1 Lingani kuti Tate bakatida ngeludo gungapani, kuti tidan'we tiyi tibana beNdzimu; lebeswa ti ibo. Hango ayitotiziba ngobe ayizotongoziba Tate. 2 Badikani, tatjiba bana beNdzimu ngwenu; koga akwanhu kukaba patjena kuti towhobani, koga toziba kuti hapa ebon'wa towhoba tinga iye, ngobe towhowumbona sekwaali iko. 3 Bose banakugalabgwe ikoku muwunli banozwitjenapadza, sekwaakatjena iye.

4 Wose nhu unoyeta jinyo unanlandu wetjuluka nlayo; tjinya whutjuluka nlayo. 5 Moziba kuti wakahhila whodusa matjinyo, kakale muwunli akuna jinyo. 6 Akuna unogala muwunli unotjinya; akuna nhu unotjinya wakatongowumbona kene wunziba.

7 Ngawana dzangu, musitjengegwe nenhu. Unothama tjakalulama wakalulama, sa iye akalulama. 8 Unoyeta jinyo ndewemvanganyi; ngobe mvanganyi wakatjinya kubvisila kutangisa. Tjakayeta kuti Nkololo weNdzimu abon'we whuti awhopaladza mihingo yemvanganyi.

9 Akuna mwana weNdzimu unoyeta jinyo; ngobe mbumbiko yeNdzimu imuwunli, kakale haangatongoyendilambeli etjinya ngobe umwana weNdzimu. 10 Ndiyo zila yatinobona nayo kuti bana beNdzimu ndibapi, nebana bemvanganyi ndiboyani. usingayete tjakalulama kene iwhoyo usingade gamu lile haatamwana weNdzimu.

11 Iyawa ndiwo matama amakawha kubvisila kutangisa, kuti takafanila dana. 12 Tisinge Khayini waka eli wembi akabulaya nun'una uwe. Wakawumbulayilani? Ngobe zwiyeto zwizwe zwaka zwili zwibi, koga zwenun'una uwe zwaka zwakalulama.

13 Musitjename, makamu, kuti hango inomubenga. 14 ✝ Toziba kuti takabhuda mulufu tikangina mubupenyu, ngobe toda makamu edu. Usingade bamwe ugele mulufu. 15 Nhu unohema gamu lile umbulayi, moziba kuti akuna mbulayi unabutjilo gusingapele muwunli. 16 Nayeyi zila toziba kuti ludo ini. kuti wakapila butjilo gugwe eyetila iswi; naswi bo takafanila pila butjilo gwedu tiyetila makamu edu. 17 Koga hapa umwe nhu akafuma muhango ebona gamu lile lidziyila, koga esingaliwhile ngoni, ludo gweNdzimu gungaba munhu iwhoyo tjini? 18 Ngawana dzangu, tiside ngematama kene nezwilebo, koga ayideni ngezwiyeto nemulebeswa.

19 Nayeyi zila toziba kuti tibelebeswa, kakale tina kunyalala mumimoyo yedu mbeli kukwe 20 hapa mimoyo yedu itiwana nlandu; ngobe toziba kuti Ndzimu unkulu pamimoyo yedu, kakale unoziba kose. 21 Badikani, hapa mimoyo yedu isingatiwane nlandu, atitohla ma mbeli kweNdzimu, 22 kakale towamutjila kubva kuwunli kene ini tjatinokumbila, ngobe totjengeta milayo iye kakale toyeta zwinowun'hanhisa. 23 Kakale iwhoyu ndiwo nlayo uwe, kuti takafanila galamoyo muzina leNkololo uwe Yesu Khirisitu kakale tidane, sekwaakatilaya. 24 Bose banotjengeta milayo iye banogala muwunli, na iye unogala mubali. Ngentha yeMeya yaakatipa, toziba kuti unogala mutili.