ଦାଉଦଦି ଗାଡ଼୍ତି ଉଣ୍ତିଙ୍ଗ୍ ଦଣ୍ତ୍
1 ଏ ଅରିୟେଲ, ଅରିୟେଲ, ଦାଉଦଦି ଗାଡ଼୍ ! ବାର୍ସେକ୍ତିଙ୍ଗ୍ ବାର୍ସେକ୍ ମିସା କିଦୁ; ପଣ୍ଡଇକୁ ପାଲି ଇସାବ୍ଦାନ୍ ରାପିୟି; 2 ଆର୍ତିଙ୍ଗ୍ ମାପ୍ ଅରିୟେଲ ଉଣ୍ତିଙ୍ଗ୍ ଦୁଃଖ ଗୋଟା କିନା, ଆବେଟ୍ ଏତ୍ କିନାନ୍ ମାରି ଆଡ଼୍ବାନାନ୍ ମାରି ଆକା ମା ଉଣ୍ତିଙ୍ଗ୍ ଅରିୟେଲ ପୁଜାସିନି ବେଦି ୱାଜା ଆନାତ୍ । 3 ମାରି, ମାପ୍ ସାରିବେଡ଼େତି ମି ବିରୁଦ୍ତାନ୍ କଟି ତିୟାର୍ କିନାପ୍ ମାରି ଇଲୁଦୁ କେର୍ସି ମିଙ୍ଗିଁ ଇଡ୍ନାପ୍ ମାରି ମି ବିରୁଦ୍ତାନ୍ କେର୍ପ୍ନି ଉପାୟ୍ ତିୟାର୍ କିନାଟ୍ । 4 ଆବେନୁ ମିର୍ ଆଡ୍ଗିଆନିଦେର୍ ମାରି ବୁମିଦାନ୍ ୱାର୍ଗିନିଦେର୍ ମାରି ଦୁଡ଼ିଦାନ୍ ମି ମାଟା ୱାଜା ଆନାତ୍; ମାରି, ଦୁବାଦି ୱାଜା ମି ମାଟା ବୁମିଦାନ୍ ସନାତ୍ ମାରି ଦୁଡ଼ିଦାନ୍ ମି ମାଟାଦି ପୁସୁରୁ ପାସୁରୁ ଆଉଲି ୱିଙ୍ଗିଁନାତ୍ ।
5 ମାତର୍ ମି ସାତ୍ରୁରି ଲୋକୁ ୱିଜେରେ ୱାର୍ତି ଦୁଡ଼ିଦି ୱାଜା ଆନାର୍ ମାରି ନିସ୍ଟୁର୍ରି ଲୋକୁ ୱିଜେରେ ଇମ୍ନିସୋନି ପଟୁଦି ୱାଜା ଆନାର୍; ଇକା ସାଣେକ୍ନେ ଦାପ୍ରେ ଗୋଟାନାତ୍ । 6 ପେରିସାକ୍ତିଦି ସଦାପ୍ରବୁ ବାଦଡ଼୍ ଗାର୍ଜାଜି, ବୁମିକମ୍ପ, ନାଣ୍ଡ୍ ଆଉଲି ଆଜି, ଗାଲିପିରୁ, ବାତ୍ୟା ମାରି ସାପିସ୍ କିନି ସିସୁ ଡ଼ିବୁଦି ୱାଲେ ୱାନି ଇସାବ୍ ଅନାନ୍ । 7 ମାରି, ୱିଜୁ କୁଡ଼ାଦି ଆମା ଲୋକୁ ୱିଜେରେ ଅରିୟେଲ ବିରୁଦ୍ତାନ୍ ଜୁଦ୍ କିନାର୍, ଇରିଙ୍ଗ୍, ଆମାକାର୍ ୱାନି ମାରି ୱାନି ଡାଟ୍ତି ନିର୍ଇ ମୁଣ୍ତାଦି ବିରୁଦ୍ତାନ୍ ଜୁଦ୍ କିଜି ୱାନିଙ୍ଗ୍ ଅଡ଼ପ୍ ଜିବନ୍ ଡ଼ିସ୍ସି ସାପିସ୍ କିନାର୍, ଆୟା ୱିଜେରେ ଲୋବେରୁ ସୁଡ଼ୁନି ୱାଜା ମାରି ନାଡ଼ାରି ବେଡ଼ାଦୁ ତରାଇଆନି ୱାଜା ଆନାର୍ । 8 ମାରି, ଏଣ୍ଡେସ୍ଗି ବାଙ୍ଗାଁଦି ଲୋକ୍ ଲୋବେରୁ ଉଣୁଜିନା ଇଜି ସୁଡ଼ୁନାନ୍, ମାତର୍ ସେତା ଆତିଙ୍ଗ୍, ୱାନି ଜିବନ୍ ୱାରିକା ମାନାତ୍; ଏଣ୍ଡେସ୍ଗି ଏର୍କିସାତି ଲୋକୁ ଏରୁ ଉଣୁଜିନା ଇଜି ଲୋବେରୁ ସୁଡ଼ୁନାନ୍, ମାତର୍ ସେତା ଆତିଙ୍ଗ୍ ସୁଡ଼ୁନାନ୍, ୱାଣ୍ଡ୍ରୁ ସାକିସିଲିକାନ୍ ଆନାନ୍ ମାରି ୱାନି ଜିବନ୍ ଏର୍କିଦୁ ମାନ୍ଜିନାତ୍, ସିୟୋନ ଗରତି ବିରୁଦ୍ତାନ୍ ଜୁଦ୍କିନି ୱିଜୁ କୁଡ଼ାଦି ଲୋକୁ ୱିଜେରେ ଆୟାୱାଜା ଆନାର୍ ।
ଏଲାଆନି ୱାରିଙ୍ଗ୍ ଜାଗାର୍ତା
9 ମିର୍ ତେବାଦୁ ମାରି କାବାଆଦୁ; ନିଜେଦିଙ୍ଗ୍ ୱେଡ଼ିକା କିଜି କାଣା ଆଦୁ; ୱାର୍ ସୋସ୍ତା ମାନାର୍, ମାତର୍ ଅଙ୍ଗୁର୍ ରସ୍ଦାନ୍ ସିଲେ; ୱାର୍ ଦୁଙ୍ଗୁଜିନାର୍, ମାତର୍ କାଡ଼ୁଦାନ୍ ସିଲେ । 10 ଇରିଙ୍ଗ୍ ସଦାପ୍ରବୁ ମି ମୁସୁକୁ ନାଣ୍ଡ ସୁସ୍କାଣାକାଣି ଆତ୍ମା ସିତାମାନାନ୍ ମାରି ମି ବବିସତ୍ ବକ୍ତାରି ୱାଜା କାଣୁକୁ ମୁଦା କିତାମାନାନ୍ ମାରି ସୁଡ଼ୁନି ଲୋକା ୱାଜା ମି ତାଲେକ୍ ୱାନ୍ ପିଡ଼ିକ୍ତାମାନାନ୍ । 11 ମାରି, ୱିଜୁ ତରାଇଆନିକା ମି ଉଣ୍ତିଙ୍ଗ୍ ଟାପ୍ ଡାକ୍ତି ବଇଦି ବାକ୍ୟ ୱାଜା ଆତାମାନାତ୍, ଏନ୍ ସିକିତ୍ ଲୋକୁଦିଙ୍ଗ୍ ଆକା ସିଜି ଦୟା କିଜି "ଇକା ପଡ଼ାଆ" ୱେର୍ତିଙ୍ଗ୍, ୱାନ୍ ଇନାନ୍, "ଇକା ଟାପ୍ ଡାକାତା ମାନାତ୍, ଆଦେଙ୍ଗ୍ ନାନୁ ପୋଡ଼ାଦେଙ୍ଗ୍ ଆଟ୍ଏ ।" 12 ମାରି, ଆୟା ବଇ ଅସିକିତ୍ ଲୋକୁଦିଙ୍ଗ୍ ସିଜି, ଦୟା କିଜି "ଇକା ପୋଡ଼ାଆ" ୱେର୍ତିଙ୍ଗ୍, ୱାନ୍ ଇନାନ୍, "ନାନୁ ପୋଡ଼ାନି ଲୋକୁ ସିଲେ ।"
13 ମାରି, ପ୍ରବୁ ଇର୍ହାନ୍, "ଇୟା ଲୋକୁ ମା ଲାକ୍ତୁ ଆନାର୍ ମାରି ୱାର୍ ନିଜେ ନିଜେଦି ମୋକମ୍ଦାନ୍ ମାରି ୱେୟୁଦାନ୍ ମାଙ୍ଗିଁ ସନ୍ମାନ୍ କିନାର୍, ମାତର୍ ୱାର୍ ନିଜେ ନିଜେଦି ଜିବନ୍ ମା ମାଣାନ୍ ଆକୋ ଇଟ୍ତାମାନାର୍ ମାରି ମା ବିସୟ୍ ୱାରି ଆମା ତିୟେଲ୍, ଆକା ଲୋକାମାଣାନ୍ ଅଜାତି ମାଟା ଆନାତ୍ ।" 14 ଇୟାଉଣ୍ଡିଙ୍ଗ୍ ସୁଡୁଦୁ, ମାପ୍ ଇୟା ଲୋକା ବାନୁ ଉନ୍ଡ୍ରି କାବାନିକା ମାରି କାବାଆନି ପାଣି କିନାପ୍, ମାରି, ୱାରି ବୁଦି ଲୋକାଦି ବୁଦି ନାସ୍ଟୁ ଆନାତ୍ ମାରି ୱାରି ମନ୍ ଲୋକାଦି ବୁଦ୍ଧି ମାରାଗ୍ନା ସନାତ୍ ।
ୱାଜିନିଦିନ୍ତି ଆସା
15 ଆମାକାର୍ ପ୍ରବୁଦି ମାଣାନ୍ ନିଜେ ନିଜେଦି ମାଟା ଆଡ଼େକ୍ତେଙ୍ଗ୍ ସେସ୍ଟା କିନାର୍, ୱାର୍ ଦଣ୍ତ୍ ପୋଇନିକାର୍ ! ମାରି, ୱାର୍ ସିକାଟିଦୁ ନିଜେ ନିଜେଦି ପାଣି କିଜି ଇନାର୍, "ମାଙ୍ଗିଁ ଏନ୍ ସୁଡ଼ୁଜିନାନ୍ ? ମାରି ମାଙ୍ଗିଁ ଏନ୍ ସିନିସ୍ନାନ୍ ?" 16 ମିର୍ ୱିଜୁ ବିସୟ୍ଦିଙ୍ଗ୍ ମାର୍ତି ପୋକ୍ତିମାନିଦେର୍ ! କୁମାର୍ ଏଣ୍ତେସ୍ ସିକ୍ଲାଦି ୱାଜା ଆନାନ୍; "ଇୟା ଲୋକୁ ମାଙ୍ଗିଁ ତିୟାର୍ କିଏନ୍," ତିୟାର୍ଆତି ଜିନିସ୍ ନା ତିୟାର୍କିତି ଲୋକା ବିସୟ୍ଦାନ୍ ଇକା ଇନାନ୍ ? ମାରି "ୱାନି ଇନି ବୁଦି ସିଲେତ୍, ରସ୍ତି ଜିନିସ୍ ନା ତିୟାର୍କିତି ଲୋକା ବିସୟ୍ଦାନ୍ ଇକା ଇନାନ୍ ?"
17 ସାଣେକ୍ତି କାଡ଼ା ୱେନ୍କା ଲିବାନୋନ ଗି ପଲ୍ ପାଣ୍ତିନି କିଡ଼ିଇଦୁ ମିସାଏତ୍ ମାରି ପଲ୍ ପାଣ୍ତ୍ନି କିଡ଼ିଇ ଏଣ୍ତେସ୍ ବନୁ ଇଜି ଇସାବ୍ ଆଏତ୍ ?
18 ମାରି, ଆୟା ନାଣ୍ତିଙ୍ଗ୍ ବୋଇରା ବଇଦି ବାକ୍ୟ ୱେନାନ୍, ମାରି, ନାଣ୍ଡ୍ ସିକାଟି ମାରି ମାସ୍ରା ସିକାଟିଦି ମାଣାନ୍ କାଣା କାଣୁକୁ ସୁଡ଼ୁନାନ୍ । 19 ସାନ୍ତି ଲୋକୁ ସଦାପ୍ରବୁଦିମାନୁ ନିଜେ ନିଜେଦି ୱେଡ଼ିକା ପିରିସ୍ କିନାର୍ ମାରି ଲୋକା ଲୋଇ ସିଲିସାତି ଲୋକୁ ଇସ୍ରାଏଲଦି ଦାର୍ମୁଦି ମାପୁରୁଦିମାନୁ ୱେଡ଼ିକା କିନାର୍ । 20 ଇରିଙ୍ଗ୍ ନିସ୍ଟୁର୍ତି ଲୋକୁ ନାସ୍ଟୁ ଆତାମାନାର୍, ମାପୁରୁଙ୍ଗୁଁ ନିନ୍ଦା କିନିକାର୍ ନାସ୍ଟୁ ଆତାମାନାର୍ ମାରି ଆମାକାର୍ ଅଦାର୍ମୁଦିଙ୍ଗ୍ କାପ୍କିନା ତେବାନାର୍, ଆୟା ୱିଜେରେ ଇନିଙ୍ଗାଁ ଆନିଙ୍ଗାଁ ଆତାମାନାର୍; 21 ୱାର୍ ମାଟାଦାନ୍ ଲୋକାଙ୍ଗ୍ ଦସି କିନାର୍ ମାରି ଗାଡ଼୍ତି ସେର୍ଲାଦୁ ଦସ୍ସିଲି ମାଟାଦି ଉଣ୍ତିଙ୍ଗ୍ ଉରି ଅଡ୍ନାର୍ ମାରି ଦସ୍ ସିଲିମାଣାନ୍ ଦାର୍ମୁଦି ଲୋକା ଉଣ୍ତିଙ୍ଗ୍ ଆରେଏ ଦସି କିନାର୍ ।
22 ଇୟାଉଣ୍ଡିଙ୍ଗ୍ ଅବ୍ରହାମଦି ମୁକୁଡ଼ା କିନି ସଦାପ୍ରବୁ ଜାକୁବ କୁଟୁମ୍ ବିସୟ୍ଦାନ୍ ଇୟାୱାଜା ଇନାନ୍; "ଜାକୁବ ଇଲେଇ ସେମାର୍ ଆଏନ୍, ମାରିବା ୱାନି ମୋକମ୍ ସିମ୍ରା ଆଏତ୍ । 23 ମାତର୍ ଏସ୍ତିୱାଲେ ୱାନ୍ ମା କିୟୁଦି ପାଣି ୱାଜା ୱାନି କଡ଼ରିଙ୍ଗ୍ ନିଜେଦି ଲୋଇ ସୁଡ଼ୁନାନ୍, ନାସ୍ତିୱାଲେ ୱାର୍ ମା ଦର୍ତିଙ୍ଗ୍ ପବିତ୍ର କିଜି ମାନାନାର୍; ହୁଁ, ୱାର୍ ଜାକୁବଦି ମାପୁରୁଙ୍ଗୁଁ ପବିତ୍ର ଇଜି ମାନାନାର୍ ମାରି ଇସ୍ରାଏଲଦି ମାପୁରୁଙ୍ଗୁଁ ନାଣ୍ତ ତିଲାନାର୍ । 24 ଆମାକାର୍ ବେମ୍ରି ଆତାମାନାର୍, ୱାର୍ ବା ବୁଦି ପୋଇନାର୍ ମାରି ବାସେକିନିକାର୍ ନେଗି ମାଟା ଅଜାନାର୍ ।"
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)