1 Koga kwakamuka balebesambeli bemanyepwa pakati kwebanhu, sekwakunowhobe nebadiyi bemanyepwa pakati kwenyu, banowhomuhhisila zwidiyo zwemanyepwa zwinokolomola ngezila yakasumbikala, belandula He wakabawangula, bezwihhisila paladziwa nekulibilidza. 2 Banjinji banowhotobela zila dzabo dzesazwibhata, nentha yabo zila yelebeswa inowholengudziwa. 3 Mupupa kwabo banowhomutshambidzila behingisa matama abo emanyepwa, kubvisila ntolo tongewa kwabo kwakabe kuhinga pakati kwabo, nepaladziwa kwabo kwakabalinda.

4 Ngobe hapa Ndzimu esakaletja batumwa pabakathama matjinyo, koga akabaposela mumoto akabasa mumimwina imuhhalima bakasungwa kudze kuti batjengetiwe kunoswika hhuba letongewa, 5 hapa asakaletja hango yantolo, koga akalondolodza Nowa, nsumikili wendulamo, anabamwe banhu balikutondeka, paakahhisa nkubila muhango yebanhu bakabe besingahle Ndzimu, 6 hapa kuli kuti wakatonga mizi-mikulu yekuSodoma neGomora ngekuyikolomola ikaba nlota, wakayithama ikabe tjilakidzilo tjekunowhoyetika kuna ibabo basingahle Ndzimu, 7 hapa akawangula Loti, nlume wakalulama, wakabe ewhisiwa zwinogwadza nesazwibhata kwebasina nlayo, 8 (ngobe iwhoyo nlume wakalulama, etjila pakati kwabo, hhuba nehhuba meya iye yakalulama yaka ihhala buyendasi ngentha yemihingo yebasina nlayo yaaka ebona neyaaka ewha), 9 ndizo He unoziba kuti unobatjidza tjini bakalulama mukulikwa, netjengeta basakalulama balimukulangiwa kudza kunoswika hhuba letongewa, 10 bukulu ibabo banotobela njemulo mbi dzetjiba kwembili belengudza tonga kweNdzimu.

Banozwiloba fuba kakale banozwibudza, abatohla tuka ibabo banagudzo, 11 koga batumwa bekudzimu, nekene bakasima kakale benasimba kubapinda, abatobapa ntongo wetukana kwabo mbeli kwaHe. 12 Koga ibaba, semhuka dzisingahingise bulubi, zwibumbgwa zwinoyeta zwisakumbula, dzakazwaligwa kuti dzibhakhwe dzibulawe, banotukana nekwendebo dzabasingawhisise, banowhobulawa bo semhuka, 13 bedziyidzika ngentha yebubi gwabo. Kubali hanha whuthama tjinohanhisa mbili masikati. Pabanoba bedla namwi banoba behanhisiwa zwabo nebupitipiti gwabo, ndizo bemutjinyidzila mazina enyu kakale bemubhatisa honi. 14 Bana meho ahhele bupombgwe, abatonyala netjinya. Banotungamilila ntome ibabo banameya isakadzikama. Mimoyo yabo yakadiyiwa pupa. Bana bakalongwa bhiso! 15 Bakabhuda muzila yakatambunuka bakalahika; bakatjitobela zila yaBhalamu, nkololo waBhowa, waka eda nlipo wethama kusakalulama, 16 koga wakatjemegwa nekakambe ngentha yejinyo lile; kakambe tjisingalebeleke tjakalebeleka ngewhi lenhu tjikamisa bupengo gwenlebesambeli.

17 Banhu ibaba bakafanana nemisenya isina vula nefulele inotutudziwa nedutu; kubali bakatjengetegwa bugalo muhhalima lakati zwi. 18 Ngobe, banozwikudza nematama asina nemano ose, banohingisa njemulo mbi dzembili tjebela banhu batjambosubvunuka muna ibabo banotjila butjilo gwetjinya. 19 Banobagadzabgwe lusununguko, koga ibo tjekwabo balanda bebupitipiti, ngobe nhu unlanda wekene ini tjinowunkulila. 20 Ngobe hapa kuli kuti hule kwetihha hambgwa dzehango nentha yeziba He Ntjidzi wedu Yesu Khirisitu, bekotjibhakhwa kakale nemisungo ibakulila, kobva kuti mamo ebupelo abo atjiyipa kupinda ekutanga. 21 Ngobe kobe kwakabe kuhine kubali kadzene bakabe besatongoziba zila yendulamo pana kuti hule kweyiziba befupatile nlayo wakayengemala wabakapiwa. 22 Kwakayetika kubali tjinolebgwa nekungulupeswa lelebeswa linoti, "Mbgwa inobgwilila ikanodla mapfo ayo," nekuti, "Ngulube yangudziwa inobgwilila ikanobumbuluka mudope."