1 ମାତର୍‌ ଏ ଜାକୁବ, ଆମାକାନ୍‌ ନିଙ୍ଗିଁ ତିଆର୍‌ କିତାନ୍‌, ଏ ଇସ୍ରାଏଲ, ଆମାକାନ୍‌ ନିଙ୍ଗିଁ ତିୟାର୍‌ କିତାନ୍‌, ଆୟା ସଦାପ୍ରବୁ ଇଲେଇ ଇୟା ମାଟା ଇଜିନାନ୍‌, ତିଲାମାଟ୍‌, ଇର୍ରିଙ୍ଗ୍‌ ମାପ୍‌ ନିଙ୍ଗିଁ ମୁକୁଡ଼ା କିତାମାନାପ୍‌; ମାପ୍‌ ନି ଦରୁ ଆସ୍‌ସି ମିଙ୍ଗିଁ କୁକୁତା ମାନାପ୍‌, ନିନୁ ମା ଲୋକୁ । 2 ନିନୁ ଏରୁଦି ଲୋଇ ସନି ୱାଲେ ନାନୁ ନିଙ୍ଗିଁ ସଙ୍ଗ୍‌ ଆନି ଗାଡାଦି ଲୋଇ ସୋରିଙ୍ଗା, ଆୟା ୱିଜୁ ନିଙ୍ଗିଁ ମୁଡ଼ୁକ୍‌ଏତ୍‌; ମିର୍‌ ସିସୁଦୁ ବୁଲାତିଙ୍ଗ୍‌ବା ୱେଇଦେର୍‌, ମାରି ସିସୁ ମିଙ୍ଗିଁ ୱେପିସ୍‌ କିଏତ୍‌ । 3 ଇର୍ରିଙ୍ଗ୍‌ ନାନୁ ପ୍ରବୁ, ନି ମାପୁରୁ, ଇସ୍ରାଏଲତି ଦାର୍ମୁଦି ୱାଜା, ନିଙ୍ଗିଁ ରକିୟାକିନିକାନ୍‌; ନାନୁ ନି ମୁକୁଡ଼ାତି ଦାରା ୱାଜା ମିସର ମାରି ନି ବାଦ୍‌ଲୁ କୁସ ମାରି ସବା ଦେସ୍‌ ସିତାମାନା । 4 ନିନୁ ନା ଆଗ୍‌ଡ଼ି ନାଣ୍ଡ୍‌ ଦାରା ମାରି ଗୌରବ୍‌ ଆତିମାନି ମାରି ନାନୁ ନିଙ୍ଗିଁ ଜିବନ୍‌ନୋତାମାନା; ଇୟାଉଣ୍ଡିଙ୍ଗ୍‌ ନାନୁ ନି ବାଦ୍‌ଲୁ ଲୋକାଙ୍ଗ୍‌ ମାରି ମି ଜିବନ୍‌ତି ବାଦ୍‌ଲୁ କୁଡ଼ାଦିଙ୍ଗ୍‌ ସିନା । 5 ତିଲାମା; ଇରିଙ୍ଗ୍‌ ନାନୁ ନି ୱାଲେ ମାନା; ନାନୁ ୱେଡ଼ାସୋନି ତରଟାନ୍‌ ନି କୁଟୁମ୍‌ଦିଙ୍ଗ୍‌ ତାନା ମାରି ୱେଡ଼ା ଆର୍‌ନି ତରଟାନ୍‌ ନିଙ୍ଗିଁ ଉଣ୍ଡା କିନା; 6 ନାନୁ ଡେବ୍‌ରା ତରନ୍‌ ଇନା, ଡ଼ିସ୍‌ସୋ ସିଦୁ ମାରି ଉଣେର୍‌ ତରିନ୍‌ ଇନା, ତେବା କିମା; ନା ମାରିନ୍‌କାଙ୍ଗ୍‌ ଆକରାନ୍‌ ମାରି ନା ଆଇଲିକାଙ୍ଗ୍ ଦୁନିଆଦି ଲୋଇରାନ୍‌ ତାସି ସିଦା; 7 ନା ଦର୍‌ତାନ୍‌ ୱେଙ୍ଗିଁନି ମାରି ଆମାୱାନିଙ୍ଗ୍‌ ନାନୁ ନିଜେଦି ଗୌରବ୍‌ତିଙ୍ଗ୍‌ ତିୟାର୍‌ କିତାମାନା, ଇୟାୱାଜା ୱିଜୁ ଲୋକାଙ୍ଗ୍‌ ତାଗା; ନାନୁ ୱାନିଙ୍ଗ୍‌ ତିୟାର୍‌ କିତା ମାନା; ହୁଁ, ନାନୁ ୱାନିଙ୍ଗ୍‌ ତିୟାର୍‌ କିତାମାନା ।

8 କାଣୁକୁ ମାନ୍‌ଜି କାଣା ମାରି ଗିତଣିଙ୍ଗ୍‌ ମାନ୍‌ଜି ବୋଇରା, ଇୟା ଲୋକାଙ୍ଗ୍‌ ସୋପ୍‌ସି ତାଗା । 9 ୱିଜୁ ଦେସ୍‌ତି ଲୋକୁ ଉଣ୍ଡାପିର୍‌ ମାରି କୁଡ଼ାଦି ଲୋକୁ ୱିଜେରେ ଉଣ୍ଡ୍ରେମାନୁ ଆପିର୍‌; ୱାରି ଲୋଇରାନ୍‌ ଏନ୍‌ ଇକା ଇଣ୍ଡ୍ରେଙ୍ଗ୍‌ ଆଟ୍‌ନାନ୍‌ ମାରି ପୁର୍ବେଦି ବିସୟ୍‌କୁ ମାଙ୍ଗିଁ ତର୍‌ତେଙ୍ଗ୍‌ ଆଟ୍‌ନାନ୍‌ ? ୱାର୍‌ ଦସ୍‌ସିଲିକା ଆନି ଉଣ୍ତିଙ୍ଗ୍‌ ନିଜେ ନିଜେଦି ସାକିରିଙ୍ଗ୍‌ ତାପିର୍‌; ମାରିବା ୱାର୍‌ ୱେନ୍‌ଜି ଇକା ସତ୍‌ ଇଜି ଇନିର୍‌ । 10 ସଦାପ୍ରବୁ ଇନାନ୍‌, "ମିର୍‌ ଏଣ୍ଡେସ୍‌ ନେସ୍‌ସି ମାମାନୁ ବିସ୍‌ବାସ୍‌ କିନାର୍‌ ମାରି ନାନୁ ଆକାନ୍‌ ନେ ଇଜି ବୁଜାନିଦେର୍‌, ଇୟାଉଣ୍ଡିଙ୍ଗ୍‌ ମିର୍‌ ନା ସାକି ମାରି ନା ମୋନ୍‌ତି ଦାସ୍‌," ନା ଆଗ୍‌ଡ଼ି ଆମାବା ମାପୁରୁ ତିୟାର୍‌ ଆଏତାନ୍‌, ମାରି ନା ୱେନ୍‌କାବା ଆଏନ୍‌ । 11 ନାନୁ, ନାନୁ ନେ ସଦାପ୍ରବୁ ମାରି ନାଙ୍ଗିଁ ଡ଼ିସ୍‌ତିଙ୍ଗ୍‌ ମାରି ରକିୟାକିନିକାନ୍‌ ସିଲେନ୍‌ । 12 ନାନୁ ତରପ୍‌ତା ମାନା, ନାନୁ ଉଦାର୍‌ କିତାମାନା ମାରି ନାନୁ ତର୍‌ତା ମାନା, ମାରି ମି ମାଣାନ୍‌ ଆମାବା ଆଇଦେସ୍‌ତି ଦେୟାମ୍‌ ସିଲେଣ୍ଡା ମାର୍ହାନ୍‌; ଇୟାଉଣ୍ଡିଙ୍ଗ୍‌ ସଦାପ୍ରବୁ ଇନାନ୍‌, ମିରୁ ନା ସାକି ମାରି ନାନୁ ନେ ମି ମାପୁରୁ । 13 "ହୁଁ, ଦିନ୍‌ତି ଆଗ୍‌ଡ଼ିରାନ୍‌ ନାନୁ ଆକାନ୍‌ ମାରି ନା କିୟୁଦାନ୍‌ ଉଦାର କିନିକାନ୍‌ ଏନ୍‌ ସିଲେନ୍‌; ନାନୁ ପାଣି କିନା, ମାରି ଏନ୍‌ ଆକା ଆଇକା କିନାନ୍‌ ?"

14 ମି ମୁକୁଡ଼ାକିନିକାନ୍‌, ଇସ୍ରାଏଲଦି ଦାର୍ମୁଦିୱାଜା ପ୍ରବୁ ଇୟା ମାଟା ଇନାନ୍‌, "ନାନୁ ମି ଉଣ୍ତିଙ୍ଗ୍‌ ବାବିଲତୁ ଲୋକୁ ପୋକତାମାନା ମାରି ନାନୁ ଆୟା ୱିଜେରିଙ୍ଗ୍‌ ଉରୁକ୍‌ତି ଲୋକା ୱାଜା ତାନା; କଲ୍‌ଦିୟରିଙ୍ଗ୍‌ ବା ୱାରି ୱେଡ଼ିକାଦି ଡଙ୍ଗାଁଦୁ ଆଡ଼୍‌ବିସ୍‌କିଜି ଆଡ଼୍‌ବିସ୍‌କିଜି ତାନିକା । 15 ନାନୁ ସଦାପ୍ରବୁ ମି ଦାର୍ମୁଦିୱାଜା, ଇସ୍ରାଏଲତି ତିଆର୍‌କିତିକାନ୍‌, ମି ରାଜା ।" 16 ଆମାକାନ୍‌ ସାମ୍‌ଦୁର୍‌ତୁ ସାରି ମାରି ନାଣ୍ଡ ଏରୁଦୁ ରାସ୍ତା କିନାନ୍‌; 17 ଆମାକାନ୍‌ ରତ୍‌ ମାରି ଗଡ଼ା, ସନ୍ୟରିଙ୍ଗ୍‌ ମାରି ସାକ୍ତିଦିୱାରିଙ୍ଗ୍‌ ସୋପ୍‌ସି ତାନାନ୍‌; ୱାର୍‌ ଅର୍‌ସେ ଆଡ୍‌ଗି ସୁଜ୍‌ଜି ମାରି ନିଙ୍ଗ୍‌ଏର୍‌ନି, ୱାର୍‌ ସିଲେଣ୍ଡ୍‌ ଆନାର୍‌ ମାରି ନାସ୍ଟୁ ୱାଜା ମାୟାନା ସୋନାର୍‌; ଆୟା ସଦାପ୍ରବୁ ଇୟା ମାଟା ଇନାନ୍‌; 18 "ମିରୁ ଆଗ୍‌ଡ଼ିରି ବିସୟ୍‌କୁ ୱିଜୁ ଏତ୍‌ କିମାଟ୍‌, ମାରି ପାଡ଼ିଇ ବିସୟ୍‌କୁ ୱିଜୁ ବିସାର୍‌ କିମାଟ୍‌ । 19 ସୁଡୁଦୁ, ନାନୁ ଉନ୍‌ଡ୍ରି ପୁନି ପାଣି କିନା; ଆକା ଇଲେଇ ଗାଜା ଆନାତ୍‌; ମିର୍‌ ଇନିକା ଆକା ନେସ୍‌ଇଦେର୍‌ ? ମାରି, ନାନୁ ଗରକାଣି ବାଟାବାଇଲୁଦୁ ସାରି ମାରି ସୁନ୍‌ସାନ୍‌ ବାଲିବାଟାବୁମିଦୁ ଗାଡା କିନା । 20 ବନୁଦି ଜାତୁଙ୍ଗ୍‌, ଗଲୁଙ୍ଗ୍‌ ମାରି ପଟିଙ୍ଗ୍‌ ମା ଗୌରବ୍‌ କିନେ; ଇରିଙ୍ଗ୍‌ ନାନୁ ନିଜେଦି ଆସ୍‌କିତି ଲୋକୁ ଉଣି ଉଣ୍ତିଙ୍ଗ୍‌ ଗରକାଣି ବାଟାଦୁ ଏରୁ ମାରି ବାଲିବାଟାଦି ବୁମିଦୁ ଗାଡା କିନା; 21 ଆୟା ଲୋକାଙ୍ଗ୍‌ ନାନୁ ନିଜେଦି ଦନ୍ୟବାଦ୍‌ କିନି ଉଣ୍ତିଙ୍ଗ୍‌ ତିୟାର୍‌ କିତାମାନା ।"

22 ମାରିବା ଏ ଜାକୁବ, ନିନୁ ମା ଲାକ୍‌ତୁ ପାର୍‌ତନା କିଇ; ଏ ଇସ୍ରାଏଲ, ନିନୁ ନା ବିସୟ୍‌ତାନ୍‌ ୱାନ୍ଦିତି ମାନି ।

23 ନିନୁ ନିଜେଦି ପୁଜାକିନି ମେଣ୍ଡା ନା ଲାକ୍‌ତୁ ତେଇ; ମାରିବା ନିନୁ ନିଜେଦି ପୁଜାଦାନ୍‌ ନାଙ୍ଗି ୱେଡ଼ିକା କିଇ । ମାପ୍‌ ପୁଜାଦି ଉଣ୍ତିଙ୍ଗ୍‌ ନିଙ୍ଗିଁ ଦାସ୍‌ପାଣି କିବିସ୍‌ କିଏପ୍‌; ମାରି ଦୁପ୍‌ଣି ଉଣ୍ତିଙ୍ଗ୍‌ ନିଙ୍ଗିଁ ୱାନ୍ଦିସ୍‌ କିଏପ୍‌ । 24 ନିନ୍‌ ୱେଣ୍ତିଦି ଡାବୁ ସିଜି ନା ଉଣ୍ତିଙ୍ଗ୍‌ ବାସ୍‌ନାଦି ଦୁପ୍‌ଣି କଡ଼ଇ, ମାରି ନି ପୁଜା ସିତିମାନି କଣ୍‌ୱେସ୍‌ଦାନ୍‌ ନାଙ୍ଗି ଉଟ୍‌ପିସ୍‌ କିଇ; ମାତର୍‌ ନିନ୍‌ ନିଜେଦି ପାପ୍‌ଦାନ୍‌ ନାଙ୍ଗି ଦାସ୍‌ପାଣି କିବିସ୍‌ କିତିମାନି, ନିନ୍‌ ନିଜେଦି ଆଇଆଇ ଦାର୍ମୁଦାନ୍‌ ନାଙ୍ଗି ୱାନ୍ଦିସ୍‌ କିତିମାନି । 25 ନାନୁ, ନାନ୍‌ ନେ ନି ଉଣ୍ତିଙ୍ଗ୍‌ ନି ସେଇ ପାଣି ୱିଜୁ ମେଡ଼୍‌ନିକା ମାରି ନି ପାପ୍‌ ୱିଜୁ ନାନୁ ଏତ୍‌ କିଏ । 26 ନାଙ୍ଗି ଏତ୍‌ କିବିସ୍‌ କିଆ; ମାଡ୍‌ ନିଜେ ନିଜେଦିଙ୍ଗ୍‌ ବିସାର୍‌ କିନିକା; ନିନ୍‌ ଦସ୍‌ସିଲିକା ଆନି ଉଣ୍ତିଙ୍ଗ୍‌ ନିଜେଦି ମାଟା ଇନ୍‌ଆ । 27 ମି ପୁର୍ବେଦି ବୁବା ପାପ୍‌ କିତାନ୍‌ ମାରି ମି ନାଣିମିରି ଲୋକୁ ନା ବିରୁଦ୍‌ତାନ୍‌ ଅଦାର୍ମୁ କିତାମାନାର୍‌ । 28 ଇୟାଉଣ୍ଡିଙ୍ଗ୍‌ ନାନୁ ପବିତ୍ର ବାଡିଦି ଅଦିପତିରିଙ୍ଗ୍‌ ଅପବିତ୍ର କିନିକା, ନାନୁ ଜାକୁବଦିଙ୍ଗ୍‌ ଆନାଦୁରିଆ ମାରି ଇସ୍ରାଏଲତିଙ୍ଗ୍ ଦଣ୍ତ୍‌ ସିନା ।