1 ଆମା ବାର୍ସେକ୍‌ ଅସୁର ଦେସ୍‌ତି ରାଜା ସର୍ଗୋନଦି ପୋକାତିମାନି ତର୍ତ୍ତାନ ସନ୍ୟରି ପେରିକାନ୍‌ ଅସ୍‌ଦଦତୁ ୱାଜି ୱାନି ବିରୁଦ୍‌ତାନ୍‌ ଜୁଦ୍‌ କିଜି ତାନିଙ୍ଗ୍‌ ଅଦିକାର୍‌ କିତାନ୍‌; 2 ଆୟା ବେଡ଼ାଦୁ ଆମସଦି ମାରିନ୍‌ ଜିସାଇୟଦି ମାଣାନ୍‌ ସଦାପ୍ରବୁ ଇୟା ମାଟା ଇର୍ହାନ୍‌, "ସାଙ୍ଗ୍‌ଆ, ମି ଜୁକିଦାନ୍‌ ବାସ୍ତା ଆଙ୍ଗିଁସକା କୁତୁଆ ମାରି ନି ପାଦାମ୍‌ତି ଜୁତେଙ୍ଗ୍‌ କୁତୁଆ," ଆବେନୁ ୱାନ୍‌ ଆକା କିଜି ଡୁମୁଡା ମାରି ୱାର୍‌ଇ ପାଦାମ୍‌ତାନ୍‌ ବୁଲାତାନ୍‌ । 3 ଆର୍‌ତିଙ୍ଗ୍‌ ସଦାପ୍ରବୁ ଇର୍ହାନ୍‌, "ମା ଦାସ୍‌ ଜିସାଇୟ ମିସର ମାରି କୁସ ଦେସ୍‌ ଉଣ୍ତିଙ୍ଗ୍‌ ଉନ୍‌ଡ୍ରି ସିନା ମାରି କାବା ଆନି ଜିନିସ୍‌ଦି ୱାଜା ଆନି ଉଣ୍ତିଙ୍ଗ୍‌ ଏଣ୍ଡେସ୍‌ ମୁଣ୍ଡ୍ରି ବାର୍ସେକ୍‌ ସାନ୍ଦି ଡୁମୁଡା ମାରି ୱାର୍‌ଇ ପାଦାମ୍‍ତାନ୍‌ ବୁଲାତାମାନାନ୍; 4 ଆୟାୱାଜା ଅସୁରଦି ରାଜା ମିସ୍ରିୟରି ସେମାର୍‌ ଉଣ୍ତିଙ୍ଗ୍‌ କଡ଼ର୍ ମାରି ଡକ୍ରା ଆନେଣ୍ଡା ମିସ୍ରିୟଦି ଜଇଲ୍‌ତୁ ମାର୍ହାର୍‌ ମାରି କୁସିୟଦୁ ମାନି ଲୋକାଙ୍ଗ୍‌ ଡୁମୁଡା, ୱାର୍‌ଇ ପାଦାମ୍‌ତାନ୍‌ ମାରି ୱେନ୍‌କାରି କୁରୁଗୁ ତର୍‌ସି ଅନାନ୍‌ । 5 ଆବେନୁ ଲୋକୁ ନିଜେଦି ବିସ୍‌ବାସ୍‌ତି ବୁମି କୁସ ଦେସ୍‌ ମାରି ନିଜେଦି କିତିମାନି ବଣ୍‌ପନ୍‌ ୱାଜା ମିସର ଉଣ୍ତିଙ୍ଗ୍‌ ନିରାସ୍‌ ମାରି ସେମାର୍‌ ଆନାନ୍‌ । 6 ମାରି, ଆୟା ନାଣ୍ତିଙ୍ଗ୍‌ ଇୟା ସାମ୍‌ଦୁର୍‌ତି ଲାକ୍‌ତୁରି ଲୋକୁ ଇନାର୍‌, ସୁଡ଼ୁଦୁ, ଅସୁର ରାଜାଦି ମାଣାନ୍ ଉଦାର୍‌ ପୋଇନି ଉଣ୍ତିଙ୍ଗ୍‌ ସାହାଜ୍ୟ ଉଣ୍ତିଙ୍ଗ୍‌ ଆମାବାନୁ ସର୍ହାପ୍‌, ମା ଆୟା ବିସ୍‌ବାସ୍‌ତି ଆସା ଇୟା ୱାଜା; ଆଦେଙ୍ଗ୍‌ ମାଡ୍‌ ବା ଏଣ୍ଡେସ୍‌ ଜିନାଟ୍‌ ?"