ମୋୟାବ୍ଦି ଆସା ସିଲି ମାଟା
1 ମିର୍ ବାଲିବାଟା ତରଟି ସେଲା ଗାଡ଼୍ତାନ୍ ଦେସ୍ତି ପେରିୱାନି ଉଣ୍ତିଙ୍ଗ୍ ସିୟୋନ ରିପାଦି ଗରନତୁ ମେଣ୍ତା ପୋକ୍ଆ । 2 ଇରିଙ୍ଗ୍ ମୋୟାବଦି ଆଇଲିକ୍ ଅର୍ଣ୍ଣୋନ ଗାଡ଼ା ନାନି ଉଣ୍ତିଙ୍ଗ୍ ୱିଜୁ ବାଡିଦୁ ବୁଲାନି ପଟିଦି ୱାଜା ମାରି ପୋଟିଦି ଇନିଙ୍ଗା ଆନିଙ୍ଗାଁ ଆତିମାନି ଗୁଡ଼ା ୱାଜା ଆନେ ।
3 ଉପାୟ୍ କିଦୁ, ବିସାର୍ କିଦୁ; ୱେଡ଼େରି ବେଡ଼ାଦୁ ନିଜେଦି ନିଡ଼ାଦିଙ୍ଗ୍ ନାଡ଼ା ୱାଜା କିଦୁ; ପେରାତିମାନି ଲୋକାଙ୍ଗ୍ ଆଡ଼୍କ୍ତୁ; ବୁଲାନି ଲୋକାଙ୍ଗ୍ ୱେର୍ମାଟ୍ । 4 ମା ପେରାତିମାନି ଲୋକାଙ୍ଗ୍ ମି ୱାଲେ ବାସାକିଦେଙ୍ଗ୍ ସିଦୁ; ସାପିସ୍କିନି ଲୋକା ଆଗ୍ଡ଼ିରାନ୍ ମିର୍ ମୋୟାବଦି ଉଣ୍ତିଙ୍ଗ୍ ତେବାନି ବାଡି ଆପିତ୍; ଇରିଙ୍ଗ୍ ନାଣ୍ତ ଲୋକୁ ବେକାର୍ ଆତା ମାନାର୍ ମାରି ତାଗ୍ଇ ପାଣି ବନ୍ଦ ଆତାମାନାତ୍, ତାଗ୍ଇପାଣିକିନିକାର୍ ଦେସ୍ତାନ୍ ସୋଲ୍ସିନାର୍ । 5 ମାରି, ଦୟାଦାନ୍ ଉନ୍ଡ୍ରି ରାଜାଗାଦି ତିୟାର୍ ଆନାତ୍ ମାରି ଅରେନ୍ ସତ୍ଦାନ୍ ଦାଉଦଦି ଗୁଡ଼ାଦୁ ଆୟା ମୁସୁକୁ ବାସ୍ନାନ୍; ୱାନ୍ ନ୍ୟାୟ୍ ରେବାଜି ବିସାର୍ କିନାନ୍ ମାରି ଦାର୍ମୁ ପୋଇଦେଙ୍ଗ୍ ସାଲାକିଆନାର୍ ।
6 ମାପ୍ ମୋୟାବଦି ଗର୍ବ ବିସୟ୍ତାନ୍ ୱେର୍ହାମାନାପ୍ ଜେ, ୱାନ୍ ନାଣ୍ଡ୍ ଗର୍ବ, ୱାନି ଆକାର୍ ମାରି ୱାନି ଗର୍ବ ମାରି ୱାନି ରିସାଦି ମାଟା ୱେର୍ହାମାନାପ୍; ୱାନି ଗର୍ବ ଇନିକା ବା ସିଲେତ୍ ।
7 ଇୟାଉଣ୍ତିଙ୍ଗ୍ ମୋୟାବଦି ଉଣ୍ତିଙ୍ଗ୍ ଆଡ଼୍ବାନିଦେର୍, ୱିଜେରେ ଲୋକୁ ଆଡ଼୍ବାନିଦେର୍; ଇରିଙ୍ଗ୍ ମିର୍ ନାଣ୍ଡ୍ ଦୁଃକ୍ ଆଜି କିର-ହେରସତ ଗାଡ଼୍ତି ଲୋକୁ ଅଙ୍ଗୁର୍ ରସ୍ ଉଣ୍ତିଙ୍ଗ୍ ଏତ୍ କିଜି ଆଡ଼୍ବାନିଦେର୍ । 8 ଏଣ୍ତେସ୍ ହିସ୍ବୋନ ଗାଡ଼୍ତି କିଡ଼ିଇୱିଜୁ ମାରି ସିବ୍ମା ଗାଡ଼୍ତି ଅଙ୍ଗୁର୍ ତିୱା ନାସ୍ଟୁ ଆତାତ୍; କୁଡ଼ାଦି ପେରିକାର୍ ଆବେଣି ଆସ୍କିତି ମାନି ନେଗି ପାଡ଼ା ୱିଜୁ ରୁକୁତା ପୋକ୍ତାର୍; ଆୟାୱିଜୁ ଯାସେର ଗାଡ଼୍ ସାନ୍ଦି ସର୍ଏ, ବାଟାଦି ବାଡି ସାନ୍ଦି ଇନିଙ୍ଗା ଆନିଙ୍ଗାଁ ସର୍ଏ; ତାନି କମେଙ୍ଗ୍ ୱିଜୁ ୱିଜୁତରିନ୍ ସାରିତାତ୍, ଆୟାୱିଜୁ ସାମ୍ଦୁର୍ ନାତେ ସର୍ହେ । 9 ଇୟାଉଣ୍ଡିଙ୍ଗ୍ ମାଡ୍ ଯାସେରଦି ଆଡ଼୍ବାନି ବେଡ଼ାଦୁ ସିବ୍ମାର ଅଙ୍ଗୁର୍ତିୱା ଉଣ୍ତିଙ୍ଗ୍ ଆଡ଼୍ବାଜିନାନ୍; ଏ ହିସ୍ବୋନ, ଏ ଇଲିୟାଲି ମାପ୍ ନିଜେଦି କାଣେର୍ତାନ୍ ମିଙ୍ଗିଁ ଉତ୍ନାପ୍; ଇରିଙ୍ଗ୍ ମି ପାଣ୍ତିତି ମାନି ପଲ୍ ମାରି କୟାତି ମାନି ପଲ୍ ଉଣ୍ତିଙ୍ଗ୍ ଆମା ୱେଡ଼ିକା ଆନିକା ମାର୍ହାତ୍, ଆକା ଇଲେଇ ସିମ୍ରା ଆତାମାନାତ୍ । 10 ମାରି, ୱେଡ଼ିକା ମାରି ସାର୍ଦାଦି ଡ଼ୁତି କିଡ଼ିଇଦାନ୍ ଆକୋ ଆତାମାନାତ୍; ମାରି, ଅଙ୍ଗୁର୍ କିଡ଼ିଇଦୁ ପାଟା ମାରି ୱେଡ଼ିକା ଆଏତ୍; ଏନ୍ ପାଦାମ୍ତାନ୍ ମାଟ୍ସି ଅଙ୍ଗୁର୍ କୁଣ୍ତ୍ଦୁ ଅଙ୍ଗୁର୍ରସ୍ ସୋପ୍ଏନ୍; ମାପ୍ ଅଙ୍ଗୁର୍ କୟ୍ନି ୱେଡ଼ିକାଦି ପାଟା ବନ୍ଦ କିତାମାନାପ୍ । 11 ଇୟାଉଣ୍ଡିଙ୍ଗ୍ ମା ମୋନ ମୋୟାବଦି ଉଣ୍ତିଙ୍ଗ୍ ମାରି ମା ଜିବନ୍ କିର୍ହେରସ୍ଦି ଉଣ୍ତିଙ୍ଗ୍ ଟଇଲା ୱାଜା ଅଡ଼୍ଜିନାତ୍ । 12 ମାରି, ମୋୟାବ ନିଜେ ମାନିୱାଲେ ମାରି ମୁସୁକୁରି ବାଡିଦୁ ନିଜେଦିଙ୍ଗ୍ ୱାଦ୍ଜି ପାର୍ତନା କିନି ଉଣ୍ତିଙ୍ଗ୍ ଦାର୍ମୁଦି ବାଡିଦୁ ଡ଼ୁଗୁନି ୱାଲେ ୱାନ୍ ଇନି ଲାବ୍ ଆଏନ୍ ।
13 ଆଗ୍ଡ଼ି ବେଡ଼ାଦୁ ପ୍ରବୁ ମୋୟାବଦି ବିସୟ୍ତାନ୍ ଇୟା ମାଟା ଇର୍ହାମାର୍ହାନ୍ । 14 ମାତର୍ ଇଲେଇ ସଦାପ୍ରବୁ ଇୟା ମାଟା ଇଜିନାନ୍, କୁଲିବୁତିଦି ବାର୍ସୁ ୱାଜା ମୁଣ୍ଡ୍ରି ବାର୍ସେକ୍ ଲୋଇ ମୋୟାବଦି ଗୌରବ୍ ୱାନି ନାଣ୍ଡ୍ ଲୋକୁ ବା ପେରାଇଆନାର୍, ମାରି ବାକି ତେବାତିମାନି ଲୋକୁ ଉଣା ଆନାର୍ ମାରି ଇସାବ୍ କିନିକା ଆଏତ୍ ।
/images/a/Tcg2NiV7ce24OT6kCIQGR)
/images/a/lTDTr17sdXbuk0Q46fQTo)