1 Badikani, musigalemoyo imwe neyimwe meya, koga holesesani meya mubone kuti kene ndedzeNdzimu, ngobe balebesambeli bemanyepwa batjiwanda muhango. 2 Meya yeNdzimu moyibona nayeyi zila. Imwe neyimwe meya inobvuma kuti Yesu Khirisitu wakahha ali munyama, ndeyeNdzimu, 3 imwe neyimwe meya isingabvume Yesu ayita yeNdzimu. Ndiyo meya yetjita tjaKhirisitu, makawha kuti inohha, yatjibeyapo kale muhango.

4 Ngawana dzangu, imwi mubeNdzimu, kakale matjibakunda; ngobe umumuli unkulu pana iwhoyo umuhango. 5 Ndebehango, ndizo tjabanoleba ndetjehango, nehango inobawhilila. 6 Iswi tibeNdzimu. Unoziba Ndzimu unotiwhilila, koga usiweNdzimu atotiwhilila. Nayeyi zila toziba Meya yelebeswa nemeya yemanyepwa.

7 Badikani, ayidananeni, ngobe ludo ndegweNdzimu. Unaludo umwana weNdzimu kakale unoziba Ndzimu. 8 Usina ludo aatoziba Ndzimu, ngobe Ndzimu uludo. 9 Ndzimu wakalakidza ludo gugwe nezila iyeyi. Wakatuma Nkololo uwe uyega muhango, kuyetila kuti titjile ndiye. 10 Ndigo ludo igogu. akuta kuli kuti takada Ndzimu, koga iye wakatida akatumila Nkololo uwe kudze abe tjibhayilo tjesuka matjinyo edu.

11 Badikani, saku Ndzimu akatida, iswi bo takafanila dana. 12 Akuna nhu wakatongobona Ndzimu; koga hapa tidana, Ndzimu unogala mutili neludo gugwe goba nebuhhalo mutili.

13 Tinalebeswa kuti togala muwunli, na iye bo unogala mutili, ngobe wakatipa Meya iye. 14 Takabona kakale topa busupi kuti Tate bakatuma Nkololo wabo kuti awhoba Ntjidzi wehango. 15 Yani nayani unobvuma kuti Yesu uNkololo weNdzimu, Ndzimu unogala muwunli, na iye bo unogala muNdzimu. 16 Ndizo toziba kakale togalamoyo kuti Ndzimu unotida.

Ndzimu ludo, iwhoyo unogala muludo unogala muNdzimu, kakale Ndzimu unogala muwunli. 17 Nayiyeyi zila ludo goba nebuhhalo mutili, kuyetila kuti tibe nekuzwigalabgwe muhhuba letongewa, ngobe sekwaali, iswi takajalo bo muhango iyeyi. 18 Akuna luhlo muludo, koga ludo gwakapelela gotata luhlo. Ngobe hla koyendidzana nelangiwa, kakale unohla aazopelela muludo.

19 Toda, ngobe wakatida kutanga. 20 Hapa umwe eti, "Ndoda Ndzimu," koga ebenga gamu lile, unyepi; ngobe usingade gamu lile laanobona nemeho, aangade Ndzimu waasakatongobona. 21 Wakatipa nlayo iwhoyu. Yani nayani unoda Ndzimu wakafanila da gamu lile.