ, ଆୟା ମୁସୁକୁ ଆମା କିୟୁ ଦୁକ୍‌ନାନ୍‌, ୱାନି ଆୟା କିୟୁ ଦୁଙ୍ଗୁନି ଉଣ୍ତିଙ୍ଗ୍‌ ୱାନ୍‌ ତିରିଗ୍‌ନାନ୍‌ ମାରି ତିଲାନାନ୍‌ । 17 ମିସର ଉଣ୍ତିଙ୍ଗ୍‌ ଜିହୁଦା ଦେସ୍‌ ଡ଼ିସାୟ୍‌ ଆନାତ୍‌, ପେରିସାକ୍ତିଦି ସଦାପ୍ରବୁ ୱାନି ବିରୁଦ୍‌ତାନ୍‌ ଆମା ଉପାୟ୍‌ କିନାନ୍‌, ଆୟା ଉଣ୍ତିଙ୍ଗ୍‌ ଜେ ୱିଜୁ ଲୋକାଙ୍ଗ୍‌ ଜିହୁଦାଦି ଦରୁ ଇନାର୍‌, ୱାନ୍‌ ତିଲାନାନ୍‌ ।

18 ଆୟା ନାଣ୍ତିଙ୍ଗ୍‌ ମିସର ଦେସ୍‌ ଲୋଇ ପାସ୍‌ ଗୋଟା ଗାଡ଼୍‌ କିଣାନିୟ ବାସାଦିକାର୍‌ ଆନାର୍‌ ମାରି ପେରିସାକ୍ତିଦି ସଦାପ୍ରବୁଦି ଦରୁତାନ୍‌ ପାର୍‌ମାଣ୍‌ କିନାର୍‌, ଉନ୍‌ଡ୍ରି ଗାଡ଼୍‌ ଦ୍ୱଂସ ଆଜି ୱେଙ୍ଗିଁନାତ୍‌ ।

19 ଆୟା ନାଣ୍ତିଙ୍ଗ୍‌ ମିସର ଦେସ୍‌ତି ନାଣିମି ବାଡିଦୁ ସଦାପ୍ରବୁଦି ଉଦେସ୍‌ତାନ୍‌ ଉନ୍‌ଡ୍ରି ଜଜ୍ଞବେଦି ଆନାତ୍‌ ମାରି ଆବେଣି ସାନ୍ଦି ଲାକ୍‌ତୁ ସଦାପ୍ରବୁଦି ଉଦେସ୍‌ତାନ୍‌ ଉଣ୍ତ୍ରି ମୁଣ୍ଡା ତିୟାର୍‌ ଆନାତ୍‌ । 20 ମାରି, ଆକା ମିସର ଦେସ୍‌ତୁ ପେରିସାକ୍ତିଦି ସଦାପ୍ରବୁଦି ସିନା ମାରି ସାକି ୱାଜା ଆନାତ୍‌; ଇରିଙ୍ଗ୍‌ ୱାର୍‌ ଡଙ୍ଗାଁକିତି ଲୋକା ଉଣ୍ତିଙ୍ଗ୍‌ ସଦାପ୍ରବୁଦି ଲାକ୍‌ତୁ ଆଡ଼୍‌ବାନାର୍‌, ଆବେନୁ ୱାନ୍‌ ଅରେନ୍‌ ରକିୟାକିନିକାନ୍‌ ମାରି କାପ୍‌କିନି ୱାନିଙ୍ଗ୍‌ ପୋକ୍‌ନାନ୍‌ ମାରି ୱାନ୍‌ ୱାରିଙ୍ଗ୍‌ ଉଦାର୍‌ କିନାନ୍‌ । 21 ମାରି, ମିସରଦିଙ୍ଗ୍‌ ସଦାପ୍ରବୁଦି ପରିଚୟ ସିଆଇ ଆନାତ୍‌ ମାରି ଆୟା ଦିନ୍‌ତୁ ମିସରିୟ ଲୋକୁ ପ୍ରବୁଦିଙ୍ଗ୍‌ ନେସ୍‌ନାର୍‌; ମାରି, ୱାର୍‌ ଅଡାତିକା ସିଜି ପୁଜା କିନାର୍‌ ମାରି ସଦାପ୍ରବୁଦି ଲାକ୍‌ତୁ ଅଡାଜି ଆକା ପୁରା କିନାର୍‌ । 22 ମାରି, ପ୍ରବୁ ମିସରତିଙ୍ଗ୍‌ ଡାକ୍‌ନାନ୍‌, ମାରି, ନେଗେନ୍‌ କିନାନ୍; ମାରି ୱାର୍‌ ସଦାପ୍ରବୁଦି ଲାକ୍‌ତୁ ଡ଼େସି ୱାନାର୍‌, ଆବେନୁ ୱାନ୍‌ ୱାରି ମାଟା ମାନାଜି ୱାରିଙ୍ଗ୍‌ ନେଗେଣ୍ଡ୍‌ କିନାନ୍‌ ।

23 ଆୟା ନାଣ୍ତିଙ୍ଗ୍‌ ମିସରତାନ୍‌ ଅସୁରତାନ୍‌ ଉନ୍‌ଡ୍ରି ପେରି ରାସ୍ତା ପୋଡ଼ାନାତ୍, ଆବେଣାନ୍‌ ଅସୁରିୟ ଲୋକୁ ମିସରତୁ ମାରି ମିସରିୟ ଲୋକୁ ଅସୁରତୁ ବୁଲା ସାଲା ଆନାର୍ ମାରି, ମିସରିୟ ଲୋକୁ ଅସୁରିୟ ଲୋକା ୱାଲେ ପୁଜା କିନାର୍‌ । 24 ଆୟା ନାଣ୍ତିଙ୍ଗ୍‌ ଇସ୍ରାଏଲ, ମିସର ମାରି ଅସୁରଦି ୱାଲେ ମୁଣ୍ଡ୍ରି ଦେସ୍‌କୁ ଏକ୍‌ ଆଜି ଦୁନିଆଦି ଉଣ୍ତିଙ୍ଗ୍‌ ଆର୍ସିବାଦ୍‌ ପୋଇନେ; 25 ଇରିଙ୍ଗ୍‌ ପେରିସାକ୍ତିଦି ସଦାପ୍ରବୁ ୱାରିଙ୍ଗ୍‌ ଆର୍ସିବାଦ୍‌ କିଜି ଇର୍ହାମାନାନ୍‌, "ମା ଲୋକୁ ମିସର, ମା କିୟୁଦି ପାଣି ଅସୁର ମାରି ମା ଅଦିକାର୍‌ ଇସ୍ରାଏଲ ଆର୍ସିବାଦ୍‌ ଆପିୟି ।"