1 ନିଙ୍ଗ୍‌ଦୁ, ଜାୟ୍‌ ୱାଜା ଆଦୁ, ଇର୍ରିଙ୍ଗ୍‌ ମି ଜାୟ୍‌ ୱାନାତ୍‌ ମାରି ପ୍ରବୁଦି ଜାୟ୍‌ ମି ମୁସୁକୁ ୱାତାମାନାତ୍‌ । 2 ଇରିଙ୍ଗ୍‌, ସୁଡ଼ୁଦୁ, ସିକାଟି ଦୁନିଆଦିଙ୍ଗ୍‌ ମାରି ସିର୍‌ ସିକାଟି ଲୋକାଙ୍ଗ୍‌ ପିଡ଼ିକ୍‌ତା ମାନାତ୍‌; ମାତର୍‌ ମି ମୁସୁକୁ ସଦାପ୍ରବୁଦି ୱାନି ଜାୟ୍‌ ମି ମୁସୁକୁ ତରାଇଆନାତ୍‌ । 3 ମାରି, ଆଇ ଦେସ୍‌ତି ଲୋକୁ ମି ଜାୟ୍‌ ଲାକ୍‌ତୁ ମାରି ରାଜାର୍‌ ମି ୱେଡ଼ା ସନି ଜାୟ୍‌ ଲାକ୍‌ତୁ ୱାନାର୍‌ । 4 ମିରୁ ସାରିବେଡ଼େତି ସୁଡ଼ୁଦୁ, ୱାର୍‌ ୱିଜେରେ ଉଣ୍ଡ୍ରେବାନୁ ଉଣ୍ତାଜିନାର୍‌, ୱାର୍‌ ମି ଲାକ୍‌ତୁ ୱାଜିନାର୍‌; ମି କୋଡ଼ର୍‌ ଆକରାନ୍‌ ୱାନାର୍‌ ମାରି ମି ଆଇଲିକ୍‌ ୱାରିମାନୁ ଏତାଜି ୱାନାର୍‌ । 5 ନାସ୍ତିୱାଲେ ମିର୍‌ ଆକା ସୁଡ଼ୁଜି ଜାୟ୍‌ ଆନାତ୍‌ ମାରି ମି ଜିବନ୍‌ ଦକ୍‌ ଦକ୍‌ ଆଜି ୱେଡ଼ିକା ଆନାତ୍‌; ଇରିଙ୍ଗ୍‌ ସାମ୍‌ଦୁର୍‌ତି ଜିନିସ୍‌ ୱିଜୁ ମି ତରିନ୍‌ ସିଆଇ ଆନାତ୍‌, ଆଇ ଦେସ୍‌ତି ଲୋକା ସମ୍ପତି ୱିଜୁ ମି ଲାକ୍‌ତୁ ୱାନାତ୍‌ । 6 ନାଣ୍ତ ଉଟ୍‌କୁ, ମିଦିୟନ ମାରି ଐପାଦି ଦାପ୍ରେ ଉରୁକ୍‌ନି ଗଡ଼ା, ମିଙ୍ଗିଁ କେର୍‌ପ୍‌ନେ; ଆୟା ୱିଜୁ ସିବା ଦେସ୍‌ତାନ୍‌ ୱାନେ; ୱାର୍‌ ବାଙ୍ଗାରାମ୍‌, କୁନ୍ଦୁରୁ ତାନାର୍‌ ମାରି ପ୍ରବୁଦି ମାଟା ପ୍ରଚାର୍‌ କିନାର୍‌ । 7 କେଦାରଦି ୱିଜୁ ମେଣ୍ତେଙ୍ଗ୍‌ ମାନ୍ଦା ମି ଲାକ୍‌ତୁ ଉଣ୍ଡାନେ, ନବାୟୋତ୍‌ଦି ଗାଉଡ଼ୁଙ୍ଗ୍‌ ମି ସେବା କିନାର୍‌; ୱାକ୍‌ ମାନାଜି ନା ଜଜ୍ଞବେଦିଦି ମୁସୁକୁ ୱାନେ, ମାରି ନାନୁ ନିଜେଦି ଗୌରବ୍‌କିନି ଇଲୁଦିଙ୍ଗ୍‌ ଗୌରବ୍‌ କିନା । 8 ଦୁରିଦି ୱାଜା ମାରି ନିଜେ ନିଜେଦି ବାଡିଦୁ ଇମ୍‌ନି ପାଉରେଙ୍ଗ୍‌ ୱାଜା ଇମ୍‌ଜି ୱାଜିନେ ଜେ ଇୟାକାର୍‌ ଏର୍‌ ? 9 ସତ୍‌ନେ ସାମ୍‌ଦୁର୍‌ ଲୋଇ ମାନି ଦେସ୍‌କୁ ନାଙ୍ଗି କାପ୍‌କିନେ, ମାରି ତର୍ସିସ୍‌ଦି ଜାହାଜ୍‌କୁ ୱିଜୁ ଆଗ୍‌ଡ଼ି ଆଜି ସଲ୍‌ସି ନିଜେ ନିଜେଦି ୱାଲେ ୱାରି ୱେଣ୍ତି ମାରି ବାଙ୍ଗାରାମ୍‌ ଅସି, ମି କଡ଼୍‌ରିଙ୍ଗ୍‌ ଆକରାନ୍‌ ତାସି, ମି ମାପୁରୁ ପ୍ରବୁଦି ଦରୁ ଉଣ୍ତିଙ୍ଗ୍‌ ମାରି ଇସ୍ରାଏଲଦି ପବିତ୍ର ମାପୁରୁ ଉଣ୍ତିଙ୍ଗ୍‌ ୱାନାନ୍‌, ଇର୍ରିଙ୍ଗ୍‌ ୱାନ୍‌ ମିଙ୍ଗିଁ ଦୟା କିତାମାନାନ୍‌ । 10 ମାରି, ଆଇଦେସ୍‌ତି ଲୋକୁ ମି ଗଡେଙ୍ଗ୍‌ ତିଆର୍‌ କିନାର୍‌ ମାରି ୱାରି ରାଜାର୍ ମି ସେବା କିନାର୍‌; ଇର୍ରିଙ୍ଗ୍‌ ନାନ୍‌ ନିଜେଦି ରିସାଦାନ୍‌ ମିଙ୍ଗିଁ ଡାକ୍‌ତାମାନା, ମାତର୍‌ ନିଜେଦି ସାକାଦାନ୍‌ ନାନ୍‌ ମି ଉଣ୍ତିଙ୍ଗ୍‌ ଦୟା କିତାମାନାପ୍‌ । 11 ଆଇଦେସ୍‌ତି ଲୋକା ଦନ୍‌ ମାରି ତାନି ୱାଲେ ୱାରି ରାଜାର୍ ତରାଇଆଜି ଏଣ୍ଡେସ୍‌ ମି ଲାକ୍‌ତୁ ତାଆନାର୍‌, ଇୟାଉଣ୍ଡିଙ୍ଗ୍‌ ମି ଗାଡ଼୍‌ତି ସେର୍‌ଲେଙ୍ଗ୍‌ ୱିଜୁଦିନ୍‌ ରେଆନେ ମାନେ, ନାଡ଼ା ୱେଡ଼େ ଆୟା ୱିଜୁ କେରାଉଁ । 12 ସତ୍‌ନେ ଆୟା ଦେସ୍‌ ମାରି ରାଜି ନି ସେବା କିଏର୍‌, ଆକା ନାସ୍ଟୁ ଆନାତ୍‌, ହୁଁ, ଆୟା ଦେସ୍‌ ୱିଜୁ ଦ୍ୱଂସ ଆନାତ୍‌ । 13 ଲିବାନୋନଦି ଗୌରବ୍‌ ମି ଲାକ୍‌ତୁ ୱାନାତ୍‌, ଦେବଦାରୁ, ତିଦର, ତାଶୁର ମାରାକୁ ଉଣ୍ଡ୍ରେବାନୁ ଆଜି ନା ପବିତ୍ର ବାଡି ସୁନ୍ଦର୍‌ କିନି ଉଣ୍ତିଙ୍ଗ୍‌ ତାନାର୍‌, ମାରି ନାନ୍‌ ନିଜେଦି ପାଦାମ୍‌ତି ବାଡି ଗୌରବ୍‌ କିନା । 14 ମାରି, ଆମାକାର୍‌ ମିଙ୍ଗିଁ କାସ୍ଟୁ ସିନାର୍‌, ୱାରି କଡ଼ର୍‌ ମାଡ଼ିସ୍‌ କିଜି ମି ଲାକ୍‌ତୁ ୱାନାର୍‌ ମାରି ଆମାକାର୍‌ ମିଙ୍ଗିଁ କାଡ଼ିତାର୍‌, ୱାର୍‌ ୱିଜେରେ ମି ପାଦ୍‌ ଆଡ୍‌ଗି ମାଡ଼ିସ୍‌ କିନାର୍‌; ମାରି, ୱାର୍‌ ମିଙ୍ଗିଁ ସଦାପ୍ରବୁଦି ଗାଡ଼୍‌, ଇସ୍ରାଏଲଦି ପବିତ୍ର ସିୟୋନ ଇଜି ଇନାର୍‌ । 15 ମିରୁ ଲୋକା ମାଣାନ୍‌ ଡ଼ିସାତିମାନି ମାରି କାଡ଼ାଇ ଆତିଙ୍ଗ୍‌ ଏନ୍‌ବା ମି ଲାକ୍‌ତୁ ସିଜି ବୁଲାଏଜି ମାର୍ହାର୍‌, ଆୟା ବାଦ୍‌ଲୁ ନାନ୍‌ ମିଙ୍ଗିଁ ଏସେଙ୍ଗ୍‌ ୱିଜ୍‌ଇ ଗୌରବ୍‌ ମାରି ନାଣ୍ଡ୍‌ ଲୋକା ରିତିନିତି ୱେଡ଼ିକା ୱାଜା କିନା । 16 ମିରୁ ଆଇ ଦେସ୍‌ତି ଲୋକୁ ମାରି ରାଜାର୍‌ ଜାତୁନ୍‍ କିଜି ପସା କିନାର୍‌; ଆବେନୁ ନାନ୍‌ ଜେ ସଦାପ୍ରବୁ ମି ରକିୟାକିନିକାନ୍‌ ମାରି ମି ମୁକୁଡ଼ାକିନିକାନ୍‌, ଜାକୁବଦି ସାକ୍ତିଦିକାନ୍‌, ଇକା ମିରୁ ନେସ୍‌ନିଦେର୍‌ । 17 ନାନ୍‌ କଂସ୍‌ତି ବାଦ୍‌ଲୁ ବାଙ୍ଗାରାମ୍‌ ତାନା ମାରି ଲୁହାଦି ବାଦ୍‌ଲୁ ୱେଣ୍ତି, ୱେର୍‌ଗୁଦି ବାଦ୍‌ଲୁ କଂସ୍‌ ମାରି କାଲୁଦି ବାଦ୍‌ଲୁ ଲୁହା ତାନା; ମାରିବା, ନାନୁ ମି ପେରି ପଦ୍‌ତାନ୍‌ ସାନ୍ତିଦୁ ମାରି ମି ଅଦିକାର୍‌ତି ପଦ୍‌ତୁ ଦାର୍ମୁଦିଙ୍ଗ୍‌ ବାସେ କିନା । 18 ମି ଦେସ୍‌ତୁ ତାଗ୍‌ଇ ମାଟା ମାରି ମି ସାନ୍ଦିଦୁ ସାପିସ୍‌ କିନି ମାଟା ମାରି ୱେନାଇ ଆଏତ୍‌; ମାତର୍‌ ମିର୍‌ ନିଜେଦି କାତିଦି ଦରୁ ରକିୟା ମାରି ନିଜେଦି ଗାଡ଼୍‌ତି ସେର୍‌ଲାଦି ଦରୁ ପ୍ରସଂସା ଇଡ୍‌ନିଦେର୍‌ । 19 ୱେଡ଼େକା ୱେଡ଼ା ମି ଜାୟ୍‌ ମାରି ଆଏତ୍‌ନି, ମାରି ଜାୟ୍‌ ଉଣ୍ତିଙ୍ଗ୍‌ ଲେଜୁ ମିଙ୍ଗିଁ ଜାୟ୍‌ ସିଏତ୍‌ନି; ମାତର୍‌ ସଦାପ୍ରବୁ ମି ଉଣ୍ତିଙ୍ଗ୍‌ ଏସେଙ୍ଗ୍‌ ୱିଜ୍‌ଇଦିନ୍‌ ସାନ୍ଦି ଜାୟ୍‌ ମାରି ମି ମାପୁରୁ ମି ଗୌରବ୍‌ ୱାଜା ଆନାନ୍‌ । 20 ମି ୱେଡ଼ା ମାରି ସନ୍‌ଏଣ୍ଡା ଆନାତ୍‌, ମାରି ମି ଲେଜୁ ନିଜେଦିଙ୍ଗ୍‌ ମାନ୍‌ଏତ୍‌; ଇର୍ରିଙ୍ଗ୍‌ ସଦାପ୍ରବୁ ମି ଏସେଙ୍ଗ୍‌ ୱିଜ୍‌ଇଦିନ୍‌ ସାନ୍ଦି ଜାୟ୍‌ ୱାଜା ଆନାତ୍‌ ମାରି ମି ଆଡ଼୍‌ବାନି ଦିନ୍‌ ୱିଜ୍‌ନାତ୍‌ । 21 ମାରି ମି ଲୋକୁ ୱିଜେରେ ଦାର୍ମୁଦିକାର୍‌ ଆନାର୍‌, ୱାର୍‌ ଏସେଙ୍ଗ୍‌ ୱିଜ୍‌ଇଦିନ୍‌ ସାନ୍ଦି ଦେସ୍‌ ଅଦିକାର୍‌ କିନାର୍‌, ୱାର୍‌ ମା ଗୌରବ୍‌ଦି ମା ଉର୍‌ତି ମାରାନ୍‌ ମାରି ମା କିୟୁଦାନ୍‌ କିତି ପାଣି ଆକା । 22 ଉଣା ଲୋକୁ ଆଜାର୍‌ ଆଜାର୍‌ ଆନାର୍‌ ମାରି ବପୁ ସିଲି ଲୋକୁ ସାକ୍ତିଦି କୁଟୁମ୍‌ ଆନାନ୍‌; ନାନୁ ପ୍ରବୁ ଏସ୍ତିୱାଲେବା ଇକା ଦାପ୍ରେନେ ଗଟାକିନା ।