1 ଏ ଦାର୍ମୁଦୁ ବୁଲାନି ଲୋକୁ, ଏ ପ୍ରବୁଦିଙ୍ଗ୍‌ ରେବାନି ଲୋକୁ, ମିରୁ ନା ମାଟା ୱେଣ୍ଡ୍ରୁ: ମିର୍‌ ଆମା କାଲୁଦାନ୍‌ କୟାତି ମାର୍ହିଦେର୍‌ ମାରି ଆମା ନିର୍‌ଇ ଗୁଟାଦି ଆଡ୍‌ଗିରାନ୍‌ କାରାତି ମାର୍ହିଦେର୍‌, ଆୟା ଉଣ୍ତିଙ୍ଗ୍‌ ସୁଡ଼ୁଦୁ । 2 ମି ପୁର୍ବେଦି ଡକ୍ରାଦାଦା ଅବ୍ରହାମ ଉଣ୍ତିଙ୍ଗ୍‌ ମାରି ମିଙ୍ଗିଁ ଜନମ୍‌ସିତି ସାରା ଉଣ୍ତିଙ୍ଗ୍‌ ସୁଡ଼ୁଦୁ; ଇର୍ରିଙ୍ଗ୍‌ ୱାନ୍‌ ଅରେନ୍‌ ମାର୍ହି ୱେଡ଼ାଦୁ ନାନ୍‌ ୱାନିଙ୍ଗ୍‌ କୁକୁତା ମାରି ନାନ୍‌ ଆର୍ସିବାଦ୍‌ କିଜି ୱାନିଙ୍ଗ୍‌ ନାଣ୍ଡ କୁଟୁମ୍‌ କିତା । 3 ଇର୍ରିଙ୍ଗ୍‌ ପ୍ରବୁ ସିୟୋନଦିଙ୍ଗ୍‌ ସାନ୍ତି କିତାମାନାନ୍‌; ୱାନ୍‌ ୱାନି ବାସ୍‌ଡ଼ାତି ବାଡିଙ୍ଗ୍‌ ୱିଜୁ ସାନ୍ତି କିତାମାନାନ୍‌; ୱାନ୍‌ ୱାନି ଗରକାଣି ବାଟାଦିଙ୍ଗ୍‌ ଏଦନ୍‌ ୱାଜା ମାରି ୱାନି ବାଲିବାଟା ବୁମିଦିଙ୍ଗ୍‌ ପ୍ରବୁଦି ଡଡ଼ି ୱାଜା କିତାମାନାନ୍‌; ୱେଡ଼ିକା ମାରି ନାଣ୍ତ ୱେଡ଼ିକା, ଦନ୍ୟବାଦ୍‌ ମାରି ପାଟା ଆଉଲି ଆୟା ଲୋଇ ଆନାତ୍‌ । 4 "ଏ ନା ଲୋକୁ, ନା ମାଟାଦିଙ୍ଗ୍‌ ମନ୍‌ଦିୟାନ୍‌ ସିଦୁ; ଏ ନା ଦେସ୍‌ତି ଲୋକୁ, ନା ମାଟାଦିଙ୍ଗ୍‌ ୱେଣ୍ଡ୍ରୁ: ଇର୍ରିଙ୍ଗ୍‌ ନା ମାଣାନ୍‌ ଉନ୍‌ଡ୍ରି ନିୟମ୍‌ ୱାନାତ୍‌ ମାରି ନାନ୍‌ କୁଡ଼ାଦି ଜାୟ୍‌ ଉଣ୍ତିଙ୍ଗ୍‌ ନା ବିସାର୍‌ କିନାନ୍‌ । 5 ନା ଦାର୍ମୁ ଲାକ୍‌ତୁନେ, ନା ରକିୟା ସତା ମାନାତ୍‌ ମାରି ନା କିୟୁ କୁଡ଼ାଦି ଲୋକାଙ୍ଗ୍‌ ବିସାର୍‌ କିନାତ୍‌; ଇସ୍‌ରି ଦେସ୍‌କୁ ନାଙ୍ଗି କାପ୍‌କିଜି ତେବାତେମାନେ ମାରି ନା କିୟୁଦୁ ଆସା ଇଡ୍‌ନାର୍‌ । 6 ମିର୍‌ ବାଦଡ଼୍‌ ତରିନ୍‌ ମୁସୁକୁ ସୁଡ଼ୁଦୁ ମାରି ଆଡ୍‌ଗିରି ବୁମିଦୁ ସୁଡ଼ୁଦୁ; ଇର୍ରିଙ୍ଗ୍‌ ବାଦଡ଼୍‌ ଗଇ ୱାଜା ଆନାତ୍‌ ମାରି ବୁମି ଆଙ୍ଗିଁସକା ୱାଜା ଜିରାନାତ୍‌, ମାରି ଆବେନୁ ଦୁନିଆଦୁ ବାସାତିମାନି ଲୋକୁ ଆୟା ୱିଜେଙ୍ଗ୍‌ ୱାଜା ସାନାସନାର୍‌; ମାତର ନା ରକିୟା ଏସେଙ୍ଗ୍‌ ୱିଜ୍‌ଏତ୍‌, ମାରି ନା ଦାର୍ମୁ ମାର୍‌ଗେଏତ୍‌ । 7 ଏ ଦାର୍ମୁଦି ଲୋକୁ, ମି ଜିବନ୍‌ତୁ ନା ନିୟମ୍‌ ମାନାତ୍‌, ମିର୍‌ ନା ମାଟା ୱେଣ୍ଡ୍ରୁ; ମିରୁ ନିସାର୍‌କିନି ଲୋକାଙ୍ଗ୍‌ ତିଲାମାଟ୍‌, ମାରିବା ୱାରି ନିନ୍ଦାଦାନ୍‌ କିଲିବିଲି ଆମାଟ୍‌ । 8 ଇର୍ରିଙ୍ଗ୍‌ ସେଦା ୱାରିଙ୍ଗ୍‌ ଆଙ୍ଗିଁସକା ୱାଜା ତିନେ ପକ୍‌ନେ ମାରି ପିଡ଼ୁକୁ ୱାରିଙ୍ଗ୍‌ ବୁର୍‌ବୁସା ୱାଜା ତିନେ; ମାତର୍‌ ନା ଦାର୍ମୁ ଏସେଙ୍ଗ୍‌ ୱିଜ୍‌ଏତ୍‌ ମାରି ନା ରକିୟା କାଡ଼ା କାଡ଼ା ସାନ୍ଦି ତେବାନାତ୍‌ ।" 9 ଏ ପ୍ରବୁ ନିଙ୍ଗ୍‌ଆ ମାରି ମାଙ୍ଗିଁ ସାକା କିଆ, ନିଙ୍ଗ୍‌ଆ ବପୁ ଆସ୍‌ଆ, ଏଣ୍ଡେସ୍‌ଗି ପୁର୍ବେ କାଡ଼ାଦୁ, ପାଡ଼ିଇ କୁଟୁମ୍‌ଦି ବେଡ଼ାଦୁ, ଆୟାୱାଜା ନିଙ୍ଗ୍‌ଆ । ଏନ୍‌ ରାହାବଙ୍ଗ୍‌*51:9 ମିସରତି ତାଗ୍‌ଇ ସାକ୍ତିଦି ସିନା ମୁକା ମୁକା କିଜି କଇତାନ୍‌, ଏନ୍‌ ସାମ୍‌ଦୁର୍‌ତୁ ମାନି ନାଗତିଙ୍ଗ୍‌ ଗୁତ୍‌ତାନ୍‌, ୱାନ୍‌ ଇନିକା ନିନ୍‌ ଆଇ ? 10 ଆମାକାନ୍‌ ସାମ୍‌ଦୁର୍‌ତିଙ୍ଗ୍‌, ନାଣ୍ଡନିରି ଏରୁୱିଜୁଦିଙ୍ଗ୍‌ ୱାରିସ୍‌ କିତାନ୍‌, ଆମାକାନ୍‌ ମୁକୁଡ଼ାତି ଲୋକାଙ୍ଗ୍‌ ନାନି ଉଣ୍ତିଙ୍ଗ୍‌ ସାମ୍‌ଦୁର୍‌ତି ଆଡ୍‌ଗିରି ବାଡିଦିଙ୍ଗ୍‌ ସାରି କିତାନ୍‌, ୱାନ୍‌ ଗି ନିନ୍‌ ଆଇ ? 11 ମାରି, ପ୍ରବୁଦି ମୁକୁଡ଼ାତି ଲୋକୁ ଡ଼େସି ୱାନାର୍‌ ମାରି ୱେଡ଼ିକା କିବୁ କିବୁ ସିୟୋନତୁ ଇନାର୍‌; ଏସ୍‌କାଙ୍ଗ୍‌ ୱିଜ୍‌ଇ ନାଣ୍ତ ୱେଡ଼ିକା ପଇନାର୍‌, ମାରି ଆଡ଼୍‌ବାନିକା ନି ଦୁଃକ୍‌ ଆକ ଆନାତ୍‌ । 12 ଆମାକାନ୍‌ ମିଙ୍ଗିଁ ସାନ୍ତି ସିନାନ୍‌, ୱାନ୍‌ ନାନ୍‌, ନାନ୍‌ ନେ; ସାନି ଆଡ୍‌ଗି ଲୋକାଙ୍ଗ୍‌ ମାରି ଏନ୍‌ ଲାଟା ୱାଜା କିଆଇ ଆନାନ୍‌, ଇୟାୱାଜା ଲୋକୁଦି ମାରିନ୍‌ତିଙ୍ଗ୍‌ ତିଲାଜିନିଦେର୍‌, 13 ମାରି ବାଦଡ଼୍‌ୱିଜୁ ଅଦିକାର୍‌ କିନିକାନ୍‌ ମାରି ଦୁନିଆଦି ୱିଜୁ ମୁଲ୍‌କୁନାଦି କିନିକାର୍‌ ମିଙ୍ଗିଁ ତିଆର୍‌କିତି ପ୍ରବୁଙ୍ଗ୍‌ ବାଣାତି ମାନିଦେର୍‌ ମାରି ଡଙ୍ଗାଁକିତିକା ନାସ୍ଟୁ କିଦେଙ୍ଗ୍‌ ତିଆର୍‌ଆତି ୱେଡ଼ାଦୁ ୱାନି ରିସା ଉଣ୍ତିଙ୍ଗ୍‌ ୱେଡ଼୍‌ୱେଡ଼ାର୍‌ ନାଣ୍ଡ ତିଲାଜିନିଦେର୍‌ ଜେ ମିରୁ, ମିରୁ ତ ଏର୍‌ ? ମାରି, ୱାନ୍‌ ଆୟା ଡଙ୍ଗାଁର୍‌ଏଙ୍ଗ୍‌ତି ରିସା ଏମେ ? 14 ଜଇଲ୍‌ତୁ ମାନିକାର୍‌ ଦାପ୍ରେ ମୁକୁଡ଼ାନାର୍‌; ମାରି, ୱାର୍‌ ଏସ୍‌କାଙ୍ଗ୍‌ ସାଏର୍‌, ମାରିବା ୱାରି କାଦି ଉଣା ଆଏତ୍‌ । 15 ଇର୍ରିଙ୍ଗ୍‌ ଲଡ଼ିଙ୍ଗ୍‌ ଗାର୍ଜାନି ଉଣ୍ତିଙ୍ଗ୍‌ ଏନ୍‌ ସାମ୍‌ଦୁର୍‌ତିଙ୍ଗ୍‌ ଦାନ୍ଦା କିନାନ୍‌, ନାନ୍‌ ଆୟା ପ୍ରବୁ ମି ମାପୁରୁ ନେ; ୱାନି ଦରୁ ପେରିସାକ୍ତିଦି ପ୍ରବୁ । 16 ମାରି, ବାଦଡ଼୍‌ୱିଜୁ ସାକ୍‌ତା ମାନା, ଦୁନିଆଦି ମୁଲ୍‌କୁନାଦି ତିଆର୍‌ କିତା ମାନା ମାରି ମିରୁ ନା ଲୋକୁ, ଇକା ସିୟୋନଦିଙ୍ଗ୍‌ ଇନି ଉଣ୍ତିଙ୍ଗ୍‌ ନାନ୍‌ ମି ଉଣ୍ତିଙ୍ଗ୍‌ ନିଜେଦି ମାଟା ଇଟ୍‌ତାମାନା ମାରି ନିଜେଦି କିୟୁଦି ନିଡ଼ାଦୁ ମିଙ୍ଗିଁ ଇଟ୍‌ତା ମାନା ।

17 ଏ ଜିରୁସାଲମ ନିଙ୍ଗ୍‌ଆ, ନିଙ୍ଗ୍‌ଜି ନିଲ୍‌ଆ, ମିର୍‌ ପ୍ରବୁଦି କିୟୁଦାନ୍‌ ୱାନି ରିସାଦି ଉଣି ସାଟି ଅସି ଉଟି ମାନିଦେର୍‌; ମିର୍‌ ସସ୍‌ନିୱାଜା ପେରି ସାଟିଦାନ୍‌ ଉଣୁଜି ଆକା ୱିସ୍‌ତି ମାନିଦେର୍‌ । 18 ୱାନ୍‌ ଆମା ମାରିନ୍‌କାଙ୍ଗ୍‌ ଜନମ୍‌ ସିତାମାନାନ୍‌, ଆୟା ୱିଜେରି ମାଣାନ୍‌ ୱାନିଙ୍ଗ୍‌ ବୁଲାକିଜି ଅତେଙ୍ଗ୍‌ ଏନ୍‌ ସିଲେନ୍‌; ମାରିବା ୱାନ୍‌ ଆମା ମାରିନ୍‌କାଙ୍ଗ୍‌ ପସା କିତାମାନାନ୍‌, ଆୟା ୱିଜେରି ମାଣାନ୍‌ ୱାନି କିୟୁ ଆସ୍‌ସି ଅନି ଉଣ୍ତିଙ୍ଗ୍‌ ଏନ୍‌ ସିଲେନ୍‌ । 19 ଇୟା ରୁଣ୍ଡି ବିସୟ୍‌ ମି ଉଣ୍ତିଙ୍ଗ୍‌ ଗଟାତାମାନାତ୍‌; ମି ଉଣ୍ତିଙ୍ଗ୍‌ ଏନ୍‌ ଆଡ଼୍‌ବାନାନ୍‌ ? ୱାରିକା ମାରି ସାନିକା, ମାରି ମର୍‌ଡି ମାରି କାଣ୍ତା; ନାନ୍‌ ମିଙ୍ଗିଁ ଏଣ୍ଡେସ୍‌ ସାନ୍ତି କିନା ? 20 ଜାଡ଼ିଦୁ ଅଡ଼୍‌ଜାତି ମାନି ମାଉଁ ୱାଜା ମି ମାରିନ୍‌କୁ ସେତାସିଲିକା ଆତାମାନାର୍‌, ୱାର୍‌ ୱିଜେରେ ପେର୍‌ଜାରିଦି ତାଲାଦୁ ଆର୍‌ତାମାନାର୍‌; ୱାର୍‌ ପ୍ରବୁଦି ରିସାଦୁ, ମି ମାପୁରୁଦି ଆଦ୍‌ରିସ୍‌ କିନି ମାଣାନ୍‌ ପୁରାବର୍ତି । 21 ଇୟାଉଣ୍ଡିଙ୍ଗ୍‌ ଏ ଦୁଃକ୍‌ତିକିନ୍ଦା ମାରି ୱାର୍ହି ଅଙ୍ଗୁର୍‌ ରସ୍‌ତାନ୍‌ ସସ୍‌ତିମାନିଦେର୍‌ ଜେ ମିରୁ, ଇଲେଇ ଇକା ୱେଣ୍ଡ୍ରୁ; 22 ନିନ୍‌ ପ୍ରବୁ, ମାରି ନିଜେଦି ଲୋକାଦି ତରନ୍‌ମାନି ମି ମାପୁରୁ ଇୟା ମାଟା ଇନାନ୍‌, "ସୁଡୁଦୁ, ନାନ୍‌ ସସ୍‌ନିନାନି ଉଣି ଡୁବାଇ, ଇର୍ରିଙ୍ଗ୍‌, ନା ରିସାଦିୱାଜା ପେରି ଉଣି ଡୁବାଇ ମି କିୟୁଦାନ୍‌ କୁତ୍‌ତା ଅତାମାନା ମିର୍‌ ମାରି ଆକା ଉଣିଇଦେର୍‌; 23 ମାରି, ଆମାକାର୍‌ ନିଙ୍ଗିଁ କାସ୍ଟୁ ସିନାର୍‌, ୱାରି କିୟୁଦୁ ନାନ୍‌ ଆକା ସିନା; ୱାର୍‌ ମି ଜିବନ୍‌ତିଙ୍ଗ୍‌ ଇର୍ହାମାନାର୍‌, ୱାଙ୍ଗ୍‌ଦୁ, ମାପ୍‌ ମି ମୁସୁକୁ ସିଜି ବୁଲାନାପ୍‌ ମାରି, ନିନ୍‌ ବୁମି ମାରି ପେରିଜାରି ୱାଜା ସନିଲୋକା ଉଣ୍ତିଙ୍ଗ୍‌ ନିଜେଦି ମୁଟାମ୍‌ ପାର୍‌ତି ସିତିମାନି ।"