ఆది 30

యాకోబు లాబానున్ పవిడ్ ఇసా జులుమ్ కలేకాద్

1 రాహేలు యాకోబున్ వలాడ్ తనే పిల్లక్ ఎర్సేట్ అనేకద్ ఒలుత్న తనే బాయిన్ పొదే అస తొతేద్. అద్ యాకోబునస్ "అనుఙ్ ఇంది పానలక్ పలం సియ్, తొద్ ఇంతే అన్ తిక్సతున్" ఇంతిన్ 2 యాకోబు రగాడ్ రాహేలున్ పొదే రగుఙ్ వత్తేద్. అమ్దు "ఇనుఙ్ ఇందిపానల పలం సియేకా దెయ్యం నే జగత్ అన్ అండాత?" ఇంతేంద్. 3 అదుఙి అద్ "అనే దాసీ బిల్హాను అండద్ తా, అద్నడ్ సీంతే అన్. అద్ అనుఙ్ సటి సినపరున్ ఎర్సద్. అ విదమడ్ అదున్ వలాడ్ అనుఙ్ గీన సినపర్ ఎద్దేర్" ఇస ఇడ్తిన్. 4 తనే దాసి బిల్హాను అమ్నున్ మాస సితిన్ యాకొబున్ అద్నడ్ కరబ్ పని కత్తెంద్. 5 అప్పుడ్ బిల్హాను ఇంది పనలక్ ఎత్న యాకోబున్ ఒకొ పొరకున్ ఎద్దిన్. 6 అప్పుడ్ రాహేలు "దెయ్యం అనుఙ్ తిర్పు తిర్సతేంద్. అమ్దు అనే వాపొయికద్ విత్న అనుఙ్ పొరకున్ దయ కత్తెంద్" ఇస అమ్నున్ "దాను" ఇస పేర్ ఇట్టిన్. 7 రాహేలున్ దాసి బిల్హాను మల్ల ఇంది పనలక్ ఎద్దిన్ యాకోబున్ వేన్కతా పొరకున్ ఎద్దిన్. 8 అప్పుడ్ రాహేలు "దెయ్యం కృపత గొట్టిత్ అనే బాయినడ్ ముడుత్ గేల్తన్" ఇస అమ్నున్ నప్తాలి ఇస పేర్ ఇట్టిన్. 9 లేయా తనుంఙ్ కన్పు ఇల్తేవ్ ఇస ఓలుత్న అనే దాసిన్ జిల్పాను యాకొబున్ మాసలఙ్ సితిన్. 10 జిల్పాను యాకోబున్ పొరకున్ ఎద్దిన్. 11 అప్పుడ్ లేయ్ "ఇద్ కిస్మతి తా" ఇస అమ్నున్ గాదు ఇస పేర్ ఇట్టిన్. 12 లేయానె దాసి జిల్పాను యాకోబున్ వెన్కతా పొరకున్ ఎద్దిన్. 13 లేయా "అన్ బాగ్యావన్. పిల్లక్ అన్ బాగ్యవతి ఇసవ్ తా" ఇస అమ్నున్ ఆసేరు అని ఇస పేర్ ఇటింన్. 14 గొదుమ పుసేక కాలముత్ రూబేను సేత్న కేనుత్ మంత్రమూలిక వేర్లున్ ఓలుత్న తనే అమ్మ లేయాకున్ కొత్న సితిన్. అప్పుడ్ రాహేలు "ఇనే కీకే కొత్న మంత్రమూలికల్లో కోన్ని అనుఙ్ సీయ్" ఇస లేయాన్ ఇంతిన్. 15 అదున్ అద్ "అనే మాసున్ ఎక్తివ్ తా, అద్ ఎరెదా? ఇండి అనే కీకేన్ కొత్తా మంత్రమూలికల్లో గీన వేల్సతీవ్" ఇస ఇంతిన్ అదుఙి రాహేలు "అనఙ్ ఎద్దే ఇనే కీకే కొత్తా మూలికల నిముత్తం ఇనే మాస్ ఈ సీంతే ఇన్నడ్ అన్సద్" ఇస ఇంతిన్. 16 ఆ సంతి యాకోబ్ కేన్తా వరేఙ్ లేయా అమ్నున్ ఎదుర్ సెత్న "నీవ్ అన్నతిన్ వరేఙ్ పజే. అనే కీకే కొత్తా మంత్రమూలికల్లో ఇన్ సుమ్మతన్" ఇస ఇడ్తిన్. అదుఙి అమ్దు ఆ సీంతే అద్నడ్ అండేద్. 17 దెయ్యం లేయానే మనవి విన్తేద్ అద్ ఇంది పనలక్ ఎత్ యాకోబున్ ఐదవ పొరకున్ ఎద్దిన్. 18 లేయా "అనే మాస్ అనే దాసిన్ సియేకదుఙ్ వలాడ్ దెయ్యం అనుఙ్ ప్రతిపలం దయ కత్తిన్" ఇస అమ్నున్ "ఇస్సాకారు" ఇస పేర్ ఇట్టిన్. 19 లేయా మల్ల ఇంది పనలక్ ఎద్దిన్ యాకోబున్ ఆరవ పొరకున్ ఎద్దిన్. 20 అప్పుడ్ లేయా "దెయ్యం అనుఙ్ సొబాత బహుమతి దయ కత్తిన్. అనే మాసున్ అర్గుర్ కీకెలున్ ఎద్దన్. అదుఙి అమ్దు ఇండితనా అన్నడ్ బత్కసద్" ఇస అమ్నున్ "జెబూలూను" ఇస పేర్ ఇట్టిన్. 21 మల్ల అద్ ఒకొ కొమ్మలున్ ఎత్న అదున్ దీనా ఇస పేర్ ఇట్టిన్. 22 దెయ్యం రాహేలున్ ఆదికత్, అద్ మనవి వింత్ అద్నె కన్పు సితిన్. 23 అప్పుడ్ అద్ ఇంది పనలక్ ఎద్దిన్ పొరకున్ ఎత్న "దెయ్యం అనే నింద పుస్తేద్" ఇంతిన్. 24 ఇంకా అద్ "యెహోవా అనుఙ్ ఇక్కొకొ పొరకున్ సిసాద్ ఇస" ఇంతిన్ అమ్నున్ "యోసేపు" ఇస పేర్ ఇట్టిన్.

యాకోబు లాబానున్ పవిడ్ ఇస జులుము కాలెకాద్

25 రాహేలు యోసేపు ఎద్ద వెన్కత్ మల్ల యాకోబున్ లాబానడ్ "అన్ పవిట్టిన్. అనే జగత్, అనే దేసముఙ్ మలయుత్ సేసత్. 26 అనే మససికున్, అనే సినపరున్ అనుఙ్ సియ్. అన్ సేసాతున్, ఔరున్ సటి ఇనుఙ్ సేవ కత్తన్. అన్ సేవ కత్తా విదమ్ ఇనుఙ్ ఒర్కి తా" ఇస ఇడ్తేద్. 27 అదుఙి లాబాను అమ్నున్ "ఇనే దయనడ్ అన్ పొదే అండె అనే గొట్టి విన్. ఇన్ బట్టి యెహోవా అన్ ఆసిర్వద్ సితేంద్ ఇస అన్ కొటొలెకాద్ ఒలుత్న ఒర్కిల్తాన్. 28 నీవ్ జీతం ఇంతే ఇస అన్నడ్ కరేయ్ ఇడ్, అద్ ఇనుఙ్ సిసాత్" ఇంతేంద్. 29 యాకోబ్ అమ్నున్ ఒలుత్న "అన్ ఇనుఙ్ ఎనఙ్ సేవ కత్తానో, ఇనే మంద అన్నతి ఎనఙ్ అన్నేవో అద్ ఇనుఙ్ ఒర్కిహ. 30 అన్ వరేఙ్ పేలె ఇనుఙ్ అండిన్ కొసెంమి, మరి అద్ కుబ్ పెర్రేత్ ఎద్దిన్. అన్ వత్నా జాగత్ యెహోవా ఇన్ ఆసిర్వద్ సితేంద్. మరి అన్ అనే స్వోత ఎల్లతరుఙ్ సటి ఎప్పుడి కమైయ్ కల్సతున్?" ఇంతేంద్. 31 అప్పుడ్ లాబాను "అన్ ఇనుఙ్ తనేన్ సిదున్?" ఇస వేల్తేద్. అదున్ యాకోబ్ "నీవ్ అనుఙ్ తనేని సినేమ్, నివ్ అనుఙ్ సటి అన్ ఇడ్తా విదమడ్ కత్తే, అన్ మల్ల ఇనే మందన్ మేప్సతున్ అదవున్ సోయ్ ఓల్సతున్. 32 ఈనెడ్ అన్ ఇనే మందలున్ పురా సేత్న ఒల్సత్ పొడలానేక మస్సలనేక ప్రతి గొర్రేనె కొవ్వేలున్ కరిక్ ప్రతి ఒక్కొదున్, మెకెలున్ మస్సలానెక, పొడల్ అనేక అదవున్ పక్కఙ్ కల్సతున్. అనట పురా అనుఙ్ జీతం ఎర్సవ్. 33 ఇండి తనా అనుఙ్ వేరెక జీతం వలాడ్ నీవ్ ఒలేఙ్ వరేఙ్ అనె న్యాయ అడ్గెకద్ అనుఙ్ సాక్స్యం ఎర్సద్. మెకే పొడలానెక మస్స తొసేట, గోర్రెనె కొవ్వె కరిక్ తొసేట అన్నతి అండే అన్ డొఙ్ కత్తన్ ఇస ఇడ్డేఙ్ వద్" ఇంతేంద్. 34 అదుఙి లాబాను "సొయ్ అండద్, ఇనే గొట్టి ప్రకారం ఎక్కద్" ఇంతేంద్. 35 ఆ దినం లాబాను సారలూ, మస్సలనేక బొకటకేవున్, పొడ మస్సలకేవున్ పటడ్ మెకెలున్ కొసేం తేలొడిక్ అనేక ప్రతి కీక్కొదున్ గొర్రేనె కొవ్వేలున్ కరికున్ పురాని పక్కఙ్ కత్ తనే కీకేలున్ సీయ్తేంద్. 36 తనుంఙ్ యాకొబ్ నడుమున్ మూది దిన దౌవ్ సేద్దేద్. లాబాను కలైత మందలున్ యాకోబ్ మేప్సనండద్. 37 యాకోబ్ గంగ రావి, బాదం, సాల మకులే సువ్వలున్ సుమ్ము ఆ సువ్వలున్ తెలొడి సాల్ కన్నకేన్నె అంతిఅంతి అదవున్ పొట్ పుస్తేర్. 38 మందలున్ ఈర ఉర్తేఙ్ కొత్తే అదవ్ సులు కట్టేకదున్ సటి అమ్దు ఒలివ సువ్వలున్ మందలున్ ఉనేఙ్ వరేకా కయ్యత్, ఈర్ గామేలత్, అదవున్ ముడట్ ఇట్టేద్ 39 అప్పుడ అ మంద అ సువ్వలున్ పెలె సులు కట్టుత్ సారలు, పొడమ్, మస్సలకేవ్ కొవ్వే అండ. 40 యాకోబ్ అ గొర్రేనె కొవ్వేలున్ పక్కఙ్ కత్ లాబానే మందత్ కరిక్ అదవ్వలే పక్కఙ్ మంద మొకమున్ తిప్పుత్ తనే మందలంతి లాబాను మందలంతి ఇడ్సేట అదవున్ పక్కఙ్ ఇట్టేంద్. 41 మందత్ సక్తి అనెకవ్ సూలు కట్టతే అదవ్ ఆ సువ్వల మంద సూలు కట్టెక విదనమ్ యాకోబున్ మందఙ్ ఎదుర్ సెత్న కాల్వత్ ఆ సూలున్ ఇట్టేంద్. 42 మంద కుబ్ దండిక్ ఎద్దే పేట్టేతె. ఆ విదమడ్ సక్తితా తొసేట లాబానుఙ్ ఎద్దేవ్ సక్తి అనేక యాకోబున్ వత్తేవ్. 43 అ విదమడ్ ఆ మన్కక్ కుబ్ పేర్రేత్ ఎద్దిన్ నేరయ్త మందలున్, దానదాసీలున్, ఒట్లున్ , గాడ్దిక్ గాయీకిలఙ్ ఎద్దేద్.