1 ଆମାୱାନିଙ୍ଗ୍‌ ମାପ୍‌ ଆସ୍‌ନାପ୍‌, ଇୟାୱାଜା ମା ଦାସ୍‌ଦିଙ୍ଗ୍‌, ଆମାୱାନି ଲାକ୍‌ତୁ ମା ତାଲା ୱେଡ଼ିକା, ଇୟାୱାଜା ମା ଆସ୍‌କିତି ଲୋକାଙ୍ଗ୍‌ ସୁଡୁଦୁ; ମାପ୍‌ ୱାରି ମୁସୁକୁ ନିଜେଦି ଆତ୍ମା ପୋକ୍‌ତା ମାନା; ୱାନ୍‌ ୱିଜୁ ଦେସ୍‌ତି ଲୋକା ମାଣାନ୍‌ ନିୟାଇ ବିସାର୍‌ ତାନାର୍‌ । 2 ୱାନ୍‌ ଆଉଲି ମାରି ନାଣ୍ଡ୍‌ ସେଉଡୁ କିଏନ୍‌, ମାରିବା ଅସାର୍‌ତି ପେରିଜାରିଦୁ ନିଜେଦି ମାଟା ୱେନିସ୍‌ଏନ୍‌ । 3 ୱାନ୍‌ କୋତ୍‌ନିନାଡ଼ାଦି ଲାଟା ରୁକୁଏନ୍‌ ମାରି କାସ୍‌ନି ଦିୱାଦି ସାଲିତା ନାପ୍‌ଏନ୍‌; ୱାନ୍‌ ସତ୍‌ଦାନ୍‌ ନିୟାଇ ବିସାର୍‌ ତାନାନ୍‌ । 4 ୱାନ୍‌ ଦୁନିଆଦୁ ନିୟାଇ ବିସାର୍‌ କିଇ ସାନ୍ଦି ଗାଡ଼ିଆ ମାରି ୱାନ୍ଦ୍‌ଏଣ୍ଡ୍‌ ଆନାନ୍‌; ମାରି, ସାମ୍‌ଦୁର ନାଣିମି ମାନି ଦେସ୍‌କୁ ୱାନି ନିୟମ୍‌ଦାନ୍‌ କାପ୍‌କିଜି ମାନ୍‌ଜିନେ । 5 ଆମାକାନ୍‌ ବାଦଡ଼ୱିଜୁ ତିଆର୍‌ କିଜି ସାକ୍‌ତାନ୍‌; ଆମାକାନ୍‌ ବୁମି ମାରି ଆକାୱିଜୁ ପାର୍‌ତନା; ଆମାକାନ୍‌ ଆୟା ମୁସୁକୁରି ୱିଜୁ ଲୋକାଙ୍ଗ୍‌ ନେଜ୍‌ନି ଗାଲି ସିନାନ୍‌ ମାରି ଆବେନୁ ବୁଲାନିସାଲାନି ଲୋକାଙ୍ଗ୍‌ ଜିବନ୍‌ ସିନାନ୍‌, ଆୟା ପ୍ରବୁ ମାପୁରୁ ଇୟା ମାଟା ଇନାନ୍‌; 6 "ନାନ୍‌ ସଦାପ୍ରବୁ, ଦାର୍ମୁଦାନ୍‌ ମିଙ୍ଗିଁ କୁକୁତା ମାନା ମାରି ମି କିୟୁ ଆସ୍‌ସି ମିଙ୍ଗିଁ ରକିୟା କିନା, ମାରି କାଣାଲୋକା କାଣୁକୁ ସୁଡ଼ୁନି ଉଣ୍ତିଙ୍ଗ୍‌, ଜଇଲ୍‌ଦାନ୍‌ ଲୋକାଙ୍ଗ୍‌ ମାରି ସିକାଟିଦୁ ବାସ୍‌ତିମାନି ଲୋକାଙ୍ଗ୍‌ ଜଇଲ୍‌ତାନ୍‌ ସପ୍‌ସି ତାନି ଉଣ୍ତିଙ୍ଗ୍‌, 7 ନାନ୍‌ ମିଙ୍ଗିଁ ଲୋକାଦି ନିୟମ୍‌ ୱାଜା ମାରି ଆଇ ଦେସ୍‌ତିଲୋକା ଦିୱା ୱାଜା କିଜି ନିଲ୍‌ପ୍‌ନା । 8 ନାନ୍‌ ସଦାପ୍ରବୁ: ଇକା ନା ଦର୍‌; ମାରି, ନାନ୍‌ ନିଜେଦି ଗୌରବ୍‍ ଆଇଲୋକାଙ୍ଗ୍‌, ମାରି ନିଜେଦି ଦନ୍ୟବାଦ୍‌ ତିଆର୍‌କିତି ବମେଆଙ୍ଗ୍‌ ସିଏ । 9 ସୁଡୁଦୁ, ଆଗ୍‌ଡ଼ିରି ମାଟେଙ୍ଗ୍‌ ସତ୍‌ ଆତାତ୍‌, ମାରି ନାନୁ ପୁନି ମାଟେଙ୍ଗ୍‌ ୱେର୍‌ନା; ଆୟା ୱିଜୁ ଆନି ଆଗ୍‌ଡ଼ି ଆୟା ବିସୟ୍‌ତାନ୍‌ ନାନ୍‌ ମିଙ୍ଗିଁ ୱେର୍‌ନା ।"

10 ଏ ସାମ୍‌ଦୁରତୁ ସନି ଲୋକ୍‌ ମାରି ସାମ୍‌ଦୁରତି ନାଣିମିମାନି ଲୋକୁ, ଏ ସାମ୍‌ଦୁରତି ନାଣିମିମାନି ୱିଜୁ ଦେସ୍‌କୁ ମାରି ଆବେନୁ ବାସାକିନି ଲୋକୁ, ମିର୍‌ ୱିଜେରେ ପ୍ରବୁଦି ଉଦେସ୍‌ତାନ୍‌ ପୁନି ପାଟା ମାରି ଦୁନିଆଦି ଲୋଇରାନ୍‌ ୱାନି ଦନ୍ୟବାଦ୍‌ କିଦୁ । 11 ବାଟାବୁମି ମାରି ଆବେଣି ଗାଡ଼୍‌କୁ ୱିଜୁ, କେଦାରତୁ ବାସାତିମାନି ନାର୍‌କୁ ୱିଜୁ ନାଣ୍ଡ୍‌ ଆଉଲି କିଦୁ; ସେଲାଦୁ ବାସାତିମାନି ଲୋକୁ ପାଟା ପାର୍‌ଦୁ, ଗରକାଣି ଟିପୁଦାନ୍‌ ୱାର୍‌ ନାଣ୍ଡ୍‌ ଆଉଲି ଆପିର୍‌ । 12 ୱାର୍‌ ପ୍ରବୁଦିଙ୍ଗ୍‌ ଗୌରବ୍‍ କିପିର୍‌ ମାରି ସାମ୍‌ଦୁର ନାଣିମି ମାନି ଲୋକୁ ୱାନି ପ୍ରସଂସା ପ୍ରଚାର୍‌ କିପିର୍‌ । 13 ପ୍ରବୁ ସାକ୍ତିଦିକାନ୍‌ ଆଜି ୱାନାନ୍‌; ୱାନ୍‌ ସାକ୍ତିଦି ନିୟାଇ ନିଜେଦି ତରପ୍‌ନାନ୍‌; ୱାନ୍‌ ପେରି ୱେୟୁଦାନ୍‌ ଆଉଲି କିନାନ୍‌, ହୁଁ, ୱାନ୍‌ ନାଣ୍ଡ୍‌ ଆଉଲି ଆନାର୍‌; ୱାନ୍‌ ନିଜେଦି ସାତ୍ରୁରି ବିରୁଦ୍‌ତାନ୍‌ ନିଜେଦି ପେରି ସାକ୍ତିଦି ପାଣି ତର୍‌ନାନ୍‌ ।

14 ନାନ୍‌ ନାଣ୍ତ ବେଡ଼ା ସାନ୍ଦି ଆଲେତା ମାନା; ନାନ୍‌ ତିର୍‌ ଆଜି ନିଜେଦିଙ୍ଗ୍‌ ସାନ୍ତି କିତାମାନା; ଇଲେଇ ନାନ୍‌ ଜନମ୍‌କିନି ଆଇମା ୱାଜା ଆଉଲି ଆନା; ନାନ୍‌ ଅର୍‌ସେନେ ନିରିଇ ପୁଣ୍ଡା ନେଜ୍‌ଜି ରେଲ୍‌ଜି ଡ଼ିସ୍‌ନା । 15 ନାନୁ ଗରକୁ ମାରି ଇସ୍ରି ଗରକାଙ୍ଗ୍‌ ଦ୍ୱଂସ କିନା ମାରି ଆବେଣି ଲାଟା ୱିଜୁ ୱାରିସ୍‌ କିନା; ମାରି, ନାନୁ ଗାଡେଆଙ୍ଗ୍‌ ସାମ୍‌ଦୁର୍‌ ମାରି ବାନ୍ଦୁଣି ଏରୁ ୱାରିସ୍‌ କିନା । 16 ମାରି, ମାପ୍‌ କାଣା ଲୋକାଙ୍ଗ୍‌ ୱାରି ନେସ୍‌ଇ ସାରି ସିଜି ତାନାପ୍‌; ଆମା ସାରି ୱାର୍‌ ନେସ୍‌ଏର୍‌, ଆୟା ୱିଜୁ ସାରିଦାନ୍‌ ୱାରିଙ୍ଗ୍‌ ବୁଲାକିନାପ୍‌; ମାପ୍‌ ୱାରି ଆଗ୍‌ଡ଼ି ସିକାଟିଙ୍ଗ୍‌ ଜାୟ୍‌ ମାରି ୱେକଣି ବାଡିଙ୍ଗ୍‌ ୱିଜୁ ସାଡ଼ୁକୁ କିନାପ୍‌ । ଇୟାୱିଜୁ ପାଣି କିଜି ମାପ୍‌ ୱାରିଙ୍ଗ୍‌ ଡ଼ିସ୍‌ଏ । 17 ଆମାକାର୍‌ ପତ୍‌ସି ରସ୍‌ତି ବମେଙ୍ଗା ଆସା କିନାର୍‌ ମାରି ସଞ୍ଚ୍‌ଦାନ୍‌ ତିୟାର୍‌ ଆତି ବମେଙ୍ଗା ମିର୍‌ ମା ମାପୁରୁ ଇଜି ଇନିଦେର୍‌, ୱାର୍‌ ଆଲେଜି ମାରି ନାଣ୍ଡ ସେମାର୍‌ ଆନାର୍‌ ।

18 ଏ ବଇରା ଲୋକୁ, ୱେଣ୍ଡ୍ରୁ; ଏ କାଣା ଲୋକୁ, ମିରୁ ସୁଡ଼ୁନି ଉଣ୍ତିଙ୍ଗ୍‌ ବେସ୍‌ତୁ । 19 ନା ଦାସ୍‌ତିଙ୍ଗ୍‌ ଡ଼ିସ୍‌ତିଙ୍ଗ୍‌ କାଣା ଏନ୍‌ ? ମାରି ନା କାବୁରୁଅନି ଦୁତ୍‌ ୱାଜା ବଇରା ଏନ୍‌ ? ନା ୱାଲେ ମିସାଜି ମାନ୍‌ଜିନି ଲୋକୁ ୱାଜା କାଣା ମାରି ପ୍ରବୁଦି ଦାସ୍‌ ୱାଜା କାଣା ଏନ୍‌ ? 20 ମିର୍‌ ନାଣ୍ଡ୍‌ ବିସୟ୍‌କୁ ସୁଡ଼ୁଜିନିଦେର୍‌, ମାତର୍‌ ମୋନ୍‌ ସିଏଜିନିଦେର୍‌; ୱାନି ଗିତଣିଙ୍ଗ୍‌ ମାନେ, ମାତର୍‌ ୱାନ୍‌ ୱେନ୍‌ଏନ୍‌ । 21 ପ୍ରବୁ ନିଜେଦି ଦାର୍ମୁ ଉଣ୍ତିଙ୍ଗ୍‌ ନିୟମ୍‌ଦିଙ୍ଗ୍‌ ପେରିକା ମାରି ଗୌରବ୍‌ କିଜି ୱେଡ଼ିକା ଆତାନ୍‌ । 22 ମାତର୍‌ ଇୟା ଲୋକୁ ଡଙ୍ଗାଆତା ମାନାର୍‌ ମାରି ୱାର୍‌ୱିଜେରେ ଗୁଟାଦୁ ଆର୍‌ତା ମାନାର୍‌ ମାରି ଜଇଲ୍‌ତୁ ତେବାତାମାନାର୍‌; ୱାର୍‌ ଡଙ୍ଗାଁକିତି ଦନ୍‌ ଆନି ଉଣ୍ତିଙ୍ଗ୍‌ ମାନାର୍‌, ମାରି ମୁକୁଡ଼ା କିନିକାନ୍‌ ଏନ୍‌ ସିଲେନ୍‌; ୱାର୍‌ ଡଙ୍ଗାକିତି ୱାଜା ଆନି ଉଣ୍ତିଙ୍ଗ୍‌ ମାନାର୍‌ ମାରି ଡ଼େପ୍‌ସି ସିଦାଟ୍‌ ଇଜି ୱେର୍‌ନି ଉଣ୍ତିଙ୍ଗ୍‌ ଏନ୍‌ ସିଲେନ୍‌ । 23 ଇୟା ମାଟାଦିଙ୍ଗ୍‌ ଆମାକାନ୍‌ ୱେନାନ୍‌ ମାରି ୱେନ୍‌ଜି ୱେନ୍‌କାରି ଦିନ୍‌ତି ଉଣ୍ତିଙ୍ଗ୍‌ ମନ୍‌ଦିୟାନ୍‌ ସିନାନ୍‌, ମି ଲୋଇରାନ୍‌ ଇୟାୱାଜା ଲୋକୁ ଏନ୍‌ ମାନାନ୍‌ ? 24 ଜାକୁବଙ୍ଗ୍‌ ଡଙ୍ଗାଁର୍‌ଏନ୍‌ ୱାଜା ଆନି ଉଣ୍ତିଙ୍ଗ୍‌ ମାରି ଇସ୍ରାଏଲତିଙ୍ଗ୍‌ ଡଙ୍ଗାଁକିନି ଲୋକା କିୟୁଦୁ ଏନ୍‌ ସାର୍ପେ କିତାନ୍‌ ? ଆମାୱାନି ବିରୁଦ୍‌ତାନ୍‌ ମାଡ୍‌ ପାପ୍‌ କିତାମାନାପ୍‌ ମାରି ଆମାୱାନି ସାରିଦୁ ଲୋକୁ ବୁଲାଦେଙ୍ଗ୍‌ ବଦା କିଏତାର୍‌, ମାରିବା ୱାର୍‌ ଆମା ନିୟମ୍‌ତିଙ୍ଗ୍ ମାନାଏତାର୍‌, ଆୟା ସଦାପ୍ରବୁ ଇନିକା ଇକା କିଏନ୍‌ ? 25 ଇୟାଉଣ୍ଡିଙ୍ଗ୍‌ ୱାନ୍‌ ୱାନି ମୁସୁକୁ ନିଜେଦି ରିସା ମାରି ଜୁଦ୍‌ ନାଣ୍ଡ୍‌ ସିତାନ୍‌; ଆବେନୁ ଆକା ସାରିବେଡ଼େତି ସିସୁ କାସ୍‌ସି ନିଙ୍ଗିଁତାତ୍‌, ମାତର୍‌ ୱାନ୍‌ ନେସ୍‌ଏତାନ୍‌; ମାରି, ସିସୁ ୱାନିଙ୍ଗ୍‌ କାଡିସ୍‌ କିତାତ୍‌, ମାରିବା ୱାନ୍‌ ମୋନ୍‌ଦିୟାନ୍‌ ସିଏତାନ୍‌ ।