1 ଏ ନା ତଡ଼ାନ୍‌କୁ ନି ତାଙ୍ଗିଁକି, ଗୌରବ୍‌ମୟ୍‌ ପ୍ରବୁ ଜିସୁ କ୍ରିସ୍ତଦିମାନୁ ବିସ୍‌ବାସ୍‌ କିତିମାନିଙ୍ଗ୍‌ ମିର୍‍ ଲୋକା ସାମାନ୍‍ତାନ୍‌ ଆତ୍‍ରେ ଆରାନିକା ସୁଡ଼ୁଜି ପେରିକାନ୍‍ ଇସ୍ରିକାନ୍‍ କିମାଟ୍‌ । 2 ଅଡ଼୍‍ବିଦୁ, ମି ମିଟିଙ୍ଗ୍‌ଁତୁ ଅରେନ୍‌ ବାଙ୍ଗାରାମ୍‌ତି ୱେତରି ମାରି ନାଣ୍ତ୍‌ଦାରାଦି ଆଙ୍ଗିଁ ଆରାଜି ୱାତାମାନାନ୍‌ । ମାରି ଅରେନ୍‌ କାକୁର୍ତି ଲୋକ୍‌ ମାଇତିକା ନି କିଜିତି ଆଙ୍ଗିଁ ଆରାତା ୱାତାମାନାନ୍‌ । 3 ଜଦି ମିର୍‌ ନାଣ୍ତ୍‌ଦାରାଦି ଆଙ୍ଗିଁ ଆରାତି ଲୋକ୍‌ତିଙ୍ଗ୍‌ ନାଣ୍ତ୍‌ ସନ୍‌ମାନ୍‌ ତର୍‌ସି ଇନିଦେର୍‌, "ଇୟା ବାଡିଦୁ ବାସ୍‌ଆ," ମାତର୍‌ କାକୁର୍ତି ଲୋକ୍‌ତିଙ୍ଗ୍‌ ଇନିଦେର୍‌, "ଆବେନୁ ନିଲ୍‌ଆ, ମାରି ଆଡ୍‍ଗି ବାସ୍‌ଆ," 4 ଆର୍‌ତିଙ୍ଗ୍‌, ନିଜେ ନିଜେଦି ଲୋଇ ପେରିକାନ୍‌ ଇସ୍ରିକାନ୍‌ ୱାଜା ତିଆର୍‌ କିଜିନିଦେର୍‌ ମାରି ସତ୍‌ସିଲିକା ମୋନ୍‌ତୁ ଇଡ୍‍ଜି ଲୋକା ମକମ୍‌ସୁଡ଼ୁଦେଙ୍ଗ୍‌ ବିସାର୍‌ କିଜିନିଦେର୍‌ ।

5 ଏ ନା ଲାଡ୍‍ତି ତଡ଼ାନ୍‌କୁ ନି ତାଙ୍ଗିଁକି, ୱେନ୍‌ଡ୍ରୁ, ମାପୁରୁ ଇନିକା ଇୟା ଦୁନିଆଦି କାକୁର୍ତି ଲୋକାଙ୍ଗ୍‌ ବିସ୍‌ବାସ୍‌ୱାଜା ଦନ୍‌ତୁ ମାଜନ୍‌ ଆଦେଙ୍ଗ୍‌ ମାରି ୱାନି ସେବାକିନିୱାରିଙ୍ଗ୍‌ ଆମା ରାଜି ସିନା ଇଜି ମାଟା ସିତାମାନାନ୍‌, ଆବେଣି ଅଦିକାର୍‌ ଆନି ଉଣ୍ତିଙ୍ଗ୍‌ ଆସ୍‌କିଏନ୍‌ ? 6 ମାତର୍‌ ମିର୍‌ ସିଲିସାତିୱାରିଙ୍ଗ୍‌ ଅସନ୍‌ମାନ୍‌ କିଜିନିଦେର୍‌ ! ଆମାକାର୍‌ ମି ଉଣ୍ତିଙ୍ଗ୍‌ ତାଗ୍‌ଇପାଣି କିନାର୍‌ ମାରି ନ୍ୟାୟ୍‌କିନି ବାଡିଦୁ ରେଲ୍‌ଜି ଅନାର୍‌, ୱାର୍‌ ଏର୍‌ ? ୱାର୍‌ ଆୟା ମାଜନ୍‌ ଲୋକୁ । 7 ଆମା ଜିସୁ କ୍ରିସ୍ତଦି ଦରୁଦାନ୍‌ ମିର୍‌ ୱେଙ୍ଗିଁତି ମାନିଦେର୍‌, ୱାର୍‌ ଆୟା ଦର୍‌ତିଙ୍ଗ୍‌ ନିନ୍ଦା କିନାର୍‌ ।

8 "ମିର୍‌ ନିଜେଦି ଲାକ୍‌ତୁରି ଲୋକାଙ୍ଗ୍‌ ଜିବନ୍‌ନୋତିୱାଜା ଜିବନ୍‍ନୋଦୁ," ଦାର୍ମୁସାସ୍ତ୍ରଦୁ ରାସ୍‌ତିମାନି ମାପୁରୁଦି ରାଜିଦି ଇୟା ନିୟମ୍‌ ଜଦି ମାନାଜିନିଦେର୍‌, ଆର୍‌ତିଙ୍ଗ୍‌ ମିର୍‌ ଟିକ୍‌ ପାଣି କିଜିନିଦେର୍‌ । 9 ମାତର୍‌ ଜଦି ଆତ୍ରେ ସୁନ୍ଦର୍‌ ସୁଡ଼ୁଜି ଲୋକା ଉଣ୍ତିଙ୍ଗ୍‌ ମକମ୍‍ସୁଡ଼ୁଜି ବ୍ୟବ୍‌ହାର୍‌ କିଜିନିଦେର୍‌, ଆର୍‌ତିଙ୍ଗ୍‌ ମିର୍‌ ପାପ୍‌ କିଜିନିଦେର୍‌ ମାରି ନିୟମ୍‌ତି ଇସାବ୍‌ତାନ୍‌ ନିନ୍‌ ଅରେନ୍‌ ଦସି ଇଜି ପାର୍‌ମାଣ୍‌ ଆଜିନି । 10 ଆମା ଉନ୍‌ଡ୍ରି ମାଟା ମାନାଏନ୍‌, ୱାନ୍‌ ୱିଜୁ ମାଟାଦିଙ୍ଗ୍‌ ମାନାଏତିଙ୍ଗ୍‌ ପାପ୍‌ ଆଜି ଦଣ୍ତ୍‌ ପୟ୍‌ନାନ୍‌ । 11 ଇରିଙ୍ଗ୍‌ ମାପୁରୁ ମାଟା ୱେର୍‌ତାମାନାନ୍‌, "ଦାରିପାଣି କିମାଟ୍‌," ଆୟା ମାପୁରୁ ମାରି ଉନ୍‌ଡ୍ରି ମାଟା ୱେର୍‌ତାମାନାନ୍‌; "ଲୋକାଙ୍ଗ୍‌ ସାୟାମାର୍‌ଗା ଡାକ୍‌ମାଟ୍‌ ।" ମାରି, ମିର୍‌ ଦାରିପାଣି କିଏତିଙ୍ଗ୍‌ବା, ଜଦି ଲୋକାଙ୍ଗ୍‌ ସାୟାମାର୍‌ଗା ଡାକ୍‌ନିଦେର୍‌, ଆର୍‌ତିଙ୍ଗ୍‌ ନିନ୍‌ ଅରେନ୍‌ ନିୟମ୍‌ ମାନାଇଜି ଦସି ଇଜି ପାର୍‌ମାଣ୍‌ ଆଜିନି । 12 ଆମା ମୁକ୍‍ଡ଼ାନି ପାଣିକିନି ନିୟମ୍‌ତାନ୍‌ ମିର୍‌ ବିସାର୍‌ ଆନିଦେର୍‌, ଆକା ମି ୱାର୍‌ଗିଜିମାନୁ ମାରି ପାଣିଦାନ୍‌ ତର୍‌ତୁ । 13 ଇରିଙ୍ଗ୍‌ ଏନ୍‌ ଆଇୱାନିଙ୍ଗ୍‍ ଦୟା କିଏନ୍‌, ମାପୁରୁ ୱାନିଙ୍ଗ୍‌ ଦୟା କିଏନ୍‌ । ନ୍ୟାୟ୍‌ ବିସାର୍‌ ମୁସ୍‌କୁ ଦୟା ନେ ଜିଣାନାତ୍‌ ।

14 ଏ ନା ତଡ଼ାନ୍‌କୁ ନି ତାଙ୍ଗିଁକି, ଏନ୍‌ ଜଦି ଇନାନ୍‌, ନା ବିସ୍‌ବାସ୍‌ ମାନାତ୍‌, ମାତର୍‌ ପାଣିଦୁ ଆକା ତର୍‌ଏନ୍‌, ଆର୍‌ତିଙ୍ଗ୍‌ ୱାନି ମାଟାଦି ଇନି ଲାବ୍‌ ମାନାତ୍‌ ? ଇୟାୱାଜା ବିସ୍‌ବାସ୍‌ ୱାନିଙ୍ଗ୍‌ ରକିୟା କିଦେଙ୍ଗ୍‌ ଆଟ୍‌ନାତ୍‌ ନୋ ? 15 ଜଦି ଅରେନ୍‌ ତଡ଼ାନ୍‌ ସିଲିତିଙ୍ଗ୍‌ ତାଙ୍ଗିଁକି ୱାତିଗନ୍ଦା ନି ଉଣିତିନିକା ଉଣାମାନାତ୍‌, 16 ମାରି ମିର୍‌ ୱାନି ମେନ୍ଧଲ୍‍ ଦରକାର୍‍ ପୁରା କିଏଣ୍‌ଗା ଜଦି ଇନିଦେର୍‌, ମାପୁରୁ ମିଙ୍ଗିଁ ଆସିର୍ବାଦ୍‌ କିପିନ୍‌; ଉଣୁଜିତିନ୍‌ଞ୍ଜି ନେଗେନ୍‌ତାନ୍‌ ମାନ୍‌ଡ୍ରୁ, ମି ମାଟା ବେକାର୍‌ ଆଏତ୍‌ ନୋ ? 17 ବିସ୍‌ବାସ୍‌ ଟିକ୍‌ ଆୟାୱାଜା : ପାଣି ସିଲେତିଙ୍ଗ୍‌ କେବଲ୍‌ ବିସ୍‌ବାସ୍‌ ସାତିକା ।

18 ମାତର୍‌ ଏନ୍‌ ଆର୍‌ତିଙ୍ଗ୍‌ ଇନ୍‌ଡ୍ରେଙ୍ଗ୍‌ ଆଟ୍‌ନାନ୍‌, "ଅରେନ୍‌ୱାନି ବିସ୍‌ବାସ୍‌ ମାନାତ୍‌, ଆଇ ୱାନିନ୍ଦି ପାଣି ମାନାତ୍‌ ।" ଇୟା ବିସୟ୍‌ତାନ୍‌ ନାନ୍‌ ୱେର୍‌ନା, "ପାଣି ସିଲେଣ୍‌ଗା ଏମେୱାନି ବିସ୍‌ବାସ୍‌ ମାନ୍‌ଡ୍ରେଙ୍ଗ୍‌ ଆଟ୍‌ନାତ୍‌ ଇଜି ନାଙ୍ଗିଁ ପାର୍‌ମାଣ୍‌ ସିଦାଟ୍‌ । ନାନ୍‌ ପାଣିଦାନ୍‌ ନା ବିସ୍‌ବାସ୍‌ ମାନାତ୍‌ ଇଜି ପାର୍‌ମାଣ୍‌ ସିନା ।" 19 ମିର୍‌ ଇନିକା ବିସ୍‌ବାସ୍‌ କିଜିନିଦେର୍‌ ଜେ, କେବଲ୍‌ ଅରେନ୍‌ ମାତର୍‌ ମାପୁରୁ ମାନାନ୍‌ ? ନେଗିକା ! ଦୁବେଙ୍ଗ୍‌ ବା ଇୟାୱାଜା ବିସ୍‌ବାସ୍‌ କିନେ ମାରି ତିଲାଜି ତର୍‌ତର୍‌ ଆନେ । 20 ଏ ବୁଦିସିଲିଲୋକ୍‌ ! ପାଣି ଡ଼ିସ୍‌ସି ବିସ୍‌ବାସ୍‌ ଜେ ୱାରିକା, ଇୟାତାନି ପାର୍‌ମାଣ୍‌ ସୁଡ଼୍‌ଦେଙ୍ଗ୍‌ ମିର୍‌ ଇନିକା ବଦା କିଜିନିଦେର୍‌ ? 21 ମା ପୁର୍ବେଦି ବୁବା ଅବ୍ରାହାମ, ମାପୁରୁଦି ଆଗ୍‍ଡ଼ି ଏଣ୍ତେସ୍‌ ଦାର୍ମୁ ଆତା ମାର୍ହାନ୍‌ ? ୱାନ୍‌ ପାଣିଦାନ୍‌ ଦାର୍ମୁ ତରାୟ୍‌ଆତାନ୍‌, ଏସ୍ତିୱାଲେ ୱାନ୍‌ ୱାନି ମାରିସିଙ୍ଗ୍‌ ଇସ୍‌ହାକ୍‌ତିଙ୍ଗ୍‌ ବେଦି ମୁସ୍‌କୁ ସିତାନ୍‌ । 22 ମିର୍‌ ଇନିକା ବୁଜାଦେଙ୍ଗ୍‌ ଆଟ୍‌ଏଜିନିଦେର୍‌ ? ଅବ୍ରାହାମଦି ବିସ୍‌ବାସ୍‌, ପାଣିଦୁ ୱେଙ୍ଗିଁତାତ୍‍; ପାଣିଦାନ୍‌ ୱାନି ବିସ୍‌ବାସ୍‌ ପୁରା ଆତାତ୍‌ । 23 ଇୟାମାଣୁକୁ ଦାର୍ମୁସାସ୍ତ୍ରଦି ଇୟା ରାସାତି ବାକ୍ୟ ପୁରା ଆତାତ୍‌ : "ଅବ୍ରାହାମ ମାପୁରୁଙ୍ଗୁଁ ବିସ୍‌ବାସ୍‌ କିତାନ୍‌ ମାରି ୱାନି ବିସ୍‌ବାସ୍‌ ଉଣ୍ତିଙ୍ଗ୍‌ ମାପୁରୁଦି ଆଗ୍‌ଡ଼ି ୱାନ୍‌ ଦାର୍ମୁ ତରାୟାତାନ୍‌ ।" ମାରି ଅବ୍ରାହାମ ମାପୁରୁଦି ସଙ୍ଗ୍‍ ଇଜି ଦରୁ ପଇତାନ୍‌ । 24 ମାରି, ମିର୍‌ ବୁଜାଦେଙ୍ଗ୍‌ ଆଟ୍‌ନିଦେର୍‌ ଜେ, ଲୋକୁ ପାଣିଦାନ୍‌ ଦାର୍ମୁ ତର୍‌ନାନ୍‌, କେବଲ୍‌ ବିସ୍‌ବାସ୍‌ତାନ୍‌ ସିଲେ ।

25 ଆୟାୱାଜା ଦାରିପାଣିକିନି ରାହାବ ବା ପାଣିଦାନ୍‌ ଦାର୍ମୁଦିକାତ୍‌ ତରାୟ୍‌ ଆତାମାର୍‌ର୍ହାତ୍‌ । ୱାଦ୍‌ ଇସ୍ରାଏଲିୟତି ଡଙ୍ଗାଁରିଙ୍ଗ୍‌ ତେବାଦେଙ୍ଗ୍‍ ବାଡି ସିତାମାର୍ହାତ୍‌ ମାରି ଆଇ ଉନ୍‌ଡ୍ରି ସାରିଦାନ୍‌ ସନ୍‌ଡ୍ରେଙ୍ଗ୍‌ ସାକା କିତାମାର୍ହାତ୍‌ ।

26 ଆଦେଙ୍ଗ୍‌ ଆତ୍ମାଦିଙ୍ଗ୍‌ ଡ଼ିସ୍‌ସି ମେନ୍ଦଲ୍‌ ଏଣ୍ତେସ୍‌ ସାତିକା, ଆୟାୱାଜା ପାଣିଦିଙ୍ଗ୍‌ ଡ଼ିସ୍‌ସି ବିସ୍‌ବାସ୍‌ ବା ସାତିକା ।