1 "ନା ଲୋକାଙ୍ଗ୍‌ ସାସ୍‌ ସିଦୁ, ସାସ୍‌ ସିଦୁ," ଇକା ମି ମାପୁରୁ ଇନାନ୍‌ । 2 ମିର୍‌ ଜିରୁସାଲମତି ଲୋକା ମନ୍‌ତୁ ୱେଡ଼ିକା ମାଟା ଇଣ୍ଡ୍ରୁ, ମାରି ତାନି ଜୁଦ୍‌ ୱିଜିତାତ୍‌, ତାନି ପାପ୍‌ କେମା ଆତାତ୍‌, ୱାନ୍‌ ପ୍ରବୁଦି କିୟୁଦାନ୍‌ ନିଜେଦି ୱିଜୁ ପାପ୍‌ ଉଣ୍ତିଙ୍ଗ୍‌ ରୁଣ୍ତି ଗୁଣ୍‌ ପୟ୍‌ତାମାନା ଇଜି ତାନି ଲାକ୍‌ତୁ ୱେର୍‌ତୁ । 3 ଅରେନ୍‌ ଲୋକା ମାଟା ୱେର୍‌ନାତ୍‌, ମିର୍‌ ଗରନୁ ସାରିଦାନ୍‌ ପ୍ରବୁଦି ସାରି ରସ୍‌ତୁ, ମରୁବାଲିବାଟାଦି ବୁମିଦୁ ମା ମାପୁରୁଦି ଉଣ୍ତିଙ୍ଗ୍‌ ଅସାର୍‌ତି ପେରିଜାରି ସିଦା ରସ୍‌ଆ । 4 ୱିଜୁ ଇସ୍ରି ବାଇଲୁବାଟା ଉଚା କିୟାଇଆନାତ୍‌, ୱିଜୁ ଗରକୁ ମାରି ଇସ୍ରିଗରକୁ ଇସ୍‌ରିକେଙ୍ଗ୍‌ କିୟାଇଆନାତ୍‌ ମାରି ୱେକଣି ୱିଜୁ ସିଦା କିୟାଇଆନାତ୍‌, ମାରି ଗୁଟା ବାଡିଙ୍ଗ୍‌ ୱିଜୁ ନିମା କିୟାଇଆନାତ୍‌; 5 ମାରି, ପ୍ରବୁଦି ଦରୁ ୱେଙ୍ଗ୍‌ନାତ୍‌ ମାରି ଦୁନିଆଦୁ ମାନି ଲୋକୁ ଅର୍‌ସେ ଆକା ସୁଡ଼ୁନାର୍‌; ଇର୍ରିଙ୍ଗ୍ ପ୍ରବୁଦି ମୋକମ୍ ଇକା ଇର୍ହାମାନାନ୍‌ । 6 ଅରେନ୍‌ ଲୋକା ମାଟା ଇନାତ୍‌, "ମାଟା ୱେର୍‌ତୁ," ଆବେଟ୍‌ ଅରେନ୍‌ ଇର୍ହାନ୍‌, "ଇନି ମାଟା ୱେର୍‌ନାଟ୍‌ ?" "ଦୁନିଆ ମାତର୍‌ ଲାଟାଦି ୱାଜା ମାରି ଦାନି ୱିଜୁଦି ସୁନ୍ଦର୍‌ତି କିଡ଼ିଇଦି ପୁଙ୍ଗୁଁଦି ୱାଜା; 7 ଲାଟା ୱାର୍‌ନା ସନାତ୍‌, ପୁଙ୍ଗୁଁ ରାଲ୍‌ନା ସନାତ୍‌; ଇର୍ରିଙ୍ଗ୍‌ ଆୟା ମୁସୁକୁ ପ୍ରବୁଦି ପୁଣ୍ତାଗାଲି ୱାନାତ୍‌, ସତ୍‌ନେ ଲୋକୁ ଲାଟାଦି ୱାଜା । 8 ଲାଟା ୱାର୍‌ନା ସନାତ୍‌, ପୁଙ୍ଗୁଁ ରାଲ୍‌ନାସନାତ୍‌; ମାତର ମା ମାପୁରୁଦି ବାକ୍ୟ ୱିଜୁଦିନ୍‌ ତେବାନାତ୍‌ ।"

9 ଏ ସିୟନ ଲାକ୍‌ତୁ ନେଗିକାବୁର୍‌ ୱେର୍‌ନିକାତ୍‌, ନିନ୍‌ ପେରି ଗରନ୍‌ତୁ ସାଙ୍ଗ୍‌ଆ; ଏ ଜିରୁସାଲମ ଲାକ୍‌ତୁ ନେଗିକାବୁର୍‌ ୱେର୍‌ନିକାତ୍‌, ନିନ୍‌ ବପୁଦାନ୍‌ ନାଣ୍ଡ ଆଉଲି ଆଜି ଇନ୍‌ଆ, ତିଲାମା; ଜିହୁଦାଦି ୱିଜୁ ଗାଡ଼୍‌କାଙ୍ଗ୍‌ ଇନ୍‌ଆ, "ଇକାନ୍‌ ସୁଡ଼ୁଦୁ, ମି ମାପୁରୁ !" 10 ସୁଡ଼ୁଦୁ, ପ୍ରବୁ ପେରିସାକ୍ତିଦାନ୍‌ ୱାନାନ୍‌ ମାରି ୱାନି ରେକା ୱାନି ଉଣ୍ତିଙ୍ଗ୍‌ ପାଣି କିନାତ୍‌; ସୁଡ଼ୁଦୁ, ୱାନି ୱାଲେ ୱାନି ପୁରସ୍କାର୍‍ ମାନାତ୍‌ ମାରି ୱାନି ଆଗ୍‌ଡ଼ି ୱାନି ବାଦ୍‌ଲୁ ମାନାତ୍‌ । 11 ୱାନ୍‌ ଗାଉଡ଼ୁଏନ୍‌ ୱାଜା ନିଜେଦି ମେଣ୍ଡେଙ୍ଗ୍‌ ମାନ୍ଦା ସାରା କିନାନ୍‌, ମେଣ୍ଡାପିଲେକାଙ୍ଗ୍‌ ୱାନ୍‌ ନିଜେଦି କିୟୁଦାନ୍‌ ଆସ୍‌ନାନ୍‌ ମାରି ନିଜେଦି ଗାତୁଦୁ ୱାନିକାଙ୍ଗ୍‌ ଆସ୍‌ନାନ୍‌, ମାରି ପାଲୁ ଉଟ୍‌ପିସ୍‌ କିନିୱାନିକାଙ୍ଗ୍‌ ଦିରେ ଦିରେ ବୁଲାକିବିସ୍‌ନାନ୍‌ ।

12 ଏନ୍‌ ନିଜେଦି କିୟୁଦି ପାସାଦାନ୍‌ ସାମ୍‌ଦୁରତି ଏରୁଦିଙ୍ଗ୍‌ ଲେକିସ୍‌କିତା ମାନାନ୍‌, ବିତାଦାନ୍‌ ବାଦଡ଼୍‌ ଲେକିସ୍‌ତା ମାନାନ୍‌ ମାରି ବାସ୍‌ତାଦୁ ଦୁନିଆଦି ଦୁଡ଼ି ୱିଜୁ ବର୍ତି କିତାମାନାନ୍‌, ଗରକାଙ୍ଗ୍‌ ମାରି ଇସ୍ରିଗରକାଙ୍ଗ୍‌ ଲେକିସ୍‌କିନି କେଜିଗୁଣ୍ତୁଦାନ୍‌ ତୁସ୍‌ତାମାନାନ୍‌ ? 13 ପ୍ରବୁଦି ଆତ୍ମାଦିଙ୍ଗ୍‌ ଏନ୍‌ ଆଦେସ୍‌ ସିତାମାନାନ୍‌, ମାରି ଅଜାକିନିକାନ୍‌ ଆଜି ଏନ୍‌ ୱାନିଙ୍ଗ୍‌ ସିକିୟା ସିଦେଙ୍ଗ୍‌ ଆଟ୍‌ନାନ୍‌ ? 14 ୱାନ୍‌ ଆମାୱାନି ୱାଲେ ଉପାୟ୍‌ କିତାର୍‌, ଏନ୍‌ ୱାନିଙ୍ଗ୍‌ ସିକିୟା ସିତାନ୍‌ ମାରି ବିସାର୍‌ଦି ସାରି ୱାନିଙ୍ଗ୍ ଅଜାକିତାନ୍‌ ମାରି ବୁଦିଦି ସିକିୟା ସିତାନ୍‌ ମାରି ନେସ୍‌ନି ସାରି ୱାନିଙ୍ଗ୍‌ ତର୍‌ତାନ୍‌ ? 15 ସୁଡ଼ୁଦୁ, କୁଡ଼ାଦି ଲୋକୁ ସାଟିଦି ଏରୁ ବଟୁ ୱାଜା ମାରି ତୁସ୍‌ନିବାଣି ଦୁଡ଼ିଦି ୱାଜା ଇସାବ୍‌ ଆନାର୍‌; ସୁଡ଼ୁଦୁ, ୱାନ୍‌ ସାମ୍‌ଦୁର ନାଣିମିରି ଦେସ୍‌କାଙ୍ଗ୍‌ ଇସ୍‌ରି ଜିନିସ୍‌ଦି ୱାଜା ନିକ୍‌ନାନ୍‌ । 16 ମାରି, ଲିବାନୋନଦି ମାରାକ୍‌ କାସିସ୍‌ କିନି ଉଣ୍ତିଙ୍ଗ୍‌ ମାରି ଆବେଣି ଜାତୁଙ୍ଗ୍‌ ହମ୍‌ ପୁଜା ସିନି ଉଣ୍ତିଙ୍ଗ୍‌ ନାଣ୍ତ ସିଲେ । 17 ୱିଜୁ ଦେସ୍‌ତି ଲୋକୁ ୱାନି ଆଗ୍‌ଡ଼ି ଇନିକା ସିଲେ; ୱାର୍‌ ୱାନି ଲାକ୍‌ତୁ ୱାରିକା ମାରି ଦାରା ସିଲିକା ଆନାର୍‌ । 18 ଆଦେଙ୍ଗ୍‌ ମିର୍‌ ଆମାୱାନି ୱାଲେ ମାପୁରୁଙ୍ଗୁଁ ଇସାବ୍‌ କିନିଦେର୍‌ ? ମାରି ଆମା ବମାଦିଙ୍ଗ୍‌ ୱାନି ସମାନ୍‌ କିନିଦେର୍‌ ? 19 ତିଆର୍‌ କିନିକାନ୍‌ ବମାଦିଙ୍ଗ୍ ସଞ୍ଚ୍‌ଦୁ ୱାକ୍‌ନାନ୍‌ ମାରି ସୁନାରି ବାଙ୍ଗାରାମ୍‌ଦାନ୍‌ ଆକା ଡାଲାୟ୍‌ କିନାନ୍‌, ମାରି ଆୟା ଉଣ୍ତିଙ୍ଗ୍‌ ୱେଣ୍ତିଦି ସିକିଣି ରସ୍‌ନାନ୍‌ । 20 ଆମା ଲୋକୁ ଇୟା ୱାଜା ଉପହାର ଉଣ୍ତିଙ୍ଗ୍‌ ନାଣ୍ଡ୍‌ କାକୁର୍ତି, ୱାନ୍‌ ସତ୍‌ନେ ଆମାବା ୱେର୍‌ଗୁଦିଙ୍ଗ୍‌ ମନ୍‌ କିନାନ୍‌, ୱାନ୍‌ ଡାଟ୍‌ତି ଉନ୍‌ଡ୍ରି ପତ୍‌ସି ବମା ରସ୍‌ନି ଉଣ୍ତିଙ୍ଗ୍‌ ଅରେନ୍‌ ନେଗି ରସ୍‌ନି ୱାନିଙ୍ଗ୍‌ ରେବାନାନ୍‌ । 21 ମିର୍‌ ଇନିକା ନେସ୍‌ଇଦେର୍‌ ? ମିରୁ ଇନିକା ୱେନ୍‌ଇଦେର୍‌ ? ପୁର୍ବେ କାଡ଼ାଦାନ୍‌ ଇନିକା ମିଙ୍ଗିଁ ଅଜା କିଏର୍‌ ? ଦୁନିଆଦି ନାସ୍ଟୁଆନି ମାଣାନ୍‌ ଇନିକା ମିର୍‌ ବୁଜାଇଦେର୍‌ ? 22 ୱାନ୍‌ ବୁମି ମୁସୁକୁ ମାନାନ୍‌ ମାରି ଆବେଣି ଲୋକୁ ମାଡ଼ିମାଉ ୱାଜା; ୱାନ୍‌ ଲେଜୁଦି ଜାୟ୍‌ ୱାଜା ବାଦଡ଼୍‌ ୱିଜୁ ବୁଲାନାନ୍‌, ମାରି ବସ୍‌ତି ଉଣ୍ତିଙ୍ଗ୍‌ ଗୁଡ଼ା ୱାଜା ଆକା ୱେଙ୍ଗିସ୍‌ନାର୍‌; 23 ୱାନ୍‌ ଅଦିପତି ଲୋକାଙ୍ଗ୍‌ ଆଡ୍‌ଗି କିନାନ୍‌; ୱାନ୍‌ ଦୁନିଆଦୁ ବିସାର୍‌କିନି ଲୋକାଙ୍ଗ୍‌ ଦାରାସିଲିକା କିନାନ୍‌ । 24 ହୁଁ, ୱାର୍‌ ଉର୍ରାଏର୍‌; ହୁଁ, ୱାର୍‌ ୱିତାଏର୍‌; ହୁଁ, ୱାରି ମୋଦଲ୍‌ତି ୱେଲା ବୁମିଦୁ ସାର୍‌ଏତ୍‌, ମାରି ୱାନ୍‌ ୱାରି ମୁସୁକୁ ତୁବ୍‌ନାନ୍‌, ଆବେନୁ ୱାର୍‌ ୱାର୍‌ନାନ୍‌ ମାରି ଗାଲିଦୁ ଇମ୍‌ନି ନାଡ଼ା ୱାଜା ୱାରିଙ୍ଗ୍‌ ଇପ୍‌ନା ଅନାନ୍‌ । 25 ଇୟାଉଣ୍ଡିଙ୍ଗ୍‌ ଆୟା ପବିତ୍ର ମାପୁରୁ ଇନାନ୍‌, ନାନ୍‌ ଆମା ଲୋକା ସମାନ୍‌ ଆଦେଙ୍ଗ୍ ଆଟ୍‌ନା, ଇୟାୱାଜା ଆମା ଲୋକା ୱାଲେ ମିର୍‌ ନାଙ୍ଗିଁ ତୁସ୍‌ନିଦେର୍‌ ? 26 ବାଦ୍‌ଡ଼ତୁ ମୁସ୍‌କୁ ସୁଡ଼ୁଦୁ, ମିରୁ ସୁଡ଼ୁତିମାନି ସୁକେଆଙ୍ଗ୍‌ ଏନ୍‌ ତିଆର୍‌ କିତାମାନାନ୍‌ ? ୱାନ୍‌ ୱିଜୁ ସୁକେଆଙ୍ଗ୍‌ କୁଡ଼ାଦି ଲୋଇରାନ୍‌ ଉଡ୍ରେ ଉଡ୍ରେ କିଜି ସପ୍‌ସି ତାନାନ୍‌; ୱାନ୍‌ ୱିଜେରି ଦରୁ ଆସ୍‌ସି ୱାରିଙ୍ଗ୍‌ କୁକୁନାନ୍‌; ୱାନି ନାଣ୍ତବପୁଦି ମାଣାନ୍‌ ମାରି ୱାନ୍‌ ସାକ୍ତିଦାନ୍‌ ନାଣ୍ଡ ଆନି ଉଣ୍ତିଙ୍ଗ୍‌ ୱାରି ଉଣ୍ତ୍ରି ବା ତେବାଏତ୍‌ । 27 ମା ସାରି ପ୍ରବୁଦି ମାଣାନ୍‌ ମାର୍‌ଗିତା ମାନାତ୍‌ ମାରି ମା ବିସାର୍‌ ମା ମାପୁରୁଦି ବୁଦିଦି ଆଗ୍‌ଡ଼ି, ଏ ଜାକୁବ, ନିନ୍‌ ଏନ୍ଦା ଇକା ଇଜିନି, ଏ ଇସ୍ରାଏଲ, ନିନ୍‌ ଏନ୍ଦା ଇକା ଇଜିନି ? 28 ମିର୍‌ ନ ନେସ୍‌ଇଦେର୍‌ ? ମିର୍‌ ନ ୱେନ୍‌ଇଦେର୍‌ ? ଦୁନିଆଦି ୱିଜୁ ତିଆର୍‌ କିତିକାନ୍‌ ଏସେଙ୍ଗ୍‌ ୱିଜ୍‌ଇ ମାପୁରୁ ପ୍ରବୁ ୱାନ୍ଦ୍‌ଏନ୍‌; ୱାନି ବୁଦି ନାଣ୍ତ ବୁଜାନି ମାଣାନ୍‌ ନାଣ୍ତ । 29 ୱାନ୍‌ ୱାନ୍ଦିତି ଲୋକାଙ୍ଗ୍‌ ବପୁ ସିନାନ୍‌ ମାରି ବପୁ ସିଲି ଲୋକାଙ୍ଗ୍‌ ବପୁ ପିରିସ୍‌ କିନାନ୍‌ । 30 ମୁରୁଲିର୍‌ ୱାନ୍ଦ୍‌ନାର୍‌ ମାରି ତାଗାଜି ମେଡ଼୍‌ନାର୍‌, ମୁରୁଲିର୍‌ ସତ୍‌ନେ ମେଡ଼୍‌ନାସନାର୍‌; 31 ମାତର୍‌ ଆମାକାର୍‌ ପ୍ରବୁଦିମାନୁ କାପ୍‌କିନାର୍‌, ୱାର୍‌ ପୁନି ପୁନି ବପୁ ପୟ୍‌ନାର୍‌; ୱାର୍‌ ଡେଗା ପଟିଦି ୱାଜା ମୁସୁକୁ ଇମ୍‌ନାର୍‌; ୱାର୍‌ ୱାନ୍ଦ୍‌ଏଣ୍ଡା ଉର୍‌କୁନାର୍‌; ୱାର୍‌ ୱାନ୍ଦ୍‌ଏଣ୍ଡା ବୁଲାନାର୍‌ ।