1 "ଏ ସାମ୍‌ଦୁର୍‌ତି ନାଣିମିମାନି ଦେସ୍‌କୁ, ନା ଆଗ୍‌ଡ଼ି ଆଲେଜ ମାନ୍‌ଡ୍ରୁ ମାରି ୱେଣ୍ଡ୍ରୁ; ଲୋକୁ ପୁନି ପୁନି ବପୁ ପୟ୍‌ରି; ୱାର୍‌ ଲାକ୍‌ତୁ ୱାଜି ୱାର୍‌ଗିପିର୍‌; ମାଡ୍‌ ଉଣ୍ଡ୍ରେମାନୁ ଆଜି ବିସାର୍‌ କିନାଟ୍‌ । 2 ୱାନ୍‌ ଦାର୍ମୁଦାନ୍‌ ଆମାୱାନିଙ୍ଗ୍‌ ନିଜେଦି ପାଦ୍‌ ଲାକ୍‌ତୁ କୁକୁନାନ୍‌, ଇୟାୱାଜା ଅରେନ୍‌ ଲୋକୁଦିଙ୍ଗ୍‌ ୱେଡ଼ାସନି ତରଟାନ୍‌ ଏନ୍‌ ତିଆର୍‌ କିତାମାନାନ୍‌ ? ୱାନ୍‌ ୱିଜୁ ଦେସ୍‌ତି ଲୋକାଙ୍ଗ୍‌ ୱାନି ଆଗ୍‌ଡ଼ି ସାର୍ପେ କିନାନ୍‌ ମାରି ରାଜାରି ମୁସୁକୁ ୱାନିଙ୍ଗ୍‌ ଅଦିକାର୍‌ କିବିସ୍‌ନାର୍‌; ୱାନ୍‌ ୱାନି କାଣ୍ତାଦି ଆଗ୍‌ଡ଼ି ୱାରିଙ୍ଗ୍‌ ଦୁଡ଼ିଦି ୱାଜା ମାରି ୱାନି ଦନୁଦି ତିର୍‌ ଆଗ୍‌ଡ଼ି ପଡ଼ୁ ୱାଜା ସାର୍ପେ କିନାନ୍‌ । 3 ୱାନ୍‌ ୱାରି ୱେନ୍‌କା ପେରେନାନ୍‌, ଆମା ସାରିଦୁ ୱାନ୍‌ ସନ୍‌ଏନ୍‌, ଆୟା ସାରିଦୁ ନେ ୱାନ୍‌ ତିଲାଏଣ୍ତା ସନାନ୍‌ । 4 ପୁର୍ବେ କାଡ଼ାଦାନ୍‌ ମେମାର୍‌ଏତିଙ୍ଗ୍‌ ମେମାର୍‌ଏନ୍‌ କୁକ୍‌ସି ଏନ୍‌ ଇୟା ପାଣି ପୁରା କିତା ମାନାନ୍‌ ? ମାପ୍‌ ସଦାପ୍ରବୁ ଆରାମ୍‌, ମାରି ୱିଜ୍‌ନି କାଡ଼ା ସାନ୍ଦି ଲୋକା ୱାଲେ ମାନା, ନାନୁ ଆୟାକାନ୍‌ । 5 ସାମ୍‌ଦୁର୍‌ତି ନାଣିମିମାନି ଦେସ୍‌କୁ ସୁଡ଼ୁଜି ତିଲାତେ; ଦୁନିଆଦି ଗରକୁ ୱିଜୁ ଦୁଙ୍ଗିତେ; ୱାକୁ ଲାକ୍‌ତୁ ଆଜି ୱାତେ । 6 ୱାର୍‌ ୱିଜେରେ ନିଜେଦି ଲାକ୍‌ତୁରି ଲୋକାଙ୍ଗ୍‌ ସାହାଜ୍ୟ କିତାର୍‌ ମାରି ସାହାସ୍‌ ଆଦୁ ଇଜି ୱିଜେରେ ନିଜେଦି ତଡ଼ାନ୍‌କାଙ୍ଗ୍‌ ଇର୍ହାର୍‌ । 7 ଇୟାୱାଜା ମିସ୍‌ତୁରି ସୁନାରିଏନ୍‌ତିଙ୍ଗ୍‌ ୱାନିଙ୍ଗ୍‌ ସାସ୍‌ ସିତାନ୍‌ ମାରି ମୁଟୁଲାଦାନ୍‌ ସାମାନ୍‌ କିନି ଲୋକ୍‌ତିଙ୍ଗ୍‌ ମିସା କିନି ପାଣି ନେଗେଣ୍ଡ୍‌ ଆତାମାନାତ୍‌ ଇଜି, କାମାର୍‌ଏନ୍‌ତିଙ୍ଗ୍‌ ସାସ୍ ସିତାନ୍‌; ମାରି, ବମା ଏଣ୍ତେସ୍‌ ଦୁଙ୍ଗୁଏତ୍‌, ଇୟାଉଣ୍ଡିଙ୍ଗ୍‌ ୱାନ୍‌ କୁଟିଦାନ୍‌ ଡାଟ୍‌ କିତାନ୍‌ । 8 ମାତର୍‌ ଏ ମା ଦାସ୍‌ ଇସ୍ରାଏଲ, ମା ମନ୍‌ତି ଜାକୁବ, ମା ବନ୍ଧୁ ଅବ୍ରହାମତି କୁଟୁମ୍‌; 9 ମାପ୍‌ ନିଙ୍ଗିଁ ଆସ୍‌ସି ଦୁନିଆଦି ଗରକାଙ୍ଗ୍‌ ତାତାମାନାପ୍‌ ମାରି ଦୁନିଆଦି ସାନ୍ଦିଦାନ୍‌ ନିଙ୍ଗିଁ କୁକ୍‌ସି ଇର୍ହାମାନାପ୍‌, ନିନ୍‌ ମା ଦାସ୍‌, ମାପ୍‌ ନିଙ୍ଗିଁ ବାସେକିତା ମାନାପ୍‌ ମାରି ଆକ କିଏପ୍‌; 10 ନିନ୍‌ ତିଲାମା, ଇର୍ରିଙ୍ଗ୍‌ ମାପ୍‌ ନି ୱାଲେ ମାନାପ୍‌; ନିରାସ୍‌ ଆମା, ଇରିଙ୍ଗ୍‌ ନାନୁ ନି ମାପୁରୁ; ମାପ୍‌ ନିଙ୍ଗିଁ ବପୁ କିନାପ୍‌; ହୁଁ, ମାପ୍‌ ନିଙ୍ଗିଁ ସାହାଜ୍ୟ କିନାପ୍‌; ହୁଁ, ମାପ୍‌ ନିଜେଦି ଦାର୍ମୁଦିୱାଜା ଉଣେରି କିୟୁଦୁ ନିଙ୍ଗିଁ ଆସ୍‌ନାପ୍‌ । 11 ସୁଡ଼ୁଦୁ, ଆମାକାର୍‌ ମି ଉଣ୍ତିଙ୍ଗ୍‌ ରିସା ଆତାମାନାର୍‌, ୱାର୍‌ ୱିଜେରେ ସେମାର୍‌ ମାରି ବର୍‌ବାଦ୍‌ ଆନାର୍‌; ଆମାକାର୍‌ ମି ୱାଲେ ବିରଦ୍‌ କିନାର୍‌, ୱାର୍‌ ୱାରିକା ଆଜି ନାସ୍ଟୁ ଆନାର୍‌ । 12 ଆମାକାର୍‌ ମି ୱାଲେ ବିରଦ୍‌ କିନାର୍‌, ମିର୍‌ ୱାରିଙ୍ଗ୍ ପୋଇନିଦେର୍‌, ମାତର୍‌ ୱାରି ଉଦେସ୍‌ ପୟ୍‌ଇଦେର୍‌; ଆମାକାର୍‌ ମିୱାଲେ ଜୁଦ୍‌ କିନାର୍‌, ୱାର୍‌ ୱାରିକା ଆଜି ମାରାଗ୍‌ନାର୍‌ । 13 ଇରିଙ୍ଗ୍‌ ମାପ୍‌ ସଦାପ୍ରବୁ ମି ମାପୁରୁ, ମି ଉଣେରି କିୟୁଦୁ ଆସ୍‌ସି ମିଙ୍ଗିଁ ଇନାପ୍‌, ତିଲାମାଟ୍‌; ମାପ୍‌ ମିଙ୍ଗିଁ ସାହାଜ୍ୟ କିନାପ୍‌ । 14 ଏ ପିଡ଼ୁଉଲିଦି ୱାଜା ଜାକୁବ ମାରି ଏ ଇସ୍ରାଏଲତି ଲୋକୁ, ତିଲାମାଟ୍‌; ସଦାପ୍ରବୁ ଇଜିନାନ୍‌, ନାନୁ ମିଙ୍ଗିଁ ସାହାଜ୍ୟ କିନା" ମାରି ଇସ୍ରାଏଲଦି ଦାର୍ମୁଦିୱାଜା ମି ରକିୟା କିନିକାନ୍‌ । 15 "ସୁଡ଼ୁଦୁ, ନାନୁ ନିଙ୍ଗିଁ ଦାରାଦି କୁଡ଼ାମ୍‌ତିୱାଜା ଉନ୍‌ଡ୍ରି ପୁନି ପାସି ମାଟିସ୍‌ କିନି ସାଜୁ କିନା; ନିନ୍‌ ଗରକାଙ୍ଗ୍‌ ମାଟ୍‌ସି ଗୁଣ୍ତୁଗୁଣ୍ଡା କିନି ମାରି ଇସ୍ରି ଗରକାଙ୍ଗ୍‌ ପଟୁ ୱାଜା କିନି । 16 ମିର୍‌ ୱାରିଙ୍ଗ୍‌ ସେରିଇଦୁ ଇପ୍‌ତିଙ୍ଗା, ଗାଲି ୱାରିଙ୍ଗ୍‌ ଇପ୍‌ସି ଅନାତ୍ ମାରି ନାଣ୍ତଗାଲି ୱାଜି ୱାରିଙ୍ଗ୍‌ ସିନ୍‌ବିନ୍‌ କିନାତ୍‌; ମାରି, ମିରୁ ସଦାପ୍ରବୁଦି ଲାକ୍‌ତୁ ୱେଡ଼ିକା କିନିଦେର୍‌ ମାରି ଇସ୍ରାଏଲତି ପବିତ୍ର ମାପୁରୁଦିବାନୁ ଗୌରବ୍‌ କିନି । 17 ସିଲିସାତିକାର୍‌ ମାରି କାକୁର୍ତି ଲୋକୁ ଏରୁଦିଙ୍ଗ୍‌ ରେବାନାର୍‌, ମାତର୍‌ ଏରୁ ସିଲୁ, ଆବେନୁ ୱାରି ୱେତଲ୍‌ ଏର୍‌କିଦାନ୍‌ ୱାର୍‌ନାତ୍‌; ନାନୁ ସଦାପ୍ରବୁ ୱାରିଙ୍ଗ୍‌ ୱେର୍‌ନା, ନାନୁ ଇସ୍ରାଏଲତି ମାପୁରୁ ୱାରିଙ୍ଗ୍‌ ଡ଼ିସ୍‌ଏ । 18 ନାନୁ ମାରାକ୍‌ ସିଲି ଉଚାବାଡିଦୁ ଏରୁ ଗାଡ଼ା କିନା ମାରି ସାଦ୍‌ରାମ୍‌ ବାଡିଦୁ ଉସା ଏରୁ ସନିକା କିନା; ନାନୁ ଗରକାଣି ବାଟାଦୁ ସେରୁ ମାରି ୱାର୍‌ତି ବୁମିଦୁ ଜଲାଦିଏରୁ କିନା । 19 ନାନୁ ଗରକାଣି ବାଟାଦୁ ଏରସ, ସିଟିମ୍‌ ମାରି ବେତଲା ମାରି ନିୟୁମାରାକୁ ଉର୍‌ନା; ନାନୁ ବାଲିବାଟାଦି ବୁମିଦୁ ଦେବଦାରୁ, ତିଦର ମାରି ତାସୁର ମାରାକୁ ଅର୍‌ସେ ଉର୍‌ନା; 20 ଆବେନୁ ସଦାପ୍ରବୁଦି କିୟୁ ଇୟା ପାଣି କିତାମାନାତ୍‌ ମାରି ଇସ୍ରାଏଲତି ପବିତ୍ର ମାପୁରୁ ଇକା ତିୟାର୍‌ କିତାମାନାନ୍‌ ଇଜି ଲୋକୁ ଅର୍‌ସେ ସୁଡ଼ୁନାର୍‌ ମାରି ୱାର୍‌ଗିଜି ବୁଜାନାର୍‌ ।"

21 ପ୍ରବୁ ଇଜିନାନ୍‌, "ମିରୁ ନିଜେଦି ଜାଟି ୱେର୍‌ତୁ," ଜାକୁବଦି ରାଜା ଇଜିନାନ୍‌, ମିରୁ ନିଜେଦି ଟାଟ୍‌ତି ପାର୍‌ମାଣ୍‌ ୱିଜୁ ସପ୍‌ତୁ । 22 ୱାର୍‌ ଆୟାକା ୱିଜୁ ସପ୍‌ସି ଆମାକା ଆମାକା ଗଟାନାତ୍‌, ଆକା ମା ଲାକ୍‌ତୁ ୱେର୍‌ତୁ; ଆଗ୍‌ଡ଼ିରି ବିସୟ୍‌କୁ ଇନିକା, ଆକା ମିର୍‌ ୱେର୍‌ତୁ, ଆକା କିତିଙ୍ଗା, ମାପ୍‌ ୱାର୍‌ଗିଜି ଆବେଣି ମାଟା ନେସେତେଙ୍ଗ୍‌ ଆନାତ୍‌; ସିଲେତିଙ୍ଗ୍‌ ୱାଜିନି ଦିନ୍‌ତି ଗଟ୍‌ନା ମାଙ୍ଗିଁ ତର୍‌ତୁ । 23 ଇୟାୱେନ୍‌କା ଆମାକା ଆମାକା ଗଟାନାତ୍‌, ଆକା ୱେର୍‌ତୁ, ଆବେନୁ ମିରୁ ଯେ ମାପୁରୁଙ୍ଗୁଁ, ଇକା ମାପ୍‌ ନେସ୍‌ନାପ୍‌; ହୁଁ, ନେଗେଣ୍ଡ୍‌ କିଦୁ, ସେଇକା କିଦୁ, ଆବେନୁ ମାପ୍‌ ନିରାସ୍‌ ଆଜି ଅର୍‌ସେ ଆକା ସୁଡ଼ୁନାଟ୍‌ । 24 ସୁଡ଼ୁଦୁ, ମିରୁ ଇନିକା ସିଲେ ମାରି ମି ପାଣି ଇନିକା ବା ସିଲେ; ଆମା ଲୋକୁ ମିଙ୍ଗିଁ ନେଗିକା କିଜିନାନ୍, ୱାନ୍‌ କାଡ଼୍‌ନିକାନ୍‌ । 25 ନାନୁ ଡେବିରି ତରଟି ଅରେନ୍‌ୱାନିଙ୍ଗ୍‌ ନିକ୍‌ତାମାନା ମାରି ୱାନ୍‌ ୱାତିଙ୍ଗାଁ; ୱାନ୍‌ ୱେଡ଼ାସନି ତରଟାନ୍‌ ମା ଦରୁ କୁକୁନାନ୍‌; ୱାନ୍‌ କାତି ତିଆର୍‌ କିନି ମସ୍‌ଲା ମାରି କୁମାର୍‌ଏନ୍‌ ମାଟ୍‌ତିମାନି ସିକିଲା ୱାଜା ଦେସ୍‍ତି ସାଲା କିନିୱାରିଙ୍ଗ୍‌ ମାଟ୍‌ନାନ୍‌ । 26 ମାପ୍‌ ଏଣ୍ଡେସ୍‌ ନେସ୍‌ତେଙ୍ଗ୍‌ ଆଟ୍‌ନାଟ୍‌, ଇୟାଉଣ୍ଡିଙ୍ଗ୍‌ ଆରାମ୍‌ତାନ୍‌ ଏନ୍‌ ଇକା ୱେର୍‌ତା ମାନାନ୍‌ ? ମାରି, ୱାନ୍‌ ଦାର୍ମୁଦିକାନ୍‌ ଇଜି ଏଣ୍ତେସ୍‌ ମାଡ୍‌ ଇଣ୍ଡ୍ରେଙ୍ଗ୍‌ ଆଟ୍‌ନାଟ୍‌, ଇୟାଉଣ୍ଡିଙ୍ଗ୍‌ ଆଗ୍‌ଡ଼ିରାନ୍‌ ଏନ୍‌ ଇକା ୱେର୍‌ତାମାନାନ୍‌ ? ହୁଁ, ତର୍‌ତିକାନ୍‌ ଏନ୍‌ ସିଲେନ୍‌, ହୁଁ, ତର୍‌ନି ଲୋକୁ ଏନ୍‌ ସିଲେନ୍‌, ହୁଁ, ମି ମାଟା ୱେନି ଲୋକୁ ଏନ୍‌ ସିଲେନ୍‌ । 27 ମାଡ୍‌ ଆଗ୍‌ଡ଼ି ସିୟୋନଦିଙ୍ଗ୍‌ ଇନାଟ୍‌, "ସୁଡ଼ୁଦୁ, ୱାରିଙ୍ଗ୍‌ ସୁଡ଼ୁଦୁ, ମାରି ମାପ୍‌ ଜିରୁସାଲମଦୁ ସୁସମାଚାର୍‌ ତାନି ଉଣ୍ତିଙ୍ଗ୍‌ ଅରେନ୍‌ ଲକ୍‌ତିଙ୍ଗ୍‌ ସିନା" 28 ନାନୁ ସୁଡ଼ୁତି ୱାଲେ ଏନ୍‌ ସିଲେନ୍‌; ନାନୁ ୱେନ୍‌ବାତି ୱାଲେ ଜେ ପଦେକ୍‌ ୱେର୍‌ତେଙ୍ଗ୍‌ ଆଟ୍‌ନାନ୍‌, ୱାରି ମାଣାନ୍‌ ଇୟାୱାଜା ଅଜାକିନିକାନ୍‌ ଏନ୍‌ ସିଲେନ୍‌ । 29 ସୁଡୁଦୁ, ୱିଜେରେ, ୱାରି ପାଣିୱିଜୁ ବେକାର୍‌ ମାରି ତାଗ୍‌ଇ ଜିନିସ୍‌; ୱାରି ସଞ୍ଚ୍‌ଦାନ୍‌ ତିୟାର୍‌ଆତି ବମେଙ୍ଗ୍‌ ଗାଲି ମାରି ୱାରିକା ।